Lucas 20 - Bíblia

Jesus Tsru Potu Hitakkalurni Piranapni

¹ Waneya pa hohne Jesus Hoyakalupji hasrukakanaxyana yine, kihle piranalu potuko hiwekkaklewatatshri pirana, tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine, hiyrun-koxa tsrukakalune judeu-ne hapokanwakatlu.

² Waneya repomhaluna: — Punkakanwu hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?

³ Waneya Jesus wan-tshin-hihretna: — Hit-koxa satu hepomhalu nixanhi hixa. Hinkakanno xako.

⁴ Kathe xawaka towutlu João h-batiz-lewaxyawaka? Ho Hoyakalu ho jeji?

⁵ Waneya hyinuwaka hiynumsakakletna wannakakluko. Waneya wla htshinkakna: — Wla wtshininri Hoyakalu, waneya repomhanunwu: “Haklu tshinanhe hi halixlu João?”

⁶ Seyni wla wtshininri jeji ruchpajya htowutjeru, nyi hixolune yine sotlujetanunwu. Klu tshinanu ralixluna João-ni Hoyakalu tokanu hinkakletatshrini rixyawaka.

⁷ Wale tshinanu wanna wla tshina hi hima rimatna hanu ruchpajyatka wale towuwlu.

⁸ Hiyáhoni Jesus wla tshinna: — Hit-koxa hi hinkakanhi hanukta ruchpajya xyekaka ntowuxijeru.

Hsana Kamrurewaxikatshine Hektu Kamrurerune Piranapni

⁹ Waneya Jesus yinuwaka hinkakletanna yine satu yapkaklu pirana: — Satu jeji yinuwaka hitakletlu uva. Waneya hsana hislahatshine renekamta. Waneya pa tshijne howuka hya. Hix-hohne ramha.

¹⁰ Waneya rapokpapkoluxinixka ramikolu, jitakleru yokanatlu satu htowreru hitaklucha hislahatshine nwaka honantshi rawapyawakapa. Seyni hitaklucha hislahatshine kachitlu htowreru hkotshipjetluna. Hike manikamtkatuko hsatkakna.

¹¹ Waneya jitakleru yokanatatnaklu satu htowreru. Seyni ruylakluna wale koxni. Wan-rixa kamhalpatetanruna. Hike manikamtkatuko hsatkakna.

¹² Hiyrunuko wane hyokanatlu satu mapa rixinri seyni hitaklucha hislahatshine wale koxni ruylakna. Waneya uva-cha malekate ruknokanruna.

¹³ Waneya jitakleru wla tshina hihchinikanuya: “Kluhe nkamhanu? Nyokanahetkotanru noturu namotleru. Wale hetko hkahwakpiratanna.”

¹⁴ — Seyni rexinixkaluna hitaklucha hislahatshine, riynumsakakna wannakakluko, wla htshinna: “Ha xyekni jitakleru whene. Hayeri wuylateru. Waneyakni hitaklu hixanpatka!”

¹⁵ — Hiyáhoni kahnete ruknokluna jitakleru whenni hitaklu mwiywakanu. Waneya ruylatanruna. Hiyáhoni klunerhe hkamhinna jitakleru?

¹⁶ Runanu ruylatanunna hitaklucha hislahatshinepni. Waneya pimrineko hitaklucha hislahatshine renekanu. Waneya xye pirana hjeminixkana, wla htshinatkana: — Ha, Hoyakalu, hi wane pixkakanru!

¹⁷ Seyni Jesus yopukhatna waneya wla htshinna: — Klunerhe xawaka raluka tshinreta Hoyakalu tokanu yonatkaluru wla htshinini: “Sotlu kpanawaklerune malukkotu rikahwakluna hepixlewatatshri potukni, psolupjiko poyehitatshrini wale.”?

¹⁸ Katupnikta xye sotlu hoho hijrukanuna rumlokanuna. Hiyrun-koxa katupnikta xye sotlu hapokhohotanu, hipahi tsonunapni.

Repomhaluna Jesus Ho Tiyiro Raluka Wenutletluna César Ho Hike Piranapni

¹⁹ Tsru hixikatshinwa sacerdote-ne hiyrun-koxa kasruklewaklerune hinanchitkaluru pirana hasruklewatatshine himatlu Jesus kamnitna yapkaklu piranaya runkakletleru. Raluka kachretmakluna Jesus seyni hpikna yine.

²⁰ Hiyáhoni hyinuwaka hislahletluna. Hwenutluna satkaka yineru waneya hyokanatluna rumlukanta hepomhalexyawakapluna Jesus. Kihle hchinikanune rixahoxnawana Jesus rumlukanuxyawakna. Wan-hixatshri hkachitko wale tshijne tsrukakalutene renekko.

²¹ Waneya repomhatkaluna, wla htshinna: — Kasruklewakleru, wimatyi pixa halikaka pirana ptshinjeta, pasrukjetkoxna. Hiyrun-koxa hi yine hixachatatshineko yokwityi seyni pasrukle halikakalutu Hoyakalu halujyawaka pirana.

