Lucas 14 - Bíblia

Jesus Yeyixatshri Rutskalajyawaka Piranapni

¹ Waneya satu hapnanuxikalur-hohnetnaka Jesus jihloklu fariseu-ne-pji fariseu-ne kosekatshripji wane hnijyawakapa. Ruslahluna Jesus klu hkamhanu.

² Satu jeji hanokatshri walestsi hwakanata.

³ Waneya Jesus hepomhana Moisés yonreru pirana himatpotutatshine hiyrunu fariseu-ne, wla htshin-hepomhaletna: — Hinanchitkalurlahe hapnanuxikalur-hohne hitskalaklewlu ho hike?

⁴ Seyni potshkena. Hiyáhoni Jesus kosetlu jeji waneya rutskalaklu. Waneya hyokanatlu hyiywakapa.

⁵ Waneya Jesus wla tshinna: — Satkaka hixa ho hiwhene ho hipra boi kapna hijrujini hi he hkochtshekanru hapnanuxikalur-hohne?

⁶ Seyni hi rimat-hihitluna.

Mayohotu, Kchinikanuru Piranapni

⁷ Jesus hislahakanatna yine niklu hitshanixkalune ho tuplawakkaka kihleru mesa yehi hwatshrirhe hnuretanna. Waneya satu yapkaklu runkakna niklu hitshanixkalune. Wla htshinna:

⁸ — Htshanixkoklunupa hnunrowatatshri nikle yehi, hi hnuretanru tuplawaka hijhakaluru wane htuplaxyawakapa. Pa katako pixa yohnika tsru kahwakpiratkaluru koxa tshanixka.

⁹ Waneya hyanwakaxinipyi htshanixjeru waneya wla htshininipyi: “Penek-tuplawakletanru xye.” Waneyakni patewatatshrinapyi ppalnanatka tuplawaka hapkatlutu ptuplatanutka.

¹⁰ Seyni ptshanixkoklunupa, hapkatlutu hapkako ptuplatanutka. Waneya runinipa ptshanixjeru, wla htshininipyi: “Nomole, kihlewakayaka ptuplatanu.” Waneklu pukchikhihlenutko ptowruneka piminkakjene.

¹¹ Klu tshinanu katukta kahwakpiratkaluru hitajinwa, malukkotu rutakko wale. Seyni malukkotu hi kahwajikatshriwa, hkahwakpiratka wale.

¹² Waneya Jesus wla tshinru htshanixjeru: — Niklu pkamhini, hanikaj-hohne ho kayi koxa, hi ptshanixanna pimatletlene, ho pimolene, ho petjejrene phurune, ho pimwastsitanune tsonu. Klu tshinanu wane pixini pa katako wanna koxa hapnutanyi pixa. Waneya kihleru pkamhaleru tshinanu rapnutankoxyina pixa.

¹³ Seyni tsru niklu pkamhinipa, hike mwikane, myapene, myankane hiyrun-koxa mayhalene ptshanixanu.

¹⁴ Waneya hihlewahchinikanyehitkalurupyi wanna pma poyaho hapnuretjene tshinanu. Seyni halikaka Hoyakalu hapnutanyi kihleru kkamhaklerune hiwekkajikolu hohnepa.

Tsru Niklu Piranapni

¹⁵ Waneya satu Jesus himinkakjeru jemlu xye pirana waneya wane htshina: — Kihle hchinikanurunepni Hoyakalu pohirewaxyawaka nikawakle tuplatatshinepa.

¹⁶ Waneya Jesus wla tshinru: — Satu jeji tsru niklu hkamha. Hixo yine htshanixa.

¹⁷ Rapokpapkoluxinixka hyokanatlu htowreru wla htshinyawakapna tshanixkalunetka mitshi: “Hinanu, ralixatka.”

