Lucas 8 - Bíblia

Suxone Jesus Hepixjerone Piranapni

¹ Waneya wane wkatanu, Jesus ptowru poktshi nwaka hyapa, tsru poktshi hiyrun-koxa mtserutu poktshikaka. Runkaklewakananumta kihler-potuko tokantshi Hoyakalu pohirewaxyawaka pirana. Waleymana rasruklene, doze-na.

² Hiyrun-koxa waleymana satokaka suxo rutskalaklenetka, kamtshi ruknojinine satkaka hiyrun-koxa rutskalaklerone satkaka hyeyixlekakayna. Sato wanna hepire Maria Madalena tshinkaluro. Wala honra mitshikananu sete kamtshine takajika.

³ Hiyrun-koxa sato suxo Joana tshinkaluro, Cuza tshinkaluru hnunro phuru Herodes hitakanru waleyma htowuwaxyawakapa. Hiyrun-koxa Susana hiyrun-koxa pimrone hixolune. Wanna Jesus hepixjekanata hejnuyma rimwalerna.

Hitaklu Tataji Jiplaljekleru Piranapni

⁴ Waneya hixolune yine ptowru poktshikaka hichpajikatshine hapatjeyehitlu Jesus. Waneya Jesus satu yapkaklu pirana runkakatkana:

⁵ — Satu jitaklewakleru hichpakamta rutaklewtapanu. Waneya ruplaljetatajitlu. Pimriji hatnu hapostsi hapoktatajita. Wane hkatsrejikatka, runna kochitshin-koxa hnikloktatajitanruna.

⁶ Pimriji sotlu hanikajite hapoktatajita. Wane ruptshejyatka riprih-hapkatanatka klu tshinanu hi khatshij-yehinru.

⁷ Pimriji kona yehi hapoktatajita. Waneya konaymakananuko htseruwna, hkakmokanatkalu.

⁸ Seyni pimriji kihle tshijiwaka hapoktatajita. Htseruwna, hjiwata. Satkakaji pejnu tshinanu cem-ji rawa. Waneya wane htshinna Jesus: — Kajnakopnahi hyijnakoxyawakapa, hyijnakotanu.

Jesus Hasruklu Klu Hyapkakleta Hitataji Jiplaljekleru Pirana

⁹ Waneya Jesus hasruklene hepomhalu Jesus: — Hanhe htshina xye yapkaklu pirana?

¹⁰ Waneya wane htshinna Jesus: — Hixamka henekka himaxyawakaplu mimatkotu pirana Hoyakalu pohirewaxyawaka pirana. Seyni pimrine tshinanu yapkaklu nkamhiylu ptowru piranako. Rexinna retmakna, hi rapkathojitna; hjeminna, hjemmakna hma mimatjeminixipna.

¹¹ — Xyeni yapkaklu. Hitataji Hoyakalu tokanni.

¹² Hatnu hapostsi hapoktatajitatshri yaholni tokantshi jematshine. Seyni runa Satanás kamtshi. Hkonyana tokantshi rajiyna hitakkaluru hma malixyawakanupluna, hma miwekkajikowakanupna.

¹³ Sotlu hanikajite hiknokkalune wannani tokantshi jematshine. Tokantshi hjeminixkana hyoptotmakluna tsru rumuwleymana. Seyni hi waneyna hitskina wanna. Hiyáhoni pchini tsonu halixatshinepni. Runinipa yahtaletlewlu ramtakanruna tokantshi hjemlerna.

¹⁴ Kona yehi hapoktatajitatshine, wanna Hoyakalu tokanu jematshine pixkalune. Seyni kojwakahchinikanrukaka, ho pohirewnalu, ho poyikowlukaka xye hohne hexikaluru mixkowpotuta waneya xekoyaka hkakmokannatkalu. Hiyáhoni hi hjiwatanatkana.

¹⁵ Seyni halikaka kihle tshijiwaka hapoktatajitatshine, wannani potuk-hajirune, kihle hajirune. Hyijnakotluna tokantshi. Romkahitluna hjemlerna. Hmachiretleymana hjiwatanutkana.

Katalu Piranapni

¹⁶ — Hike yineru lamparina nikotatshri hachhaji hpuko hitakanro. Hi hijeko hpukoko rutakanro. Seyni kihlero halikaka lamparina kihle nikotle tixyawaka tutajikowaka, ptowru yineru hapkathojixyawakapa tnikotle tshinanu.

¹⁷ Klu tshinanu ptowruka yohimluru ruphujetko. Ptowru tokantshi yohimatkaluru rimathetko, runkakletko.

