Marcos 13 - Bíblia

¹ Waneya Hoyakalupji ruchpajinixka Jesus, satu rasrukleru wan-tshinru: — Kasruklewakleru, hi pa hihlenukananru pantshikaka hiyrunu hsotlutekaka.

² Waneya Jesus hihita: — Petluhe xyepjikaka tsrukakalu? Ptowruka petleru hkoptalhako hi satukna sotlu hwahohokakanu.

Salewaktshi, Kojwaklewatatshri Piranapni

³ Jesus tuplakanata Oliveiras mriji Hoyakalupji nwaka hyihata. Waneya Pedro, Tiago, João, hiyrunu André hepomhalu wannapkani:

⁴ — Hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka?

⁵ Waneya Jesus yinuwaka hasrukletna, wla htshinna: — Xakoka hike yokwijetanhi.

⁶ Klu tshinanu hixo hiphujewnanu hita hiwakaya wla tshinatshripa, “Hita Cristo-no” waneya hixopni hyokwijetanunna.

⁷ Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.

⁸ Pa neruymako hyahotkakanu satu neruko. Pa tshijneko yahotanru satupni. Hix-poktshi hiyolikanu. Natshipni. Xyekaka mturu tshino yinuwakle pixkalutni.

⁹ — Wane ntshinhi ptowru potuka hmuphujewnaknukawa klu tshinanu preso hitakko, hjemahchinikanyehitko hiyrunu hanjihohnewakapjikaka hkotshipjexiko. Tsru hixikatshinwa hiyrunu tsrukakalune nwaka hanikko hita hiwaka tshinanu halikaka pirana hpohixyawakapa.

¹⁰ Hmapokkanuhnapukawa hnikawnahohnexyawaka ralukko kihle piranalu potuko hiwekkaklewatatshri pirana hinkajyawakapna ptowru neruka.

¹¹ Hkachitkoklunpatka hi hkojwakahchinikanutanu hanu htshin-hihretanu hjihyehitjen-yehi hapojinipa. Klu tshinanu rapojinpapkopatka hyanumaxyawaka Hoyakalu henektokanutanhi. Klu tshinanu hyanumaxiniklunupa hi hixako htshinrepni seyni Hoyakalu Hiwejikaluru henektokanutanhi.

¹² Moltshine himolene potuko ruylajixkakanna. Waneko pixka rixan-koxna hirtshine, hwuhenene ruylajixanna. Haté hwuhenene kamnitanna rurna ruylaxyawakapluna.

¹³ Ptowru yineru hahnanutanhi hixa hita tshinanu seyni poyehi halixleru haté hmahle papko, riwekanu.

Tsru Salewaktshi Piranapni

¹⁴ Jesus pnute hya hinkakleta, wla htshina: — Hexinpatkalu tsru jhamleru mkahwajikowakanu yehi hixa himathethatatshinhi xako himatjemanru. Waneyakni katukta Judeia hwanu, rasukanu, hipjita hyanu.

¹⁵ Katukta teno pantshi hohowaka hwanu, hi hserpikanu rejnunkate pantshi hajeru rawapyawakapa.

¹⁶ Katukta campo hwanu, hi hsatkapanu hipji himkalu rawapyawakapa.

¹⁷ Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni!

¹⁸ Hoyakalu hanjitanu katshikleru papkolu hma makanhiywakanupa xyekaka.

¹⁹ Klu tshinanu tshiji rawanu salewaktshi tsrupotpákolu. Hikeklu hohne wane pixkalutu salewaktshi rawapa xye tshijne yinuwajikolukananuko haté xawakni hiyrun-koxa wane pixkalutu salewaktshi hikeklu hohne hakanhanutnaka.

²⁰ Seyni Hoyakalu hma masatkanumkalu salewnikolu papkopa, hikemka hiwekanu. Seyni Hoyakalu nuretanune tshinanu, hmasatanru salewaktshi klu papkopa.

²¹ — Waneya waneklu papkopa yineru wane htshinini: “Hetanu, hewitkalu Messias!”, ho wane htshinini: “Hawlalu! ” — hi halixanru.

²² Klu tshinanu hixolune Messias minjene hiyrun-koxa Hoyakalu tokanu hinkakletatshine minjene hakanhanu hiyakolukaka hiyrunu himyekaklewatatshri kamhatshine hyokwijexyawakapna yine. Rumukatkamka haté Hoyakalu nurrene hyokwijetanu.

²³ Hiyáhoni hislahanru. Wane ntshinhi ptowru potuka hmuphujewnaknukawa.

Jeji Whene Hininri Piranapni

²⁴ Waneya Jesus wan-tshina: — Xye hohne hajeru salewaktshi nikawninipa, waneklutka rutshpokanu tkatshi, hi katalupni ksuru,

²⁵ katahirine tenhohne hijrujini, hiyrun-koxa tenhohne hajerkaka hiyolikkako.

²⁶ Waneya Jeji Whene retanna, hohimkohi rapojini royaknuyma tsru pixkonuyma koxa.

²⁷ Hoyakalu yokanatanna htowrene hiwejikalune tenhohne hajene ptowru sretako rapatjexyawakapna Hoyakalu nurrene ptowru sreta tshiji hichpajikatshine.

Figueira Piranapni

²⁸ Waneya Jesus wan-tshina: — Xawakni himatanru figueira pirana hasrujyawakhi. Hyinuwaka hiptsheklesurexinixka hiyrun-koxa rerotewapluxinixka, himatlu hi howukatkalu mhalu.

²⁹ Wane koxa rixanu, hexinpatkalu xyekaka himatanutka hi howukatkalu rakanhiywakapa.

³⁰ Hichinikanru xye: Xyekaka wan-hixa hiphujewnaletanu hmupnaknuhnapukawna xawakni mupnakanewa.

³¹ Tenhohne tshij-koxa nikawnanu seyni ntokanu hikeklu nikawnanu.

³² — Hike himatlu wale hohne hi hipapkoluko rakanhiywakapa xyekaka. Hiwejikalune Hoyakalu towrene tenhohne hajene hi himatlu, hi Whentshiko himatlu seyni Hirtshi tsonupka himatlu.

³³ Hiyáhoni hislahinri [hiyrunu hanjihohnetanu] klu tshinanu hixa hi himatlu rapojinri hohnepa.

³⁴ Satu jeji howuka yatshripa pixka rixanu. Hmayaknuhnapukawa htowutna htowrerune, rapsatna kamrurewjetatshine kamrurtshi hiyrun-koxa htowutlu hiphapto hislahatshri ruslahyawakaplu.

³⁵ Hiyáhoni hislahanu klu tshinanu hi himata hiklu hsatkapanu kapjiru. Ho kayiplahe ho hanikaj-yetshnoplahe ho hohistsiplahe ho yetshpotukawaplahe.

³⁶ Chinpotukawa runinipa hma mapyehixyawakanuphi himkatshinhi.

³⁷ Ntshinyawakhi ptowrunekhi ntshinanru: Halikak-potu hislahinri!