Lucas 24 - Bíblia

Jesus Hiwejyawakatnaka Piranapni

¹ Waneya hyinuwakle seman-hohne, yetshpotukawa yomletshi nwaka hyana. Raniklona phamluhalo hkamhahnapuxyaluna.

² Seyni retluna rerutkatka sotlu yomletshi hajeru.

³ Hjihlokyomletluna. Seyni hi rukchikmanetluna Tsru Hixikatshriwa Jesus-ni mane.

⁴ Hiyáhoni hkojwakahchinikanutna. Chinpotukawa hepi jejine katajiru mkatshri hitakatshine hakanhayehitna wannastsi hyopkakna.

⁵ Hpikatkana suxone. Tshiji hyohimhojitna. Waneya jejine mkatshri katajiru hitakatshine, wan-tshinna: — Klu tshinanhe hipnatshri hwawakle hijhiylu hiwekatshri?

⁶ Hi hewitkalu seyni riwekatnaka halikaka. Hichinkapanru runkajyapiranhi mitshikananu Galileia tshijne rawakanaxiniwa.

⁷ Wla htshinatkahi mitshikananu: “Jeji Whene tshinkaluru hijhalu renejikowakapa hektune myoya. Rujhalu ruylaxikowakapa cruz-ya. Waneya map-hohne rixinri rujhalu riwejyawakatnaka.”

⁸ Waneya suxone hichinkaplu Jesus tokanu.

⁹ Hiyáhoni yomletshi nwaka ruchpajyatkana. Xye pirana ptowruka runkakmakna onze Jesus hasruklene, pimrin-koxamka.

¹⁰ Suxone wannani Maria Madalena, Joana, tshinkalune hiyrun-koxa Maria tshinkaluro, Tiago tshinkaluru hinro. Nyi suxone, pimron-koxa wannaymalune xye pirana ptowruka runkakletna, onze jejine Jesus nurrene.

¹¹ Seyni nyi onze suxone yanumsalecha pixka rixa jemletluna. Hiyáhoni hi ralixatkana.

¹² Waneya Pedro palna, rasukanwakatlu yomletshi. Rujnoka. Retlu mkatshri sama tsonutka. Waneya hipji hsatokatka. Rimyekahchinikanuta xye pirana tshinanu.

Jesus, Hepi Rasruklene Yehi Rakanhiywakatnaka Piranapni

¹³ Waneyatnaka wale hohneko hepi pa poktshi nwaka yamtatshine, doze quilômetro pchinru Jerusalém poktshi, Emaús tshinikowaka.

¹⁴ Riynumsakakakananumtna ptowruka xye hiknohatshri pirana.

¹⁵ Waneya riynumsakakakananumxiniwana, repomsakakamxiniwana, Jesus hapokastsitna. Wannayma mnutkalu.

¹⁶ Rasruklene hetmaklu seyni kluneru tshinanukta hi rimathetluna katuktani.

¹⁷ Waneya Jesus hepomhana: — Klu pirana htshinkakakananumta hixkakluko hyanakananumxyawaka? Waneya rutuk-yanretatkana wamonuwhojitatshineko.

¹⁸ Waneya satu, Cleopas tshinkaluru wan-tshinru: — Jerusalém poktshi hajermakyi, seyni pixa tsonu hetko hi himatlu klu rixanatka Jerusalém poktshiya xye hohnekaka.

¹⁹ Waneya wale wan-tshinna: — Kluneru pirana? Waneya wanna wla tshinna: — Jesus-ni Nazaré poktshi hajerni pirana. Walenixkani jejni Hoyakalu tokanu hinkakletatshrini. Hiyrun-koxa ptowrunek-yine hetanuya kpixkonuru hkamrureya, htokanuy-koxa.

²⁰ Tsru hixikatshinwa sacerdote-ne, hiyrun-koxa wutsrukatene heneklu ruylaxikowakapa. Ruylatluna cruz-ya.

²¹ Seyni hixa kahwakmaklu walepnikni israel-nerune hepixatshripni hkamnitjeneya. Waneya xawakni, map-hohne pnutetkani wan-rixinrinatka.

²² Waneya xawakni pimrone suxon-koxa, hixaymalone himyekakahchinikanutwu. Yetshpotukawa yomletshi hyana.

²³ Seyni hi rukchikmanetluna. Waneya hsatokna. Hiwejikalune Hoyakalu towrene tenhohne hajen-hima retna. Runkakhimatkanna Jesus hima hiwekatnaka.

²⁴ Wane hyapna pimrin-koxa hixaymalune yomletsh-yehi. Htshinakanaxyawak-potukna suxone rixa hetletkoxna wanna. Seyni Jesus potuko hi retna.

²⁵ Waneya Jesus wan-tshinna: — Ha, mimatjemkanhi. Hi kahchinikanhi halixhapkaxyawaka ptowru potuko pirana Hoyakalu tokanu hinkakletatshine tshinjekanaxyawakhi!

²⁶ Hi he rujhalu Messias tshinkaluru hsalewniywakapa waneya hyoptoxyawakaplu tsru pixkontshi walenuko?

