Lucas 18 - Bíblia

Hipnahnurutatshro Hepixikolu Piranapni

¹ Waneya Jesus satu yapkaklu pirana runkakna ranjihohnexyawakapna, hma muhrojyawakanupna.

² Wla htshinatkana: — Pa poktshi rawa satu hetamayxaklerewatatshri. Wale hi piklu Hoyakalu. Yine koxa hi hkahwakpirata.

³ Wale poktshi twakanat-koxa sato hipnahnurutatshro. Waneya wale yehi tya. Wla ttshinru hetamayxaklerewatatshri: “Papnuyehitanno nkamnitjeru tshinanu!”

⁴ — Seyni hix-hohne hi repixlo. Waneya wale pnutetka wane htshinahchinikanuta: “Himka npiklu Hoyakalu. Hiyrun-koxa hi nkahwakpiratlu yineru.

⁵ Seyni twu hipnahnurutatshro kojwakjepotutno hiyáhoni napnuyehitanutkalo. Wane nmixkanuklunupa nupukalewatanutka wala hinjetatshro tshinanu.”

⁶ Tsru Hixikatshriwa Jesus wla tshin-koxa: — Hyijnakotanru klu htshina hetamayxaklerewatatshri mpomunanukotu.

⁷ Hiyáhoni hi he xawaka Hoyakalu hapnuyehitanna rayinetene hnurrene, hohohne hoyetshno koxa ranjitjene? Himka repixhapkatanna.

⁸ Seyni wane ntshinhi, repixanna halikaka! Seyni rapojinipa Jeji Whene tshinkaluru halixlerhe rukchikanu xye tshijiya?

Fariseu Hiyrun-koxa Jijhawenrukleru Piranapni

⁹ Waneya Jesus xye yapkaklu pirana htshin-koxa, yine kihle hikahwajikatshinwa hiyrunu pimrine reyikjetna.

¹⁰ Waneya wla htshina Jesus: — Hepi jejine yanwakatlu Hoyakalupji ranjihohnexyawakapna. Satu jeji fariseu-ne hiyrunu satu jeji tiyiro kyoptokleru.

¹¹ Waneya fariseu-ne yotunotatka ranjihohnetatka walepka. Wla htshinnawa: “Ha, Tsru Hixikatshriwa Hoyakalu npoyahnutyi hita hi pimrine pixka hixatshrino, wanna katshowhurune, hektutu kamhajetatshine, suxohewatatshine, haté xye tiyiro kyoptokleru pixka hi nix-hita.

¹² Pa semankaka hepi kata hita hi nika hiyrun-koxa Hoyakalu nenekjetlu psoji ptowruka nkayaleru.”

¹³ — Seyni tiyiro kyoptokleru howuka hyotunoxyatka, hi tenoko hyihatatka. Seyni rutpestaxnawa wane htshina: “Ha, Tsru Hixikatshriwa Hoyakalu, petwamonutanno hitni hektuwaka kamhatshrino!”

¹⁴ Waneya Jesus wan-tshina: — Wane ntshinhi jeji mitshikananu hanjihohnetatshri hi ruhlehchinikanutka seyni hapkat-hanjihohneretatshri kihle hchinikanutka hsatkapa hipji nwaka Tsru Hixikatshriwa Hoyakaluyma. Klu tshinanu katukta kihle rixahoxnawa mtserutu rixinixkawa seyni katukta mtserutu hixakanaxinwa htserutkotka.

Jesus Hiyrunu Mturune Piranapni

¹⁵ Waneya mturunemka ranikanwakatka Jesus, kihle hwachalerunephi htshinikowakamkapna mturune seyni Jesus hasruklene hi hitshitna.

¹⁶ Waneya Jesus tomhana rasruklene. Wla htshinatkana: — Hetachatanna mturune hyanwakaxyawaknona. Hi himaletanna. Klu tshinanu Hoyakalu pohirewaxyawaka hayinetene mturune pixkalune koxni wanna.

¹⁷ Wla ntshinhi halikaka: — Katukta hi yoptotanru Hoyakalu pohirewaxyawaka mturu pixka, hi hjihlokanru.

Jeji Phuru Piranapni

¹⁸ Waneya satu judeu tsrukakalu hepomhaplu Jesus, wla htshina: — Kasruklewakleru kihleru, klunerhe nkamhanu niwejinri hikeklu hohne nma nikawniywakanupa?

¹⁹ Waneya Jesus wla tshinru: — Haklu tshinanhe wane ptshinno kihle nixyawaka? Hikeni yineru kihleru, Hoyakalu tsonu kihleru hikeni hiyrunu.

