Lucas 1 - Bíblia

Teófilo Tshinkaluru Tshinanupa

¹ Hi heppika yineru yahot-yonretmaklu Jesus pirana rixjekanaxyawaka hix-yehi hkamhajekanaxinri pirana tshinanu.

² Xyekaka pirana wunkakjene, reyinuwaklekananuko hetatshine hiyrun-koxa Hoyakalu tokanu jinkakletaklerunekananni.

³ Hiyáhoni, kchinikanur-potni Teófilo, hit-koxa hikchikhihlenutlu nyonaxyawaklu xye pirana kihle pokowak-potuko nixyawakaplu pixa tshinanu. Klu tshinanu hit-honra xye pirana reyinuwaklekananuko nuslahpiranpotukanatlu.

⁴ Pimatpotuxyawakaplu pix-koxa psol-piranako halikaka pirana pasrujikolu.

João Batista Matuxinri Hinkaklexikolu Piranapni

⁵ Judeu tshijne pohire Herodes tshinkaluru klu papko wanekanan-koxlu satu sacerdote Zacarias tshinkaluru. Sacerdote-ne Abias tshinkalune klopichni wale. Hiyrun-koxa Zacarias hnunro Isabel tshinkaluro sacerdote klopich-koxni Arão tshinkaluru klopichni wala.

⁶ Hiyrun-koxa powrahchinikanurunni wanna hepi Hoyakalu hetanuya. Kajnákona Tsru Hixikatshriwa Hoyakalu hiykolukaka. Hi psojikna hpupjexyana.

⁷ Seyni Isabel tshinkaluro hi michiwata hiyáhoni mwuhenewaklenni; hiyrun-koxa tsrutsolejinetkani.

⁸ Waneya pa kata Zacarias tshinkaluru sacerdote kamrure hkamhakanata Hoyakalu kamrure, rix-kamrurjexyawakna sacerdote-ne.

⁹ Wan-rix-kamhaljexyawakna sacerdote-ne, rutakka Zacarias tshinkaluru, Tsru Hixikatshriwa Hoyakalupji hjihlojyawakapa phamluhalo hyoxijyawakapa.

¹⁰ Waneya rapokpapkoluxinixka phamluhalo hyoxijyawaka, pimrine hixolune Hoyakalupji maleka sretate hwakanatatshine ranjihohnekanatna.

¹¹ Waneyakni satu hiwejikaluru Hoyakalu towreru tenhohne hajeru hakanhayehitlu Zacarias. Kapajiru henekachalu yoxikkaluru hitajikowaka phamluhalo yoxijikowakastsi hpotukle sreta hyopkakakanata Hoyakalu towreru tenhohne hajeru.

¹² Waneya Zacarias hexinixkalu hkojwakahchinikanuxnawa. Hpikpotutatka.

¹³ Seyni hiwejikaluru Hoyakalu towreru tenhohne hajeru wan-tshinru: — Hi ppikanu, Zacarias. Hoyakalu himatlu panjireru hanjihohneruya. Hiyáhoni phanunro Isabel matuwhenexinyi jejipni. Phiwakatanru xako João.

¹⁴ Hmatuxinipa pumuwatanu pixa hiyrun-koxa hixolune yine poyikowatanu.

¹⁵ Klu tshinanu tsru hitakkalurupni Tsru Hixikatshriwa Hoyakalu yhaleya. Wale xako hikeklu hohne ruranru vinho-ha, hi katshwuhaloko ruranu. Hoyakalu Hiwejikaluru tsepotmanetanru runro nanwaka ruchpajinikananuko.

¹⁶ Hixolune yine israel-nerune hsatkakanu Tsru Hixikatshriwa Hoyakalu Royakalutna romkahixyawakapna.

¹⁷ Hoyakalu towrerupni, jinkaklewaklerupni. Hoyakalu tokanu hinkakletatshrini Elias-ni tshinkalurni hchinikanu pixka rixleyma hiyrun-koxa Elias-ni pixkonu pixka rixleyma rimatletkakanna tsrune hwuheneneymana. Hektutu kamhatshine ruprotakanna potuka hchinikanurune hiykole romkahixyawakapna. Ralpokohnaputna yine Tsru Hixikatshriwa hapojinripa.

