Lucas 12 - Bíblia

Hislahinwa Hixachaluya Piranapni

¹ Waneya rapatjetna hixolune yine, hixo mil yine. Haté hkatsrekkakna wannakakluko. Waneya mitshikananhapka Jesus wan-tshinna rasruklene: — Hetanru xako fariseu-ne tserutjeru. Waleni rixachalna.

² Ptowru potuko hichyatkaluru ruphujetko hiyrun-koxa ptowru potuko yohimluru pirana pohitko.

³ Hiyáhoni ptowru potuko hyanumaxinri mapchahawakaya, hyijnakotko katawak-hohne yehiya. Hiyrun-koxa ptowru potuko himsalewaxinri, hihruko hitokoteya, ptowru yineru jemanru htshinyawak-potuko.

⁴ Jesus xye koxa htshina: — Nimatletanune, wane ntshinhi halikaka: Hi hpikanna mantshi hiylatatshine klu tshinanu wane pnutetka hike rumukata kamhalexyatkahi.

⁵ Wale tshinanu nekhithi kat-potu hpikanu. Halikaka hpikanru Hoyakalu hix-mane hakot-hiylaletatshri waneya wane pnute tshitshmero ruknoklewata. Wane ntshinatnaka. Halikak-potu Hoyakalu hpikanu.

⁶ — Hi he cinco kochitshine hi kwenu hichanjika? Wanepnawaka Hoyakalu hi satukna kochitshi hma muslahanutu.

⁷ Haté wijiwutsa ptowruka hitakyahokalurni Hoyakaluya. Hiyáhoni hi hpikanu klu tshinanu hixa yáholu satupka yineru tsonu, hixo kochitshine yohnik-hijhakalurni!

⁸ Jesus wan-tshina: — Wane ntshinhi, katukta hiphujtatno hita yine jemanu, Jeji Whene tshinkalur-koxa hiphujtatanru wale hiwejikalune Hoyakalu towrene tenhohne hajene hetanu.

⁹ Seyni katukta yine jemanu malukkotu htshinanwakaxinipno waneya Jeji Whene tshinkaluru koxa waneko pixka htshinanwakatanunru hiwejikalune Hoyakalu towrene tenhohne hajene jemanuya malukkotni wale htshinanunna.

¹⁰ — Katuktako hektuwaka htshinanwakatlu Jeji Whene tshinkaluru, wanepnawakatshi ramtakahchinikanuxiko rektunu. Seyni katukta hektutu tshinanwakaxiniplu Hoyakalu Hiwejikaluru hikeklu hohne ramtakahchinikanyehitkona rektunu.

¹¹ — Hanikkoklunpatka hanjihohnewakapjikaka nwaka hjihyehixikowakapa, ho tsrukakalune hoji sreta, ho tsru hitakkalun-yehi, hi hkojwakahchinikanuxinwa hanu potu htshin-hihretanna ho hanu htshinanna.

¹² Klu tshinanu waneklu papko potuko Hoyakalu Hiwejikaluru hasrukanhi hanu potu htshinanu.

Jeji Phuru Mahchinikanutu Piranapni

¹³ Waneya satu jeji wan-tshinru Jesus hixolune yin-yehiya. Wla htshina: — Kasruklewakleru, ptowutanru nomole hkaniprexinmakno wurni hiknokamtanru hejnu.

¹⁴ Waneya Jesus wan-tshinru: — Jeji, kathe hitakno hapohchinikanutkaluru nixyawaka nkotspalaxyawakaplu hejnu hixa tshinanu?

¹⁵ Waneya Jesus wla tshinna: — Yine, hislahinwa ptowruka ksotanuru pmet-sotanuxyawakanupa. Klu tshinanu hiweklu hi hejnu hihlenu tshinanu riwekanu yineru.

¹⁶ Waneya Jesus xye yapkaklu rutaka: “Rawa satu jeji phuru. Htshijne rawa tsru honantshi.

¹⁷ Waneya hyinuwaka hichinikanuwleta: Hi kwawakleyno xye tsru honantshi nimrexyawakapa. Hanhe nixanu xawaka?

¹⁸ Ha! Xawakni nimatlu nkamhanrupa, — htshina wale nanwaka. — Nyotkakanru pantshi hitsruka honantshi himrexikowakapjikaka waneya herotu pantshikaka nkamhanu tsru potpaklu. Waneko nimrexinri nonanru psoluka, nimwaleru ptowruka koxa.

¹⁹ Waneya wla ntshinanu nohchinikanuya: ‘Jeji kihle hchinikanurno. Ptowru potuko kihleru nimwa hixo mhale tshinanu. Xawakni napnanutanu, nnikanu, nuranu, numuwatanu!’”

