Marcos 11 - Bíblia

Jesus Jihlojyawaklu Jerusalém Piranapni

¹ Waneya Jesus rasrukleneyma hapokpiraxinixka Jerusalém poktshi, Oliveiras mriji rapokna, Betânia, Betfagé poktshikakastsitkana. Waneya Jesus yokanatna hepi rasruklene.

² Waneya wla htshina yokanretna Jesus: — Poktshi pnute hajeru nwaka hyanu. Waneya chinpotukawa hjihlokanru, hetanru jumento whene tsatkaluru hikeklu myapatjitkotuwa. Hkochrikanru wale hanikanru wkata.

³ Seyni satu yineru hepomhiniphi kluhe wla himixa waneya wla htshinanru: — Kasruklewakleru haluklu. Seyni chinpotukawa hsatkakanru.

⁴ Waneya hyatkana. Rukchikluna jumento whene tsatkaluru hatnuya. Htsatka pantshi hiphaptotestsi. Hkochrijinixkaluna wale,

⁵ satkaka yineru hepomhana: — Klunerhe hkamha? Haklu hikochriklu jumento whene?

⁶ Waneya ruhitluna htshin-towutlexyawakna Jesus. Hiyáhoni ritshitluna waneya ranikluna.

⁷ Waneya rasruklene haniklu jumento whene Jesus nwaka. Waneya himkalna jumento-tji hoho rutakna. Waneya Jesus hatskotjihohotlu.

⁸ Waneya hixo yineru koprakamkata hatnu hapo, pimrine kopalatlu kachehiru tshij-hoho campo rawapyaluna.

⁹ Waneya kosekamtatshine hiyrunu hapkatamtatshine saplewamta: — Himalwutkalurni Hoyakalu! Kihlehchinikanuru Tsru Hixikatshriwa Hoyakalu hiwaka hinikatshri!

¹⁰ Kihlehchinikanurupni wutsrukatni Davi-ni pohirewaxyawaka hinatshripa. Tenoya hoyakawaxikowaka!

¹¹ Waneya wane pnute Jesus jihloklu Jerusalém poktshi. Waneya Hoyakalupji hya. Retjetlu psoluka. Seyni kayi rixyawaka tshinanu Jesus, Betânia poktshi nwaka hya doze rasrukleneyma.

Figueira Piranapni

¹² Waneya wale prika hsatkapinixkana Betânia poktshi, Jesus hnatshnemnutka.

¹³ Waneya howuka rexyalu figueira katseplu hisure hiplu. Waneya wane hya hisahi rujhiywakapa. Seyni rapokyehitlu hisure tsonu reta klu tshinanu hi hipapkolni hisahi rawyawaka.

¹⁴ Waneya Jesus wan-tshinru figueira: — Hikeklu hohne pniksahitkotka. Rasruklene yijnakotlu xye hima.

Jesus Hoyakalupji Hapkapyawaka Piranapni

¹⁵ Waneya Jesus rasrukleneyma hapojinixka Jerusalém poktshi, hjihlojinixka Hoyakalupji, hyinuwaka hakaklexyatkana ptowruneka wane maronewaxikatshine, hichanrewatatshin-koxa. Hyotkakanru mes-kakni tiyiro ripekowaklena. Tuplawakkakni koxa hyotkaka pombo ruchankawaklena.

¹⁶ Hi ritshitatkalu Hoyakalupji ranijikowaka hejnu.

¹⁷ Waneya wla rixa hasrukletna: — Wla htshina yonatkaluru Hoyakalu pirana: “Nopji hanjihohnewakapji htshinka ptowru yineru hanjihohnewakleni.” Seyni hixa katshowhurune hwiywaka hkamhiyatkalu.

¹⁸ Waneya tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine yijnakotlu xye. Hyinuwaka hijhaletluna ruylaxyawakapluna Jesus. Klu tshinanu hixolune yine ptowruneka himyekahchinikanuta rasruklewle tshinanu hiyáhoni hpikluna.

¹⁹ Waneya rutshpojinixka, Jesus rasrukleneyma poktshi ruchpajyatkana.

Figueira Piranapakotnakni

²⁰ Waneya wale prika yetshpotukawa figueira riknohamxinixkana retanatkaluna figueira-ni. Riprihanatka haté hitskih-potuko.

²¹ Waneya Pedro hichinkaplu Jesus tshinyawakanru. Waneya Pedro wan-tshinru Jesus: — Petanu kasruklewakleru, figueira-ni hektuwaka ptshinanwakatanroni hipnanatka.

²² Waneya Jesus hihitlu, wla htshinru: — Hichinikanru xye. Halixiniklunru Hoyakalu,

²³ hixa himukata tshinretmaklu xye mriji: “Ppalnanu mar powha puknojinwa.” Waneya hma kahekkanuklunru hihchinikanu seyni halixinri wan-rixa hiphujewnalexyawakapa waneyamka wane potuko rixanu.

²⁴ Wale tshinanu wane ntshinhi: Hanjihohnexini, pa hixanu hanjixini, halixanu hyoptoxyawakatkalu waneya hixa ptowruka henekkotka.

²⁵ Hiyrunu hanjihohnexiniklunuwa, hektuwaka hkamhanwakatjeru hamtakahchinikanyehitanru rektunu. Waneya Hirtshi tenhohne hajer-koxa hamtakahchinikanyehitanru hixa hektunu.

²⁶ Seyni pimrine hektunu hma mamtakahchinikanyehixinipa hixa, Hirtshi tenhohne hajer-koxa hi hamtakahchinikanyehixinhi hixa hektunu.

Jesus Tsru Potu Hitakkalurni Piranapni

²⁷ Waneya hsatkapna Jerusalém poktshi. Jesus Hoyakalupji yapakananumta waneya tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine judeu-ne tsrukakalutene koxa hapokanwakatlu.

²⁸ Waneya repomhaluna: — Hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?

²⁹ Waneya Jesus hihitna, wla htshinna: — Hit-koxa satu hepomhalu nixanhi hixa. Hihixinri xye, hit-koxa hinkakanhi hixa katu henekno xye tsru hitakkaluru xyekaka nkamhiywaka.

³⁰ Hinkakanno xako. Kathe xawaka towutlu João h-batiz-lewaxyawaka? Ho Hoyakalu ho jeji?

³¹ Waneya hyinuwaka hiynumsakakletna wannakakluko waneya wla htshinkakna: — Wla wtshininri Hoyakalu, waneya repomhanunwu: “Haklu tshinanhe hi halixlu João?”

³² Seyni wla wtshininri jeji ruchpajya htowutjeru hpikna hixolune yine klu tshinanu ralixluna João-ni Hoyakalu tokanu hinkakletatshrini rixyawaka.

³³ Wale tshinanu wla htshin-hihretluna: — Hi wimatlu. Waneya wla htshina Jesus: — Hit-koxa hi hinkakanhi hanukta ruchpajya xyekaka ntowuxijeru.