Lucas 4 - Bíblia

Jesus Yohnixikolu Piranapni

¹ Jesus Jordão wenne rali hichpaklexinixka, katsepoyatkalu Hoyakalu Hiwejikaluru. Waneya Hoyakalu Hiwejikaluru hanikkotlu Jesus kahnete poktshiri hyiywakpatka.

² Waneya quarenta hohne pchinika tsru kamtshi Satanás yohnitlu Jesus. Waneya wane pejnu hohne hike hnika Jesus hiyáhoni hnatshitatka.

³ Waneya tsru kamtshi Satanás wan-tshinru: — Hoyakalu whene pixinipakni, ptowutanru xye sotlukaka pão rixinwa.

⁴ Seyni Jesus hihitlu: — Hi he Hoyakalu tokanu potukalu yonatkaluru wan-tshina: Yine hi pão mixkonu tsonu riwejyana seyni ptowruka wane htshintokanuta Hoyakalu: “Hoyakalu tokanu tshinanu riwekanu yineru.”

⁵ Waneya tsru kamtshi Satanás hanikatkalu Jesus satu himriji tenolu, pchinhohnejiji rekhitlu Jesus ptowruka tshijnekaka pohirewaxyawaka.

⁶ Waneya tsru kamtshi Satanás wan-tshina: — Xye ptowrukamka nenekanyi ptowuxyawaklu, npohirewnale koxamka pixanpatka. Klu tshinanu xye ptowruka nenekka hiyáhoni numukata henekletanru katukta naluk-henekletanu.

⁷ Xyekaka ptowruka pixanpatkani pyoptsojityehixinipno, pimalwuxinipno.

⁸ Waneya Jesus wan-tshinru: — Wane htshina hinkakleta Hoyakalu tokanu potukalu yonatkaluru: “Tsru Hixikatshriwa Hoyakalu tsonu himalwutanu hiyrun-koxa wale tsonu pomkahitanu.”

⁹ Waneya wane pnutetka tsru kamtshi haniklu Jesus Jerusalém poktshi waneya Hoyakalupji hohwaka hwatshri tenoptajiru rimatskotlu Jesus. Waneya wane htshinru: — Hoyakalu whene pixinipakni hewi tenowaka puknojinwa,

¹⁰ klu tshinanu Hoyakalu tokanu potukalu yonatkaluru wan-tshina: “Hoyakalu towutna htowrene hiwejikalune tenhohne hajene hinoxyawakapyi.”

¹¹ Hiyrun-koxa: “Himyoymana ruchatkapanyina, pma muphajixixyawakanupa sotlu hoho.”

¹² Waneya Jesus wan-tshinru: — Seyni Hoyakalu tokanu yonatkaluru wan-tshina: “Hi pyahtaletanru Tsru Hixikatshriwa Hoyakalu Poyakalute.”

¹³ Waneya rali yahotaletletlu Jesus xye yahotaletluya psoluka, tsru kamtshi Satanás hichomtlu. Waneya pchinhohne retachatlu.

Jesus Yinuwaka Kamrurewlexyawaka Piranapni

¹⁴ Waneya Jesus satokanwakatlu Galileia tshijne nwaka. Hoyakalu Hiwejikaluru himukatle himotsatlu. Jesus pirana wale tshijne psoluka rupalpiranyehita.

¹⁵ Rasruklewjekanata wanna hanjihohnewakapjikakaya. Ptowruneka himalwutlu.

Nazaré Poktshi Rawyawaka Piranapni

¹⁶ Waneya Jesus htseruwniywaka poktshi Nazaré tshinikowaka hya. Rixjexyawaka sábado hohne hanjihohnewakapji hjihloka. Waneko hyopkaka rethaxyawakaplu Hoyakalu tokanu potukalu yonatkaluru.

¹⁷ Waneya renekka papel-mta Hoyakalu tokanu hinkakletatshrini Isaías-ni yonre steno. Hkoprakatkalo. Rukchiklu wane htshin-yonhaxyawaka:

¹⁸ “Hita rawa Hoyakalu Hiwejikaluru. Hnuretno nunkaklexyawakaplu Kihle piranalu potuko hiwekkaklewatatshri pirana hike mwikane yehiya Runkaklewjixno ruchoxikowakapna yine pirana kachitkalune tshinanu hiyrun-koxa himrekhale pirana nunkajyawakna mayhalene, ruchotkona salewnatshine,

¹⁹ nunkaklexyawak-koxlu Tsru Hixikatshriwa Hoyakalu rayinetene riwekkajinripatka mhale pirana.”

²⁰ Waneya Jesus hichyatatkalo papel-mta waneya reneklu hanjihohnewakapji kamrurewaxikatshri. Waneya htuplatatka. Ptowrunek-yine hanjihohnewakapji hwakanatatshine yopukhapotutlu.

²¹ Waneya hyinuwaka wan-tshinretna: — Xawakni hohne potuko rakanhatka xye tokantshi yonatkaluru hjemyawaka pixka.

²² Ptowru neruka halikakni htshinruna Jesus, rukchikhihlenutluna kihleru tokantshi Jesus hinkajyatkana. Wla htshinjekanatluna: — Hi he José tshinkaluru whenni wale?

