Lucas 2 - Bíblia

Jesus Matuxinri Piranapni

¹ Waneya waneklu papko phuru Augusto tshinkaluru towutlewjekanata ptowru tshijne hajeneko rutakhiwakaxikowakapna rutakyahojikowakapna yine.

² Xye mitshikananu rutakyahojikolna papkoni Cirênio tshinkaluru towutakanatlu Síria tshijne.

³ Hiyáhoni ptowruneka yatka satkaka waleko hipoktshi nwaka hyana rutakhiwakaxikowakpatkana.

⁴ Hiyáhoni wale tshinanu José tshinkaluru, Galileia tshijne Nazaré poktshi tshinkaluru, ruchpajya waneya pa poktshi nwaka hya Belém tshinikowaka Judeia tshijneya, phuru Davi-ni matuxyawaka poktshi. Wane hyatka José tshinkaluru klu tshinanu Davi-ni klopichni.

⁵ Waneya wane hya rutakhiwakaxikowakpatka Maria tshinkaluroyma, runkaklexikolo seyni kamchíroni wala.

⁶ Waneya Belém poktshi rapokatkana waneko tmatuwhenexyatka.

⁷ Tmatkakatkalu mitshikananu toturu. Waneya mkatshri sama tpoyitatkalu. Pratshine nikjexyawaka tutakatkalu mturujiji klu tshinanu hikeni hihruko pnu hichpajikatshine hwalerupa.

Hoyakalu Towrene Tenhohne Hajene Jesus Matuxyawaka Pirana Runkakapyawakna Yine Piranapni

⁸ Wale poktshistsi campo-te koxa rawna hinotaprayetshnotatshine.

⁹ Satu hiwejikaluru Hoyakalu towreru tenhohne hajeru serpikatka wanna nwaka. Waneya Hoyakalu pixkonu hatnu nikotyehitatkana. Waneya hpikpotuthonukatkana.

¹⁰ Seyni hiwejikaluru Hoyakalu towreru tenhohne hajeru wan-tshinna: — Hi hpikanu. Klu tshinanu hetanu nuna nunkajyawakaphi kihler-pirana poyikowlu potukalu pirana, ptowru yinerunupni.

¹¹ Xawakni hohne potuko, Belém tshinikowaka, Davi-ni poktshi, hmatuxyatka hixa hiwekkakjerupa. Waleni Tsru Hixikatshriwa Cristo.

¹² Xyekni rimaxikolu: mturu matutatshri hikchikanu pratshine nikjexyawaka hikoluhatshri mkatshri sama poyitkalurupa.

¹³ Waneya waneklukawa potuko hiwejikaluru Hoyakalu towreru tenhohne hajeruymatkana pimrine hiwejikalune tenhohne hajene hixolune Hoyakalu towrene. Hoyakalu himalwutatshine. Wla htshinatkana:

¹⁴ — Himalwutkalurni Hoyakalu tenhohne pnut-tennu hajeru. Kihlehchinikanurune yine xye tshijne hajene, rukchikhihlenrene.

¹⁵ Waneya hixolune hiwejikalune Hoyakalu towrene tenhohne hajene tenhohne yinixka waneya hinotaprajetatshine wla tshinkaka: — Wuya, Belém poktshi wyanu xawakni. Wetapanru tukwala piran-yehi hakanhatshri Tsru Hixikatshriwa Hoyakalu hinkakjixyatkawu.

¹⁶ Waneya hchireta wane yaletatkana. Waneya wane rukchijyalona Maria tshinkaluro hiyrunu José tshinkalur-koxa. Rukchikluna mturujiji pratshine nikjexyawaka hikoluhatshritka.

¹⁷ Waneya hinotaprajetatshine pohitatkalu mturu pirana tshina hinkaklexyawaka pixka potuko Hoyakalu towrene tenhohne hajene.

¹⁸ Waneya ptowrunek-yine wanestsi hajene xye pirana yijnakotatshine himyeka hinotaprajetatshine hinkakle pirana tshinanu.

¹⁹ Seyni Maria tshinkaluro ptowru piranako timreta tajiya. Tuchinikanretpiranatlu.

