Lucas 3 - Bíblia

João Batista Tshinkaluru Hinkakle

¹ Quinze mhale pchinika hpohirewna romano-neru pohire Tibério tshinkaluru. Waneklukananuko koxa Pôncio Pilatos tshinkaluru towutjekanatlu Judeia tshijne. Herodes tshinkaluru towutjekanatlu Galileia tshijne hiyrun-koxa Herodes mole Filipe tshinkaluru Itureia tshinikowaka hiyrunu Traconites tshinikowak-koxa htowutjekanata. Lisânias tshinkaluru towutjekanatlu Abilene tshinikowaka.

² Anás hiyrunu Caifás tshinkalune kosekakanatna sacerdote-ne tshinkalune. Waneklu papko Hoyakalu henektokanutlu João tshinkaluru Zacarias tshinkaluru whene, popriwaka rawakanaxini João.

³ Waneya João tshinkaluru wenu Jordão sreta hyapa wale tshijne psoluka runkaklewtapyawaka Hoyakalu tshinyawaklu. Wla htshina: — Hehchinikanutanu hektunu tshinanu. Wan-hixko h-batiza-xikolupa hiyrunu hektuntshi hiknojiko Hoyakaluya.

⁴ Htshinyawak-potuko tokantshi yonatkaluru rixa hakanhaletatka hinamtatshri pirana hinkakletatshrini Isaías-ni tshinkalurni tokanu, wla tshina: “Kahnete poktshiri saplewaxikatshri tokanu: Halpokotanru Tsru Hixikatshriwa hatnu hapote. Hpotukatanru hatnu hapotkaka.

⁵ Ptowru hitskata hichyatko. Ptowru mriji kihle tshijiwaka rixko. Katpahapolkaka potukatko. Hiyrun-koxa kaploj-hapolu phayamta rixhapotko.

⁶ Ptowru neruka hetanru Hoyakalu kamrure, yine riwekkajyawakapa.”

⁷ Hixolune yine yanwakatlu João h-batiza-xikolupna. João wla htshinatkana: — Himnu kamaklewatatshri pixkalunhi. Kathe hinkakatkahi hapnokaxikolumkapa Hoyakalu hapnokaxyamkaphi hasujikatshinhi hixyawakatka?

⁸ Hekhixinwa hehchinikanutatshinhi hixyawaka kihleru kamhatshinhi hixyawaka. Hi hyinuwaka wla tshinkakletanu hixkakluko: “Hixni Abraão-ni klopichanwu.” Klu tshinanu nunkakhi Hoyakalu himukata hakanhakakletanru Abraão-ni klopichane xyekaka sotluya!

⁹ Klu tshinanu heptshi pixkalutu halpokotatka hahmunkaka hkastajyawakapa haté hitskihi potuko. Klu tshinanu ptowru hahmuna kihle sahiwle mixkatu kaykako. Tshitshmero ruknokko.

¹⁰ Waneya yine hixolune hepomhajekanatlu. Wla htshinjekanatna: — Klu wumukata kamhaleta xye himkaka tshinanu?

¹¹ Ruhjekakna, wla htshinjekanatna: — Hepi mkatshri himwatshri henekanru hike mimwakatu. Niktshi himwatshri hapikanru hike mnikkatu.

¹² Waneya satkaka jijhawenrukleru koxa hapoka. Waneya repomhaluna João. Wla htshinna: — Kasruklewakleru, klu wkamhanu hixa?

¹³ Waneya João wan-tshinna: — Hi hijhawenukjixikolu pso pnute hijhanu.

¹⁴ Hiyrun-koxa satkaka soldado hepomhalu: — Ha hixa? Klu wkamhanu? Waneya João wan-tshinna: — Hike yineru tiyirote hkonanu hipokananu. Hi hweyawyehitanunna yinni tiyiro himukata kaylexyawaka tshinanupa. Hiyrun-koxa hpoyahnutjetanru hwenuxikolu henekkoklunpatka.

João, Cristo Pirana Ruphujexyawaka Piranapni

¹⁵ Yine kahwaklurepotutatkalu. Ptowrunek-yine hihchinikanuyna ruchinikanuwyehitluna João, ho hiwekkaklewatatshri hinatshripaklahe ho hike.

¹⁶ Seyni João wan-tshinna yine ptowruneka: — Hita honhayma n-batiz-jethi. Seyni runanu hita yohnik-kahwakpiratkaluru. Hita hi tsru hixikatshriwano nkochpirojyawakaplu h-sapato-tetslu. Wale batiza-tanhi Hoyakalu Hiwejikaluruyma hiyrun-koxa tshitshmeroyma.

