Lucas 23 - Bíblia

Pilatos Yehi Ranijyawakluna Jesus Piranapni

¹ Waneya hpalnatkana wanna ptowruneka, waneya phuru Pilatos tshinkaluru nwaka ranikluna Jesus.

² Waneya hyinuwaka jihyehretluna, waneya wane htshinyehitluna: — Xye jeji wukchika winerune pupjekakatshri. Hyokchajetna yine phuru César hma wenuxyawakanupna. Hiyrun-koxa wale hima Messias-ni, Pohirtshini.

³ Waneya phuru Pilatos wan-tshinru: — Pixlahe judeu-nerune pohiryi? Waneya Jesus hihitlu, wane htshina: — Pixako wan-tshina.

⁴ Waneya phuru Pilatos wan-tshinna tsru hixikatshinwa sacerdote-ne hiyrun-koxa pimrine yine: — Hi psojikna hikolukanuwnalu nukchika xye jeji tshinanu.

⁵ Seyni wanna mixkowa yanumletatka, wla htshinna: — Xye komyekahchinikanutna yine. Judeia tshijne psoluka hya rasruklewle. Galileia tshijne hyinuwajya. Xawakni hewi rapokatka.

⁶ Waneya hjeminixkalu phuru Pilatos, Galileia tshijne hkochtshejyawakna, repomhana ho Galileia tshijne hajerlahe xye jeji.

⁷ Waneya rimaxinixka phuru Herodes hinoxyawaka sreta hajeru rixyawaka Jesus, phuru Pilatos yokanatlu phuru Herodes nwaka. Klu tshinanu phuru Herodes koxa Jerusalém poktshi rawakanata waneklu papko koxa.

Herodes Yehi Ranijyawakluna Jesus Piranapni

⁸ Waneya phuru Herodes, Jesus rexinixka hpoyikowpotuta. Klu tshinanu hix-hohne tshinanu raluk-hetletmaklu Jesus. Klu tshinanu hixo pirana hjemyehitlu Jesus. Hiyáhoni hiyakolumka raluk-hetleta, Jesus kamhalerupa.

⁹ Waneya phuru Herodes hixo hepomhalu rixmaklu Jesus. Seyni Jesus hike tshinru.

¹⁰ Waneya tsru hixikatshinwa sacerdote-ne, hiyrun-koxa kasruklewaklerune hinanchitkaluru pirana hasruklewatatshine yotunota. Hjihyehitatkaluna Jesus. Hipokananu hyanumatna.

¹¹ Waneya phuru Herodes, soldado-neyma heyiklu. Rapnokatluna. Waneya mkatshri kihler-potuko hmakatluna Jesus. Wan-hixatshriko phuru Pilatos nwaka ranikluna hiyrunukotnaka.

¹² Wale hohnetka rimatletkakatkana phuru Herodes hiyrunu phuru Pilatos-yma. Klu tshinanu mitshikananu hkamnikakjekanatna.

Ho Jesus Ho Barrabás Piranapni

¹³ Waneya phuru Pilatos hapatjekjixna tsru hixikatshinwa sacerdote-ne, tsrukakalune judeu-ne hiyrun-koxa yine pimrine.

¹⁴ Waneya wla htshinna: — Hixa xye jeji hanikanwakatno, yine himtukahchinikanutatshri phuta. Seyni hixa hetanuko nepomsatlu. Hi satuknako jikolukanuru nukchika xye jeji hjihyehixyalu tshinanu.

¹⁵ Phuru Herodes koxa hike hima rukchika jikolukanuru wale tshinanu. Klu tshinanu hsatkakjixlu hixa nwaka. Halikaka hike hkamha ruylaxikowakapa.

¹⁶ Hiyáhoni nkotshipjejixachatanru. Waneya wan-hixatshri nyakjixanu.

¹⁷ Tsru niklu hohne tshinanu Phuru Pilatos hijhalu satu preso hajeru hichoxyawaka, yine nurrer-potuko.

¹⁸ Waneya ptowrunek-yine yinuwaka saplewleta: — Pixrikkakanru xye, seyni Barrabás tshinkaluru puchoxinwu!