¹⁸ — Hiyáhoni hislahinwa hanu pixa yijnakoletanru xye hima: Klu tshinanu hwikatshri pnute renekko. Seyni hike mwikatu haté seyo rimwaleru hkonkona.

Jesus Hinro, Himolen-koxa Piranapni

¹⁹ Waneya Jesus hinro, himolen-koxa yanwakatlu Jesus. Seyni hi rumukata hapoklestsitluna hixolune yine tshinanu.

²⁰ Waneya runkakka. Wane htshinruna: — Punro, pepurun-koxa maleka rawna. Raluk-hetletyina.

²¹ Waneya Jesus wan-tshinna wanna ptowruneka: — Katnihe nunro, nomolene wannani Hoyakalu tokanu yijnakotatshine hiyrunu ntshinyawaka kamhatshine.

Jesus Kanniphalu Hitukkajyawaka Piranapni

²² Waneya pa hohnekotnaka Jesus kanawa hpokowna rasrukleneyma. Waneya wla htshinna: — Tujra sreta wnahlu powha wyanu. Waneya hyatkana.

²³ Seyni hkopruhatka pchinikna Jesus himkamta. Waneya hyopyoka tsru kanniphalu tsru powhaya. Htsepohjetlo kanawa hiyáhoni katsephatkalo. Tsru jhamleru potukni ptowruka.

²⁴ Waneya rasruklene yanwakatlu Jesus, hkomyekluna wane htshinruna: — Kasruklewakleru, Kasruklewakleru, wupnahetkotanuna! Waneya Jesus yotunotatka htshihetjetlu kanniphalu hiyrunu tenoplojhal-koxa. Waneya rutukatka kanniphalu. Pokokha rixatka hipowha.

²⁵ Waneya Jesus hepomhatkana rasruklene wane htshinna: — Hanurhe hixa halixle? Seyni hpikatkana hiyáhoni wane htshinkakna wannakakluko: — Hanu hixatshri koxni xye jeji? Klu tshinanu kanniphalu hipowha koxa yijnakotlu.

Jesus Hitskalajyawaklu Jeji Hixolune Kamtshine Himwatshri Piranapni

²⁶ Waneya tujra wnahlu tsru hipowha Gerasa sreta rapokna, Galileia powha wnahlu.

²⁷ Waneya kanawa ruptejinixka Jesus satu jeji poktshi hajer-makni, kamtshine himwatshri yoptotlu. Hix-hohne mamkatni. Hi pantshiko rawa seyni yomletshi rawa.

²⁸ Waneya Jesus rexiniklunu hsaplewata. Hyawnamta Jesus-stsi. Tsru plama rixa waneya wane htshin-saplewleta: — Jesus, Hoyakalu ten-potu hajeru whene! Kluhe pixannatkano? Nanjityi hi psaletpotutanunno.

²⁹ Wale wan-tshina klu tshinanu Jesus yokanatatkalu kamtshi ruchpajyawakaplu jeji. Hixo kata kamtshi kachitlu hipokananu. Hiyáhoni rostutka. Yomuwatsamka rostutka himyonota, hihpeji koxamka. Seyni yomuwatsni hiknajromtana hmixkonu tshinanu. Waneya popriwaka ranikjekanatluna kamtshine.

³⁰ Waneya Jesus hepomhalu: — Klu hiwakyihe? Waneya ruhitlu kkamtshiteru. Wane htshina: — Nhiwakni Hixoluru. Wane htshina kkamtshiteru klu tshinanu hix-potu kamtshine jihloklu wale.

³¹ Waneya kamtshine hanjitlu Jesus teno pnawaka hma yokanaxyawakanupna.

³² Wanekananru hixoluru porco hipjitastsi hnikakanaxyana. Waneya kamtshine hipokananu ranjitluna Jesus ritshixyawakapna porco mane hjihlojyawakanapna. Waneya Jesus hitshitna.

³³ Hiyáhoni ruchpakamtatkana kamtshine. Waneya porco-ne mane hitokote hjihlokamtatkana. Waneya hixolunni porco-nni hipjita hijrujyanatka. Hipowha rapokanna waneya hipowha rahyejyanna.

³⁴ Waneya xye rexinixkana porco-ne hinotatshine rasukamtna. Runkaklewatna tsru poktshiya, hsana hajen-koxa.

³⁵ Waneya hixolune yine hinamta retapyawakanapna klu rixanna. Waneya rapokluna Jesus nwaka. Retluna kkamtshithixapatshri. Htuplakanata Jesus jixistsi. Kamkatkalu kkamtshithixapatshri, kahchinikanutkalu. Waneya rimyekatkana yine.