¹⁸ Waneya Zacarias hepomhatkalu hiwejikaluru Hoyakalu towreru tenhohne hajeru: — Hanhe xawaka nixa halixletlu xye pirana? Klu tshinanu tsrutsolejitkano. Nhanunro koxa hixo mhaletkalo.

¹⁹ Waneya hiwejikaluru Hoyakalu towreru tenhohne hajeru wane htshin-hihretlu: — Petanu. Nhiwaka Gabriel, Hoyakalu towrerno. Walekni nyokanatjeru pixa nunkajyawakapa xye pirana kihler-potuko.

²⁰ Petanu. Hi palixlu nunkakle wanepnawaka rapokpapkoluxinipa rakanhanu ptowru piranaka nunkajyatkayi. Seyni pmalixtokanutkan-tshinanno, myanumatkatupyi. Hi pumukata yanumletanuna haté hmatuxinipa piwhene.

²¹ Seyni yine wane pchinika hkahwakakanatluna Zacarias tshinkaluru Hoyakalupji ruchpajyawakapa. Rimyekna klu tshinanu hohamokatkalu.

²² Ruchpakamxinixka hi rumukata yanumletanatka. Waneya rimathetluna pa hixanu hetko hetkaluru rethetkotatka Hoyakalupjiya. Myanumatkatukananukotkani hiyáhoni himyoko runkajyatkana yine.

Isabel Tshinkaluro Poyikowaxyawakapa Piranapni

²³ Wan-rixa. Rali kamruremxinixkalu, sacerdote kamrure, hipji nwaka hyatka.

²⁴ Waneya pchini hohnejijitka Zacarias hnunro Isabel tshinkaluro michiwatatka waneya cinco ksuru hi tuchpaka topjiya.

²⁵ Waneya wane ttshina: — Xawaknikananu Tsru Hixikatshriwa Hoyakalu hepixatkano. Xawakni nimatlu ruchinijyawakno klu tshinanu hkonyano npatewle yine hetanuya, klu tshinanu kwhenepatkano. Mwuhenewakletno nixpatka.

Jesus Matuxinripa Piranapni

²⁶ Waneya seis ksuru rixinri kamchiro tixyawaka Isabel tshinkaluro Hoyakalu yokanatatnaklu hiwejikaluru htowreru tenhohne hajeru, Gabriel tshinkaluru, Nazaré poktshi Galileia tshijneya, hyiywakapa.

²⁷ Makloji jeji mapokmanetanuto yehi hya. Twu suxo José tshinkaluru tunkaklexika, Phuru Davi-ni tshinkalurni klopichni, hhanunroxyawaka. Twu suxo jeji mapokmanetanuto hiwakni Maria.

²⁸ Hiyáhoni hiwejikaluru Hoyakalu towreru tenhohne hajeru hapyehitlo wla htshinatkalo: — Hali, pixa Hoyakalu nurreroyi Tsru Hixikatshriwa Hoyakalu pixaymalu.

²⁹ Seyni Maria kojwakahchinikanuta wane htshina haliklexyawaklo. Tujhahchinikanuta klu tshinanhe wane htshintokanyehitlo.

³⁰ Seyni hiwejikaluru Hoyakalu towreru tenhohne hajeru wan-tshinro: — Hi ppikanu, Maria, klu tshinanu kihlehchinikanru Hoyakalu pixa tshinanu.

³¹ Petanu. Pixa michiwatanu, jeji pmatkakanu. Jesus putakhiwakatanru.

³² Tsru Hixikatshriwa rixyawakapa. Hhiwakatko, Hoyakalu Tsru Potuko whenni. Tsru Hixikatshriwa Hoyakalu henekanru rurni Davi-ni pohirewakanaxyawaka.

³³ Jacó-ni klopichane pohirepni hikeklu hohne mnikawnakatupa, hiyrun-koxa hpohirewnale hikeklu hohne nikawnanutka.

³⁴ Waneya Maria wan-tshinru hiwejikaluru Hoyakalu towreru tenhohne hajeru: — Hanhe rixa hakanhaletanu xye klu tshinanu hita hike hapokmanetno.

³⁵ Seyni hiwejikaluru Hoyakalu towreru tenhohne hajeru wan-tshinro: — Hoyakalu Hiwejikaluru pix-hohwaka rapokanu. Hiyrun-koxa Hoyakalu Ptowru Potuka Himukatatshri himukatle pix-hitokote hwanu. Wale tshinanu mturu pkaylerupa Hoyakalu nurrerni. Hoyakalu whene htshinko.

