Marcos 12 - Bíblia

Hsana Kamrurewaxikatshine Piranapni

¹ Waneya Jesus yinuwaka hinkakletanna satu yapkaklu pirana. Waneya wla htshina: — Satu jeji yinuwaka hitakletlu uva-cha. Rutaklu h-cerca-tetlu. Hjitotlu uva katsrekjexikowaka vinho-ha hkamhiywakapa hiyrunu satu tenopjiru uva-cha hislahikowakapji hkamha. Waneya hitaklucha hislahatshine renekamta. Waneya pa tshijne howuka hya.

² Waneya rapokpapkoluxinixka ramikolu, jitakleru yokanatatkalu satu htowreru hitaklucha hislahatshine nwaka hyoptoxyawakaplu psoji jitaklerunupa.

³ Seyni hitaklucha hislahatshine kachitlu htowreru hkotshipjetluna. Hike manikamtkatuko hsatkakna.

⁴ Waneya jitakleru yokanatatnaklu satu htowreru. Wan-rixa kamhalpatetanruna. Hkotshipjejiwutluna.

⁵ Hiyrunuko satu hyokanata wane seyni hitaklucha hislahatshine hiylatanru. Waneko pixka rixyana pimrine htowutanune. Pimrinni ruylakkanna pimrinni ruylatkanna.

⁶ Xawakni jitakleru satupkalu hituru ramotleru rimwa hyokanatanrupa. Seyni wanepnawaka hyokanatlu. Klu tshinanu ruchinikanuwata: “Wale hetko hkahwakpiratanna.”

⁷ Seyni hitaklucha hislahatshine hiynumsakaka wannakakluko: “Ha xyekni jitakleru whene. Hayeri wuylateru. Waneyakni hitaklu hixanpatka!”

⁸ Hiyáhoni hkachitluna hiwhene. Ruylatanruna. Ruknokluna himane kahnete hitaklu mwiywakanu.

⁹ Waneya Jesus hepomha, wla htshina: — Klunerhe hkamhanu jitakleru? Runinipa ruylatanunna hitaklucha hislahatshine. Waneya renkapanna pimrineko hitaklucha hislahatshine.

¹⁰ Hi he het-yonhatlo Hoyakalu tokanu wla tshinatshri: “Sotlu kpanawaklerune malukkotu rikahwakluna hepixlewatatshri potukni, psolupjiko poyehitatshrini wale.

¹¹ Tsru Hixikatshriwa kamhalerni hiyáhoni kihle potuklu hixa hetanuya!”

¹² Waneya tsru hixikatshinwa judeu-ne himatlu Jesus kamnitna yapkaklu piranaya runkakletleru. Waneya ralukluna preso rutajyawakluna Jesus. Seyni hpikna hixolune yine. Wale tshinanu ruchotluna. Waneya hyatkana.

Repomhaluna Jesus Ho Tiyiro Raluka Wenutletluna César Ho Hike Piranapni

¹³ Waneya fariseu-ne hasruklene hyokananwakatluna Jesus Herodes-neyma. Ralukluna rumlukanuxyawakluna.

¹⁴ Rapokna waneya wla htshinna: — Kasruklewakleru, wimatyi pixa halikaka pirana ptshinjeta, pasrukjetkoxna. Hiyrun-koxa hi yine hixachatatshineko yokwityi seyni pasrukle halikakalutu Hoyakalu halujyawaka pirana. Hiyáhoni punkakanwu, pkahwaklu minanchitkotlahe psoji tiyiro wenejyawaklu César Roma hajeru tsru hixikatshriwa? Ho wenejerhe ho hike?

¹⁵ Seyni Jesus himathetlu hixachatatshine rixyawakna waneya ruhitna, wla htshinna: — Haklu tshinanu haluk-himlukantaletno? Hanikanro tiyiro proji. Netanro.

¹⁶ Waneya raniklona. Waneya Jesus hepomhana: — Katu yaholunhe kat-hiwaknihe toproji hwatshri? Waneya wanna hihitlu: — César-ni.

¹⁷ Hiyáhoni Jesus wla tshina: — Henekanru César kluneruktapni César-nu henekanru hiyrun-koxa kluneruktapni Hoyakalunu waleko henekanru. Waneya rimyekna ruhixya tshinanna.

Repomhaluna Yineru Hiwejyawakpatnaka Piranapni

¹⁸ Satkaka saduceu hipnatshri mkahwak-hiwekletkane yanwakatlu Jesus repomhiywakapluna, wla htshinruna:

¹⁹ — Kasruklewakleru, Moisés-ni yonaxyawu xye hiykolu pirana: “Jeji hipninipa ruknokamtanro hhanunro mwuhenetoko, walen-moleko hnunrotanro waleni hnunro. Twuhenewatanu hipnatshrini whenene hkahwajikowakapna.”

²⁰ Wan-rixa hahijewakatanna sete-ni jejinni moletkakatshinni. Tsrujruni hnunrowatni rupnana mwuhenetniko.

²¹ Waneya repurni hnunrotlo hipnahnurutatshro. Rupnana mwuhenetniko. Waneko pixka rixa hahijewakatan-koxa satni mapa rixinrini.

²² Sete-ni hnunrotlewatni walaluto suxo. Rupnanna mwuhenenniko. Waneya suxni koxa hipnanatka.

²³ Xawakni hiwejikalur-hohnepatnaka, hanurpatkanhe thanuru? Klu tshinanu ptowruneko hnunrotaplo.

²⁴ Waneya Jesus hihita: — Hixa pupjetatshinhi! Klu tshinanu hi himatlu Hoyakalu pirana, hi koxa himatlu Hoyakalu himukatlewle.

