Marcos 14 - Bíblia

Hjemahchinikankakyehitluna Jesus Ruylaxyawakapluna Piranapni

¹ Waneya hepi hohne mahatatka Páscoa hohne tshinkaluru rexyawakapa. Waleni pão myapjetu nijikolu hohne. Hiyáhoni tsru hixikatshinwa sacerdote-ne hiyrunu kasruklewaklerune hinanchitkaluru pirana hasruklewatatshine hijhahchinikanuta hanu rixa himukata preso hitakletluna Jesus yokwiruyma ruylaxyawakapluna.

² Waneya wla htshinatkana: — Seyni xye hi wkamhanu tsru hohne pchinika hmakanhiywakanupa yin-sejire.

Jesus Betânia Hapkapyawaka Piranapni

³ Waneya Jesus Betânia poktshi hwakanata, Simão-pji hijirohitutatshripji. Waneya hnikka pchinikna tunamta sato suxo waneylo pa stonha sotlu kamhikolo phamluhalo katsephal-potuko nardo-ha, myapjetkoto kwenur-potukni. Tupokhatanro waneya Jesus jiwu tuyokhatanro.

⁴ Waneya satkaka yineru wane hwakanatatshine hahkalo. Hi rukchikhihlenutlona wane tixyawaka hiyáhoni wane htshinkakna: — Haklu tshinanu t-saletachatlo?

⁵ Trezentos hohne kamrurtshi wenru pso yohnikamka tumukata hichankaletmaklo wala phamluhalo. Wale tiyirotemka tumukata henekletna hike mwikane. Hiyáhoni hyanhaklona wala suxo.

⁶ Seyni Jesus wan-tshina: — Hetachatanro. Haklu hikojwaklo twu suxo? Kihler-potuko tkamhiyno.

⁷ Hike mwikane ptowru hohneruka himwanu hixa tskalaya. Hikluktako haluk-hepixletna himukata hepixletna seyni hi ptowru hohneruka pimwanno hita.

⁸ Ptowru tumukatleru tkamhatka. Nmupnaknuhnapukawa phamluhalo tutakmanexinno, talpokomanetno nkapnaxikolupa.

⁹ Hichinikanru xyekaka: Psol-tshijneko kihle piranalu potuko hiwekkaklewatatshri pirana hinkaklexiko, tkamhaleru koxa hinkakletko, tuchinijikolupa wala.

Judas Kamnixyawaklu Jesus Piranapni

¹⁰ Waneya satu doze rixinri Jesus hasrukleru, Judas Iscariotes tshinkaluru yanwakatna tsru hixikatshinwa sacerdote-ne riynumsaxyawakapna hanu potu rixa hiphujetletanru Jesus wanna yehiya.

¹¹ Wale hjeminixkana poyikpotukna. Waneya tiyiro renekpiratluna Judas. Hiyáhoni rujhalu hiklukta hpoyaho hekhiretanna.

Jesus Páscoa Hohne Hichinijyawaka Piranapni

¹² Waneya mitshikanan-hohne pão myapjetu nijikolu hohne, carneiro-ne ruylajexinrina judeu-ne Páscoa hohne ruchinikjexinrina hohne, rasruklene hepomhalu Jesus: — Hanurhe walpokotanru Páscoa hohne nikle wnijyawakapa tshinanu.

¹³ Waneya Jesus wla tshina yokanretna hepi rasruklene: — Tsru poktshi hyanu. Waneya wane hyoptoxinri satu jeji hachhaji katsephalu hanikamtatshri. Homkahitanru.

¹⁴ Waneya hanupjiktako hjihlokamxinri jeji wane htshinanru kapjiru kasruklewakleru hepomhakjixhi: “Hanhe rawa hihruko hita, nasrukleneyma himukata niklexyawakapa Páscoa hohne tshinanupa?

¹⁵ Hiyáhoni wale hekhitanhi tsru hihruko pantshi hohwaka hwatshri, ralpokotka ptowruka hwiywaka. Wane halpokoxini.