²³ Waneya Jesus wan-tshinna: — Hix-hetko ptowrunekhi xye yapkaklu pirana htshinanno: “Kpinrewakleru, putskalajinwa.” Wla kox-hetko htshinanno: “Cafarnaum poktshi pkamhakanaxinri hewi koxa, ptshijne potuko, pkamhinixnaklu.”

²⁴ Wane htshin-koxa Jesus: — Halikaka wane ntshinhi. Hi satukna muphujewnakatuwa pirana hinkakletatshri hikchikhihlenutko waleko htshijneya.

²⁵ Hjemanru: Mitshikananu hinamtatshri pirana hinkakletatshri Elias-ni tshinkaluru klu papko rawna hipnahnurutatshrone Israel tshijneya. Waneklu papko hi rinnewjekanata Israel tshijneya mapa mhale hiyrunu seis ksuru pchinika. Waneya tsru natshi potuko retna wale tshijne hajene.

²⁶ Wanepnawaka hi satokna Israel tshijne hajero hipnahnurutatshro nwaka hyokanatka Elias-ni Hoyakalu tshinanuya. Seyni halikaka Sarepta tshinikowaka, Sidom tshijne hwatshri poktshi hajero hipnahnurutatshro tsonu Elias tyokananwakatka.

²⁷ Hiyrun-koxa Hoyakalu tokanu hinkakletatshrini Eliseu-ni tshinkaluru klu papko koxa yeyixlu mjemtshinotkotu himwatshine híxona Israel tshijneya seyni hi satuknako wanna hitskalakka waneklu. Naamã-ni tshinkalurni, Sírio-neru tsonupka hitskalakkatka waneklu papko.

²⁸ Waneya xye pirana hyijnakoxinixkana hanjihohnewakapji hwakanatatshine ramewpotutna.

²⁹ Waneya hpalnamtna. Poktshi maleka sreta ranikluna hipokananu. Wale poktshi maleka tenopjitawaka potuko ranikluna hitskata hyotkajyawakapluna.

³⁰ Seyni hixolune yine hanikajiteko hyapamta. Hyatka.

Kkamtshiteru Piranapni

³¹ Waneya Jesus jihlokamtlu Cafarnaum poktshi Galileia tshijne poktshite. Waneya sábado hohne rasruklewjeta hanjihohnewakapjiya.

³² Rimyekna rasruklewle tshinanu klu tshinanu rasrukna hatatjewa tsru towutatshri pixka rixa hasrukletna.

³³ Waneya kkamtshiteru koxa wane hwakanata hanjihohnewakapji. Waneya hsaplewata kkamtshiteru. Wla htshin-sapleta:

³⁴ — Ya! Kluhe pixannatkawu, Jesus Nazaré hajeru? Puna pumtukapyawakapwuhe? Nimatyi katyi pixa: Potukalyi Hoyakalyi!

³⁵ Seyni Jesus hi hinanchitlu. Waneya wane htshina: — Potshkepyi. Puchpakanutka wale maneya! Waneya kamtshi wanna hanikajite yawnakaklu kkamtshiteru. Waneya ruchpakamxyalu. Hi rumtukamtlu jeji.

³⁶ Waneya ptowrunek-yine himyeka. Hiyáhoni repomhakakna, wane htshinna: — Klunerni xye tokantshikaka? Xye jeji tsru hitakkaluruyma hiyrun-koxa tsru himukatluyma kamtshi ruchpakjixa. Hiyrunu hjemluna wale kamtshine htshinyawakna.

³⁷ Waneya hpohiwata Jesus psol-tshijne potuko wale tshijneya.

Pedro Himajiro Rutskalajyawaka Jesus Piranapni

³⁸ Waneya hanjihohnewakapjiya ruchpakamxinixka Jesus Simão Pedro tshinkalurupji hjihloka. Simão himajiro patshwapotuta waneya wala tshinanu ranjitluna.

³⁹ Waneya walastsi hyopkaka. Waneya ruchpakjixlu patshwalu. Tutuk-patshwalemtatka. Waneya waneklukawa tyotunotatka waneya tyomhatna.

⁴⁰ Waneya kayi rixinixka rimxijinixka tkatshi yeyixatshine ranikanwakatluna hiyrun-koxa ptowru hixatshri hahijewaktshi himwatshine. Waneya wanna ptowruneka himyo rutakhohota, rutskalakna.

⁴¹ Kamtshine koxa hixolune yineyma hwakanatatshine hichpakamtatka, hsaplewamtatkana. Wla htshin-saplemtna: — Pixni Cristo-yi, Hoyakalu Whenyi! Seyni Jesus hi hitshi yanumsaletna kamtshine klu tshinanu rimathetluna Cristo rixyawaka.

Jesus Yinuwaka Hinkaklewlexyawaka Piranapni

⁴² Waneya rumrekpiraxinixka, poktshi ruchpakamxyatka Jesus. Potshkewaka nwaka hyatka. Waneya yine hixolune yinuwaka hijhaletlu. Hyanwakatluna. Waneya rukchijinixkaluna htshipetmakluna wanna yehi hma muchpajyawakanupa.

⁴³ Seyni Jesus wan-tshinna: — Nujhalu nunkaklewaxyawak-koxa pimri poktshikakaya, Hoyakalu pohirewaxyawaka hinatshripa pirana. Klu tshinanu wale tshinanukni nuna.

⁴⁴ Hiyáhoni runkaklewakananumta hanjihohnewakapjikakaya Judeia tshijne hajerkakaya.