Lucas 17 - Bíblia

Hektuntshi Hiyrunu Ramtakahchinikanyehixikolu Piranapni

¹ Waneya Jesus wla tshinna hnurrene: — Hi rumukata himaletkota hitspetkalurukaka hma wiywakanupa. Seyni hektumkalu wale yineru kojwakahchinikanrewatatshri!

² Kihlepotmaklu tsru sotlu rostunojixikowaka waneya mar powha ruknojikowaka hma pupjekajyawakanupna mtserkakanewa.

³ Hixanuko hislahinwa! Pimwastsireru hektuwaxini punkakanru jikolukanuru rixyawaka. Rehchinikanuxinipa hamtakahchinikanuxinri rektunu.

⁴ Sete kata rektuwyehixinipyi pa hohne tshinanu seyni sete katako rapokanwakaxinipyi wla htshininipyi: “Nehchinikanutatka”, waneya pamtakahchinikanutanru rektunu.

Halixlu Piranapni

⁵ Waneya nuretkalune wla tshinru Jesus: — Tsru Hixikatshriwa, ptserut-halixletanwu.

⁶ Waneya Jesus wla tshina: — Mostarda-tataji pso rixiniklunu halixle waneya himukata xye figueira muna wla tshinreta, mutakkotu muna, “Pkopkolijinwa. Mar powha putajinwa.” Waneyamka wane potuko rixanu.

Towrertshi Kamhalerupa Piranapni

⁷ Waneya Jesus wla tshina: — Hixa satkakhi htowreru hsana yochyakakanatatshri, ho campo kamrurewakanaxikatshri pantshi rapojini hixa hi wla tshinru: “Punanu ptuplatanu nikawaka yehi.” — hi htshinru.

⁸ Hi he wla htshinhonuklu: “Nijittshi pkamhanu. Mkatshri nijittshi hikamhapi pmakatanu waneya punanu nijittshi putajinno. Nnikka pchinika nurka pchinika pinotanno. Nali niklexini tsonu pnikanu, puranu”? Hi he xawaka wlako htshinru htowreru?

⁹ Towrertshirhe xawaka poyahnutka ruhlenu kamrure tshinanu? Hike.

¹⁰ Hiyáhoni hix-koxa ptowru potuko htowuxikowaka hali kamhalexini, wla htshinanu: “Hixa towrertshinwu hike hepixatshinwu. Klu tshinanu wtowuxikolupka wkamha.”

Jesus Dez Hijirohitutatshine Rutskalajyawaka Piranapni

¹¹ Waneya wla rixatka Jesus. Jerusalém poktshi nwaka hyamxini Samaria hiyrunu Galileia tshinikowaka tshijne hyapamtatka.

¹² Waneyakta satu poktshi hjihlokamxinixka dez jejine hijirohitutatshine yoptotaplu. Howukako hyopkakna.

¹³ Hsaplewatna: — Tsru Hixikatshriwa Jesus, petwamonutanunwu!

¹⁴ Jesus yijnakotna waneya wla htshinna: — Hajewa, sacerdote-ne hekhitapinwa. Waneyatka wane hyaka pchinikna rutskalhatkana.

¹⁵ Waneya satu wanna, Samaria-nerni, rexinixkawa rutskalhiywakatka, hsatoka, tsru tokantshiyma rimalwumtlu Hoyakalu.

¹⁶ Waneya Jesus jixistsi hyoptsojitamta waneya hpoyahnutlu.

¹⁷ Waneya Jesus wla tshinru: — Hatshni dez-na hitskalakalune? Seyni ha pimrine nove, hanhe hyatkana?

¹⁸ Klu tshinanhe xye jeji tsonu, pa neruko satoka Hoyakalu rimalwuxyawakapa?

¹⁹ Waneya Jesus wla tshinru: — Ppalnanu. Pyanutka. Putskalhatka palixle tshinanu.

Hoyakalu Pohirewaxyawaka Hapojinri Piranapni

²⁰ Waneya satkaka fariseu-ne hepomhalu Jesus hikluplu Hoyakalu pohirewaxyawaka. Waneya Jesus hihitna, wla htshinna: — Hoyakalu pohirewaxyawaka hapojiklu hi phujetkalurupa yine yhaleya.

²¹ Hike yineru himukata wan-tshinretlu: “Hetanu, hewitkalu”, ho “Hawlalu”. Klu tshinanu Hoyakalu pohirewaxyawaka hixa hitokote rawa.

²² Waneya Jesus wla tshinatkana rasruklene: — Rapokpapkoluxinipa hixa haluk-hetletanru Jeji Whene tshinkaluru klu papkopa yáholu pa hohnejiji. Seyni hi hetanru.

²³ Wla htshininiphina: “Hetanu, wanetkalu” ho “Hewiru”. Hi wane hyanu. Hi homkahitanna.

²⁴ Klu tshinanu rawrakle pixka rixanu, pa sreta hyinuwaka hawraklexini haté pa sreta hohne rapokhawrakletsatanu. Waneko pixka rixanu Jeji Whene tshinkaluru hapojinri hohnepa.

²⁵ Seyni mitshikananhapka rujhalu hsalewniywaka hiyrun-koxa ruknokko xye hohne hiwekatshine klu papko.

²⁶ Noé klu papko pixka rixanu Jeji Whene tshinkaluru hapojinri papkopa.

²⁷ Klu tshinanu ptowrunniko yinni hniknina, rurnina, hhanunrowatnina, hhanuruwatnina, Noé-ni tsro kanawatlo jihlojinriklu potukananuko. Waneya runatka hahyekachalu, ptowrunnika yinni hnikata.

²⁸ Ló tshinkalurni klu papko koxa waneko pixka rixa. Hniknina, rurnina, hmaronewatnina, rutaklewatnina, hpanawatnina.

²⁹ Ló tshinkalurni hichpajin-hohne potuko, Sodoma poktshiya wan-rixanixkana. Waneya hina pixka rixa hijrukleta tenhohneya tshitshmero hiyrun-koxa enxofre. Ptowrunnik-yinni hnikata.

³⁰ Waneko pixka rixanu Jeji Whene tshinkaluru ruphujewnin-hohnepa.

³¹ Waneklu hohnepa katukta pantshi hoho hwatshripa, rasukhapkatanu. Hi pantshi hjihlokanu rejnunkate pantshi hwatshri rawapyawakapa. Katukta campo hwanu, hi hsatkapanu hipji nwaka.

³² Hichinkapanro Ló tshinkaluru hnunroni.

³³ Katukta haluk-hiwekkaklexinwa, ramtaklewatanun-honuka. Katukta hamtakanru riwekle riwekanu halikaka.

³⁴ Wane ntshinhi: Wale yetshnopa hepi himumkakakatshinepni walerutu chetshiya. Satu hanikko, satupni hiknokamtkona.

³⁵ Hepi suxone trigo-ji yojitatshinepa, sato hanikko, satopni hiknokamtkona.

³⁶ Waneya rasruklene hepomhalu, wla htshinna: — Tsru Hixikatshriwa Jesus, hanhe rakanhini xye ptshinreru?

³⁷ Waneya Jesus wla tshinna: — Hanukta rawamanetanuna hipnatshripni wane rapatjexinna maylune.