Lucas 22 - Bíblia

Hjemahchinikankakyehitluna Jesus Ruylaxyawakapluna Piranapni

¹ Waneya hi hix-hohne mahatatka Páscoa hohne tshinkaluru rexyawakapa. Waleni pão myapjetu nijikolu hohne.

² Hiyáhoni tsru hixikatshinwa sacerdote-ne hiyrunu kasruklewaklerune hinanchitkaluru pirana hasruklewatatshine hijhahchinikanuta hanu rixa himukata hiylaletanruna Jesus.

Judas Tshinkaluru Kamnixyawaklu Jesus Piranapni

³ Waneyakni tsru kamtshi Satanás jihloklu Judas tshinkaluru. Hyokle hiwakni Iscariotes. Judas tshinkalur-honra satu doze Jesus hasrukleru.

⁴ Judas yatka, riynumsaxyawakapna tsru hixikatshinwa sacerdote-ne hiyrun-koxa Hoyakalupji hinotatshine hanu potu rixa hiphujetletanru Jesus wanna yehiya.

⁵ Wale hjeminixkana poyikpotukna. Waneya tiyiro renekpiratluna Judas.

⁶ Waneya Judas hinkakletlu Jesus renejyawakapna. Hiyáhoni rujhalu hiklukta hpoyaho hekhiretanna, hixolune yine himnanhinri papko Jesus rekhixyawakapna.

Jesus Páscoa Hohne Hichinijyawaka Pirana

⁷ Rapokatka pão myapjetu hnikjexinrina hohne, carneiro-ne ruylajexinrina judeu-ne Páscoa hohne ruchinikjexinrina hohne.

⁸ Waneya Jesus yokanatna Pedro, João tshinkalune, wla htshinatkana: — Hajewa. Halpokotanru hixa tshinanupa Páscoa hohne nikle wnijyawakapa tshinanu.

⁹ Waneya repomhaluna: — Hanhe paluka wutajyawaklu?

¹⁰ Waneya Jesus wan-tshina: — Tsru poktshi hjihlojinipa wane hyoptoxinri satu jeji honha hachhaji hanijikatshri. Homkahitanru. Hanupjiktako hjihlokamxini jeji wane koxa hjihlokanu.

¹¹ Waneya wla htshinanru kapjiru: “Kasruklewakleru hepomhakjixyi: Hanhe rawa hihruko hita, nasrukleneyma himukata niklexyawakapa Páscoa hohne tshinanupa?”

¹² Hiyáhoni wale hekhitanhi tsru hihruko pantshi hohwaka hwatshri, ralpokotka ptowruka hwiywaka. Wane halpokoxini.

¹³ Waneya wane hyana. Waneya rukchikluna Jesus tshinyawaka pixka potuko. Waneya ralpokotluna hniklerupna Páscoa hohne kayno hnijyawakapna.

Jesus Hipninri Yapkakle Piranapni

¹⁴ Waneya rapokpapkoluxinixka, Jesus mesa htuplata hnurreneyma.

¹⁵ Waneya wla htshina: — Naluk-himinkalepotuthi xye Páscoa hohne, nsalewninri wkatanuko.

¹⁶ Klu tshinanu halikaka wane ntshinhi hikeklu hohne nnikanru xye Páscoa hohne tshinanupa haté rakanhanu Páscoa hohne potu Hoyakalu pohirewaxyawakaya.

¹⁷ Waneya copa stono hkochtsheka. Hpoyahnutlu Hoyakalu. Waneya wla htshina: — Xye copa hyoptotanu. Himurkakanu.

¹⁸ Klu tshinanu wane ntshinhi: Hi nuranutnaklu xye vinho-ha haté rapojinipa Hoyakalu pohirewaxyawaka.

¹⁹ Waneya pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina: — Xyeni hatatjewa nomane. Hixa tshinanu renekka. Xye pixkalutu hkamhajetanu hita hichinijikolupa.

²⁰ Waneyatnaka rali niklexinixkana waneko pixka rixa, copa stono hkochtsheka, waneya wla htshina: — Twu copa stonha nunkakletleru, waleni herotu nohraha piranni. Xye nohraha hixa tshinanu hiyokkalurupa.

²¹ Seyni hetanu! Hewitkalu nkamnitjerupa! Hitayma hewi nikjexikowaka rawa.

²² Klu tshinanu Jeji Whene tshinkaluru halikaka hipnanu Hoyakalu hixahchinikanuxyawaka pixka. Seyni hektu potlu wale jeji, Jeji Whene tshinkaluru kamnitatshri!

²³ Waneya hyinuwaka hepomhakakletna wannakakluko, kathe xawaka kamnitanru?

Katpothe Hijhakaluru

²⁴ Seyni Jesus hasruklene hihjekaka wannakakluko katpotnihe hijhakaluru.

²⁵ Hiyáhoni Jesus wan-tshina: — Phurune xye tshijne hajene towutjetna yine. Hiyrun-koxa towutatshine ralukluna kihlewaka htshinanwakaxikowakna.

