Lucas 9 - Bíblia

Jesus Hasruklene Kamrurepa Piranapni

¹ Jesus tomhana rasruklene doze waneya renekpixkonutna kamtshine htowuxyawakapna ruchpajyawakapna yine maneya hiyrun-koxa ptowru hixatshri yeyixlu rutskalajyawakna.

² Jesus yokanatna Hoyakalu pohirewaxyawaka pirana runkaklexyawakapna hiyrun-koxa yeyixatshine rutskalajyawakna.

³ Waneya Jesus wan-tshinna: — Hike hanikanu xye yanre tshinanu, hi hkanojere, hi saco-ko, hi pão-ko, hi tiyiroko, hi hepi mkatshriko hanikanu.

⁴ Satu pantshi hjihlojinipa, wanepji hwanu haté hichpajini potuko.

⁵ Hma yoptotjenepa, hma jemjenepa tshinanu, hichpakamxinpatka waneya wanna hetanu hiwlihkajpatjixitanu rimaxyawakapna hi hixako htshinanni seyni hma yoptotjene malixlenu tshinanni.

⁶ Waneya hyatkana. Ptowru poktshi pejnu nwaka hyana. Runkakletluna kihle piranalu potuko hiwekkaklewatatshri pirana hiyrun-koxa ptowru sretaka hwatshine yeyixatshine rutskalakna.

Phuru Herodes Kojwakahchinikanuxyawaka Piranapni

⁷ Waneya phuru Herodes, Galileia tshijne pohire, himatyehitlu Jesus kamhajekanatanru pirana. Waneya hkojwakahchinikanutatka Herodes klu tshinanu satkaka wan-tshinakanata: — João Batista-ni hetko hiwekatnaka.

⁸ Pimrine wan-tshina Elias-ni tshinkalurni hakanhayehihetkotwu, seyni pimrine wan-tshina satu mitshikawni Hoyakalu tokanu hinkakletatshri hiwejiklutnaka.

⁹ Seyni Herodes wan-tshina: Hitakni kastaknojikjixatkalu João Batista-ni. Hiyáhoni katnihe xawaka xye jeji xyekaka pirana njemyehixinri? Hiyáhoni phuru Herodes haluk-hetletlu.

Jesus Hixolune Yine Rohluxyawaka Piranapni

¹⁰ Waneya hsatojinixkana Jesus nurrene, runkakluna Jesus ptowruko hkamhapanruna. Hiyáhoni ranikna wannapka kahnete poktshiriya Betsaida poktshistsi hajeru nwaka.

¹¹ Seyni hixolune yine himatyehitlu wane hyiywaka. Hiyáhoni romkahitluna. Seyni Jesus kihle yoptole rixna. Runkakletluna Hoyakalu pohirewaxyawaka pirana hiyrun-koxa rutskalakna ptowruneko hpinitkonnalune.

¹² Waneya kayi rixinixka Jesus hasruklene hapyehitlu. Wane htshinruna: — Pyokanatanna yine hixolune poktshikaka nwaka hyiywakapna hiyrunu hsankaka wi potuko hwatshri nwaka hyiywakapna. Wane ruknokajinrina hoyetshno, rukchijyapluna hnikanrupna. Klu tshinanu hewi wwiywaka kahnete poktshirni.

¹³ Seyni Jesus wan-tshinna: — Hixa henekanna hnikanrupna. Waneya ruhitna: — Nijittshi wimwalerutka cinco pão hepi chima tsonu. Palukluhe wanjixyawakaplu nikkaluru nyi yine pejnu tshinanupa?

¹⁴ Klu tshinanu rawna cinco mil jejine. Waneya wane htshinna rasruklene: — Htuplakjixanna yine pa ptohkaka, cinquenta yine pa xkehkaka rixanna.

¹⁵ Waneya wan-rixana. Htuplakjixna ptowruneka.

¹⁶ Waneya Jesus kochtsheklu cinco pão, hepi chim-koxa. Tenhohne hyihata hpoyahnutlu Hoyakalu. Waneya hjiknajrotlu pão. Waneya rasruklene reneklu hixolune yine rapsaxyawakapna.

¹⁷ Waneya ptowruneko nikatka. Jinanutkana. Waneya hkochtshekluna hixetatshri pão psojkaka, chim-koxa, doze chiwatu htsepotana.

Pedro Jesus Hiphujtaxyawaka Piranapni

¹⁸ Waneya pa katatnaka ranjihohnekananumta Jesus, walepka. Waneya rasruklene repomha walestsi hwakanatatshine. Wane htshinna: — Kathe rikahwaknona yine?

¹⁹ Waneya ruhitluna, wla htshinruna: — Satkaka yineru wan-tshina pixa João Batista-yi; satuko wan-tshina pixa Elias-yi; satuko wan-tshinyi pixa satu mitshikawni Hoyakalu tokanu hinkakletatshriyi, hiwejiklutnakyi.

²⁰ Jesus hepomhana: — Ha hixa, kathe hkahwakno? Waneya Pedro hihita: — Pixni Hoyakalu yokanreryi, Messias-yi.