²⁵ Seyni tujra hohne hiweklu yoptotatshinepa hi hnunrowatanu hiyrunu hi hhanuruwatanna. Hiwejikalune Hoyakalu towrene tenhohne hajene pixka rixanutkana.

²⁶ Hi he het-yonhatlu Moisés yonreru hipnatshine hiwekkajikowaka pirana tshinanu? Klu tshinanu kamxihiru ruchpakmeroxini Moisés-ni wla htshinyawaka Tsru Hixikatshriwa Hoyakalu pirana: “Abraão-ni Hoyakalutno, Isaque-ni Hoyakalutno, Jacó-ni Hoyakalut-koxno.”

²⁷ Hoyakalu hiwekatshine Hoyakalutni seyni hi miwekkanepa Hoyakalutni. Hixa psol-potuka pupjexya!

Yokanruru Hijhakalur-potu Piranapni

²⁸ Satu kasruklewakleru hinanchitkaluru pirana hasruklewatatshri wane hwakanata. Hyijnakotlu hiynumsakaklu. Retlu kihle hihre rixlu Jesus. Wale tshinanu wla htshin-hepomhaleta: — Kasruklewakleru, kluner-pothe hijhakaluru ptowru Moisés yonreru yonatkaluruya?

²⁹ Waneya Jesus hihita: — Xyekni yokanruru hijhakalur-potu: “Hyijnakotanu Israel-nerune! Tsru Hixikatshriwa Woyakalute, wale tsonni Hoyakalu.

³⁰ “Pamotanru Tsru Hixikatshriwa Poyakalute psol-potuko pajiya, psol-potuko piwejinriya, psol-potuko pmixkonuya, psol-potuko pihchinikanuya.”

³¹ Yokanruru hepi rixinri wla htshin-yonhata: “Pamotanru pimwastsitanru pamoxnawakwa pixka.” Hi rawa satu yokanruru xyekaka yohnik-hijhakaluru.

³² Hiyáhoni kasruklewakleru hinanchitkaluru pirana hasruklewatatshri wan-tshinru Jesus: — Wanekni, kasruklewakleru! Ptshinyawaka halikakni. Seyokni Hoyakalu, hikeni wane pnuterutu.

³³ Wamoxyawaklu Hoyakalu psol-potuko wajiya, psol-potuko wihchinikanuya, psol-potuko wmixkonuya hiyrun-koxa wamoxyawakna wimwastsirene wamoxnawakwa pixka ptowru henekachlu yoxikkalurupa hiyrunu henekachaxikolu Hoyakalu tshinanupa yohnikayalutni.

³⁴ Rexinixka Jesus tshipetkaluru yonatkaluru tokantshi hasruklewatatshri hihitlu rimatkalnuyma, waneya wla htshinru: — Pixa hi howukyi Hoyakalu pohirewaxyawakaya. Wane pnute hike tsru hchinikanutka repomhiywakatkana.

Cristo Davi-ni Klopichni Rixyawaka Piranapni

³⁵ Waneya Jesus hasrujinixkana Hoyakalupjiya repomha, wla htshinna: — Hanhe rumukata wla tshinretna kasruklewaklerune hinanchitkaluru pirana hasruklewatatshine, Messias klopichnixkani Davi-ni?

³⁶ Davi-ni potuko wan-tshina yonawahlo papel-mta, Hoyakalu Hiwejikaluru pixkonu tshinanu, wla htshina: “Tsru Hixikatshriwa Hoyakalu wan-tshinno Tsru Hixikatshriwa: Ptuplatanu npotukle sreta, haté pkamnitjene pijixi hpuko nutakanu.”

³⁷ Davi-ni potuko Rutsrukate tshinru Hoyakalu hiyáhoni hanhe rumukata Davi-ni klopicha hixleta Messias? Yine hixolune yijnakotlu Jesus hasrujyawakna poyikowluyma.

Jesus Hikolujyawakna Hinanchitkaluru Pirana Hasruklewatatshine Piranapni

³⁸ Waneya Jesus wan-tshinjetna yine: — Xakoka kasruklewaklerune hinanchitkaluru pirana hasruklewatatshine. Rukchikhihlenutluna mkatshri hopowalu riyanyawakna. Rukchikhihlenutluna ralijikowakna hixowaka hetanu.

³⁹ Rujhaluna tuplawaka tsru hixikatshriwa tuplaxyawaka htuplaxyawakna ptowru hanjihohnewakapjiya hiyrun-koxa ralukpotutluna kihleru niklur-yeh-potuko htuplaxyawakna.

⁴⁰ Hipnahnurutatshroni hkonahejnunkatetna. Wanepnawaka hohanjihohneru rixjetna kihleru hkahwajikolupna. Seyni wanepnawaka tsru hapnokatlu rixkona.

Hipnahnurutatshro Hike Mwikato Henekachle Piranapni

⁴¹ Waneya Jesus tuplakanata Hoyakalupjiya. Hoyakalu henekachal-pajistsi htuplata. Ruslahakanatna yine henekachal-paji hitak-tiyirotetatshine. Hixo phurune tsru tiyiro hitaka.

⁴² Waneya wan-rixakanatawana hipnahnurutatshro hike mwikato hapokamtatka. Tutaklo tiyiro seyojiji hepi proji.

⁴³ Hiyáhoni Jesus tomhana rasruklene. Waneya wla htshinna: — Halikaka wane ntshinhi, twu hipnahnurutatshro hike mwikato pimrine yohnik-tutaka wala.

⁴⁴ Klu tshinanu nyi pimrine hixetatshro tsonu rutakna. Seyni wala, hike mwikato, teneklu psoluka timwakanatanru, tyoptojetanru tenekatka.