Lucas 16 - Bíblia

Pantshi Muhle Hislahletkatu Piranapni

¹ Wla koxa htshinatkana rasruklene Jesus: — Rawa satu jeji phuru. Ktowreru pantshi hinotatshri. Xye towrertshi jihyehitkatka, hsalethimatlu rutsrukate hejnunkate.

² Hiyáhoni htomhalu waneya wla htshinru: “Klunhe xye njempiranyehityi? Puhlepokotanru pantshi pinotjexyawaka pirana. Klu tshinanu hewi hi pumukata hinotlepjitatka.”

³ — Waneya pantshi hinotakanatatshri wan-tshina hitoko hchinikanuya: “Klu nkamhanutka xawakni? Klu tshinanu ntowutjeru yokanatno. Hi kmixkonno njitoxyawaka. Npatewata tiyiro nanjijechaxyawaka.

⁴ Hehe, nimata klu nkamhanu, nuchpajinpatka xye kamrurtshi pantshi ninoxyawaka, nyoptohihlenutkoklunupa pimrine yehiya.”

⁵ — Hiyáhoni repukna satkaka htowutakanatjeru deve-tatshine. Wla htshinatkalu mitshikananu hapokatshri: “Hi pejnuhe p-deve-tlu ntowutjeru?”

⁶ — Waneya wale wan-tshina: “Cem stono nhihtshi n-deve-tlu.” — Waneya pantshi hinotatshri wan-tshinru: “Xyetkani papel-mta p-conta-te pirana. Ptuplatanu waneya cinquenta stono pejnu tsonu pyonatanu.”

⁷ — Waneya pantshi hinotatshri wla tshinru satu deve-tatshritnaka: “Ha pixa, hi psolhe p-deve-ta?” — Waneya wale hihitlu: “Cem chiwatu trigo-ji n-deve-ta.” — Waneya pantshi hinotatshri wan-tshinru: “Wuya, oitenta chiwatupso pyonatanu.”

⁸ — Waneya phuru hikchikhihlenutatkalu pantshi muhle hislahletkatu rimatkalnu tshinanu. Waneya Jesus wla tshina: — Yine, xye hohne hwatshine, yine katawaka hwatshine yohnik-jimatkalerunni xye tshiji hajeru piranaya.

⁹ Hiyáhoni wla ntshinhi: Hikchikanru himatletleru xye tshijne pohirewnaleyma. Waneya wale pohirewnalu nikawninipa, hyoptotkona hwikowaka hikeklu mnikawnakatu yehiya.

¹⁰ Katukta psotsonuyaka kihle kamrureya, tsrur-tshinan-koxa kihle kamrurru. Hiyrun-koxa katukta hi kihle hislahle psotsonu tshinanu, tsrur-tshinan-koxa waneko pixka rixa.

¹¹ Klu tshinanu muhle hislahletkane hixini xye tshijne pohirewnale tshinanu, kathe xawaka munanhanhi pohirewnalu halikakalutu tshinanu?

¹² Hiyrun-koxa pimrine hejnunkateyma mpoyahokaka kamruretkane hixini, kathe henekanhi hixanpako?

¹³ — Hi satukna yineru towrertshi walerutu himukata kamhaletlu hepi phurune kamrure. Klu tshinanu rahnanutanru satu, satu ramotanu; ho satu repiretanu, satu reyikanu. Hixa hi himukata kkamrurewaklerune hixleta Hoyakalu tshinanu hiyrunu pohirewlu tshinanu.

Jesus Hichinikakjetna Yine Satkaka Hiykolu Yonatkaluru

¹⁴ Seyni fariseu-ne xye pirana jematshine heyiklu Jesus klu tshinanu ramotlona tiyiro.

¹⁵ Hiyáhoni Jesus wan-tshinna: — Kihle hetko hikahwajnawa pimrine hetanuya seyni Hoyakalu himathethajithi, hanu potu hixatshinhi. Klu tshinanu yine hikchikhihlenrer-potu, walekni rahnanuta Hoyakalu.

