Lucas 5 - Bíblia

Jesus Nuretna Satkaka Rikamrurewatjenepa Piranapni

¹ Waneya wla rixa Jesus. Hipowha Genesaré wnahlu rawakanata Jesus. Ripxakjekanaxyawakluna yine Hoyakalu tokanu hjemyawakna.

² Waneya hepi kanawa reta, hipowha wnaha rawakanatna. Seyni kkanawaterune mariskakanatatshine hichotlo hkanawatna klu tshinanu h-tarrafa-tkakna rerokakanatna hipowha wnahaya.

³ Hiyáhoni sato kanawa hpokowna Jesus, Simão tshinkaluru kanawate. Waneya Jesus hanjitlu Simão hanikajhayaka ranjiywaklu. Waneya kanawa htuplata waneya hyinuwaka hasrukletna yine hixolune.

⁴ Waneya rali hinkaklewlexinixka, Simão htowuta, wla htshina: — Kanawa xako tenohawaka panikanu. Waneya hiknok-tarrafa-tetanu chima hkachixyawakapa.

⁵ Seyni Simão wan-tshinru: — Kasruklewakleru, psol-yetshnokmaka wmariskata seyni hike wkachita. Seyni pixa tokanu tshinanu, tarraf-kaka nuknokanu.

⁶ Waneya rali wan-hixletatkana, hix-potu chima hkachitna. Haté ruskatana h-tarrafa-tkaknina.

⁷ Waneya repirna rutsejrihjeyehitna sato kanawa hwakanatatshine, repixyawakapna. Runna. Waneya hepi kanawa htsepotna chima haté rimxikpiratna kanawane.

⁸ Waneya xye rexinixka Simão Pedro, hyoptsojityehitlu Jesus. Waneya wane htshinru: — Tsru Hixikatshriwa hit-yehi pasujini klu tshinanu hitni jejno hektuntshi hwalerno.

⁹ Klu tshinanu Simão hiyrunu pimrin-koxa himyekpotuta hixo chima hkachitanruna tshinanu.

¹⁰ Tiago hiyrunu João tshinkalune, Zebedeu tshinkaluru whenen-koxa, Simão tshinkaluru hepirene himyekpotuta. Waneya Jesus wan-tshinru Simão: — Hi ppikanu. Xawakni yine kmariskahohoklerunpatkahi.

¹¹ Waneya tshiji hyosropkaklona hkanawatkakna. Ptowruko ruknokamtatkana waneya Jesus romkahitatkana.

Jesus Hitskalajyawaklu Hijirohitutatshri Piranapni

¹² Waneya pa katatnaka Jesus pa poktshi hwakanatatka waneylu satu jeji hijirohitutatshri hallikanatatshri. Waneya Jesus rexiniklunu hyoptsojityehitlu Jesus tshiji rutspakhojita waneya Jesus ranjita: — Tsru Hixikatshriwa, palujinipa pumukata hitskalakletno.

¹³ Waneya Jesus homyokanwakatlu, hkamruklu. Waneya Jesus wan-tshinru: — Hehe, naluka. Putskalakkatka. Waneya waneklukawa potuko rujirhitle ramhiyatka, rutskalhatka.

¹⁴ Waneya Jesus hijretlu wla htshinru: — Petanu. Hike punkakanu seyni pyanutka. Sacerdote pekhimantapinwa putskalhinrixka. Waneya panikanru henekachalu henekawaka nwaka Moisés-ni yonreru tshinyawaka pixka pimrine himaxyawakaplu putskalhiywakatka.

¹⁵ Seyni pnute hya kopalpiranretlu. Hiyáhoni hixolune yine hinanwakatlu Jesus tokanu hjemyawakna hiyrun-koxa hyeyixlena rutskalajyawakapa.

¹⁶ Seyni Jesus kahnete sputa hya potshkewaka. Waneya wane ranjihohnexya.

Jesus Hiktehatshri Hitskalajyawaka Piranapni

¹⁷ Waneya pa hohnetnaka Jesus hasrukakanatna. Wane koxa rawakanata satkaka fariseu-ne hiyrun-koxa satkaka yonawahlo yonha kyimakleru Jesus-stsi htuplakanatna. Ptowru poktshi pejnu runyatkana Galileia tshijneya hiyrun-koxa Judeia tshijne hajeneya. Jerusalém poktshi koxa runyatkana. Tsru Hixikatshriwa Hoyakalu himukatle Jesus-ymalu ptowru hahijewaktshi rutskalajyawaka.

¹⁸ Waneya pimrine jejine hanikanwakatlu Jesus satu jeji hiktehatshri hijeko hikoluhatshri. Raluka pantshi jihlokletmakna Jesus-stsi rutajyawakamkapluna hiktehatshri.

