Lucas 13 - Bíblia

Mehchinikanutkatu Hiylaxikowakapa Piranapni

¹ Waneklu hohne koxa satkaka yine hinkaklu Jesus Galileia hajene pirana. Phuru Pilatos hima hiylakjixanna satkakni Galileia hajenni henekachalu hiylatkaluru Hoyakalu renekakanaxiniwa.

² Waneya Jesus wan-tshina: — Hixlahe kahwaklu nyi Galileia hajenni pimrine Galileia hajene yohnik-hektunu rixyawaknina tshinanu wan-rixa salewnaletna?

³ Seyni hita wane ntshinhi, hike. Hma mehchinikanutkanuklunupa hixa ptowrunekhi, waneko pixka hixa hiylaletkona.

⁴ Ha hiyrun-koxa dezoito yinni tenopjiru yawnahohotanunni. Ruylatkanna. Hixlahe kahwaklu wannani pimrine ptowruneka Jerusalém poktshi hajene yohnik-majnakowatatshinnixkani?

⁵ Seyni wane ntshinhi, hike. Hma mehchinikanutkanuklunu hixa, ptowrunekhi waneko pixka hixa hiylatkotanu.

Figueira Muna Masahito Piranapni

⁶ Waneya Jesus yapkaklu pirana rutaka: — Satu yineru pa kata figueira muna rutaka rusanate uva-cha yehi. Waneya wane hya hisahi rujhapyawakmaka. Seyni hikta rawa.

⁷ Waneya wla htshinru uva-cha hislahatshri: “Haha hetanu! Mapa mhale pchinika nujhasahtaplu xye muna seyni haté xawakni hi kasahpirlu. Hiyáhoni xawakni pkayikanutkalu. Klu rimimaletachatlu tshiji?”

⁸ Seyni uva-cha hislahatshri wan-tshinru: “Nutsrukate, xye mhaleyakatshi wetanru. Njitoskotanrutshi waneya tshkipahitshi nutakaskotanru.

⁹ Hsahiwaxinipa kihleplu. Seyni wane hmixkanuklunupa pkayikajixanru halikaka.”

Jesus Hitskalajyawaklo Suxo Hapnanuxikalur-hohne Piranapni

¹⁰ Satu hapnanuxikalur-hohnetnaka Jesus hasruklewakanata satu hanjihohnewakapjiya.

¹¹ Waneya sato suxo satu kamtshi yeyixkaklewatatshri twiya. Dezoito mhale pchinika hyeyixkaklo wala suxo. T-satkokanatka. Hi tumukata potukawleta hi psotsonujijiko.

¹² Waneya rexiniklunutkalo Jesus, htomhalo. Waneya wane htshinatkalo suxo: — Suxo, pyeyixale hichotanropyi.

¹³ Himyo wala hoho rutaka, waneya chinpotukawa tpotukawamtatka. Waneya timalwutatkalu Hoyakalu.

¹⁴ Seyni hanjihohnewakapji kosekatshri himtuwnahchinikanuta klu tshinanu Jesus pinrewata hapnanuxikalur-hohne waneya wla htshinna yine wane hapatjekanaxikatshine: — Waneru seis hohne rumukata kamrurewlexyawaka yineru. Hiyáhoni kamrurtshi hohnekaka hinanu hpinixikowaka hijhiywakapa seyni hapnanuxikalur-hohne hike.

¹⁵ Seyni Tsru Hixikatshriwa Jesus wla tshinru: — Hixachatatshinhi, hi he hixa ptowrunekhi hipra boi ho burro hkochpiroka hapnanuxikalur-hohne hiyrunu hanikna maleka sreta honha rurapyawakapna pratshine?

¹⁶ Hiyrunu xawakni twu suxo Abraão-ni klopicha. Satanás kachitanro dezoito mhale pchinika. Hiyáhoni kluneru tshinanhe hi tumukata hichotkota xye tkachikanaxikolu hapnanuxikalur-hohne?

¹⁷ Waneya Jesus kamnitjene ptowrunniko patewatana Jesus wan-tshinyawakna tshinanu. Seyni pimrine yine hixolune hpoyikowatna himyekaklewatatshrikaka Jesus kamhaleru tshinanu.

Mostarda-tataji Piranapni

¹⁸ Waneya Jesus wan-tshina: — Kluneru pixka rixa Hoyakalu pohirewaxyawaka? Kluneru nyapkakletanru?