²² Hiyáhoni wepomhanyi minanchitkotlahe psoji tiyiro wenejyawaklu César Roma hajeru tsru hixikatshriwa? Ho wenejerhe ho hike?

²³ Seyni Jesus himathetahchinikanutna waneya wla htshinna: — Haklu tshinanhe haluk-himlukantaletno?

²⁴ Hanikanro proji tiyiro. Netanro. Katu yaholunhe kat-hiwaknihe toproji hwatshri? Waneya ruhitluna: — César-ni.

²⁵ Waneya Jesus wla tshina: — Henekanru César kluneruktapni César-nu henekanru hiyrun-koxa kluneruktapni Hoyakalunu waleko henekanru.

²⁶ Hi rumukata kachretluna tokantshiya yine hetanu. Hiyáhoni potshkena klu tshinanu rimyekna Jesus hihixya tshinanna.

Repomhaluna Yineru Hiwejyawakpatnaka Piranapni

²⁷ Waneya satkaka saduceu Jesus-stsi hipnatshri mkahwak-hiwekletkane hapoka. Waneya wla htshinna:

²⁸ — Kasruklewakleru, Moisés-ni yonaxyawu xye hiykolu pirana: “Jeji hipninipa ruknokamtanro hhanunro mwuhenetoko, walen-moleko hnunrotanro waleni hnunro. Twuhenewatanu hipnatshrini whenene hkahwajikowakapna.”

²⁹ Wan-rixa hahijewakatanna sete-ni jejinni moletkakatshinni. Tsrujruni hnunrowatni rupnana mwuhenetniko.

³⁰ Waneya repurni hnunrotlo hipnahnurutatshro. Rupnana mwuhenetniko.

³¹ Waneko pixka rixa hahijewakatan-koxa satni mapa rixinri. Sete-ni hnunrotlewatni walaluto suxo. Rupnanna mwuhenenniko.

³² Waneya suxni koxa hipnanatka.

³³ Xawakni hiwejikalur-hohnepatnaka, hanurpatkanhe thanuru? Klu tshinanu ptowruneko hnunrotaplo.

³⁴ Waneya Jesus hihita: — Jejine, suxone xye tshijne hajene, hhanunrowjetna, hnuruwjetna.

³⁵ Seyni tujra hohne mnikawnakatupa himukata hwaletatshinepa, hiweklu yoptotatshinepa, hi hnunrowatanu hiyrunu hi hhanuruwatanna.

³⁶ Hiyrun-koxa hi rumukata hipnaletanutnakna klu tshinanu hiwejikalune Hoyakalu towrene tenhohne hajene pixka rixanutkana. Hoyakalu whenenepatkani klu tshinanu riwekkakatnakna.

³⁷ Moisés-ni hekhipotutlu hipnatshine hiwejyawakpatnaka halikaka. Klu tshinanu kamxihiru ruchpakmeroxini Moisés-ni wla htshinyawaka Tsru Hixikatshriwa Hoyakalu pirana “Abraão-ni Hoyakalutno, Isaque-ni Hoyakalutno, Jacó-ni Hoyakalut-koxno.”

³⁸ Wale hekhitlu Hoyakalu hiwekatshine Hoyakalutni seyni hi miwekkanepa Hoyakalutni. Klu tshinanu ptowrunek-yine hiweka wale tshinanu.

³⁹ Waneya satkaka kasruklewaklerune hinanchitkaluru pirana hasruklewatatshine wan-tshina: — Wane potuko ptshina, Kasruklewakleru!

⁴⁰ Waneya wane pnute ptowru yineru pa pirana pika hepomhaletlu.

Cristo Davi-ni Klopichni Rixyawaka Piranapni

⁴¹ Waneya Jesus hepomhana yine: — Hanhe rumukata wla tshinretna yine, Messias klopichnixkani Davi-ni?

⁴² Davi-ni potuko wan-tshina yonawahlo papel-mta, Salmos stenoya: “Tsru Hixikatshriwa Hoyakalu wan-tshinno Tsru Hixikatshriwa: Ptuplatanu npotukle sreta,

⁴³ haté pkamnitjene pijixi hpuko nutakanu.”

⁴⁴ Davi-ni potuko Rutsrukate tshinru Hoyakalu hiyáhoni hanhe rumukata Davi-ni klopicha hixleta Messias?

Jesus Hikolujyawakna Hinanchitkaluru Pirana Hasruklewatatshine Piranapni

⁴⁵ Waneya ptowru yineru jemanu Jesus wla tshinatkana rasruklene:

⁴⁶ — Xakoka hi kasruklewaklerune hinanchitkaluru pirana hasruklewatatshine yokwijetanhi. Rukchikhihlenutluna mkatshri hopowalu riyanyawakna. Rukchikhihlenutluna ralijikowakna hixowaka hetanu. Hnuretluna tuplawaka tsru hixikatshriwa tuplaxyawakapa ptowrupjika hanjihohnewakapji, kihleru niklur-yeh-potuko htuplatna.

⁴⁷ Hipnahnurutatshroni hkonahejnunkatetna. Seyni wanepnawaka hohanjihohneru rixjetna kihleru hkahwajikolupna. Seyni wanepnawaka tsru hapnokatlu rixkona.