Lucas 10 - Bíblia

Setenta Hiyrunu Hepi Jejine Hyokanata Runkaklewtapyawakapna Piranapni

¹ Waneya Tsru Hixikatshriwa Jesus setenta e dois jejine hnureta. Hyokanatna hepkaka hkosejyawakapna, ptowru poktshi hiyrunu ptowru tshijnekaka hyiywakapna, Jesus yapamxyawaka pejnupa.

² Wla htshinatkana: — Hamkaluru halikaka hix-potuko. Seyni kamrurewatatshine hi hixo. Hiyáhoni hanjitanru Tsru Hixikatshriwa hamkaluru towutatshri, kamrurewatatshine hyokanaxyawakapa ramyawakapluna.

³ Hajewa. Seyni himatanu. Nyokanathi hatatjewa ovelha-nhi lobo-ne pixkalune hanikajite hyiywakapa.

⁴ Tiyiro mapa hi hanikanu, hi sacola-ko hanikanu. Hiyrun-koxa hi hanikanru sandalha. Hi halikanru hatnu hapo hyoptoxinri.

⁵ Satu pantshi hjihlojinipa, mitshikananhapka wla htshinanna pantshi hajene: “Kihlephi xyepji hwatshine.”

⁶ Hiyáhoni wanepji rawinipa satu yineru kihle hwachleru walekni kihle hwachleru htshinka. Seyni wane hmawkanuklunu jeji kihle hwachle mixkatu htshintokanuxyawaka hixa nwakako hsatkapanu htshinyawaka.

⁷ Walepjiko hwanu. Wane hnijini kluneruktako hohlutko. Hiyrun-koxa wanepjiko hirini klunerukta hitko. Klu tshinanu kamrurewatatshri himukata yoptoletlu hkamrure hipekole. Hi pimripjikaka hyanu.

⁸ — Hanur-poktshiktako hjihlojinipa, kihle yoptole hixkoklunupa, hnikanru kluneruktako henejikolupa.

⁹ Wane poktshi hwatshine hitskalhakakanu. Waneya wla htshinanna: “Hoyakalu pohirewaxyawaka hapokanwakatatkahi.”

¹⁰ Hanu poktshikta hjihloka hma malukkonuklunupa waneya wane hichpajini. Poktshi pjikaka hapotlo hyanu. Waneya wla htshinanu:

¹¹ “Haté tshiji pahi xye poktshi hajeru, wijixi hipxakatshri pahi, wcheyitanu hixa hetanu. Seyni hichinikanru xye: Hoyakalu pohirewaxyawaka hapokanwakatamkahi.”

¹² Jesus pnuteko htshinna: — Nunkakhi, halikaka ntshina. Hapnokaxikolu hohnepa Sodoma poktshini salexikolu yohnik-hapnokatlu rixko hma yoptohihlenuxikowakanu poktshiya.

Malixkane Poktshikaka Hapnokaxikowaka Piranapni

¹³ Hiyrun-koxa Jesus wan-tshina: — Hapnokatkalur-potupyi pixa Corazim poktshi hiyrunu Betsaida poktshi! Klu tshinanu himyekaklewatatshrikaka hkamhakmaka Tiro poktshiya hiyrunu Sidom poktshi hix-yehi hakanhikatshri pixkalutu, waneyamka mitshikawako rehchinikanutanutkana wane poktshikak-hajene, waneyamka mkatshri saco mapa kamhikolu hmakatanutkana rimathexikowakna rehchinikanutatkana hiyrunu tshitshi pahi koxamka hpolojiwuxinwana.

¹⁴ Rapnokaxikolu hohnepa Tiro hiyrun-koxa Sidom poktshi hi hsaletpotukanatkona hixa salexikowaka pso.

¹⁵ Hiyrunu pixa Cafarnaum poktshi. Pkahwakhe patskoxyawakapa haté tenhohne? Seyni pixa halikaka puknokko tshiji hitokote hamhikowaka yehi.

¹⁶ Hixa yijnakotatshine hit-koxa hyijnakotna. Hixa hiknokatshine hit-koxa ruknokna. Hiyrunu hita hiknokatshine, nyokanatjer-koxa ruknokna.

Setenta Hiyrunu Hepi Satojyawaka Piranapni

¹⁷ Waneya hsatokatkana setenta e dois jejine Jesus yokanrene. Hpoyikowpotutna. Wla htshinatkaluna Jesus: — Haté kamtshine yijnakotwu wyokanaxinna ruchpakna pixa phiwaka tshinanu!

¹⁸ Waneya Jesus wan-tshinna: — Hehe, hita hetlu Satanás kamtshi rujrujyawaka tenhohneya rawrakle pixka.

¹⁹ Hjemanno. Nenekatkahi pixkontshi himnune hkatsrexyawaka, heklone koxa. Hike rixa. Nenekatkahi pixkontshi hkamnitjene mixkonu hiknojyawakapa. Hike himtukanhi.

²⁰ Wanepnawaka hi himuwatanu kamtshine yijnakoxyawakhi tshinanu seyni halikaka himuwatanu klu tshinanu hyonhiwakatka tenhohneya.