²⁶ Seyni hixa hi wan-hixanu. Seyni hijhakalur-potni mujhakot-potu hikahwajikatshriwa. Hiyrun-koxa tsru towutatshri hijhalu towrertshi pixka rixyawaka.

²⁷ Klu tshinanu katpothe hijhakaluru? Ho nikjexikowaka tuplatatshri ho nijittshi hitakatshri? Hi he nikjexikowaka tuplatatshri potu hijhakaluru? Seyni hix-yehiya towrertshino Hita.

²⁸ — Hixa himwatkano ptowruka nsalewnale tshinanu.

²⁹ Hiyáhoni towuwlu, Nuru henejyano pixkalutu, wale towuwlu pixkalutu nenekanhi hixa.

³⁰ Halikaka himinkanno, himuranno nikjexikowakaya npohirewaxyawaka hwatshri. Hiyrun-koxa phuru tuplawakle htuplatanu hikolukanuwnakakanna israel-nerune doze ptohkakapni.

Jesus Hinkaklu Pedro Wkatakluyakawa Pirana

³¹ Waneya Jesus wan-tshina: — Simão, Simão. Hetanu, Tsru kamtshi Satanás-mka halukyi pixa. Raluk-hixirikletmakyi hahosu hixirijikowaka pixka.

³² Seyni nanjihohneyehityi palixle hma mahaxyawakanupa. Pehchinikanuxinpatka pmixkowkakahchinikanutanna xako Hita tshinanu pmoletanune.

³³ Waneya Simão Pedro wan-tshinru: — Tsru Hixikatshriwa, halpokotatshrino preso nutajikowakapa pixayma. Haté pixayma nupniywakapa halpokotatshrino.

³⁴ Waneya Jesus wan-tshinru: — Halikaka wane ntshinyi, Pedro. Xye yetshno hma yanumatkanuklunuwa patlapa hepi kata, pixa map-kata pweyawatanu. Pma mimatletanutu ptshinanno.

Hepi Yohlolewapi Piranapni

³⁵ Jesus wan-tshinatnakna: — Pa kata mitshi nyokanathi tiyiro manikkanhi, tsapantshi, sandalha koxa manikkanhi. Kluhe mitshi hmahaxyatka? Waneya wanna wan-tshina: — Hike wmahaxyatka.

³⁶ Waneya Jesus wan-tshinna: — Seyni xawakni wane ntshinhi, tiyiro mapa himwatshri ranikanru. Hiyrun-koxa tsapantshi himwatshri, ranikanru. Yohlolewapi mimwakatu, ruchankanru himkalu, yohlolewapi ranjixyawakapa.

³⁷ Klu tshinanu halikaka wane ntshinhi: Xye nopirana, yonatkaluru Hoyakalu tokanuya haluk-hiphujewnaletanu hitayma. Wla htshina yonatkaluru, nopirana: “Hektutu kamhatshine yehi nwanu.” Xye tokantshi yonatkaluru hitayma ruphujewnanu.

³⁸ Waneya rasruklene wan-tshina: — Tsru Hixikatshriwa petanu. Hewitkalu hepi yohlolewapi. Waneya Jesus wan-tshina: — Hehe hpoyahota.

Jesus Himriji Oliveiras Tshinikowaka Hyiywaka Piranapni

³⁹ Waneya hyatka Jesus. Himriji Oliveiras tshinikowaka hya, rixjexyawaka pixka. Rasruklen-koxa homkahitlu.

⁴⁰ Waneya wane rapojinixkana, Jesus wan-tshinna: — Hanjihohnetanu hmallixikowakanupa.

⁴¹ Waneya pnutejiji hya ho trinta metro pchinrahe. Hyoptsojita waneya hyinuwaka hanjihohnereta.

⁴² Wla htshina hanjihohnereta: — Nuru! Palujinipa putneprikkajinno twu copa salewaktshi yehi. Seyni hi hitako nalujyawaka pkamhanu halikaka.

⁴³ Satu hiwejikaluru Hoyakalu towreru tenhohne hajeru hiphujewnayehitlu. Hmixkowkaklu.

⁴⁴ Jesus salewnahchinikanuta tsru potuko hiyáhoni hmixkowa hanjihohnereta wane pnute. Ruhkokha hrahtshi pixka rixa. Rutspihle tshiji rapoka.

⁴⁵ Waneya rali hanjihohnerexini, hpalna hsatoka rasruklene nwaka. Retamtna himkatshine. Hwamonuymana.

⁴⁶ Waneya wane htshinanna: — Haklu tshinanhe himkakanata? Hpalnanu. Hanjihohnetanu hmallixikowakanupa.

Jesus Kachixikowaka Piranapni

⁴⁷ Hyanumakanatawa Jesus runatkana hixolune yine. Judas tshinkaluru, satu doze rixinri, kosekamtna hixolune yine. Waneya rapokastsitlu Jesus ramluxyawakaplu.

⁴⁸ Seyni Jesus wan-tshinru Judas: — Judas, pkamnitluhe Jeji Whene satu hamluruyma?

