Lucas 19 - Bíblia

Jesus Hiyrunu Zaqueu Tshinkaluru Piranapni

¹ Waneya Jesus Jericó poktshi hjihlokamta waneya hkoprutlu.

² Waneya wanekananru satu jeji Zaqueu tshinkaluru. Waleni jijhawenruklerune chefe-te. Phurni wale.

³ Raluk-hetletlu Jesus hanu hixatshrini seyni hi rumukata hetletlu hixolune yine tshinanu klu tshinanu mtseruwnakatni.

⁴ Hiyáhoni pnuteyaka hya hasukleta. Waneya satu hahmuna ratskotatka rexyawakaplu Jesus. Klu tshinanu wane hyapamtanu.

⁵ Waneya rapojinixka Jesus wale yehi, teno hyihata Jesus. Waneya wla htshinru: — Zaqueu, hajewa pserpikhapkatanu klu tshinanu xawakni pipji naluk-hapokleta.

⁶ Hiyáhoni hchireta serpikleta Zaqueu. Hyoptotlu Jesus hpoyikonuyma.

⁷ Seyni pimrine hetakanatatshine kahemha. Wla htshinna: — Hektutu kamhatshripji rawanu.

⁸ Waneya ptowru yine hetanu hyopkaka Zaqueu tshinkaluru. Waneya wla htshinru Tsru Hixikatshriwa Jesus: — Tsru Hixikatshriwa Jesus, petanu, hanikaji nimwaleru nenekanna hike mwikane. Hiyrun-koxa katuktako pa hixanu ntshowhuxya nyokwijreymalu, quatro kata pnute nsatkajinri.

⁹ Waneya Jesus wla tshinru: — Xawakniko hiweklu jihlokatkalu xyepji. Klu tshinanu Abraão-ni when-koxni wale.

¹⁰ Klu tshinanu Jeji Whene tshinkaluru hina hamhakanatatshri rujhiywakapa riwekkajyawakaplu.

Dez Ouro Proji Piranapni

¹¹ Waneya Jesus yapkaklu pirana runkakna, tokantshi jemakanatatshine. Klu tshinanu hi howukatkalu Jerusalém poktshi hiyrunu wanna kahwakatkalu Hoyakalu pohirewaxyawaka hakanhahapkaxyawakpatka.

¹² Hiyáhoni wla htshina Jesus: — Satu jeji phuru hijhalu pa tshijne hyiywakapa wale tshijne pohire rutajikowakpatka. Waneya hima hsatkapanu.

¹³ Seyni mitshikananhapka htomhanna hkamrurewkakjetanune dez-rune. Waneya pa projkaka ouro renekna satkaka. Waneya wla htshinna: “Hetanu hi psokta tiyiro himukata kamhaletanu wale projiyma haté napojini.”

¹⁴ — Seyni rawyawaka tshijne hajene hahnanutlu. Hiyáhoni hyokanatna wale hatjini tokantshi hanikatshine. Wla tshinatshine: “Hi walukyi pixa wwiywaka poktshi pohire pixyawaka.”

¹⁵ — Waneya rali yoptolexinixkalu hpohirewaxyawaka pa tshijneya, htshijne nwakako hsatokatnaka. Waneya hkamrurewkakjetanune ouro proji renekamtanune htomha rimaxyawakaplu hi psokta tiyiro hkayatatkana walaya.

¹⁶ Mitshikananu jeji hapokatka waneya wla htshina: “Nutsrukate, pa proji ouro penekamxyano, dez proji ouro wanetka.”

¹⁷ — Waneya phuru wan-tshinru: “Poyahnu, kihleru towrertshiyi. Psotsonu tshinanu kihle hislahlu pixlu. Hiyáhoni dez poktshi pohirepyi.”

¹⁸ — Waneya satu hinatnaka. Waneya wla htshina: “Nutsrukate, pa proji ouro penekamxyano, cinco proji ouro-tkalo.”

¹⁹ — Waneya wale koxa wla htshina phuru: “Pix-koxa cinco poktshi pohirepyi.”

²⁰ Waneya satu hinatnaka, wla htshina: “Nutsrukate, xyetkani ouro proji penekamxyano, satupkalutu. Nimretlo, mkatshri sama npoyitlo.

²¹ Klu tshinanu npikyi, pix-honra jeji menekachalewakletyi. Pwiya pma kamhanutuko. Mutakatúkoyi hamlu.”

²² — Waneya wla htshinru: “Hektutu towrertshiyi. Pixako ptokanuko nukolukkakanunyi. Pimatnohe jeji menekachalewakletu nixyawaka? Nma kamhanutuko nimwiywaka hiyrun-koxa mutakkatukno hamyawaka?

²³ Haklu tshinanhe hi banco putaklo ntiyirote tatskoxyawakapa? Wane pixkamka napojinitka nyoptotanmaklo tiyiro tsroyakalotka.”