²⁰ Waneya hsatokatkana hinotaprajetatshine. Waneya runkakletatkaluna. Rimalwutluna Hoyakalu ptowru piranako hyijnakotanruna, retanruna, htshinakanaxyawak-potuko rix-hetkatatkaluna.

Mturu Jesus Rutakhiwakaxikolu Piranapni

²¹ Waneya oito hohne rixinixka mturu jiprojhaptojimtatkatka. Waneya rutakhiwakatka Jesus. Klu tshinanu hma matutkanuklunuwa mturu hiwejikaluru Hoyakalu towreru tenhohne hajeru hitakhiwakamtlu.

Hoyakalu Renejikowakatka Jesus Hoyakalupjiya Piranapni

²² Waneya rapokpapkoluxinixka runkajikowakpatkana tsrune powralune rixyawakatkana, Moisés yonreru pirana pixka potuko rixa homkahrexyawakpatkana, waneya ranikatkaluna mturu Jesus Jerusalém poktshi nwaka. Tsru Hixikatshriwa Hoyakalu renejikowakpatka.

²³ Klu tshinanu yonatkaluru Tsru Hixikatshriwa Hoyakalu yokanreru pirana wla tshina: “Ptowru mitshikananu matutatshri kanipretko Tsru Hixikatshriwa Hoyakaluya. Hiyáhoni Hoyakalununni.”

²⁴ Hiyrun-koxa wane hyana henekachalu ranikna hiylatkalurupa hepi kamowane ho hepi motkokoji whenene htshinyawak-potuko yonatkaluru Tsru Hixikatshriwa Hoyakalu yokanreru.

Simeão Tshinkaluru Chikale Piranapni

²⁵ Jerusalém poktshi rawakanata satu jeji Simeão tshinkaluru. Waleni jeji potukalu, kchinikanuru hike mixkatuwa. Israel-nerune hiwekkakatshripa kahwakatshrini. Hoyakalu Hiwejikaluru waleymalu.

²⁶ Waneya runkakkatka Hoyakalu Hiwejikaluruya hi himatshi rupnanu hma metkanu pchiniklu Cristo, Tsru Hixikatshriwa Hoyakalu yokanrerupa.

²⁷ Waneya Hoyakalupji hyatka Simeão tshinkaluru. Klu tshinanu Hoyakalu Hiwejikaluru yokanatlu. Waneyatka tsrune hanikatkalu mturu Jesus, Hoyakalupji, Moisés yokanre hkamhiywakapna mturu tshinanu.

²⁸ Waneya Simeão tshinkaluru kanpukatkalu mturu. Hpoyahnutlu Hoyakalu mturu tshinanu. Wla htshinatka:

²⁹ — Xawakni, Nutsrukate Hoyakalu, wane potuko pixkakno ptshina hinkaklexyawakpotukno ptowrerno. Hiyáhoni xawakni nunhayi nupniywakpatka kihlehchinikanurukno.

³⁰ Klu tshinanu netlu, noyhale potuko nexyalu, Hiwekkaklewatatshri pyokanreru.

³¹ Xye pkamhaleru ptowru yineru hetanru.

³² Katalu pixa patnu hapote hnikotyehixyawakapna judeu mixkane ptowruneka tshinanu, hiyrun-koxa payinetene israel-nerune tshinan-koxa hpohijetkona wanna.

³³ Waneya Jesus hiru, runro himyekahchinikanutatka wane htshinyawakatka Simeão mturu Jesus pirana tshinanu.

³⁴ Waneya Simeão hihlehchinikanutatkana, waneya wane htshinro Jesus hinro: — Xye mturu Hoyakalu nurrerni, ramtakkajyawakanapna hixolunepni hiyrunu riwekkajyawakna hixolune israel-nerune. Xye mturu Hoyakalu hekhirewleni seyni hixolune yine hapatanru.

³⁵ Seyni pixa, pyohlotko pihchinikanu hatatjewa yohlolewapi pyohloxiko. Hoyakalu nuretatkalu hixolune yine hchinikanu, hichinikanretjetanru yohimatkaluru, hiphujetatshripa.

