João 9 - Bíblia

Jesus Mayhaletu Retkajyawaka Piranapni

¹ Waneya Jesus yamxini retlu satu jeji mayhaletu. Hmatuxinikawa mayhaletni.

² Waneya Jesus hasruklene hepomhatkalu Jesus, wla htshinruna: — Kasruklewakleru, kathe hektuwatatka, xye jeji mayhaletu ho ruru ho runro? Klu tshinanu mayhaletuko hmatuxyatka xye jeji.

³ Jesus wla tshinna: — Hi rektunu tshinanu hiyrunu hi rurune hektunu tshinanu wan-rixa xye jeji mayhaletu. Seyni wan-rixa Hoyakalu kamrure himathexikolupa xye jeji tshinanu.

⁴ Nujhalu nyokanatjeru halukanru nkamhiywaka, hohi rixka pchinika. Klu tshinanu hoyetshno hapokanu. Waneya hoyetshno rixinpatka hike kamrurewatanu.

⁵ Xye tshiji nwaka pchinika, xye tshijne katalute hitni.

⁶ Waneya rali wan-tshinretatka, tshiji rutskahata. Waneya hitskaha ruhaklu kajpa. Waneya mayhaletu yhale hsahajpatlu kajpa.

⁷ Waneya wla htshinru mayhaletu: — Hajewa. Honha himrexikowaka Siloé tshinikowaka pyanu wane perokayhalexinwa. Siloé, raluka tshinreta ‘yokanatkaluru’. Hiyáhoni hyatka, wane hya. Rerokayhalexnawa waneya hsatokatka retatka.

⁸ Waneya rimwastsirene hiyrunu pimrine mayhaletukananu himathetatshine wla htshinyehitluna: — Hi he xyekni tuplajekanatatshri, hanjijekanatatshri?

⁹ Satkaka wla tshina: — Hehe walekni. Seyni pimrine wla tshina: — Hike, seyni wale pixkalutni. Seyni waleko wla tshina: — Hitakni.

¹⁰ Hiyáhoni wla htshinruna: — Hanhe pixa himrekhaletatka?

¹¹ Waneya ruhitatka wla htshina: — Satu jeji Jesus tshinkaluru kajpa hkamha waneya noyhale hsahajpatlu. Waneya rerokayhalekjixno honha himrexikowaka yehi Siloé tshinikowakaya. Hiyáhoni wane nya, nerokatkalu noyhale, netatka.

¹² Waneya repomhatkaluna, wla htshinruna: — Hanurnihe? Waneya wale wla tshina: — Hi nimata.

Fariseu -ne Mayhaletukananu Repomhiywakna Piranapni

¹³ Waneya repomhakjene haniklu jeji mayhaletukananu fariseu-ne nwaka.

¹⁴ Hapnanuxikalur-hohneni Jesus hitskahayma kamhalu mayhaletu rumrekhakajinrijpa.

¹⁵ Waneya hiyrunukotnaka repomhaka mayhaletukananu hanu rixa hetkakletkatka. Fariseu-ne hepomhalu. Waneya mayhaletu wla tshinna: — Kajpa hsahayhaletno, waneya nerokayhaletatka, netatka.

¹⁶ Waneya fariseu-ne wla tshina: — Ha wan-hixatshri jeji hi hetko Hoyakalu hichpajikatshrini klu tshinanu hi hkahwakpiratlu hapnanuxikalur-hohne. Seyni pimrine wla tshina: — Hanu xawakhe rumukata hektuwaka kamhatshri xye pixkalutu himyekaklewatatshri kamhaleta? Hiyáhoni hkotspalahchinikanutatkana yine.

¹⁷ Waneya wla htshinatnakluna mayhaletukananu: — Ha pixa hanu pixahotlu jeji piyhale himrekhakakatshri? Waneya wale wla tshinna: — Hoyakalu tokanu hinkakletatshrini wale.

¹⁸ Seyni judeu kosekatshine hi halixlu mayhaletu rixakanaxyawaka, waneya retkakkatka, haté hetkakkaluru hirune mtomhaknuko pchinika.

¹⁹ Waneya judeu kosekatshine hepomhatkana tsrune, wla htshinna: — Xyerhe hituru, hixa wan-tshinru, mayhaletu matuxikatshri? Halikaka rixini hanhe rixa hetletatka xawakni?

²⁰ Waneya ruru, runro hihitna, wla htshinna: — Wimatlu xyeni wwuhene jeji hiyrun-koxa wimata mayhaletu hmatuxyatka.