²⁴ Waneya wla htshinatkana wane hwakanatatshine: “Hkonanru ouro proji nenekamxyalu. Dez proji ouro himwatshri henekanro.”

²⁵ — Seyni wanna wla tshina: “Seyni Tsru Hixikatshriwa, wale honra dez projine ouro rimwa!”

²⁶ — Waneya wla htshina phuru: “Wla ntshinhi, tsru himwatshriko pnute renekko. Hiyrun-koxa hike mwikatu seyo rimwalerujiji hkonko.

²⁷ Hiyrun-koxa nmalukjene hpohirna nmaluk-hixletjene hanikanna hewi. Hita hetanuko hiylatanna.”

Jesus Jerusalém Poktshi Jihlojyawaka Piranapni

²⁸ Waneya rali wan-tshinretatka Jesus, hyatka. Hkosekamtna Jerusalém poktshi nwaka.

²⁹ Waneya Betfagé hiyrunu Betânia poktshikaka rapokastsixinixka, himriji Oliveiras tshinikowakastsi hyokanatna hepi rasruklene.

³⁰ Wla htshinna: — Poktshi pnute hajeru nwaka hyanu. Waneya chinpotukawa hjihlokanru, hetanru jumento whene tsatkaluru hikeklu myapatjitkotuwa. Hkochpirokanru wale, hanikanru wkata.

³¹ Seyni satu yineru hepomhiniphi haklu wla himixa waneya wla htshinanna: “Kasruklewakleru haluklu.”

³² Waneya hyatkana Jesus yokanrene. Rukchikluna htshinakanaxyawak-potuko.

³³ Hkochrijinixkaluna jumento whene kaprane hepomhana, Haklu hikochriklu jumento whene?

³⁴ Waneya wane htshinna: — Kasruklewakleru haluklu.

³⁵ Waneya rasruklene Jesus nwaka ranikluna jumento whene. Waneya himkalna jumento-tji hoho rutakna. Waneya Jesus waletji rutakatkana.

³⁶ Riknohamtka pchinika Jesus, yine koprakamkata hatnu hapo.

³⁷ Waneya Jerusalém poktshistsi rapojinixka, Oliveiras-pjita yopikjexikowaka, hixolune yine romkahitjene himuwata. Hyinuwaka himalwuretluna Hoyakalu. Hsaplew-himalwuretluna ptowru retakanatanruna, hetkalurkaka tshinanu.

³⁸ Wla htshinna: — Himalwutkalurni Pohirtshi, Tsru Hixikatshriwa hiwaka hinikatshri! Kihle hwachalu rixanu tenhohneya! Tenoya hoyakawaxikowaka!

³⁹ Waneya satkaka fariseu-ne hixolune yine himwakanatatshine wan-tshinru Jesus: — Kasruklewakleru, putshrokjixanna pasruklene.

⁴⁰ Waneya Jesus wla tshinna: — Halikaka wane ntshinhi, nyi potshke hixinipa seyni sotlune saplewatanu.

Jesus Tshiyahaxyawaka Jerusalém Poktshi Tshinanu Piranapni

⁴¹ Waneya Jerusalém poktshistsi rapojinixka Jesus, rexinixkalu htshiyahata wale poktshi tshinanu.

⁴² Wla htshinakteta Jesus: — Ha! Himatkamka, haté xawakniko, himukata hikchikletlu kihle hwachalu! Seyni xawakni hi pumukata hetletlu.

⁴³ Klu tshinanu pa hohne runanna pkamnitjene, tshiji hjitotanna hkamnixyawakyina papkopa. Hsajrukanyina. Ptowru sretako rerutanyina.

⁴⁴ Hyotkakanyina hiyrun-koxa pixa hitokote hwatshinepni. Hi satukna sotlu hwahohokakanu klu tshinanu hi pimathetlu Hoyakalu hepixlepir-hohne.

Jesus Hoyakalupji Rapkapyawaka Piranapni

⁴⁵ Waneya Hoyakalupji hjihlokamta Jesus. Hyinuwaka maleka yokanretna hichanrewatatshine.

⁴⁶ Wla htshinna: — Wla htshina yonatkaluru Hoyakalu pirana: “Nopji hanjihohnewakapjini.” Seyni hixa katshowhurune hwiywaka hkamhiyatkalu!

⁴⁷ Jesus ptowru hohneruka hasruklewjekanata Hoyakalupjiya. Tsru hixikatshinwa sacerdote-ne, kasruklewaklerune, hinanchitkaluru pirana hasruklewatatshine hiyrun-koxa judeu-ne tsru hixikatshinwa haluk-hiylaletmaklu Jesus.

⁴⁸ Seyni hi rukchikluna hanu potu rixa hiylaletanruna. Klu tshinanu ptowrunek-yine haluka jemlepotutlu Jesus tokanu.