Lucas 15 - Bíblia

Ovelha Pupjetatshro Piranapni

¹ Waneyatnaka rapokastsitluna Jesus hixo jijhawenruklerune hiyrun-koxa hektutu kkamhaklerune hyijnakoxyawakapluna.

² Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine jiheklu Jesus. Wla htshinanwakatluna: — Xye jeji hiyanna hektutu kamhatshine. Hiyrun-koxa wannayma hnika.

³ Hiyáhoni Jesus yapkaklu pirana runkakna. Wla htshinna:

⁴ — Hanurutkanhe jeji cem ovelha rimwini seyni sato ramtajini, hi he pimri hiprane noventa e nove, ruknokamtanu kahnete poktshi rujhapyawakaplo pupjetatshro haté rukchijini potuklo?

⁵ Waneya rukchijiniplo ovelha hamhakanatatshro, hpoyikowpotuta. Rutjitanro

⁶ haté hipji yehi. Htomhana rimatletanune rimwastsitanune. Waneya wla htshinna: “Himuwatanu hitayma klu tshinanu nopra ovelha hamhakanatatshro nukchikatka.”

⁷ — Hiyáhoni wane ntshinhi tenhohney-koxa rawanu tsru poyikowlu potuko satupka hektuwaka kamhatshri hehchinikanuxiklu tshinanupa noventa e nove-pna yine potuka hchinikanurune, hehchinikanru mujhakanetka.

Tiyiro Proji Hamhatshro Piranapni

⁸ — Suxo dez proji prata kamhikolu himwatshro, pa projipka tamhini, hi he tujhanru? Tumukata hikchiklexyawakaplo lamparina tnikotanu, pantshi t-satolotanu, tujhapotutanro haté tukchikanro.

⁹ Waneya tukchijiniklunuplo ttshanixanna timatletanune, timwastsitanune wla ttshinna: “Himuwatanu hitayma klu tshinanu nukchiklo ntiyirote proji hamhakanatatshro.”

¹⁰ — Wane ntshinhi halikaka, waneko pixka rixa himuwletna hiwejikalune Hoyakalu towrene tenhohne hajene, rehchinikanuxini satu yineru hektuwaka kamhatshri.

Whentshi Pupjetatshri Piranapni

¹¹ Jesus wla tshinatnaka: — Hepi whenru satu jeji.

¹² Waneya hepurtshi wan-tshinru ruru: “Papa, xawakni penekanutkano psoji hitanupakotka.” — Hiyáhoni tsru kanipretatkalu wanna hepi hiwhenene himlujikolu.

¹³ Waneya hi hix-hohne potuwani hepurtshi ptowruka rihnanutamtatka. Howuk-tshijne nwaka hyatka. Waneya wane hsalechaxyalo ptowruka rimwakanatanru, ptowru hixatshri poyikowluyma.

¹⁴ — Waneya ptowruniko hsalexinixka, tsru natshi hakanhatka rawyawaka tshijneya. Hyinuwaka yijnako mahlerewatanatka.

¹⁵ Waneya hyinuwaka yanretatka. Kamrurtshi rujhapyawakatka rawatshijnetanru yehiya. Waneya rukchik-kamruretka hiyáhoni campo porco-ne yehi hyokanatka porco-ne rohluxyawakapa.

¹⁶ Raluk-hinanutlexnamkawa porco-ne nijitumka raluka nikleta. Seyni waleni hike rohlutna.

¹⁷ Ruchinikanuwpotutatka waneya wla htshina: “Ha hi pejnukananna kamrurewatatshine nuru yehi kihleru nikatshine haté rixetluna nikkaluru seyni hitni hewi natshi kamakpiraxyanno.

¹⁸ Nsatkaphetkotanu nurupji nwaka. Wla hetko ntshinanru: ‘Papa, nektuwyehitatkalu Hoyakalu hiyrunu pix-yehi koxa.

¹⁹ Hiyáhoni hi numukatatka pituru ntshinikolpatka. Satu ptowreru pixka pixkakanno.’ ”

²⁰ Hiyáhoni hpalnamta. Hsatokatka rurupji nwaka. Seyni ruru howukako rexyalu. Retwamonutlu. Rasukanwakatlu, hsapriklu, ramlutlu.

²¹ Waneya hituru wan-tshinru: “Papa, nektuwatatka Hoyakalu hetanu, pixa hetan-koxa. Hi numukata pituru tshinretkotka. Satu ptowreru pixka pixkakanutkano.”

²² — Seyni ruru towutna htowrene, wla htshinna: “Wuya, hchiretanu, mkatshri hopowalu kihleru hwapanu. Hyochmakanru. Hiyrun-koxa anel putakamyojitanru, sandalha hyochmakjixitanru.

²³ Boi whene hixownakakaluru hwapanu. Hiylatanru. Tsru niklu wkamhanu. Wpoyikowatanu.

²⁴ Klu tshinanu xye noturu nupnaholerutka hiwekhonukatnaka, hamhakanatatshri hiphujewnatka.” — Waneya hyinuwaka poyikowletna.

²⁵ — Wane pchinika hituru tsrujru hsana hwakanata. Waneya pantshistsi rapojinixka hjemlu tokluru, hahsalu.

²⁶ Hiyáhoni satu towrertshi htomha. Repomhalu klunerni.

²⁷ — Waneya wale wla tshinru: “Pepuru hapokatka. Pantshitkalu kihle hapokle rixa. Hiyáhoni puru boi whenni hixownakakaluru ruylakjixa.”

²⁸ — Seyni whentshi tsrujru jihekanuwata. Hi hjihlokpirata. Hiyáhoni ruru hichpakanwakatlu. Hjihlokjixlu.

²⁹ Seyni whentshi tsrujru wla tshinru tsru: “Ha, hi pejnu mhalekananu nepixyi, towutachatkaluru pixka. Hikeklu ptokanu nmajnakowaxya. Wanepnawaka hikeklu penekno carneiro whene nimatletanuneyma npoyikowaxyawakapa.

³⁰ Seyni xye pituru pnikat-hejnunkatetjeru, suxone jejiheroneya, runatka pumuylatlu boi whene hixownakakaluru.”

³¹ — Waneya tsru wan-tshinru whentshi tsrujru: “Noturu, pixa ptowru hohneka himwanno. Ptowru potuko nimwaleru pixanni.

³² Seyni wujhatkalu xye poyikowlu wkamhiywaka, wpoyikowaxyawaka. Klu tshinanu xye pepuru hipnatshrikananni hiwekatka. Hamhakanatatshrini seyni hikchikalurutkani.”