²⁰ Seyni Tsru Hixikatshriwa Hoyakalu wan-tshinru: “Jipukaleru! Xye yetshno potuko pupnanu. Ha xawakni kathe himutukanru wale ptowruka pimretanru?”

²¹ Waneya Jesus wla tshina: — Wan-rixanuna yinepni hejnu hapatjetatshinepni wannanupka hijhatshinepni seyni hike mwikanenapni Tsru Hixikatshriwa Hoyakalu yehiya.

Hoyakalu Munanhikolu Piranapni

²² Waneyakni Jesus wan-tshinna rasruklene: — Hi hkojwakahchinikanutanu hanu hixa hiwekletanu, klu hnikanu. Hi himane tshinanuko koxa hkojwakahchinikanutanu klu hmakatanu.

²³ Klu tshinanu hiweklu, nikkaluru yohnik-hijhakalurni. Mantshi, mkatshri yohnik-hijhakalurni.

²⁴ Hetanru pokotu. Hi rutaklewata. Hi ramlu. Hi honantshi himretawakako rimwa. Halikaka rohlutjeru tsonu Hoyakalu. Seyni hixa, kochitshine yohnik-hijhakalun-pothi hixa.

²⁵ Hanunhe hixa satkakhi kojwakahchinikanruyma hixolethohneyehixikatshriwa rumukata hiweklexyawaka pejnu hohne?

²⁶ Hma mumukata kamhaletkanuklunru xye myapret-potu haklu tshinanhe pimrikaka tshinanu hkojwakahchinikanjeta wanepnawaka?

²⁷ Hetanru kahwuru. Hanhe rixa tseruwnaleta? Hi hkamrurewata. Hi rama. Seyni wane ntshinhi halikaka hi phuru Salomão-niko, phuru potukni, seyni mkatshri kihler-potuko rutakjereru hi kahwuru pa hihlenu rixa.

²⁸ Hoyakalukni makawkaklu campo hwatshriptshe xawakni wetleru yetshikawa ramhannatka forno hyoxijikolu tshinanu. Hi he kchana hmakaxyawaka pnute rixa makawkakletanhi hixa malixaklenhi?

²⁹ Hiyáhoni hi hijhanru klu hnikanu ho klu hiranu. Hi hkojwakahchinikanuxinwa.

³⁰ Klu tshinanu xyekaka ptowruka rujhajetmakna moyakalutene, ptowru tshijne hajeneko. Hiru tenhohne hajeru himatlu xye ptowruka halukanru.

³¹ Seyni mitshikananhapka Hoyakalu pohirewaxyawaka hijhanu. Waneyakni Hoyakalu koxa henekanhi xyekaka ptowruka.

³² Waneya Jesus wla tshina: — Noprane ovelha-ne mixone pixkalunmakhi seyni hi hpikanu. Klu tshinanu hixa Hiru nurehchinikanuxnawa hpohirewaxyawaka renejyawakaphi.

³³ Ptowruka himwaleru hichankanu waneya tiyiro hyoptotanrupa henekanna hike mwikane. Hikchijinwa tsapantshikaka mimat-nikawnakatu, hpohirewninri himretanu tenhohneya. Wane hi rimata nikawniya. Klu tshinanu tenhohne katshowhurune mwiywakanni. Hi kamlako himtuklewaxya.

³⁴ Klu tshinanu hanukta himrexyalu hpohirewnale wane koxlu hihchinikanu.

Towrertshi Hislahyawakapa Piranapni

³⁵ — Halpokoxinwa ptowru potuko hinatshripa tshinanu. Hostuskotaxinwa lamparina hnikotanru.

³⁶ Towrertshine pixka hixanu, hpohirna hkahwajinna hnunrowlu nikle yehi ruchpajinpatka pixka hixatshinephi. Rutpehiphaptotexinipa hkotpukyehihapkaxyawakapluna hitowrene.

³⁷ Hihlewahchinikanyehitkalunephi towrertshine hiyokatshine pixka hixini, ptowruka halpokatkalurpatka hpohire hnapu. Halikaka wane ntshinhi, hpoyiptshijixinwa phuru. Htuplakjixanna htowrene. Repixanutkana wale potuko.

³⁸ Hihlewahchinkanyehitkalunepni hanunektapni hiyokatshine hikchijikolune rapojinipa htowutjerna ho hanikaj-yetshno ho hoprikako rapojinipa.

³⁹ Hichinikanru xye: kapjiru himatahnaputkamkalu katshowhuru, himka retachatanru hipji hyotpujyawakapa.

⁴⁰ Hix-koxa kakonutanu klu tshinanu Jeji Whene tshinkaluru hinanu hma kakonuxinri papko.

⁴¹ Waneya Pedro hepomhalu: — Tsru Hixikatshriwa, xye yapkaklu ptshinreru ho hixa tshinanu tsonuplahe ho pimrine tshinan-koxaplahe?

