Marcos 10 - Bíblia

Jesus Kopruhaxyawaklu Jordão Wenne Piranapni

¹ Waneya Jesus wane ruchpajya, Judeia tshijne hyatka, hkopruhatlu Jordão wenne. Waneya hixolune yine hapatjeyehitlu hiyrunukotnaka. Wale hasrukna rixa hasruhlexyawaka pixka.

Hiknokahnunrolu Piranapni

² Waneya satkaka fariseu-ne yanwakatlu Jesus hepomhalu retumhiyluna. Repomhaluna: — Moisés hiykole pirana yonatkalurlahe hi tshipetlu jeji hhanunro ruknojyawakapa?

³ Waneya Jesus hihitna satu hepomhaluyma: — Kluhe ruykotatkahi Moisés-ni?

⁴ Waneya wanna hihita, wla htshinruna: — Moisés hiykole yonatkaluru wan-tshina jeji ruchohnunroxinipa ruchoxyalo pirana yonaxikolu renekanro, hhanunro tmixyawakanpatka waneya hyokanatatkalo.

⁵ Waneya Jesus wan-tshina: — Moisés yonatlu xye yokanruru hixa chiko hchinikanu hixyawaka tshinanu.

⁶ Hyinuwajikolu xye tshijne hiyakoxikolu klu papko Hoyakalu hixkajyawaklu jeji suxo rixyawakna.

⁷ Wale tshinanu jeji hichotlu ruru, runro, rimwiywakaplo hhanunro.

⁸ Hiyáhoni hepitkana seyni pa manepkalunetkani, wale tshinanu hi hepna, satupkalu.

⁹ Hiyáhoni hike yineru xako hitspalkakanru Hoyakalu hapatjetanune.

¹⁰ Waneya rapojinixkana pantshi, rasruklene yinuwaka hepomhaletlu wale pirana.

¹¹ Waneya Jesus hihitna, wla htshinna: — Jeji hichohnunroxini, satoko hhanunroxini rimopatatkalo.

¹² Hiyrun-koxa suxo hichohnuruxini, satuko thanuruxini, timopatatkalu.

Jesus Hiyrunu Mturune Piranapni

¹³ Waneya wane pnute satkaka hanikna mturune Jesus yehi ruhlewahchinikanyehixyawakapna seyni rasruklene hi hitshitna.

¹⁴ Seyni Jesus hexinixkalu xye hi rukchikhihlenutlu, waneya wla htshina: — Hetachatanna mturune hyanwakaxyawaknona. Hi himaletanna. Klu tshinanu Hoyakalu pohirewaxyawaka hayinetene mturune pixkalune koxni wanna.

¹⁵ Hichinikanru xye: Katukta hi yoptotanru Hoyakalu pohirewaxyawaka mturu pixka, hi hjihlokanru.

¹⁶ Hiyáhoni Jesus saprikna mturune, ruhlewahchinikanyehitna, rutakamyohohotna.

Jeji Phuru Piranapni

¹⁷ Waneya hyinuwaka yanrexinixnaka Jesus, satu jeji hasukanwakatlu, hyoptsojityehitlu wale hoji sreta, waneya repomhalu, wla htshinru: — Kasruklewakleru kihleru, klunerhe nkamhanu niwejinri hikeklu hohne nma nikawniywakanupa?

¹⁸ Waneya Jesus wla tshinru: — Haklu tshinanu wane ptshinno kihle nixyawaka? Wale tsonu Hoyakalu kihle, hikeni hiyrunu.

¹⁹ Pimathonru hiykolu pirana: “Hi puylalewatanu, hi hapoklewatanu, hi ptshowhuwatanu, hi pimrine pweyatanu, hi pimrine pyokwijetanu, pkahwakpiratanru puru, punro.”

²⁰ Waneya jeji hihitlu: — Kasruklewakleru, nmatureyakawa haté xawakni nomkahitlu xye hiykolu ptowruka.