³⁶ Waneya kkamtshithixapatshri hetakanatjene hinkakna hanu rixa hitskalakletkatka.

³⁷ Waneya hpikpotutatkana ptowrunek-yine Gerasa tshiji sreta hajene. Hiyáhoni ranjitluna Jesus wanna tshijne ruchpajyawakapa. Waneya kanawa hpokownatka Jesus. Waneya hsatokhonukatka ruchpakakanaxyawaka sreta.

³⁸ Seyni wale jeji kkamtshithixapatshri hanjitmaklu Jesus, waleyma rixyawakpatka. Seyni Jesus yokanatlu. Wla htshinhonuklu:

³⁹ — Pipji pyanutka. Punkakanna yine Tsru Hixikatshriwa Hoyakalu rix-hepixlexyawakyi pirana. Hiyáhoni ralimta. Runkaklewatatka hipoktshi hajene yehiya Jesus hixyawakatkalu.

Jesus Sato Suxo, Sato Mturo Rutskalajyawaka Piranapni

⁴⁰ Waneya pa sreta wnahlu rapojinixka Jesus, hixolune yine yoptotlu, tsru poyikowluyma. Klu tshinanu waneko hkahwakakanaxyaluna.

⁴¹ Waneya runa satu tsru hitakkaluru hanjihohnewakapji hajeru, Jairo hiwakatletatshri. Hyoptsojityehitlu Jesus jixistsi. Ranjitlu Jesus hipji hyiywakapa,

⁴² klu tshinanu richitsho, satopkaluto, doze mhaleruto, tupnakastsitkani. Waneya Jairo-pji hyakananumxiniwa Jesus hixolune yine hipxakjemtlu.

⁴³ Waneya twa sato suxo hihrahawatatshro. Doze hwalapu hima tuhrahawatatka. Hixo kpinrewaklerunemka pinixnixkalo hiyrunu tnikatlewatanatka ptowruka twinri. Hike himukata hitskalhakakletlo.

⁴⁴ Jesus tjimne sretako tunya waneya tkamrukamkatlu. Waneklukawa potuko tutukahrahatatka.

⁴⁵ Waneya repomha Jesus: — Kathe kamrukamkatno? Seyni ptowru yineru hi hitni htshinna. Waneya Pedro wan-tshinatkalu Jesus: — Kasruklewakleru, hixolune yine katshnekyi ripxakjetyina.

⁴⁶ Seyni Jesus wan-tshina: — Yineru kamrukamkatatkano. Nimata klu tshinanu ruchpakamxyatkano npixkonu.

⁴⁷ Waneya texnawa suxo hi tumukata yohimlexnawa, hitatakatshroko yanwakatlu Jesus. Waneya Jesus jixistsi tuknojnawa. Waneya tunkaklewata ptowru yineru hetanu klu hikolukle tkamruklu hiyrunu waneklukawa tutskalhiywakatka pirana.

⁴⁸ Waneya Jesus wan-tshinro: — Chrima, palixle hitskalakyi. Pyanu kihlehchinikanpatkayi.

⁴⁹ Waneya hyanumsakanaxiniwa Jesus, Jairo-pji hichpajikatshine htowrene hapoka. Waneya wane htshinruna: — Pchítshoni hipnanatka. Hi pnute pkojwakanru hasruklewatatshri.

⁵⁰ Wale hjemini Jesus, wane htshinru Jairo: — Hi ppikanu. Palixachatanu, pchitsho hitskalhanu.

⁵¹ Waneya Jesus Jairo-pji hapojinipa, hi ritshitna pimrine wanna hatjini hjihlojyawakna. Pedro, Tiago, João hiyrunu mturo hiru, tunro, wane pejnu tsonu himukata wane yaleta.

⁵² Wane pchinika ptowru yineru tshiyahata hsaplewjepotutna mturo pohwaka tshinanu. Seyni Jesus wan-tshinatkana: — Hituk-tshiyahletanutka. Mturo hi tupna seyni tumkachata.

⁵³ Seyni rutsolhitatluna Jesus, wanna himata tupniywakanatka.

⁵⁴ Waneya Jesus kosemyoxininatkalo mtúroni, wane htshinro: — Mturo, ppalna!

⁵⁵ Waneya tiwejinri hiwekatnaka. Waneklutka mturo yotunotatka. Waneya Jesus hohlujixlo mturo.

⁵⁶ Turu, tunro koxa himyekatka seyni Jesus hijretna hike hmunkajyawakanupluna wale pirana.