¹⁹ Seyni hixolune yine tshinanu hi rumukata hijihlokletluna hiktehatshri. Hiyahokni ranikluna pantshi hoho hwakwatatshri. Hjihmikakwatluna waneya wane swa hkosputajyaluna yoklutsayma hiktehatshri hijeko hikoluhamtatshri, hixolune yine hanikajite Jesus hojistsi rutspakluna.

²⁰ Waneya Jesus hexinri wanna halixle, wane htshinru hiktehatshri: — Nimatletleru, pektunu puknojikatka.

²¹ Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine yinuwaka hijhahchinikanretna waneya wla htshinatkana: — Katnihe xye jeji hektuwaka htshinanwakatlu Hoyakalu? Katu tsonhe himukata hiknokhektunutlu yineru? Satupkalu Hoyakalu tsonu.

²² Seyni Jesus himathetahchinikanutna hiyáhoni ruhitna, wane htshinatkana: — Klu tshinanhe wan-hixahchinikanuta xyekaka hektutu hichinikanrethajixyawaka?

²³ Hanupothe kihle tshinko? Wla htshinikowaka hiktehatshri: “Pektunu puknojikatka”, ho wla htshinikowaka: “Pyotunotanu, pyanutka”?

²⁴ Seyni himatjempotuxyawakaplu Jeji Whene tshinkaluru hitakkalurutkani xye tshijiya ruknokhektunuxyawakapna yine hiyáhoni wla ntshinanru hiktehatshri: — Pixa wane ntshinyi: Pyotunotanu, pkochtshekjekomtanu pyanutka pipji.

²⁵ Waneya waneklukawa hyotunomtatka, hkochtshekjekomtatka ptowruneko hetanu. Hipji nwaka hyatka. Rimalwumtlu Hoyakalu.

²⁶ Ptowruneka tsru himyeklu rixna. Tsru pikluyma rimalwutluna Hoyakalu. Wane htshinkakna: — Kluneru pixkalutu weta xawakni?

Jesus Tshanixyawaklu Levi Piranapni

²⁷ Waneya wane pnute ruchpakamta Jesus, retlu satu jijhawenrukleru, Levi tshinkaluru. Htuplakanata tuplawaka hwenuxikolu hyoptoxyawakapa. Waneya Jesus wan-tshinru: — Pomkahitanno.

²⁸ Waneya ptowruka ruknokachata, hpalnamtatka waneya romkahitlu Jesus.

Jesus Hektuneyma Nijyawaka Piranapni

²⁹ Waneyakni Levi tshinkaluru tsru niklu hkamhiylu Jesus, waleko hipjiya. Wane rawakanatna hixolune jijhawenruklerune, pimrin-koxa wannayma tuplakanatatshine nikawakakwa yehi.

³⁰ Seyni fariseu-ne hiyrun-koxa kasruklewaklerune hinanchitkaluru pirana hasruklewatatshine kahemhayehitna Jesus hasruklene. Wla htshinna: — Kluneru tshinanhe wannayma hnika, rura wanna jijhawenruklerune, hektuneyma?

³¹ Waneya Jesus wan-tshinna: — Pomtalune hi haluklu kpinrewakleru seyni katshinomtalu haluklu.

³² Klu tshinanu hi nuna ntshanixyawakapna kihlerune seyni hektune ntshanixyawaka rehchinikanuxyawakapna.

Hix-hohne Mnikkatu Piranapni

³³ Waneya satkaka yineru wan-tshinru Jesus: — Haklu tshinanhe João Batista hasruklene hohajirewjeta, ranjihohnejet-koxna hiyrunu fariseu-ne hasruklene waneko pixka rixna seyni pasruklene nika, rurna?

³⁴ Waneya wane htshinatkana: — Rumukata natshretnahe hnunrowlu hetatshine hnunrowatatshriymalune? Hike.

³⁵ Seyni rapokhohnexinpatka hnunrowpiratatshri hixolune hetanu hkochpakkoklunpatka. Waneklu papko halikaka rohajirewatanutkana wanna.

³⁶ Waneya satu yapkaklu pirana runkakkoxna, wla htshinatka: — Hi kihle hipxatkolu mkatshri hitsruka herotu samayma. Wan-rixkoklunu herotu sama hiskakkakanunru tsrutsolejipni. Hiyrun-koxa hi pixkakakluni tsrutsoleji herotu samayma.

³⁷ Hi kihle tsrutsoleji mapa hitakhatkolo vinho-ha hekamhakolha. Wan-rixkoklunutka vinho-ha hipchekkakanunru sac-kakapni. Tuyokhatanuna vinho-hapni waneya sac-kaka koxapni salewnanuna.

³⁸ Seyni vinho-ha herotu, saco herotu tutakhatka.

³⁹ Hiyrun-koxa mitshikawlurha hiratshritka hi hannahatlo herotha. Klu tshinanu wane htshinna: “Mitshikawlurha halikaka kihlepotu.”