²¹ Waneya Jesus yopukhatlu ramotleyma, wane htshinru: — Seyni satu pa hixanu pmaha kamhaletawa. Wane pyanu, puchankanru ptowruka pimwanru, penekanna ptowruka mahaxikatshine, wane pixa pohirewnaletanu tenhohneya. Punanu cruz putaykopitanu waneya pomkahitanno hita.

²² Waneya wale pirana hyijnakoxinixka phuru, hyatka, hwamonuwnapotuta. Hjihekanuwatatka klu tshinanu phurupotukni.

Pohirewnalu Hma Mepixyawakanru Yineru Hoyakalu Pohirewaxyawaka Hjihlojyawaka Piranapni

²³ Hiyáhoni Jesus sajruruyhaletatka. Waneya wla htshina: — Hi pa yaprenukananru phurune Hoyakalu pohirewaxyawaka hjihlojyawakapna!

²⁴ Waneya rasruklene himyekpotuthonuka seyni Jesus pnuteko tshina: — Nowhenene, hi pa yaprenukananru Hoyakalu pohirewaxyawaka hjihlojyawaka.

²⁵ Kyapreru camelo tsapujripna hjihlojyawaka seyni wane yohnik-yapren-potu phuru Hoyakalu pohirewaxyawaka hjihlojyawaka.

²⁶ Hiyáhoni wale pirana hjeminixkana rasruklene rimyekpotuthonukna. Hiyáhoni repomhakakna wannakakluko: — Ha han-hixatshri hiwekkakko?

²⁷ Waneya Jesus yopukhatna, waneya wane htshina: — Jeji hi himukata seyni Hoyakalu himukata klu tshinanu Hoyakalu ptowru himukatatshrini wale.

²⁸ Waneya Pedro wan-tshina: — Petanu ptowruka wuchota pixa womkahixyawakatka.

²⁹ Waneya Jesus hihita, wla htshina: — Nmunanhalu ptowru yineru hipji hichotatshri, ho himolene ho himolerone, ho runro, ho ruru, ho hiwhenene ho tshijkaka hichotatshri ramoxyawaka tshinanno hiyrun-koxa kihle piranalu potuko hiwekkaklewatatshri pirana ramoxyawaka tshinanu,

³⁰ hyoptotanru yohnik-potu xawakni riwejinri. Hyoptotanru cem yohnik-kata hipji, himolene, himolerone, hinrone, hiwhenene, tshijkaka hiyrunu salewaktshi. Hiyrunu xye riwejinripa hinatshri hyoptotanru riwejinri hikeklu hohne mnikawnakatupa.

³¹ Hiyrun-koxa hixolune kosekakanatatshine hapkatatanutka. Waneya hixolune rapkatle hwatshine kosekanutka.

Jesus Hinkakatnaklu Rupninri Hiyrunu Riwejinritnaka Piranapni

³² Waneyakni Jesus doze rasrukleneyma hatnu hapo hyana hkankaluna Jerusalém poktshi. Jesus kosekamta. Rasruklene hapkatatatshine himyeka Jesus tshinyawakna tshinanu pimrin-koxa wannaymalune pikatka. Hiyáhoni Jesus kahnete hanikna rasruklene hiyrunukotnaka. Waneya Jesus hinkakna riknohjerupa pirana, wla htshinna:

³³ — Jerusalém poktshi nwaka wyamtanu. Waneya Jeji Whene tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine renekko. Waneya rukolukanuwnakakanruna ruylajixanruna, judeu mixkane renekko.

³⁴ Jesus reyikanna, rutskahjetanruna, rutpehjetanruna, ruylatanruna; seyni map-hohne rixinri riwekanutnaka.

Tiago Hiyrunu João Hanjireru Piranapni

³⁵ Waneya wane pnute Tiago hiyrunu João, Zebedeu whenene, hapokastsitlu Jesus, waneya wane htshinruna: — Kasruklewakleru, wuya penekanwu wepuklerupa.