Jesus Hinkakletlu Rupninri Pirana Hiyrunu Riwejyawakatnaka Pirana

²¹ Waneya ruykotna hipokananu hike yineru xako hinkakanru wale pirana. Waneya wane pnute htshina:

²² — Jeji Whene tshinkaluru hijhalu hsalewniywaka hixo pa hixanu tshinanuya. Nuknokko tsrukakalune judeu-ne hiyrunu tsru hixikatshinwa sacerdote-ne yehiya, kasruklewaklerune hinanchitkaluru pirana hasruklewatatshine yehiy-koxa. Nuylatko. Seyni map-hohne rixinri niwekanutnaka.

Cristo Cruz Rutaykoxinri Piranapni

²³ Waneya wane htshinna wanna ptowruneka: — Satu yineru haluk-homkahrexinno, rujhalu pa hohne pejnu wale ralujyawaka ruchoxyawaka, ptowru hohneruka rutaykopitanru h-cruz-te waneya romkahitanno hita.

²⁴ Klu tshinanu katukta haluk-hiwekkakletanru riwejinrimka, ramtakanru riwekle; seyni katukta hita tshinanu hamtakanru riwekle riwekanu.

²⁵ Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna ho hnikaxikona?

²⁶ Klu tshinanu katukta hipatewatanno hita hiyrun-koxa ntokanu hipatewatatshri Jeji Whene tshinkaluru koxa hipatewatanru wale runinipa waleko royaknuyma hiyrunu Ruru hoyaknuyma rimapojinipa hiwejikalune Hoyakalu towrene tenhohne hajene potukaluneyma.

²⁷ Hichinikanru xye; satkaka hewi hajeru hma mupnaknukawa, retanru Hoyakalu pohirewaxyawaka hapokatshritka.

Jesus Pnuko Hixamanexyawaka Rasruklene Hetanu Piranapni

²⁸ Waneya pa semana pnutejiji hiknohatka Jesus, Pedro, João, Tiago koxa ranika. Satu mriji hkankatkana ranjihohnetapyawakapna.

²⁹ Waneya ranjihohnekanaxiniwa Jesus, hyokmanhojitatka. Himkal-koxa klata, klat-potuko rixa, katajru.

³⁰ Waneyakni hepi jejine hakanha. Riynumsatluna Jesus. Satni Moisés-ni tshinkalurni, satni Elias-ni tshinkalurni.

³¹ Hoyaknutshi rimakanhana, Jesus hipnalepa pirana htshinjetna, Jerusalém poktshi hakanhikatshripa pirana.

³² Seyni Pedro-ne hixapnewpotuthonuka. Waneya ruyojinixkana, retluna Jesus hoyaknu, hiyrun-koxa hepi jejine waleymalune.

³³ Waneya hyinixkana Jesus hiynumsakanatatshine Pedro wla tshinru Jesus: — Kasruklewakleru, kihleru wiko wutujyawaka. Hayeri wkamheru mapa pantshi; satu pixanupa, satu Moisés-nupa, satu Elias-nupa. Pedro hi himatjemnawa klukta htshina.

³⁴ Wane htshinakanaxiniwa hohimkohi hichyatna. Seyni hohimkohi hichyaxinixkana hpikatkana.

³⁵ Waneya hohimkohi hitokote ruchpajyatka tokantshi wla tshinatshri: — Xyekni nowhene nalukleru. Hyijnakotanru hanukta htshinanhi!

³⁶ Waneya rutshrojinixka tokantshi Jesus tsonu retatkana. Waneya potshkechana. Waneya waneklu papko retlerna hike runkakna.

Jesus Mturu Kamtshite Hakajyawaka Piranapni

³⁷ Waneya wale prika himriji hserpijyatkana. Waneya yine hixolune yoptotaplu.

³⁸ Waneyakni satu jeji hixolune yin-yehi hwakanatatshri saplewata. Wane htshin-sapleta: — Kasruklewakleru, nanjityi pepixyawaklu noturu klu tshinanu waleni noturu satupkalutu.

³⁹ Kamtshi kachjetlu mturu. Hsaplewjejetana, hkowchoklu mturu, kamtshi hipokananu hiknoklu, ruchpaksolnamatana. Hsaletjetanru. Kyapreru mturu ruchoxyawakanru.

⁴⁰ Pasruklenemka nanjita ruknojyawakapluna kamtshi seyni hi rumukatna.

⁴¹ Waneya Jesus hihita. Wla htshina: — Yine malixaklenhi, hektutu kkamhaklerunhi. Haté hi pejnu hohnekta nimwanhi hixa? Haté hi pejnu hohnekta nakotanhi? Waneya wla htshinru tsru: — Wkata panikanru pituru.

⁴² Waneya ranikatkaluna mturu Jesus nwaka kamtshi hiknokanru mturni tshij-hoho. Ruwnanakanatka. Waneya Jesus towutlu kamtshi mturu ruchpajyawakapa. Rutskalaklu mturu. Waneya ruru renekatkalu.

