Lucas 21 - Bíblia

Hipnahnurutatshro Hike Mwikato Henekachle Piranapni

¹ Waneya Jesus hislahakanatna phurune henekachal-paji hitak-tiyirotetatshine.

² Hiyrun-koxa retlo sato hipnahnurutatshro hike mwikato, tutaklo tiyiro seyojiji hepi proji.

³ Waneya Jesus wla tshina: — Halikaka wane ntshinhi, twu hipnahnurutatshro hike mwikato pimrine yohnik-tutaka wala.

⁴ Klu tshinanu nyi pimrine hixetatshro tsonu rutakna henekachawaka Hoyakalunupa. Seyni wala, hike mwikato, teneklu psoluka timwakanatanru, tyoptojetanru tenekatka.

Jesus Himatahnaputlu Hoyakalupji Kopalaxikowakapa Piranapni

⁵ Waneya satkaka Hoyakalupji pirana htshinakanatna. Hi pa hihlenukananru pantshi sotlukaka kwenur-koxa hewi, hiyrunu henekachlukaka Hoyakalupji henekkaluru. Waneya Jesus wla tshina:

⁶ — Rapokpapkoluxinipa xyekaka ptowruka hetleru hkoptalhako hi satukna sotlu hwahohokakanu.

Salewaktshi, Kojwaklewatatshri Piranapni

⁷ Waneya repomhatkaluna Jesus, wla htshinna: — Kasruklewakleru, hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka?

⁸ Waneya Jesus hihitna, wla htshina: — Xakoka hike yokwijetanhi. Klu tshinanu hixo hiphujewnanu hita hiwakaya wla tshinatshripa, “Hita Cristo-no”, ho, “rapokpapkolutatka”. Seyni wan-tshinatshri hi homkahitanru xako.

⁹ Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.

¹⁰ Waneya xye koxa htshinatkana: — Pa neruymako hyahotkakanu satu neruko. Pa tshijneko yahotanru satupni.

¹¹ Hix-poktshi hiyolikanu. Natshipni. Yeyixlukakapni. Hetkalurkaka himyekaklewatatshripni, tsru hetkalurkakapni tenhohneya.

¹² — Seyni xye ptowruka hnapu, preso hitakko, hsalewnakakko. Hanjihohnewakapjikaka hajene henekko, hjemahchinikanyehitko waneya preso hiknokko. Tsru hixikatshinwa hiyrunu tsrukakalune nwaka hanikko hita hiwaka tshinanu.

¹³ Wan-hixatshinhi hinkaklewatanu kihler-pirana Cristo pirana.

¹⁴ Hiyáhoni hi hkojwakahchinikanutanu himat-hihitanna hjihyehitjen-yehi hapojinipa.

¹⁵ Klu tshinanu hita henektokanutanhi hiyrunu himatkalewlu. Hma mumukata hihretanutna hkamnitjene, hma mumukata yoptoletanutna tokantshi.

¹⁶ Hixako hirune preso hitakanhi. Hiyrunu himolene pirana haté himolene potuk-koxa hiyrunu himatletanune preso hitakjixanhi. Satkaka hixa hiylajixko.

¹⁷ Ptowru yineru hahnanutanhi hixa, hita tshinanu.

¹⁸ Seyni hi pa jiwutsakna hamhini.

¹⁹ Hpoyehitahchinikanuxinwa hiyáhoni wan-hixatshinhi hiwekanu.

Tsru Salewaktshi Piranapni

²⁰ Jesus pnute hya hinkakleta: — Hexinpatkalu soldado-ne Jerusalém poktshi sajrukatshine hkamnixyawakaplu, himatanutkalu hi howukatkalu hyotkajikowakanpatka poktshipni.

²¹ Waneyakni katukta Judeia hwanu, rasukanu, hipjita hyanu. Katukta poktshi hwanu, ruchpakhapkatanu. Katukta campo hwanu, hi hjihlokanru poktshi.

²² Klu tshinanu waneklu papkopa hapnokatlu hohnepatkani, rakanhiywakapa ptowru potuka yonatkaluru Hoyakalu piranaya.

²³ Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni! Klu tshinanu tshiji rawanu salewaktshi tsrupotpákolu. Hoyakalu hapnokatanna nyi yinepni.

²⁴ Hixolunepni hiylatkona yohlolewapiya, pimrinepni hanikkona ptowru tshijne ranikkona preso rutakkona. Hiyrun-koxa judeu mixkane Jerusalém poktshi hkapnikapahitanna haté rapokpapkoluxinpatka ruchoxikolna papko.

Jeji Whene Hininri Piranapni

²⁵ Waneya Jesus wan-tshina: — Waneplu hetkalurkaka tkatshiya, ksuruya, katahirin-koxa. Hiyrun-koxa tshijiya ptowru tshijne hajene tsru kaheknanuwlu retanna, mar powha hiyrunu tenoplojhalu honha sejire hamlenu tshinanu.

²⁶ Psol-tshijne hajenepniko hitshpokhojitanuna hpiklena tshinanu, hkahwaklu retlerna tshinanu, salewnalu xye psol-tshijneko hinatshripa tshinanu. Klu tshinanu poyehirkaka tenhohne hajeru kowchitkotka.

²⁷ Waneya Jeji Whene tshinkaluru hiphujewnanu, hserpikanu hohimkohiya tsru hpixkonu ratnuyma.

²⁸ Hyinuwaka hakanhalexini xyekaka, poyehi yopkaklephi. Teno hyihatanu klu tshinanu chinpotukawa hiwekkakkotka.

Figueira Piranapni

²⁹ Waneya Jesus satu yapkaklu pirana runkakna, wla htshina: — Hetanru figueira muna hiyrunu ptowru hahmuna hanu rixna.

³⁰ Hyinuwaka hiptsheklesurexinixka, himatlu hi howukatkalu mhalu.

³¹ Wane koxa rixanu, hexinpatkalu xyekaka himatanutka hi howukatkalu rakanhiywakapa Hoyakalu pohirewaxyawaka.

³² Halikaka wane ntshinhi, xyekaka wan-hixa hiphujewnaletanu hmupnaknuhnapukawna xawakni mupnakanewa.

³³ Tenhohne, tshij-koxa nikawnanu seyni ntokanu hikeklu nikawnanu.

Hiyokanu, Hanjihohnetanu Piranapni

³⁴ Jesus wan-tshina: — Hislahinwa! Hi hyokwixinwa tsru nikluyma ho himriya ho xye hiwejinri kojwakle tshinanuya. Hma mimyejyawakanupa himnanhakanatatshine pixka rakanhinpatka xyekaka.

³⁵ Klu tshinanu ptowrunek-yine xye tshijne hajene hkachitanu hitseklu pixkalutu.

³⁶ Hiyáhoni hi himnanhinri, hanjihohnejetanu, hi hituk-hanjihohneretanu, himukata hasuklexyawakaplu ptowruka xyekaka hinatshripa. Hpaklu poyehiwlehchinikanuta Jeji Whene tshinkaluru hetanuya.

³⁷ Jesus Hoyakalupjiya hasruklewjekanaxya, ptowru hohneko. Halikaka hoyetshno himriji Oliveiras tshinikowaka hyajekanata. Wane rawjekanata.

³⁸ Ptowru prikaka, yetshpotukawa ptowrunek-yine yanwakjetlu Jesus Hoyakalupjiya hjemyawakapluna htokanu.