¹⁶ — Moisés hiykole pirana yonatkaluru hiyrun-koxa mitshikawlunni Hoyakalu tokanu hinkakletatshinni hinkakle hwatka haté João Batista klu papko. Waneya waneklukananuko, kihle piranalu potuko hiwekkaklewatatshri pirana Hoyakalu pohirewaxyawaka pirana, hinkakletka. Ptowrunek-yine yapretaklu wane hjihlojyawakapna.

¹⁷ — Myapretpotni tenhohne hiyrunu tshiji nikawniywakapa seyni Moisés hiykole pirana yonatkaluru yáholu pa yonhajiji hi nikawnanu.

¹⁸ — Ruchohnunroxini jeji, satoko hhanunroxini rimopatatkalo. Hiyrun-koxa katukta hanunrotlo, hichotkaluro rimopatlewata.

Phuru Hiyrunu Lázaro Piranapni

¹⁹ — Rawa satu jeji phuru. Kihleru mkatshri rutakjetatka ptowru hohneruka kihleru hiweklu rimwa.

²⁰ Raw-koxa satu jeji hike mimwakatu kachreru, Lázaro hiwakatletatshri. Phurupji hiphaptotestsi rutakka.

²¹ Waneya Lázaro haluka nikletlu phuru nijitu h-mesa-te hijrujikatshri. Haté kawene hapokastsitlu Lázaro, remrotluna rutsreru.

²² Waneya wan-rixatka. Lázaro-ni kwamonurni hipnanatka waneya hiwejikalune Hoyakalu towrene tenhohne hajene hanikatkalu Abraão-ni nwaka. Waneya phurni koxa hipnanatka. Waneya hkapnatka.

²³ Phurni salewnapotutana tshitshmeroya. Retlu Abraão-ni howuk-potuko rawa, retkoxlu Lázaro Abraão-nistsi.

²⁴ Waneya hsaplewata phurni: “Nutsrukatni Abraão-ni, petwamonutanno! Pyokanatanru Lázaro-ni, himyoji ruhakamtanu waneya runanu ruhakanrutanunno klu tshinanu nsalewna hewi tshitshmeroya!”

²⁵ — Seyni Abraão-ni wan-tshinru: “Noturu, puchinikanru piwekakanaxini ptowruka kihleru pimwakanata seyni Lázaro salewnajekanata. Hiyáhoni xawakni wale hewiru hpoyikowahchinikanuta seyni pixa salewnanu.

²⁶ Hiyrun-koxa hewi hixa hanikajite rawa tenotlowaka hiyáhoni wanna hewi hajene pixa nwaka yapiratatshinemka hi rumukata koprurenwakatyina hix-yehi, hi koxa hix-yehi hajene himukata koprurenwakatwu hixa.”

²⁷ — Waneya phurni wan-tshina: “Wan-rixini Nutsrukatni Abraão-ni, nanjityi Lázaro-ni xako pyokanatanu nurupji nwaka hyiywakapa.

²⁸ Klu tshinanu kamolno cinco jejine. Pitshitanru Lázaro-ni wane hyiywakapa ruykoxyawakapna wanna hma munyawakanupna hewi salewnikowaka.”

²⁹ — Seyni Abraão-ni hihitlu: “Pimolene himwalu Moisés tokanu hiyrun-koxa pimrine Hoyakalu tokanu hinkakletatshine hiykoxyawakapna. Hiyáhoni wannako hyijnakotanna.”

³⁰ — Seyni phurni hihitlu: “Hike, Nutsrukatni Abraão-ni, seyni satni yinerni hiwejinpatnaka waneya wan-hixatshri hiykoxinipna waneya rehchinikanhetkotanumkana rektunnuyna.”

³¹ — Seyni Abraão-ni wan-tshinru: “Moisés yonreru hiyrunu pimrine Hoyakalu tokanu hinkakletatshine hma malixkanuklunna, hi koxa ralixanruna yinerni hipnatshri yotunoxiklu.”