¹⁶ Waneya hepi rasruklene tsru poktshi hyana. Waneya rukchikluna Jesus tshinyawaka pixka potuko. Waneya ralpokotluna hniklerupna Páscoa hohne kayno hnijyawakapna.

Jesus Hekhixyawaklu Hkamnitjeru Piranapni

¹⁷ Waneya rutshpojinixka Jesus rasrukleneyma hapokatka.

¹⁸ Hnikka pchinikna mesa yehi, Jesus wla tshina: — Halikaka ntshinhi, satu hewi hwatshri niminkaleru nkamnitjerupa.

¹⁹ Waneya wanna wamonuwpotuta waneya satkaka yinuwaka hepomhaletlu: — Hitlahe?

²⁰ Waneya Jesus hihitatka, wla htshina: — Nkamnitjerukni satu hixa doze-hi hitayma pão yotshmota prato-ya.

²¹ Klu tshinanu Jeji Whene tshinkaluru halikaka hipnanu Hoyakalu tokanu tshinyawaka pixka. Seyni hektu potlu wale jeji, Jeji Whene tshinkaluru kamnitatshri. Kihle potlu wale jeji hma matuxyawakanutka.

Jesus Hipninri Yapkakle Piranapni

²² Waneya hnikka pchinikna Jesus pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina: — Pão hyoptotanu. Xyeni hatatjewa nomane.

²³ Waneya copa stono hkochtsheka. Hpoyahnutlu Hoyakalu, rasruklene reneklu. Ptowruneka wale stono hirya.

²⁴ Waneya wla htshina: — Xyeni hatatjewa nohraha hmunanhalerni Hoyakalu yineruyma hixolune yine tshinanu hiyokkalurupa.

²⁵ Halikaka ntshinhi hikeklu hohne nuranutnaklu xye vinho-ha haté nurinri vinho-ha herotu Hoyakalu pohirewaxyawakaya hohnepa.

²⁶ Waneya satu chikale hchikaletna, ralimtna, himriji Monte Oliveiras tshinikowaka hyatkana.

Jesus Hinkaklu Pedro Wkatakluyakawa Piranapni

²⁷ Waneya Jesus wan-tshinna rasruklene: — Ptowrunekhi hiknokanno klu tshinanu Hoyakalu tokanu wan-tshina: “Nuylatanru carneiro-ne hinotatshri, waneya hiprane hipalatanu.”

²⁸ Seyni niwejinpatnaka, hita kosekanhi hixa Galileia tshijne nwaka.

²⁹ Waneya Pedro hihitlu, wla htshinru: — Hikeklu hohne nuknokanyi pixa yáholu pimrine ptowruneka hiknokanyi seyni hita hike.

³⁰ Waneya Jesus wan-tshinru Pedro: — Puchinikanru xye: Xye yetshno hepi kata hma yanumatkanuklunuwa patlapa, pixa map-kata pma mimatletanutu ptshinanno.

³¹ Seyni Pedro hipokananu wan-tshinatnaka: — Hike! Hikeklu hohne nma mimatletanutu ntshinanyi yáholu pixayma nupnanu. Waneya pimrine rasruklene ptowruneka koxa wane potuko htshinna.

Jesus Getsêmani Tshinikowaka Hyiywaka Piranapni

³² Waneya Jesus rasrukleneyma Getsêmani tshinikowaka hya. Waneya rapojinixkana Jesus wla tshinna: — Hixa hewitshi htuplatanu, nanjihohnetka pchinika.

³³ Waneya ranikna Pedro, Tiago, João koxa. Jesus yinuwaka wamonuwnalepotuta, hiyrun-koxa hsalewnahchinikanuta.

³⁴ Waneya wla htshina: — Niwejinri wamonuwpotuthonuka, hatatjewa nupnakastsitkani. Hewiphitshi, hislahanu.

³⁵ Waneya wane pnutejiji hya. Hyospaka tshiji rutspakhojita. Waneya ranjitlu Hoyakalu hpoyahoxinipa hkochpajyawakaplu wale papko salewaktshi.