¹⁹ Barrabás preso hitakka klu tshinanu poktshi tsrukakalutene hkamnikanaxyawaka tshinanni. Ruylale tshinanu kapna rutakka.

²⁰ Seyni Pilatos haluk-hicholetmaklu Jesus. Hiyáhoni yinemka hixolune repomhatnaka.

²¹ Seyni wanna wane pnute rixa saplewlepotutna: — Cruz putakanru! Cruz putakanru!

²² Waneya phuru Pilatos wan-tshinna map-kata rixinri: — Seyni klunerhe hektutu hkamha xye? Hi satukna jikolukanuru nukchijyalu rupninripa. Hiyáhoni nkotshipjejixanru waneya wan-hixatshri nuchotanu.

²³ Seyni wanna hixko rixa saplewlepotuthonukna. Ranjitluna cruz rutajikowakatka. Hiyáhoni wanna tokanu hallirewata.

²⁴ Waneya phuru Pilatos, Jesus ruylakjixa, ranjixyawakna yine pixka.

²⁵ Ruchoxyana jeji kkamnirewakleru, hiylalu tshinanu preso hitakkaluru. Ranjixyawakna yine pixka rixyana. Hiyahokni renekna Jesus wanna ralujyawakna hkamhiywakapna Jesus-yma.

Jesus Calvário Tshinikowaka Ranjikowaka Piranapni

²⁶ Waneya ranikakanaxinixkaluna Jesus hatnu hapoya, satu jeji yoptotna Simão tshinkaluru Cirene poktshi hajeru. Campo ruchpakamxya. Hkachitluna. Waneya cruz rutjikakluna, Jesus hatjini ranijyaplu.

²⁷ Hixolune yine homkahimtlu. Wannayma hyana suxone, kaheknanuwatatshrone, wamonuwatatshrone Jesus tshinanu.

²⁸ Waneya Jesus hiprotakyehitna suxone. Waneya wane htshinna: — Jerusalém poktshi hajerone hi hitshiyahatanno hita. Seyni halikaka htshiyahatanu hixako htshinanu hiyrun-koxa hixako hwuhenene tshinanu.

²⁹ Klu tshinanu halikaka rapokhohnetanu wla htshininri hohnepna, hihle hchinikanyehitkalunepni mwuhenewatkane, mmatuwhenetkane hiyrun-koxa tnutshkaka machitkotuwa.

³⁰ Waneklu papkopa hyinuwaka wan-tshinretanruna teno mrijiwaka: “Hix-hoho pujrukanu.” Hiyrun-koxa wane htshinanru mtseru pjitatu: “Pyohimatanunwu.”

³¹ Klu tshinanu rapnokaxinipnona hita, herot-muna pixkalutukno, klunerhe hkamhikatka popri rixinixka?

³² Waleyma ranikka koxna hepi hektutu kamhatshine, Jesus-yma ruylaxikowakapna.

Jesus Cruz Hitajikowaka Piranapni

³³ Waneya rapokluna Calvário tshinikowaka. Wale tokantshi yokakkaluru, yineru jiwuta pixkalutni. Wane potuko cruz rutajyaluna Jesus. Hiyrun-koxa hektutu kkamhaklerune, hepi wan-rutakna. Satu Jesus potukle sreta rutakka. Satu pa sta sreta hitakka.

³⁴ Waneya Jesus wan-tshina: — Nuru, pamtakahchinikanyehitanru nyi yine hektunu. Klu tshinanu hi rimatna klukta hkamhana. Waneya hiknokkaluru ruknokna rimaxyawakapna katu kayatanru Jesus-ni mkalu.

³⁵ Retakanatluna Jesus. Tsrukakalune judeu-ne wannaymalune koxa heyiklu, wla htshinna: — Pimrine riwekkaka, rumukaxinipa riwekkajinwa wale nanuko, halikaka Messias tshinkaluru rixinpakni, Hoyakalu nurreru.

³⁶ Soldado-ne heyik-koxlu. Jesus-stsi rapokamtna, renekmakluna kapsahalu.