Ana Tshinkaluro Hinkaklewaxyawaka Piranapni

³⁶ Wane koxa twakanata sato tokantshi hiphujetatshropa, tsrotsoleji potukotkani, hipnahnurutatshro, Ana tshinkaluro. Fanuel tshinkaluru whenni, Aser tshinkaluru klopichni wala. Thanuruwata waneya sete mhale hiknohatka rupnanatka thanurni.

³⁷ Waneklu papko oitenta e quatro mhalekananro. Hi tuchpaka Hoyakalupjiya. Seyni hohohne, hoyetshno koxa hi tutuk-himalwuretlu Hoyakalu tohajirewleyma hanjihohneruya.

³⁸ Waneya waneklukawa potuko tapoka. Waneya tyinuwaka poyahnutletlu Hoyakalu mturu tshinanu hiyrun-koxa tyinuwaka hinkakletletlu mturu pirana ptowrunek-yine Jerusalém poktshi hicho towutlexikowakpatka pirana kahwaka hakanhaletatshineya yehiya.

Nazaré Poktshi Nwaka Hsatkapyawakna Piranapni

³⁹ Waneya hnikata kamhalexinixkaluna ptowru yonatkaluru tshinyawaka potuko, Tsru Hixikatshriwa Hoyakalu yokanre piranaya, José hiyrunu Maria tshinkalune satokanwakatlu Galileia tshijne, hipoktshina nwak-potuko Nazaré tshinikowaka hyana.

⁴⁰ Waneya mturu Jesus tseruwna, hmixkowahchinikanukananumtatka. Htsepotka rimatkaleya. Hoyakalu hamotlewleymalu.

Jesus Hoyakalupji Rawyawaka Piranapni

⁴¹ Ptowru mhaleko Jesus hinro ruru yaper-koxa Jerusalém poktshi hyana poyikowaxikalur-hohne Páscoa tshinkaluru tshinanu.

⁴² Waneya doze mhale rapkajinixka Jesus, hyanwakatluna Jerusalém poktshi poyikowaxikalur-hohne ruchinijyawakapluna, rixa hasruhlejexyawakna.

⁴³ Waneya poyikowaxikalur-hohne pnutetka, Jesus hinro thanur-koxa pantshi nwaka hyamtatkana seyni mturu Jesus hitukatka Jerusalém poktshiko. Seyni wanna tsrune hi himatlu wan-rutujyawakatka.

⁴⁴ Wanna tsrune kahwaklu rimotsaneyma rapkatamta Jesus. Hiyáhoni pa hohne yanru hyatkana tsrune. Waneya hyinuwaka hijhaletmakluna mturu Jesus himolene yehiya, rimatletlene yehiy-koxa.

⁴⁵ Waneya hma mukchikkanuklunutkaluna mturu Jesus, Jerusalém poktshi nwaka hsatkaphonukna, hyana rujhapyawakapluna.

⁴⁶ Waneya map-hohne hiknohinixka rukchikluna Jesus, Hoyakalupji rawakanata. Hoyakalu tokanu hasruklewatatshine hanikajite htuplakanata Jesus. Hyijnakokanatna mturu Jesus, repomhakanatna.

⁴⁷ Ptowrunek-yine, Jesus yijnakotatshine himyeka mturu Jesus himatkalnu tshinanu. Hiyrun-koxa rimyekna wane htshin-hihrexyawakna repomhakjene.

⁴⁸ Waneya runro thanur-koxa rexinrina Jesus, rimyekna. Waneya runro wan-tshinru: — Noturu, klu tshinanhe wane pixwu? Hi he puru, hit-koxa hijhakanatyi? Wkojwakahchinikanpotukanatatka.

⁴⁹ Waneya Jesus hihitna: — Haklu tshinanhe hixa hijhakanatno? Hi he himata nurupjiko nwiywaka?

⁵⁰ Seyni hi rimatjemluna klu potu pirana htshinna Jesus.

⁵¹ Waneya Jesus hya runro, ruru yaholeyma. Nazaré poktshi nwaka hyana. Jesus yijnakotna. Seyni Jesus hinro xye pirankaka ptowruka tuchinikanreta tohchinikanuya.

⁵² Waneya Jesus tseruwna rimatkalnuya, himaney-koxa. Htseruwna Jesus Hoyakalu hamotlewluya hiyrunu yineru hamotlewley-koxa.