³⁶ Waneya wane htshina hanjihohnereta: — Hirtshi! Nuru! Pixa ptowruko himukatatshriyi. Pkochripaxinno twu copa salewaktshi yehiya. Seyni hi hitako nalujyawaka pkamhanu seyni pixako palujyawaka pkamhanu halikaka.

³⁷ Waneya Jesus satokanwakatna rasruklene, retamtna himkatshine, waneya repomhalu Pedro: — Simão, pumkawhe? Hi he pa hora-kna himukata hislahleta hitayma?

³⁸ Hislahanru, hanjihohnetanu hmallixikowakanupa. Klu tshinanu jmeremkahi seyni mantshicha mmixkotni.

³⁹ Hiyrunuko pnute hya ranjihohnexyawakapa waneya htshinakanaxyawaka pixka hanjihohneruya htshinatnaka.

⁴⁰ Waneya hsatokatnaka rasruklene nwaka, retamtna himkatshine hi rumukata himrekhayhaletna. Hi rimatna hanu rixa hihretanruna Jesus.

⁴¹ Waneya map-kata rixinri rapkapinixka wla htshina: — Himkawhe hapnanuthe? Seyokatkani. Rapokpapkolutatka! Jeji Whene tshinkaluru hektuwaka kamhatshinemyo rutakkatka.

⁴² Hpalnanu, hayewa. Hetanu, tujrapa nkamnitjeru!

Jesus Kachixikowaka Piranapni

⁴³ Jesus yanumakanaxiniwa, satu doze rixinri rasruklene Judas tshinkaluru hapokatka. Waleymalune hixolune tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine hiyrun-koxa tsrukakalune judeu-ne yokanatanune. Yohlolewapi hiyrunu hahaje ranikna.

⁴⁴ Kamnitatshri satu rimaxikole runkakna, wla htshina: — Katukta namlutanu, walekatkani. Hkachitanru wale. Kihle kachre hixanru. Wan-hixatshri hanikanu.

⁴⁵ Waneya hajeyri rapokastsixinixkalu Jesus waneya wane htshina Judas: — Kasruklewakleru! Waneya ramlutlu.

⁴⁶ Waneya wan-rixa kachretluna Jesus. Hkachpotuthonukluna.

⁴⁷ Seyni satu wane hwakanatatshri kochpaklu hyohlolewapre. Waneya hkastakjepitlu tsru sacerdote towrer-jepi.

⁴⁸ Waneya Jesus wan-tshinna yine: — Ha hixa wkata hina yohlolewapikakayma, hahajekakayma koxa hkachixyawakapno? Hatatjewa katshowhurlanohe?

⁴⁹ Hixayma nwakanata ptowru hohneruka. Ptowru hohneruka Hoyakalupji nasrukjekanaxyahi. Seyni hi hkachitno. Seyni xye ptowruka hakanha Hoyakalu tokanu tshinyawaka hpoyahokajyawakapa tshinanu.

⁵⁰ Waneya rasruklene ptowruneka hichotatkalu, rasukatkana.

⁵¹ Waneya satu makluji mkatshri sama tsonu poyixikatshriwa homkahitlu Jesus. Waneya satkaka yineru yahot-kachretmaklu.

⁵² Seyni hkaspukamkalutlu. Rasuka malechkopiru.

Tsrukakalune Jemahchinikankakyehixyawaklu Jesus Piranapni

⁵³ Waneya ranikluna Jesus tsru sacerdote-pji nwaka. Wanepji rapatjexyana tsru hixikatshinwa sacerdote-ne, tsrukakalune judeu-ne, kasruklewaklerune hinanchitkaluru pirana hasruklewatatshin-koxa.

⁵⁴ Seyni Pedro hohatjini romkahyehixyalu Jesus. Waneya tsru sacerdote hiputre hjihloka. Tshitshmerostsi htuplata soldado-neyma roljiywakapa.