¹⁹ Mostarda-tataji pixka rixa. Satu jeji haniklo. Rusanate rutaklo. Ttseruwna, hahmuna tixnawa. Waneya kochitshine teno yapatshine hina, hkamhachaletna hiplu hohoya.

Chitshponatshri Piranapni

²⁰ Hiyrunukotnaka wla htshina Jesus: — Kluneru nyapkakletanru Hoyakalu pohirewaxyawaka?

²¹ Tserutatshri pixka rixa. Sato suxo hwalu. Mapa chiwatupso trigo pahi tyapjetlu haté psolujpako chitshponatka.

Mtseruswa Hiphaptotetu Piranapni

²² Waneya pa poktshikaka, tsru poktshikaka, mtserutu poktshikak-koxa hyapamtatka Jesus. Rasruklewakananumta. Jerusalém poktshi nwaka hyamta.

²³ Waneya satu yineru hepomhalu, wla htshinru: — Tsru Hixikatshriwa, mixon-koxlahe yine hiwekkakko? Waneya Jesus wan-tshinna:

²⁴ — Hyahot-jihlokletanu mtseruswa hiphaptotetu. Klu tshinanu halikaka ntshinhi. Hixolunemka haluka jihlokletanu seyni hi rumukatanruna.

²⁵ — Kapjiru palnanu, hiphapto ruchyatanu. Waneya hixa hiphapto maleka sreta hwanu, hiphaptomka hitpetanu wla htshinreyma: “Tsru Hixikatshriwa, pjihlokkakanwu.” Seyni wale hihitanhi, wla htshinanhi: “Hi nimathi hanu sretakta hichpajikatshinhi.”

²⁶ Waneya hixa wla tshinanu: “Hixa pixayma mitshi nikatshinwu. Wipoktshi mitshi pasruklewaxya.”

²⁷ Seyni wale wla tshinanhi hiyrunuko: “Hi nimathi hanu sreta hichpajikatshinhi. Hasujinri nosta sreta hixa ptowrunekhi hektutu kkamhaklerunhi.”

²⁸ Hexiniklunpatkana Abraão-ni, Isaque-ni, Jacó-ni, hiyrun-koxa pimrinni Hoyakalu tokanu hinkakletatshinni ptowrunnika Hoyakalu pohirewaxyawaka rawyawakna seyni hixapni maleka sreta hwininapa waneya rawanu tsru tshiyahlu haskiyhiru koxa.

²⁹ Hixolune yine hinanu, tkatshi hichpajyawaka sreta, rimxijyawaka sreta, pa sta sreta hpotukle sreta ruchpajinna. Nikjexikowaka yehi Hoyakalu pohirewaxyawaka hwatshri htuplatanna.

³⁰ Himatanru xye. Rapkatle hwatshri kosekanutka. Hiyrun-koxa kosekakanatatshri hapkatatanutka.

Jesus Jerusalém Poktshi Ruchinijyawaka Piranapni

³¹ Waneya waneklu satkaka fariseu-ne yanwakatlu Jesus. Wla htshinruna: — Hewi pasujinixka klu tshinanu phuru Herodes haluk-hiylaletyi.

³² Waneya Jesus wla tshina: — Hajewa. Wale kaweretshi pixkalutu nwaka hyanu. “Kamtshine nuchpakkaka hiyrunu yeyixatshine nutskalakjeta xawakni hohne, yetshikawa koxa wane nixanu. Halikaka map-hohne rixinripa nali kamruretanutka.” Xye xako hinkakanru.

³³ Klu tshinanu nujhalu natnu hapote nomkahixyawaka xawakni, yetshikawa wale pnut-hohne. Klu tshinanu halikakni Hoyakalu tokanu hinkakletatshri hi rumukata hipnaleta Jerusalém poktshi minjeya.

³⁴ — Jerusalém, ha Jerusalém! Puylajetna Hoyakalu tokanu hinkakletatshine hiyrunu pimrinni pixa nwaka hyokanatanunni Hoyakalu psotlujeta! Hixo katmaka naluka kapolethi ho sapriklethi patlapa tapatjewhenexini pixka! Tomeji hpuko tutajinna pixka. Seyni pixa hi hitshitno.

³⁵ Himatanru xye. Xawakni hipji hichotkalurutka. Halikaka ntshinyi. Hi hiyrunu petanutkano haté wla ptshininipa: “Hoyakalu hihlehchinikanutlu Tsru Hixikatshriwa Hoyakalu hiwaka hinikatshri.”