⁴² Waneya Jesus wan-tshinru: — Katnihe towrertshi ptowutkolu, kahchinikanuru? Walepkani towrertshi rutakka htowutjerupji rinoxyawakapa hiyrunu pimrine towrertshine reneka niklexyawakapa niklu papkokaka.

⁴³ Hihlehchinikanyehitkalurni wale towrertshi htowutjeru hininipa retamtlu wan-rixa kamrurekanata!

⁴⁴ Halikaka wane ntshinhi, wan-hixatshri towrertshi rutakko ptowruka htowutjeru himwaleru htowuxyawakapa.

⁴⁵ Seyni towrertshi wla htshinahchinikanuxini rajiya: “Ha hohamokpotukananutkalu ntowutjeru.” Waneya hyinuwaka hiylakletna towrertshine, towretshrone koxa. Hiyrun-koxa tsru potuko hnika, rura, rimeta.

⁴⁶ Hiyáhoni wale towrertshi towutjeru hma kahwajinitu hohne runanu. Hma malpokoxinutu hohne runanu. Htowutjeru yostajhitutanunru towrertshipni. Malixkaneyma ruknokona waneko rapnokaxikona.

⁴⁷ — Hiyrun-koxa htowutjeru halukleru himatatshri seyni hma muhlepokotkanuklunru hkamrure hiyrunu hma kamhaknuklunru htowutjeru halukanru, hkotshipjetko hipokananu.

⁴⁸ Seyni towrertshi, htowutjeru halukanru mimatkatu, hpupjexini pa hixanuya, rujhalu rapnokaxikowakapa seyni psotsonu hkotshipjexiko. Klu tshinanu katukta hixo henekka, hixo koxa rujhiko. Hiyrun-koxa hixo hitajikaluru, hixo ranjitko.

Kotspalaxikatshinwa Jesus Tshinanu Piranapni

⁴⁹ Jesus wla tshinatnaka: — Nuna napnokaxyawaklu xye tshijne tshitshmeroyma. Hi pso haluklekananukta nixlu ralhiywakapa xye tshiji.

⁵⁰ Nujhalu nyoptoxyawakaplu satu batiza-xikolu pixkalutu. Hiyáhoni nkojwakahchinikanuta hmakanhaknu pchinika.

⁵¹ Hixlahe kahwaklu nuna kihle hwachleru nanikanwakaxyawaklu xye tshijne? Seyni hike. Halikaka wane ntshinhi, nuna hi hihle hwachlu nenejyawakaphi seyni nuna nkotspalaxyawakaphi halikaka.

⁵² Klu tshinanu xawakni potuko cinco yine papji hwatshine kotspalahchinikanutkotka. Mapa yine hkamnitanna hepi. Hiyrunu wanna hepi kamnitanna wanna mapa yine.

⁵³ Hirtshi kamnitanru hwuhene hiyrunu whentshi kamnitanru ruru. Hinrotshi kamnitanro tchitsho, tchitsho kamnitanro tunro. Hiyrun-koxa himajirotshi kamnitanro tomekanunro hiyrunu mekanunrotshi kamnitanro thimajiro.

Hipapkolkaka Himaxikolu Piranapni

⁵⁴ Xye koxa htshinna Jesus yine hixolune: — Hixa hohimkohi heta palnalexini tkatshi himxijyawaka sreta waneya wla tshina, “Hinhetkopatkani.” Hiyrunu wane potuko rixa.

⁵⁵ Hiyrun-koxa tkatshi mwiywakanu sreta ruchpajini kanniphalu, hixa wan-tshina: “Hameru hohnektapni.” Hiyrunu wane potuko rixa.

⁵⁶ Hixachatatshinhi! Klu tshinanu tshiji, tenhohne himaxikolkaka himatheta. Hiyáhoni haklu tshinanhe hi himathetlu xye hohnekaka hetlurutka hanu rixa?

Hkamnitjene Hektunu Ramtakahchinikanyehixyawaka Piranapni

⁵⁷ — Haklu tshinanhe hixa hi nurehchinikanuxinwa hanurni kihle kamruru menu?

⁵⁸ Ho satu yineru jihyehixinipyi raluk-haniklexinipyi jemahchinikanjexikowaka yehi. Wane hyamtkako pchini puhlemtanru wale pirana jemahchinikanjexikowaka yehi pmapokkanuko pchini, hipokananu hma manikkanuklunupyi. Heta mayxaklerewatatshri kapna yochmaklewjetatshri hma menejyawakanupyi. Kapna hitaklewjetatshri kapna mutajyawakanupyi.

⁵⁹ Hiyrun-koxa wane ntshinyi, kapna putakkoklunupa hi puchpakanu waneya tiyiro ralujyawaka pso pma menekkanuklunuko pchini.