⁵⁵ Waneya tsru hixikatshinwa sacerdote-ne hiyrunu tsrukakalune jemahchinikankakatshine hijhamkalu satu rukolukanuwninri yáhole rumukata hiylalexyawakapluna. Seyni hike rukchikna.

⁵⁶ Hixolune yine weyawjechayehitlu Jesus seyni satkaka yineru pnuk-tshina. Seyni hi psokaklu pirana htshinna.

⁵⁷ Satkaka yineru yotunota hweyawyehitluna Jesus malechawaka htshinyehitluna, wla htshinna:

⁵⁸ — Wjemlu wla htshinyawaka: “Numukata nikatletanru xye Hoyakalupji yine kamhalerupji seyni map-hohne pnute, nkamhanutnaklu satu pantshi hi yinemyo kamhapjitanrupni.”

⁵⁹ Seyni wanepnawaka hi pixkakaklu htshinna.

⁶⁰ Waneya tsru sacerdote hixolune hanikajite yotunoxya waneya Jesus repomha: — Hi he puhitanru hjihyehixyayina?

⁶¹ Seyni Jesus hi hihita. Hike htshina. Waneyatnaka tsru sacerdote hepomhatnaklu: — Pixlahe Messias-yi, Hoyakalu himalwutkaluru whenyi?

⁶² Waneya Jesus hihitlu: — Hitakni. Hiyrunu hixa ptowrunekhi hetanru Jeji Whene, hohimkohi hoho hapokatshripa, Ptowru Himukatatshri Hoyakalu potukle sreta tuplatatshripni.

⁶³ Waneya tsru sacerdote hjihekannu tshinanu hsuskamkaluxnawa waneya wla htshina: — Hi wujhana pimrine hiphujtatatshine.

⁶⁴ Hjemluhe hektuwaka htshinanwakaxyawaklu Hoyakalu? Hiyáhoni kluhe hkahwaka hixa? Waneya ptowru yineru wan-tshina rujhalu rupniywaka.

⁶⁵ Waneya satkaka yineru yinuwaka hitskahjeretlu. Ruchyahojitluna. Rutsojtakluna waneya wla htshinruna: — Pmetanutu punkakletanu kathe hiylakyi. Hiyrunu rinotjen-koxa kachitlu, rutsojtakluna.

Pedro Wan-Tshina Hi Rimathetlu Jesus Piranapni

⁶⁶ Pedro honra tsru hixikatshriwa sacerdote hiputre rawakanata waneya sato tsru sacerdote towrero hapokatka.

⁶⁷ Tetlu Pedro tshitshmero rolkakanata. Tyopukhatlu waneya wla ttshinru: — Pix-koxa Jesus Nazaré hajeruymalutyi.

⁶⁸ Seyni wale weyawata wla htshina: — Hi nimathetlu. Hi nimata klukta ptshina. Hiyáhoni hiputu hichpajyawakle hya waneyatka hyanumatatka patlapa.

⁶⁹ Waneya towretshro hexinitnaklu Pedro tyinuwaka hinkakletna wanestsi hwakanatatshine: — Xye jeji wannaymalutni.

⁷⁰ Seyni Pedro weyawatatnaka hiyrunuko hi wannaymalutno htshina. Waneya xekoyaka wane hwakanatatshine wan-tshinatnaklu: — Ha hi wkahekyi, wimatyi pixa satu wannaymalutyi klu tshinanu pixa Galileia hajer-koxyi.

⁷¹ Waneya Pedro yinuwaka hektuwaka tshinrexnawa waneya wla htshina: — Halikaka hi nimathetlu jeji katu pirana punkakno.

⁷² Waneklukawa patlapa yanumatatnaka. Waneya Pedro hichinikaplu Jesus tokanu htshinakanaxyawaklu: “Hepi kata hma yanumatkanuklunuwa patlapa, pixa map-kata hi pimathetno ptshinanu.” Hiyáhoni Pedro kaheknanuwahchinikanutatka waneya hyinuwaka tshiyahlepotuta.