²¹ Seyni hi wimata hanukta rixa hetletatka. Hiyrun-koxa hi wimatlu katukta himrekhakaklu. Seyni tsru yinerutkani hiyáhoni wale potuko hepomhanu. Waleko hinkaklexinwa.

²² Xye tokantshi htshinatka ruru, runro klu tshinanu judeu kosekatshine hpikatkana. Klu tshinanu judeu kosekatshine wane htshinna mitshi pa hchinikanurunepni, katukta yineru hiphujtaxinri Jesus, Cristo tshinkaluru rixyawaka, wale tokantshi tshinatshri hanjihohnewakapji hkochpajiko.

²³ Hiyáhoni wale tshinanu ruru, runro wane htshinna: — Tsru yinerutkani wale, hiyáhoni waleko hepomhanu.

²⁴ Waneya mayhaletukananu htomhatnakna waneya wla htshinruna: — Hoyakalu tsonu himalwutanu klu tshinanu wimathetlu putskalakjeru ptshinreru hektuwaka kamhatshrikni wale.

²⁵ Waneya mayhaletukananu hihitna, wla htshina: — Hi nimata ho halikaklahe hektuwaka kamhatshrini xye jeji ho hike. Seyni satu pirana nimata, mayhaletukananno seyni xawakni netatka.

²⁶ Waneya wla htshinatnakluna mayhaletukananu: — Kluhe rixyi? Hanhe rixa himrekhakakletyi?

²⁷ Seyni wale wla tshinna: — Nunkakatkahi seyni hi haluk-halixletno. Haklu tshinanhe haluka yijnakoletatnaklu? Hix-koxa haluk-homkahretluhe?

²⁸ Waneya wanna heyikatkalu mayhaletukananu, wla htshinruna: — Pixa halikaka homkahitlu seyni hixni Moisés-ni tshinkalurni homkahitatshinwu.

²⁹ Wimata Hoyakalu hiynumaxyawakniri Moisés-ni seyni xye jeji hi wimata hanu potu ruchpajya.

³⁰ Waneya mayhaletukananu hihitna, wla htshinna: — Halikaka himyekaklewatatshri piranni xye hixa tokanu, klu tshinanu rumrekhakakatkano seyni wanepnawaka hi hima himata hanu ruchpajya.

³¹ Ha, wimatlu Hoyakalu hi repixna hektune. Seyni Hoyakalu homkahitatshri hanuruktako yineru hiyrunu ralujyawaka kamhatshri hanuruktako yineru repixa halikaka.

³² Xye tshiji hiyakotkoklunukawa hikeklu hetko hjempiranyehitka satu yineru himrekhakajyawakatkalu hmatureyakawa mayhaletu.

³³ Klu tshinanu xye jeji Hoyakalu yokanreru hma mixkanumka hikemka rumukata kamhaletanu.

³⁴ Waneya wla htshinruna mayhaletukananu: — Pixa halikaka hektuntshi matuxikatshriyi, seyni paluk-hasrukletwuhe wanepnawaka? Waneya hanjihohnewakapji hkochpajyaluna hipokananu.

Jesus, Mayhaletu Yehi Ruphujexnakwa Piranapni

³⁵ Jesus himatatkalu hanjihohnewakapji hkochpajikowaka hipokananu mayhaletukananu pirana. Waneya Jesus yoptoxinri mayhaletukananu, wla htshinru: — Palixluhe Jeji Whene tshinkaluru?

³⁶ Waneya wale wla tshina: — Nutsrukate, waletshi pekhitanno, hanurni wale, nalixyawakaplu.

³⁷ Waneya Jesus wla tshinru: — Pali hetletatkalu. Walekni piynumsatjeru.

³⁸ Waneya mayhaletukananu wla tshinru: — Tsru Hixikatshriwa, nalixa. Waneya Jesus rimalwutatka.

³⁹ Waneya Jesus wla tshina: — Nuna xye tshiji, yine hektunu nuphujexyawaka. Yine metkane netkajyawakapa. Hetaphutatatshine hma mexyawakanupna.

⁴⁰ Waneya satkaka fariseu-ne Jesus-stsi hwakanatatshine jemlu xye tokantshi waneya repomhaluna: — Hix-koxlahe mayhalenwu?

⁴¹ Jesus wla tshinna: — Mayhalene hma mikahwajiknumkawa, himka hektuntshi hwalerunephi. Seyni hixa wan-tshinnawa, ‘hetatshinwu’ htshina, hiyáhoni hektunu hi hkonka halikaka.