⁴³ Hiyáhoni ptowruneka himyekahchinikanutatka Hoyakalu tsru pixkonu rixle tshinanu. Waneya rimyekahchinikanuxiniwana yine ptowruneka Jesus kamhajekanatanru tshinanu, Jesus wan-tshinatkana rasruklene:

Jesus Hinkaklewaxyawaklu Rupninri Piranapni

⁴⁴ — Hi xako hamtakanru xye tokantshi ntshinyahi. Jeji Whene tshinkaluru yine renekko.

⁴⁵ Seyni Jesus hasruklene hi rimatjemluna klu raluka tshinreta xye tokantshi. Hi phujetanuwaka htshina xye tokantshi hma mimatjemyawakanupluna. Hiyrun-koxa hpika hepomhaletluna Jesus klumka raluka tshinreta wale tokantshiya.

Kat-pothe Hijhakaluru Piranapni

⁴⁶ Waneya rasruklene yinuwaka hihjekakleta wannakakluko katnihe hijhakalur-potu.

⁴⁷ Seyni Jesus himatlu ruchinikanretanruna. Hiyáhoni satu mturu hkachita Jesus. Hyehistsi rutaklu mturu.

⁴⁸ Waneya wla htshina: — Katukta hihle yoptoletlu xye mturu nhiwaka tshinanu hit-koxa hyoptotanu. Hiyrunu katukta yoptotanno hita, hyoptotanru hita nyokanatjeru. Klu tshinanu mujhakotu hikahwakleru hixa, walekni hijhakalur-potu.

Katukta Hi Kamnirewata Repixlewata Wale Piranapni

⁴⁹ Waneya João wan-tshinru: — Kasruklewakleru, wetlu jeji kamtshi hiknokatshri pixa phiwakaya seyni wimaletlu klu tshinanu hi hixa wepirni.

⁵⁰ Waneya Jesus wan-tshinna João hiyrunu pimrine rasruklene: — Hi himaletanru klu tshinanu katukta hi kamnitwu, repixwu.

Samaria-nune Tshinkalune Myoptohihlenuxyawakanru Jesus Piranapni

⁵¹ Waneya wla rixa. Rapokpapkolupiraxinixka tenhohne hyiywakapa, Jesus hichinikanretlu Jerusalém poktshi hyiywakapa.

⁵² Waneya hepi yine hkosekakjixa ralpokohnapuxyawakapluna Jesus. Hyatkana. Waneya satu mtserutu poktshi Samaria tshijne hwatshri ralpokoxyana kihle hapokle rixyawakapa.

⁵³ Seyni wane hajene hi haluka yoptoletlu Jesus klu tshinanu rimathetluna Jerusalém poktshi nwak-potu hyanu.

⁵⁴ Waneya rasruklene Tiago, João rexinixkana wan-rixahchinikanuxyawakna wane poktshi hajene, wla htshinruna: — Tsru Hixikatshriwa Jesus, hi he paluklu tshitshmero tenhohne hajeru wtomhiywaka nyi yine hnikaxyawakapa?

⁵⁵ Seyni Jesus hiprotakatka waneya htshihetjetna. Wla htshina: — Hi himathexnawa hanu hixa hiwekletatshinhi hixa.

⁵⁶ [Klu tshinanu Jeji Whene tshinkaluru hi hina yine samenru hnikaxyawakapa seyni halikaka runa riwekkajyawakapna yine.] Waneya pa poktshi nwakako hyatkana.

Satkaka Jesus Homkahpiratatshinemka Piranapni

⁵⁷ Hatnu hapo hyapakanaxinna, satu jeji wan-tshinru Jesus: — Kasruklewakleru, hanuktako pyanu pixa nimotsatanyi hita.

⁵⁸ Waneya Jesus wan-tshinru jeji: — Kaweretshine kapna rawjetna. Kochitshin-koxa tenhohne yapatshine waneyna rawyawakna. Seyni Jeji Whene tshinkaluru tsonu hi jimkawakleru, hi rawya rapnanuwakle.

⁵⁹ Waneya satu jejitnaka Jesus wan-tshinmaklu: — Pomkahitanno. Seyni wale wla tshinru: — Tsru Hixikatshriwa, pitshitanno mitshikananhapkatshi nsatkapamtanu. Nurunitshi nkapnamtanu.

⁶⁰ Seyni Jesus wan-tshinru: — Petachatanna hipnatshinekakluko kapnakajyawaka. Seyni pixa, punkakletanru Hoyakalu pohirewaxyawaka pirana.

⁶¹ Waneya satutnaka wan-tshinru Jesus: — Tsru Hixikatshriwa, nomkahitanmakyi seyni petachahapkatanno nunhiywakapna nopji hajene.

⁶² Seyni Jesus wan-tshinru: — Katukta yochyaktshijipi yochyaktshijixikatshriko ratjini reknojini, Hoyakalu pohirewaxyawaka mpoyahokkakatni.