²⁷ Waneya hyinuwaka hinkakletna Hoyakalu tokanu yonatkaluru pirana, Moisés yonreru hiyrun-koxa Hoyakalu tokanu hinkakletatshine yonrekananuko runkakna wane htshinakanaxyawakna waleko hipirana.

²⁸ Waneya rapokastsitluna poktshi hyamxyawakna. Walemka pnute yapirata.

²⁹ Seyni wanna tshipetlu. Wla htshinruna: — Hewipyitshi. Kayitkani, hoyetshnopatkani. Hiyáhoni Jesus jihlokapjitna. Wanna yehi rutukatka.

³⁰ Waneya nikawakakwa htuplata. Pão hkochtsheka waneya hpoyahnutlu Hoyakalu pão tshinanu. Waneya hjiknajrotlu pão. Waneya reneksatna.

³¹ Waneya hyopukhatatkana hiyáhoni rimathetluna. Seyni wale hamhamtatka. Hi retluna.

³² Waneya wane htshinkakna wannakakluko: — Hi he hamhajitaknawu riynumsakanaxinixkawu hatnu hapoya, runkakakanaxinixkawu Hoyakalu tokanu yonatkaluru tshinpiraxyawaka pirana?

³³ Waneya hpalnahapkatna. Hsatokanwakatluna Jerusalém poktshi nwaka. Wane hyoptoxyaluna Jesus rasruklene onze, wannaymalun-koxa rimapatjejekanatanune.

³⁴ Wane htshinjekanaxyawakna: — Hehe, halikakni, Tsru Hixikatshriwa Jesus hiwekatnaka! Simão tshinkaluru hetlu!

³⁵ Waneya wanna hepi jejine koxa hinkakletlu riknohjerna pirana hatnu hapoya. Runkakletkoxluna Jesus pão hjiknajroxiniklunutka rimathetluna Tsru Hixikatshriwa Jesus-ni.

Jesus Rasruklene Hakanhayehixyawaka Piranapni

³⁶ Waneya wane htshinakanatawana, xye piranaya, Jesus wanna hanikajite hyopkakatka. Waneya wane htshinna: — Kihle hchinikanuphi.

³⁷ Seyni wanna himyekpotuta. Hpikpotutatkana. Wanna kahwakatkalu samentshi rexyawakna.

³⁸ Seyni wale wan-tshinna: — Klu tshinanhe hkojwakahchinikanuta? Kluneru tshinan-koxhe wan-hixahchinikanhajita?

³⁹ Hetamyotanno hiyrun-koxa nojixi. Hitakni. Hkamrukanno, himathexyawakapno. Klu tshinanu samentshi hi kahitlu, hi kahaplu. Hixa hi hetno wane nixyawaka.

⁴⁰ Rali wan-tshinretatka, rekhitna himyo, hijix-koxa.

⁴¹ Seyni hi ralixluna tsru hpoyikowle tshinanna, hiyrun-koxa rimyekahchinikanre tshinanna. Hiyáhoni Jesus hepomhana, wla htshina: — Hi he waneyhi pa hixanu nikkaluru?

⁴² Waneya wanna heneklu psoji chima jimkaluro.

⁴³ Jesus yoptotlo waneya wanna hetanuko hniklo.

Hoyakalu Tokanu Ruphujexyawaka Jesus Piranapni

⁴⁴ Waneya Jesus wan-tshinna: — Nimwakanaxiniwahi nunkakatkahi raluk-hakanhaleta ptowru potuko hita pirana yonatkaluru, Moisés yonreruya, Hoyakalu tokanu hinkakletatshine yonreya hiyrun-koxa Salmos-mta yonatkaluruya hita pirana.

⁴⁵ Waneya hkotpukahchinikanutna rumukata himatjemletluna Hoyakalu tokanu yonatkaluru.

⁴⁶ Waneya wane htshina: — Hyonpiranatka Messias tshinkaluru haluka salewnaleta seyni map-hohne rixinripa riwekanutnaka hipnatshine tskalaya.

⁴⁷ Hiyrun-koxa ptowru tshijneko runkaklexikotka hehchinikanru pirana hektuntshi hiknojikowaka pirana, wale hiwakaya. Jerusalém poktshi hyinuwaka hinkaklewlexini.

⁴⁸ Hixakni xye pirana hiphujetatshinephi.

⁴⁹ Hiyrun-koxa hitakni yokananwakatanhi Nuru hinkaklexyahi. Seyni hewitshi poktshi hitukanu pixkontshi klu papko hapojini, tenhohne hichpajikatshri, hixa nwaka hapokatshripa.

Jesus Tenhohne Yinri Piranapni

⁵⁰ Jesus hanikatkana Jerusalém poktshi kahnete Betânia poktshistsi potuko ranikatkana. Waneya hyotukamyota. Ruhlewahchinikanyehitna.

⁵¹ Waneya wan-rixakanatawa, ruhlehchinikanyehitka pchinikna, wanna yehi hkochtshejikatka. Tenhohne ranikkatka.

⁵² Rimalwutluna waneya hsatokna Jerusalém poktshi nwaka tsru poyikowluyma.

⁵³ Ptowru hohneko Hoyakalupji rawna. Hoyakalu rimalwutna. Hpoyahnutluna.