³⁶ Waneya Jesus hepomhana, wla htshina: — Kluhe haluka nkamhiywakhi?

³⁷ Waneya ruhitna, wla htshinruna: — Pitshitanwu satu ppotukle sretate htuplaxyawakapa, satu pa sta sreta htuplaxyawakapa poyaknu yehi ppohirewnale tuplawakle ptuplaxinipa.

³⁸ Waneya Jesus hihitna: — Hixa hi himatlu klukta hanjita. Hixlahe himukata hirrexyalo copa salewaktshi yehi nurinropa? Himukata batiza-letkahe n-batiza-xikolu pixka?

³⁹ Waneya wane htshinruna: — Wumukata. Waneya Jesus wan-tshinna: — Halikaka, hixa hirinro copa salewaktshi yehiya hiyrunu n-batiza-xikolu h-batiza-tko hixa.

⁴⁰ Seyni htuplaxyawakaplu npotukle sreta ho npastate sreta hi hitanni neneklewaxyawakapa. Xye ptaklukaka sreta hajene Hoyakalu halpokohnapulene tshinanupa.

⁴¹ Waneya pimrine rasruklene dez, hjeminixkaluna wale pirana rahkanwakatna Tiago, João.

⁴² Hiyáhoni Jesus tomhana wanna ptowruneka walestsi rapojyawakapna, waneya wla htshinna: — Hixa himatlu phurune towutanune xye tshijne hajene towutjetna yine hiyrun-koxa wanna towutjene towutjetna wanna koxa.

⁴³ Seyni hixkakluko hi wan-rixa. Katukta hijhakalur-pira, pimrine repixanu,

⁴⁴ hiyrun-koxa katukta haluka towuwletanu, walepni pimrine towrerupa.

⁴⁵ Klu tshinanu Jeji Whene koxa hi hina repixikowakapa, seyni runa repixyawakapna yine, riwejinri renejyawakapna, hixolune yine hektunu hwenuxyawakapa.

Jesus Mtsawa Bartimeu Hiwakatletatshri Hitskalajyawaka Piranapni

⁴⁶ Waneya Jesus rasrukleneyma hapoklu Jericó poktshi. Waneya wale poktshi ruchpajinixka rasrukleneyma, hixoluneyma koxa, hyoptotluna mtsawa Bartimeu hiwakatletatshri, Timeu whenni. Mtsawa tuplakanatlu hatnu tnumne. Ranjitlu renekachaxikolu.

⁴⁷ Waneya hyijnakpiranyehixinixkalu Jesus, Nazaré hajeru, hiknohamxyawaka, hyinuwaka saplewletatka: — Jesus, phurni Davi-ni whene, petwamonutanunno.

⁴⁸ Hiyáhoni hixo yineru hiykotlu mtsawa potshke rixyawakapa seyni hsaplewata hiyrunuko: — Phurni Davi-ni whene, petwamonutanunno!

⁴⁹ Waneya Jesus hitukatka waneya wla htshina: — Htomhanru mtsawa. Waneya htomhaluna waneya wla htshinruna: — Pmixkowahchinikanuyakatanu! Ppalnanu. Htomhayi!

⁵⁰ Waneya Bartimeu hichale hiknokamta hiyáhoni hpalnamta chinpotu hyanwakatlu Jesus.

⁵¹ Waneya Jesus hepomhalu, wla htshinru: — Klunerhe paluka nkamhiywakyi? Waneya mtsawa hihitlu: — Kasruklewakleru, naluk-hetletatnaka hiyrunuko!

⁵² Waneya Jesus wla tshinru: — Pyanutka. Palixle tshinanu hihlerurutkayi. Waneklukawhapka Bartimeu yinuwaka hetletatka hiyrunuko. Waneya romkahitlu Jesus hatnu hapoya.