⁴⁹ Waneya Jesus-ymalune rexinrina riknohjerutka wane htshinruna: — Tsru Hixikatshriwa, yohlolewaplahe wustaklewaxini?

⁵⁰ Waneya satu repirna kastakjepitlu tsru sacerdote towrer-jepi. Hkastaklu hpotukle jepi.

⁵¹ Seyni Jesus hitukjixna, wla htshina: — Hitshi hi wan-hixanu. Waneya hkamruklu hijepi hwakanaxyawaka. Waneya ruhlewata.

⁵² Waneya Jesus wan-tshinna tsru hixikatshinwa sacerdote-ne, Hoyakalupji hinotatshine chefe-tene, tsrukakalune judeu-ne koxa hkachpiratjene: — Ha hixa wkata hina yohlolewapikakayma, hahajekakayma koxa hkachixyawakapno? Hatatjewa katshowhurlanohe?

⁵³ Hixayma nwakanata ptowru hohneruka. Hoyakalupji nasrukjekanaxyahi. Seyni hi hkachitno. Seyni xawakni hipapkolutkani Hoyakalu hitshixyawaklu hixa tshinanu. Xawakni pixkontshi mapchahawaka hwatshri papkolni.

Pedro Wan-tshina Hi Rimathetlu Jesus Piranapni

⁵⁴ Waneya hkachitluna Jesus. Ranikluna tsru sacerdote-pji nwaka. Seyni Pedro hohatjini hwamta romkahyehitlu Jesus.

⁵⁵ Waneya hiputu hanikajite hpawatna, rituplakakna. Waneya Pedro tshinkalur-koxa wannayma htuplata.

⁵⁶ Seyni sato towretshro hetlu Pedro tshitshmero rolkakanaxyawaka. Tyopukhatlu, waneya wane ttshina: — Xye jeji koxa Jesus-ymakakalutu.

⁵⁷ Seyni wale weyawata, wane htshina: — Suxo, hi koxa nimathetlu.

⁵⁸ Waneya pchini hohnejiji satutnaka hetlu waneya wla htshina: — Pix-koxa satu wannaymalutyi. Seyni Pedro wan-tshinru: — Jeji, hita hi wannaymalutno.

⁵⁹ Waneya satu hora hetko hiknohatka waneya satu hipokananu wan-tshinru: —Ha hi wkaheklu, wimatlu xye jeji satu Jesus-ymalutni klu tshinanu wale Galileia tshijne hajerni.

⁶⁰ Waneya Pedro wan-tshinru: — Jeji, hi nimata klukta ptshina. Waneya waneklukawa potuko, hyanumaxiniwa Pedro, patlapa yanumatatka.

⁶¹ Waneya Tsru Hixikatshriwa Jesus heknokyehitlu Pedro. Waneya Pedro hichinkaplu Tsru Hixikatshriwa Jesus tokanu, htshinakanaxyawaklu: “Xawakni hma yanumatkanuklunuwa patlapa, pixa map-kata hi pimathetno ptshinanu.”

⁶² Waneya Pedro wane hichpajya, kahnete hya. Waneya hyinuwaka tshiyahlepotuta.

Soldado-ne Hapnokaxyawaklu Jesus Piranapni

⁶³ Waneya soldado-ne Jesus kachitatshine yinuwaka heyikletlu. Ruylakluna.

⁶⁴ Ruchyahojitluna. Waneya repomhaluna. Wla htshinna: — Pmetanutu punkaklewatanu, kathe hiylakyi?

⁶⁵ Hi heppik-pirana htshinruna, hektuwaka potuko htshinruna.

Tsrukakalune Jemahchinikankakyehixyawaklu Jesus Piranapni

⁶⁶ Waneya hohi rixinixka rapatjetna tsrukakalune judeu-ne, tsru hixikatshinwa sacerdote-ne, kasruklewaklerune hinanchitkaluru pirana hasruklewatatshin-koxa. Waneya ranikjixluna Jesus jemahchinikankakjexikowakaya, judeu chefe-tene hapatjewakle.

⁶⁷ Waneya repomhaluna Jesus, wane htshinna: — Punkakanwu. Pixlahe Messias tshinkaluryi? Waneya wale wan-tshinna: — Hehe ntshininiphi hi hetko halixanno.

⁶⁸ Hiyrun-koxa hixa pa pirana nepomhiniphi hi hetko hihitanno hita.

⁶⁹ Seyni xawaknikotka Jeji Whene tshinkaluru, Hoyakalu ptowru potuko himukatatshri potukle sreta htuplatanu.

⁷⁰ Waneya wanna ptowruneka hepomhatkalu: — Hiyáhoni, pixlahe Hoyakalu Whenyi? Waneya wale wan-tshinna: — Htshinyawakno, hitakni.

⁷¹ Waneya wanna wan-tshina: — Hi rujhatkalu hiphujtatkaluru wane pnute. Hixako wjemlu waleko htokanu, hikolujyawakatkalu.