¹⁷ Ruplokapre himyo hwa hkotspalaxyawakaplu hitataji hipatayma. Rapatjetanru hitataji hihruko rutakanru seyni hipata hyoxikanu tshitshmeroya hikeklu hohne mnikawnakatuya.

¹⁸ Hiyrun-koxa hixo pimri piranayma ruykotna yine runkaklewaxini.

¹⁹ Seyni rapatlu phuru Herodes klu tshinanu hhanunrotlo himole Filipe tshinkaluru hnunro, Herodias tshinkaluro. Hiyrun-koxa rapatlu phuru Herodes pimri hixoluru hektutu hkamhaleru tshinanu.

²⁰ Wane pnutetka phuru Herodes hektut-potu hkamha klu tshinanu preso rutakjixlu João.

Jesus Batiza-xikolu Piranapni

²¹ Waneya João hali batiz-lexinixkana yine ptowruneka hiyrun-koxa Jesus h-batiza-tatka. Waneya ranjihohnekanaxiniwa Jesus tenhohne kotpukka.

²² Waneya Hoyakalu Hiwejikaluru motkokoji pixka rixa wale hohowaka hapokatshri. Waneya waneylu tokantshi tenhohneyalutu wan-tshinatshri: — Pixni noturyi nalukanruyi, wale poyikowkakno.

Jesus Hitsrukatenni Hiwakkaka Piranapni

²³ Waneya Jesus yinuwajinixkalu hkamrure psokaklu trinta mhaletkalu. José whene hikahwakkaluru, José hirutlu Eli.

²⁴ Eli tshinkaluru hirutlu Matate, Matate tshinkaluru hirutlu Levi, Levi tshinkaluru hirutlu Melqui, Melqui hirutlu Janai, Janai hirutlu José.

²⁵ José hirutlu Matatias, Matatias hirutlu Amós, Amós hirutlu Naum, Naum hirutlu Esli, Esli hirutlu Nagai,

²⁶ Nagai hirutlu Maate, Maate hirutlu Matatias, Matatias hirutlu Semei, Semei hirutlu José, José hirutlu Jodá,

²⁷ Jodá hirutlu Joanã, Joanã hirutlu Resa, Resa hirutlu Zorobabel, Zorobabel hirutlu Salatiel, Salatiel hirutlu Neri,

²⁸ Neri hirutlu Melqui, Melqui hirutlu Adi, Adi hirutlu Cosã, Cosã hirutlu Elmadã, Elmadã hirutlu Er,

²⁹ Er hirutlu Josué, Josué hirutlu Eliézer, Eliézer hirutlu Jorim, Jorim hirutlu Matate, Matate hirutlu Levi,

³⁰ Levi hirutlu Simeão, Simeão hirutlu Judá, Judá hirutlu Jonã, Jonã hirutlu Eliaquim,

³¹ Eliaquim hirutlu Meleá, Meleá hirutlu Mená, Mená hirutlu Matatá, Matatá hirutlu Natã, Natã hirutlu Davi,

³² Davi hirutlu Jessé, Jessé hirutlu Obede, Obede hirutlu Boaz, Boaz hirutlu Sala, Sala hirutlu Nasom,

³³ Nasom hirutlu Aminadabe, Aminadabe hirutlu Admim, Admim hirutlu Arni, Arni hirutlu Esrom, Esrom hirutlu Peres, Peres hirutlu Judá,

³⁴ Judá hirutlu Jacó, Jacó hirutlu Isaque, Isaque hirutlu Abraão, Abraão hirutlu Tera, Tera hirutlu Naor,

³⁵ Naor hirutlu Serugue, Serugue hirutlu Reú, Reú hirutlu Pelegue, Pelegue hirutlu Éber, Éber hirutlu Selá,

³⁶ Selá hirutlu Cainã, Cainã hirutlu Arfaxade, Arfaxade hirutlu Sem, Sem hirutlu Noé, Noé hirutlu Lameque,

³⁷ Lameque hirutlu Metusalém, Metusalém hirutlu Enoque, Enoque hirutlu Jarede, Jarede hirutlu Maalalel, Maalalel hirutlu Cainã,

³⁸ Cainã hirutlu Enos, Enos hirutlu Sete, Sete hirutlu Adão, Adão Hoyakalu whenni.