³⁶ Hiyrunu petanu. Pimole Isabel-mka tsrotsolejni. Seyni wala koxa kwajnanwaka mturu seyni jejni. Hike kahwaklo tmichiwaxyawaka seyni kamchirotkani. Seis ksurutkalo.

³⁷ Klu tshinanu Hoyakaluyma hikeni kyapreru.

³⁸ Waneya Maria wan-tshinru: — Hewitkano. Tsru Hixikatshriwa Hoyakalu towrerno. Wane potuko rixanno ptshinyawakno. Waneya hiwejikaluru Hoyakalu towreru tenhohne hajeru yatka.

Maria Hetapyawaklo Tomole Isabel Piranapni

³⁹ Waneya hi hix-hohnepotu, wane tuchpajya Maria. Teyakawamta. Teno mrijiwaka tya. Judeia tshijne hajeru poktshi nwaka tya.

⁴⁰ Zacarias-pji tjihlokatka waneya Isabel tshinkaluro talikatka.

⁴¹ Wane tixatka. Isabel jem-haliklexinixkalo Maria, mturu Isabel nanwaka hajeru ruptekapa. Hoyakalu Hiwejikaluru pixkonu himwatkalo.

⁴² Hiyáhoni hipokananu tyanumata. Wla ttshina yanumleta Isabel: — Hihlehchinikanyehitkalúroyi pixje suxon-yehiya. Hiyrun-koxa hihlehchinikanyehitkaluru pixa nanwaka hichpajikatshripa.

⁴³ Katnohe hita tyanwakaxyawakno Noyakalute hinro tetapyawakno?

⁴⁴ Petanu. Hajeyrono yijnakotatkayi palijyawakno mturu nonanwaka hajeru hiptekapa hpoyikonuyma.

⁴⁵ Hihlehchinikanyehitkalúroyi klu tshinanu palixanru rixa hakanhalexyawaka psol-piranako Tsru Hixikatshriwa Hoyakalu hinkajyatkayi halikaka.

Maria Himalwure Piranapni

⁴⁶ Waneya wla ttshinatka Maria: — Naji himalwutlu Tsru Hixikatshriwa Hoyakalu.

⁴⁷ Niwejinri himuwata Hoyakalu Niwekkakjeru tshinanu.

⁴⁸ Klu tshinanu hita ruchinikanretatka, hitako, htowrerno, hike makotkatokno. Xawakni pnut-hohne hihlewahchinikanyehitkalurno wane htshinnona ptowru hiwekhohnekanatatshine ptowru hixatshine jejine, suxone.

⁴⁹ Klu tshinanu Hoyakalu Ptowru Potuko Himukatatshriko tsru hetkaluru hkamhiyno. Hhiwakni Potukal-potuko.

⁵⁰ Retwamonre rekhitna yine hkahwakpiratjene pejnu hiwekakanatatshine haté xawakni pnut-hohne hiwekatshinepa.

⁵¹ Rekhitlu hmixkonu hkamrureymakotka. Hkopalatna halixkotachaxikatshinwa ruchinikanretanruymana.

⁵² Phurunekananu hkonyana hpohirewaxinrina. Waneya hike mkochpakkanekananu tsru rixkakatkana.

⁵³ Jinanu rixkakna natshikanatatshine ptowru nijittshi kihleruya. Phurune hyokanatanna hyiywakatkana hike manikaneko.

⁵⁴ Repixlu htowreru israel-nerune klu tshinanu hi ramtakatkalu retwamonrewle.

⁵⁵ Runkajya pirannina wutsrukatenni. Wan-rixlu Abraão-ni hiyrun-koxa hiklopichaneya hikeklu hohne mnikawnakatupa.

⁵⁶ Waneya Maria tshinkaluro mapa ksuru pchinika Isabel tshinkaluro yehi twa. Waneya topji nwaka t-satokatnaka Maria.

João Batista Tshinkaluru Matuxyawaka Piranapni

⁵⁷ Waneya rapokpapkoluxinixka Isabel tshinkaluro tmatuwhenexyawaka, twuhenetlu mturu jeji.