²⁰ Pimathonru hiykolu pirana: “Hi hapoklewatanu, hi puylalewatanu, hi ptshowhuwatanu, hi pimrine pweyatanu, pkahwakpiratanru puru, punro.”

²¹ Waneya phuru hihita: — Nmatureyakawa haté xawakni nomkahitlu xye hiykolu ptowruka.

²² Waneya hjeminixkalu Jesus xye ptowruka wla htshinatkalu: — Seyni satu pa hixanu pmaha kamhaletawa. Puchankanru ptowruka pimwanru, penekanna ptowruka mahaxikatshine. Wane pixa pohirewnaletanu tenhohneya. Waneya punanu, pomkahitanno hita.

²³ Waneya wale pirana hyijnakoxinixka phuru, hwamonuwnapotuta klu tshinanu phurupotukni.

²⁴ Waneya rexinixkalu Jesus hwamonuwnapotuxyawaka phuru, wla htshinru Jesus: — Hi pa yaprenukananru phurune Hoyakalu pohirewaxyawaka hjihlojyawakapna!

²⁵ Kyapreru camelo tsapujripna hjihlojyawaka seyni wane yohnik-yapren-potu phuru Hoyakalu pohirewaxyawaka hjihlojyawaka.

²⁶ Waneya wale pirana yijnakotatshine wla tshina: — Ha han-hixatshri hiwekkakko?

²⁷ Waneya Jesus wla tshina: — Yine mumukatanutu, wale rumukata Hoyakalu.

²⁸ Waneya Pedro wla tshina: — Petanu, ptowruka wuchota, pixa womkahixyawakatka.

²⁹ Waneya Jesus wla tshinna: — Nmunanhalu ptowru yineru hipji hichotatshri, ho runro, ho ruru, ho himolene ho himolerone ho hhanunro, ho hiwhenene hichotatshri Hoyakalu pohirewaxyawaka tshinanu.

³⁰ Wale yoptotanru yohnik-potu xawakni riwejinri hiyrun-koxa xye riwejinripa hinatshri hyoptotanru riwejinri hikeklu hohne mnikawnakatupa.

Jesus Hinkaklexyawaklu Rupninri Piranapni

³¹ Waneya Jesus hanikna kahnete doze rasruklene, waneya wla htshinatkana: — Jerusalém poktshi nwaka wyamtanu. Wane poktshikni rakanhini ptowruka yonatkaluru tshinyawaka mitshi Hoyakalu tokanu hinkakletatshinni yonre tshinyawaka pixka Jeji Whene pirana.

³² Klu tshinanu judeu mixkane renekko. Reyikko, rapnokatko, rutskahjetko.

³³ Hkotshipjetko waneya ruylatko. Waneya map-hohne rixinri riwekanutnaka.

³⁴ Seyni wanna hike pirana rimatjemna. Wanna rinanchixika xye pirana hiyáhoni hi rimatjematkaluna klu raluka tshinreta Jesus xye pirana tshinanu.

Jesus Mtsawa Hitskalajyawaka Piranapni

³⁵ Waneya Jericó poktshistsi rapojinixka Jesus satu mayhaletu hatnu tnumne tuplakanatatshri. Tiyiro hanjijetatshri.

³⁶ Waneya hixolune yine hjema hiknohlexinixka, repomha: — Klunernihe?

³⁷ Waneya runkakluna mtsawa Jesus Nazaré poktshi hajeru hiknohamxyawaka.

³⁸ Hiyáhoni hyinuwaka saplewleta, wla htshinjeta: — Jesus, phuru Davi-ni whene, petwamonutanunno.

³⁹ Waneya kosekamtatshine hiykotlu potshke rixyawaka mtsawa; seyni wale wane pnute hsaplewjepotuta: — Phuru Davi-ni whene, petwamonutanunno hitni!

⁴⁰ Waneya Jesus yopkaka. Waneya ranikjixlu wale nwaka. Waneya mtsawa Jesus-stsi rapojinixka repomhalu.

⁴¹ Wla htshinru: — Klunerhe paluka nkamhiywakyi? Waneya mtsawa hihitlu: — Kasruklewakleru, naluk-hetletatnaka hiyrunuko!

⁴² Waneya Jesus wla tshinru: — Petanutka. Palixle tshinanu putskalhatka.

⁴³ Waneya waneklukawa retatka. Waneya mtsawakananu homkahitatkalu Jesus, Hoyakalu rimalwumta. Hiyrun-koxa ptowrunek-yine xye hetatshine yinuwaka himalwuretlu Hoyakalu.