¹⁸ — Seyni satkaka pnu pejnu hixahchinikanuta. Hyinuwaka hallikakletna. Tshanixkalurutka mitshi wla tshina: “Tshiji nanjita. Nujhalu wane nyiywakapa, netapyawakaplu. Hiyáhoni nanjityi pma mukolujyawakanupno.”

¹⁹ — Waneya satuko wan-tshinatnaka: “Dez boi-ne nanjita carro himat-kosetatshine. Wanna nwakakni nyamtatka netapyawakapna. Nanjityi pma mukolujyawakanupno.”

²⁰ — Waneya satutnaka wan-tshin-koxa: “Nhanunrowatatka hiyáhoni hi numukata wane yaleta.”

²¹ — Waneya towrertshi satokatka. Hyokanatjeru runkakatka htshintokanuxyawakna htshanixlenemka. Waneya kapjiru jihekanuwata. Wla htshinru htowreru: “Hajewa pchiretanu. Tsru poktshi nwaka pyanu. Ptowru pantshi hapkaka tsru hapolu, mtser-hapot-koxa pyanu. Pwapanna hike mwikane, myapene, mayhalene, myankane.”

²² — Waneya xekoyaka towrertshi wan-tshinru htowutjeru: “Nutsrukate, ptshinyawaka nixatka seyni rixetawa hwikowaka.”

²³ Waneya wla htshinru htowutjeru: “Haté hehe. Pyanutnaka ptowru hapokaka nwaka haté kahnete hapojijkak-koxa nwaka. Yine hipokananu pjihlokjixanu, nopji htsepoxinripna.

²⁴ Klu tshinanu wane ntshinyi halikaka. Hi satukna wanna jejine mitshikananu ntshanixlenemka hetumhanru nnijitu!”

Jesus Hasruklene Haluk-hixlexikatshriwa Piranapni

²⁵ Hixolune yine himotsakanatlu Jesus. Jesus hiprotakatka waneya wane htshinna:

²⁶ — Katukta haluka nasrukleru hixletanu seyni ruru ho runro ho hhanunro ho hiwhenene ho himolene jejine ho himolene suxone ho haté waleko riwekle hmahnanutkanuklunu, hi rumukata nasrukleru hixleta.

²⁷ Hiyrun-koxa katukta h-cruz-te hma mutaykopitkanuklunupa hi rumukata nasrukleru hixleta.

²⁸ Kathe hixa satkakhi pantshi tenopjiru haluka kamhalexini seyni mitshikananhapka hma muchinikanuwatkanuklunu hma mutakyahokwenrutkanuklunru ho rumukata nikat-kamhaletluhe ho hike?

²⁹ Wane hmixkanuklunupa, tenopjiru hkamhapirreru hyinuwakachatlu seyni hi hnikata kamhaletlu. Waneya ptowruneka hetatshine heyikanru. Wla htshinanruna:

³⁰ “Haha hetanu. Xye jeji panawaphutata seyni hi hnikata kamhaletlu!”

³¹ — Ho hanukananru phuru satu phuruyma hiylalewpiratatshri, muchinikanuwhapkatkatu ho rumukata yahotletnahe hyanwakatjenepa vinte mil soldado-ne himwatshriyma, dez mil tsonu himwatshriyma?

³² Wla hmixkanuklunupa, howukakowana htowrene hyokanata riynumsakajyawakapna kihle hwachle rixyawakapna pirana.

³³ — Hiyrun-koxa katukta hi hiknoklu ptowru potuka rimwaleru hi rumukata nomkahitjeru hixleta.

Hma Tuwrenuklunutka Tuwu Piranapni

³⁴ — Kihlemkalu tuwu. Seyni hma tuwrenuklunutka, kluneru tuwutkotka?

³⁵ Hike kihleyatkalu. Hi tshijiko kihleylu, hi tshkiko kihle yapjetkotkalu. Seyni ruknokachatkatka. Katukta kajnakopnapa hyijnakoxyawaka hyijnakotanru.