⁵⁸ Waneya timwastsirene hiyrun-koxa tomolene jempiranyehitlu Tsru Hixikatshriwa Hoyakalu hepixyawaklo Isabel tshinkaluro pirana. Hiyáhoni rumuwatna wanna ptowruneka walayma.

⁵⁹ Waneyatka mturu oito hohne rixinixka ranikluna mturu hjiprojhaptojimtaxikowakpatka. Waneyakni rutakhiwakatmakluna Zacarias, ruru hiwakako.

⁶⁰ Seyni runro wan-tshina: — Hike seyni João htshinko halikaka.

⁶¹ Waneya pimrine wan-tshinro: — Seyni hi satukna pimolene xye hiwaka hiwakatletatshri.

⁶² Waneya rutsejrihjetluna mturu hiru hanu htshinahiwakatlepiratlu wale.

⁶³ Waneya Zacarias hanjitlu papel-mta. Waneya hyonatlu hituru hiwaka João. Waneya ptowruneka himyekatka.

⁶⁴ Waneya waneklukawa potuko Zacarias himukata yanumletatnaka. Waneya hyinuwaka himalwuretlu Hoyakalu.

⁶⁵ Waneyakni rimwastsitanune pikatkalu Hoyakalu. Hiyrun-koxa Judeia tshijne teno mrijiwakaya psoluchako hpohixikatka xye pirankaka.

⁶⁶ Waneya ptowru yine xye pirankaka jematshine himretpiranatlu rajiyna. Repomhiynawana: — Klu hixatshripni xye mturu? Klu tshinanu halikaka phujetkalu Hoyakaluyma rixyawaka.

Zacarias Tshinkaluru Hinkakletlu Mapokatuwa Piranapni

⁶⁷ Waneya mturu hiru, Zacarias tshinkaluru, katsepoylu Hoyakalu Hiwejikaluru hiyáhoni runkakletlu mapokatuwa pirana, waneya wane htshina:

⁶⁸ — Himalwutkaluru Tsru Hixikatshriwa israel-nerune Hoyakalute, klu tshinanu runatka, riwekkakatkana rayinetene.

⁶⁹ Hoyakalu henekatkawu satu hiwekkaklewatatshri, tsru pixkonurutu Tsru Hixikatshriwa Hoyakalu towreru Davi tshinkalurni klopichni.

⁷⁰ Mitshikawako wane htshinatka Hoyakalu, htokanu hinkakletatshine nuretkaluneya.

⁷¹ Runkakletlu wkamnitjenemyoya riwekkajyawakapwu, waneya pnuteko runkakwu wahnanutjene jihekannu hkochtshejinwu.

⁷² Retwamonre pirana wutsrukatenni runkaklexinritka rekhitanu. Htshina hinkaklexyawaknina pixka potuko rixa halikakalutu pirana hi ramtaklu.

⁷³ Hoyakalu hinkakniri wutsrukatni Abraão-ni, hiyáhoni Hoyakalu kamhiylu htshina hinkaklexyawak-potuko.

⁷⁴ Hkochpajyawakapwu wkamnitjene hamlenu, wpoyaho homkahrexyawakaplu Hoyakalu, hike wpikanu,

⁷⁵ Wumukata homkahretlu powrahchinikanurunwu, potukalunwu ptowru hohneruka wiwejinriya Hoyakalu hetanuya.

⁷⁶ Hiyáhoni, noturu, Tsru Hixikatshriwa Hoyakalu, tenhohne hajeru tokanu hinkakletatshri ptshinko. Klu tshinanu pixa yihapamtanu Tsru Hixikatshriwa Hoyakalu hatnu hapote palpokoxyawakapa.

⁷⁷ Hoyakalu hayinetene punkakanu hiwekkaklewatatshri pirana, rektunna hiknojikowakpatka.

⁷⁸ Woyakalute retwamonrewle tsru potuko rixanwu. Hkotpukyehitanwu ratnuya hiwekkaklewatatshri pirana tenhohne hichpajikatshri pirana.

⁷⁹ Hnikotyehitna mapchahawaka hwatshine, hipuktshistsi hwatshinena; rekhixyawakapwu hatnu hapo hapnanuhchinikankaklewatatshri hapo wyapyawakapa. (Seyokatkani Zacarias chikale.)

⁸⁰ Waneya mturu João Batista tseruwnatka, hmixkowahchinikanutatka. Popriwaka rawjekanatatka haté rakanhayehitatkana israel-nerune.