³⁷ Wla htshinruna: — Judeu pohire pixini halikaka, pkochpajinwa cruz-ya!

³⁸ Cruz hoho teno nwaka raw-yonhata, Jesus jihyehixikolu pirana. Wla htshin-yonhata: “Xye judeu-ne pohire.”

Hepi Hektutu Kamhatshine Piranapni

³⁹ Waneya satu wanna hepi hektutu kkamhaklerune, Jesus-yma cruz hitakkalune, heyik-koxlu Jesus: — Hi he Messias-yi? Hiyáhoni piwekkajinwa pixa, hiyrunu hix-koxa piwekkakanu.

⁴⁰ Seyni satu hiykotlu, wane htshinru: — Hi he Hoyakalu ppika? Hixa ptowrunekwu hapnokatkalunwu pixkakaklunwu.

⁴¹ Seyni hix-hepwu halikaka wane potuko wixka. Klu tshinanu wkamrure hapnute pixkalutu potuko wyoptota. Seyni xye hike hektutu hkamha.

⁴² Waneya wane htshina: — Jesus, puchinikanunno hitni, ppohirewaxyawaka papojinipa.

⁴³ Waneya Jesus wan-tshinru: — Halikakni wane ntshinyi. Xye hohneko hitaymapyi kihlewak-potuko, tenhohne wyanu.

Jesus Hipninri Piranapni

⁴⁴ Waneya hanikaj-hohnestsi rutshpokatka. Hiyáhoni psol-tshijneka rutshpokapya mapa hora.

⁴⁵ Waneya mkatshri sama, Hoyakalupji hwatshrini hiskakana hepi tshraj-samanru.

⁴⁶ Jesus hipokananu saplewatatka: — Nuru, pimyo nutaklu niwejinri. Waneya rali wan-tshinretatka rupnanatka.

⁴⁷ Waneya romano-neru soldado-ne pohire rexinixkalu, wan-rixikowaka Jesus-ni, Hoyakalu rimalwutatka, wla htshina: — Halikakni xye jeji honnira, jeji potukalni.

⁴⁸ Hiyrun-koxa ptowrunek-yine, wane hapatjexikatshine, hetapatshine, rexinixkaluna wan-rixikowaka Jesus-ni, rutpestaxnawana. Waneya hsatokna.

⁴⁹ Hiyrun-koxa ptowruneka rimatletanune suxon-koxa romkahitjene Galileia rumuchpajinine, hyotunotna howukaya. Retakanatluna xyekaka.

Jesus Kapnaxikolu Piranapni

⁵⁰ Wanekananru satu jeji José hiwakatletatshri. Wale tsru jemahchinikankakatshine yehi hajerni. Hiyrun-koxa jejni kchinikanuru, potukalu.

⁵¹ Wale honra hi hehe htshinatkana pimrine repirene hijhahchinikanutatshineya Jesus jihyehixikolu piranaya. José tshinkaluru Arimateia tshinikowaka hajerni, judeu poktshi. Hiyrunu Hoyakalu pohirewaxyawaka kahwakatshrini, wale koxa.

⁵² Xye jeji Pilatos nwaka hya. Jesus-ni mane ranjitlu.

⁵³ Waneya José tshinkaluru Jesus-ni mane hkochtsheka cruz-ya. Waneya mkatshri sama, linho sama, ruwtoklu. Waneya kapna, sotlu jitoxikolu hipjitaya, rutakmanetlu Jesus-ni. Satukna mutajikowakanuwa rutaklu.

⁵⁴ Wale hohne halpokotkalur-hohneni. Hiyrun-koxa hi howukatkalu hapnanuxikalur-hohne hyinuwajyawakapa.

⁵⁵ Hiyrunu suxon-koxa, Jesus himotsatatshine, Galileia tshijne rumuchpajinine, retkapnatkotapluna. Retkoxluna hanu potu rixa kapnakota Jesus-ni mane.

⁵⁶ Waneya hsatokatkana. Ralpokotluna phamlu pahiru hiyrun-koxa phamluhalo. Seyni rapnanutatkana hapnanuxikalur-hohne Moisés-ni hiykole yonatkaluru tshinyawaka pixka.