Jesus Poyikowaxyawaka Piranapni

²¹ Waneya waneklu hpoyikowpotuta Jesus, Hoyakalu Hiwejikaluru himukatle tshinanu. Waneya wane htshina: — Nimalwutyi, Nuru, tenhohne tshij-koxa Towutatshriyi. Klu tshinanu pyohimatlu xye pirankaka jimatkaleruneya hiyrunu kahchinikanuruneya. Seyni puphujetlu hike mimatkane hetanuya. Hehe, Nuru, xye pixa palujyawakni.

²² — Nuru, ptowru potuko renekno. Hike himathetlu Whentshi seyni Hirtshipka himathetlu. Hike himathetlu Hirtshi seyni Whentshipka himathetlu hiyrun-koxa katukta raluk-himatyehkakletlu Hirtshi.

²³ Waneya Jesus hiprotakyehitna rasruklene waneya wla htshinatkana wannapka: — Kihlehchinikanhi xyekaka pejnu hexini, hiyhaleya.

²⁴ Klu tshinanu wane ntshinhi hixo Hoyakalu tokanu hinkakletatshinni hiyrun-koxa phurune haluk-hetletmaklu hixa hetanrutka. Seyni hi retluna. Raluka yijnakoletmakluna hixa yijnakotanrutka seyni hi hyijnakotluna.

Kihleru Jeji Samaria Hajeru Piranapni

²⁵ Waneya satu Moisés yonreru pirana himatpotutatshri palnamta hyahoxyawakaplu Jesus. Wla htshin-hepomhaletlu: — Kasruklewakleru, kluhe nkamhanu nkayaxyawakaplu hiwejikaluru hikeklu hohne mnikawnakatupa?

²⁶ Waneya Jesus wan-tshinru: — Hanhe htshina yonruru pirana? Hanhe htshin-yonhata?

²⁷ Waneya jeji wla tshin-hihretlu: — “Pamotanru Tsru Hixikatshriwa Poyakalute psol-potuko pajiya, psol-potuko piwejinriya, psol-potuko pmixkonuya, psol-potuko pihchinikanuya; pamotanru pimwastsitanru pamoxnawakwa pixka.”

²⁸ Waneya Jesus wan-tshinru: — Hehe, wane potuko ptshin-hihreta. Wane potuko pixanu waneyapa piwekanu.

²⁹ Seyni hinanchitkaluru pirana hasruklewatatshri haluka powratlexnawa hiyáhoni wla htshinru Jesus: — Seyni katnihe nimwastsireru?

³⁰ Waneya Jesus hihitlu: — Wanekananru satu jeji Jerusalém poktshi yopijikatshri. Jericó nwaka hyakananumta. Katshowhurune yehi rapokana. Hkomkahanruna. Ruylakanruna. Waneya hyatkana. Rupnakastsitkani ruchomtatkaluna.

³¹ Waneyakta satu sacerdote wale hapoko yopikakanaxya. Retamxininatkalu jejni pa sretatnu hapo hyapamta, hyatka.

³² Waneko pixka rixatka satu Levi tshinkaluru klopicha. Wane rapokamta retamtanru. Riknohachamtan-koxlu wale.

³³ Seyni satu Samaria tshijne hajeru wale hapok-koxa yapamtatshri hapyehixinixkalu jeji. Retlu. Retwamonutlu.

³⁴ Hyanwakatlu. Hpoyichretlu. Nhihtshiha ruyokhohotlu vinho-ha koxa. Waneya hipratji hoho rutakatkalu. Ranikatkalu, himkajexikowakapji rutakatkalu. Waneko rinoxyalu.

³⁵ Waneya wale prika hyatka. Seyni mitshikananhapka tiyiro hepi hohne kamrurtshi wenru pso hkochpaka waneya kapjiru reneka. Wla htshinru: — Puslahanru. Klunerukta wane pnute psaletanutka wale tshinanu, nsatkapinipa, nwenutanyi.

³⁶ Hiyáhoni xawakni kathe pkahwaka pixa, nyi mapa jejine tshinanu, rimwastsirexyawakluna katshowhurune hiylakleru?

³⁷ Waneya hinanchitkaluru pirana hasruklewatatshri wla tshinru: — Retwamonutjeru halikaka himwastsiretlu. Waneya Jesus wan-tshinru: — Pyanu. Waneko pixka pixanu pixa.

Jesus Hetapna Marta Hiyrunu Maria Tshinkalurone Piranapni

³⁸ Waneya Jesus rasrukleneyma yatka. Satu poktshi nwaka hyatkana. Sato suxo Marta tshinkaluro, wale poktshi hajero yoptotlu Jesus topjiya.

³⁹ Waneyatka tepuro Maria tshinkaluro Tsru Hixikatshriwa Jesus jixistsi ttuplakanatatka. Tyijnakokanatlu htokanu.

⁴⁰ Seyni Marta tshinkaluro kojwakahchinikanuta hixo kamrurtshi, pantshi hajeru tshinanu. Hiyáhoni tapokanwakatlu Jesus. Waneya wla ttshinru: — Tsru Hixikatshriwa, hike pix-pixa tuknokamtano nepuro, hitapkani kamrurewatana? Hiyáhoni pyokanatanro tepixyawakapno.

⁴¹ Waneya Tsru Hixikatshriwa Jesus wan-tshinro: — Marta, Marta, kojwakahchinikanutatshroyi, mimatahichinikanuwatkátoyi hixo pa hixanu tshinanu.

⁴² Satupkalu hijhakalur-potu. Maria-kni kihleru nuretatka. Hiyrun-koxa hi tkonko tnurreru.