João 6 - Bíblia

Jesus Pão Hixolewkajyawaka Piranapni

¹ Waneya wane pnute Jesus kopruhatlu Galileia powha tujra wnahlu Tiberíades tshinikowaka.

² Hixolune yine homkahikanatlu Jesus klu tshinanu retluna himyekaklewatatshri Jesus yeyixatshine rutskalajyawaka.

³ Waneya Jesus satu himriji hkankatka wane htuplata rasrukleneyma.

⁴ Páscoa hohne (waleni ruchinikanretluna Egito tshijne ruchpajinrina papko), tsru himretkaluru hohne, judeu-ne hasruha himretletanru hohne hi howukatka.

⁵ Waneya Jesus heknojtata retna hixolune yine romkahitjene. Waneya Jesus wan-tshinru Filipe: — Hanhe wanjixinri nijittshi nyi hixolune yine niklerupa?

⁶ Jesus himatlu hkamhanrupa seyni wane htshina Jesus, Filipe retumhiywakapa.

⁷ Waneya Filipe hihitlu: — Satkaka yineru yoptoxyawakaplu psotsonujiji nikluru wujhalu duzentos prata proji ho pnute.

⁸ Waneya André, Simão Pedro tshinkaluru mole, Jesus hasrukleru koxni wale, wan-tshina:

⁹ — Hewiru satu mturu rawya cinco pão cevada kamhikolu hiyrun-koxa hepi chima whene. Seyni hanhe rixa hinanuwletanna nyi yine hixolune?

¹⁰ Waneya Jesus wan-tshina: — Punkakanna yine tshij-hoho htuplaxyawakapna. Wale peklo yehi waneya peklo hwiywaka potuko htuplatna. Pakat-hetkoko cinco mil jejine wane hwakanata.

¹¹ Waneya Jesus pão hkochtsheka, hpoyahnutlu Hoyakalu waneya Jesus hapsatna pão ptowruneko. Waneko pixka rixlo Jesus chim-koxa. Waneya ptowruneka hi psokta raluka nikletna wane pso hnikna.

¹² Waneya rinanuwaxinixkana yine Jesus wan-tshinna rasruklene: — Hapatjetanru hixetatshri hike hma salewniywakanupa.

¹³ Waneya rasruklene hapatjetatkalu hixetatshristsiji cinco pão tshinanu hiyáhoni htsepotatkana doze chiwatu.

¹⁴ Waneya Jesus hiyákole hetakanatatshine wan-tshina: — Xyekni halikaka Hoyakalu tokanu hinkakletatshri xye tshijne hinatshripa.

¹⁵ Waneya rimaxinipa Jesus yine haluk-hipokananu kachrexyawaklu wanna pohire rutajyawakluna hsatkapanwakatlu himriji hiyrunupatnaka. Walepka wan-ya.

Jesus Honha Hoho Hyanamxyawaka Piranapni

¹⁶ Waneya kayi rixinixka Jesus hasruklene yanwakatlu hipowha.

¹⁷ Waneya kanawa hpokownatkana Jesus hasruklene waneya hyinuwaka kopruhaletatkaluna hipowha, hyanwakamtluna Cafarnaum poktshi nwaka. Waneya rutshpokatka hiyrun-koxa Jesus hi hapokawa wanna hyoptoxyawakapa.

¹⁸ Waneya waneklukawa potuko rakanhatka tsru kanniphalu. Waneya kanniphalu tenoplojha hixkaklu honha.

¹⁹ Waneya cinco ho seis quilômetros pchini ruchpajyatkana Jesus hasruklene retluna Jesus honha hoho hyanamxyawaka. Kanawastsi rapokatka. Jesus hasruklene pikpotuthonuka.

²⁰ Seyni Jesus wan-tshina: — Hi hpikanu, Hitni!

²¹ Hiyáhoni hpoyikonuymana kanawa hpokotatkaluna Jesus. Waneya waneklukawa rapokna ruchinijyawakna tshiji.

Pão Hiwekkaklewatatshri Rixyawaka Jesus Piranapni

²² Waneya wale prika yine hixolune pa sreta wnahlu hitukatshinetka hetlu pa kanawapka mtseroto tsonu wane hwa. Hixolune yine himatlu Jesus hi pokownalo kanawa rasrukleneyma klu tshinanu yine hixolune hetna Jesus hasruklene wannapka yatka.

²³ Waneya wane pchinika pimro kanawkaka Tiberíades poktshi hichpajikatshrokaka hapokastsitlu hixolune mitshi nijyawaklu pão Jesus hali poyahnutlexinixkalu, Hoyakalu mitshi.

²⁴ Waneya rexinixkaluna Jesus hiyrunu Jesus hasruklene hi wane rawna, kanawkaka hpokownatkana waneya Cafarnaum poktshi sreta hyana Jesus rujhapyawakapna.

²⁵ Waneya hixolune yine yoptotlu Jesus hipowha pa sreta wnahluya. Waneya repomhaluna: — Kasruklewakleru, hikluhe hewi papokatka?

²⁶ Waneya Jesus hihitna: — Hixa hi hijhajetno hiyakolukaka hexyawaka tshinanu seyni halikakni hixa hijhajetno klu tshinanu hixa nikatkalu pão, hinanuwatatka.

²⁷ Xako hi hkamrurewatanu nikkaluru himat-nikawnatshri tshinanu. Seyni hkamrurewatanu nikkaluru hikeklu hohne mnikawnakatupa tshinanu. Yineru Whene tshinkalurno xye nikluru hikeklu hohne mnikawnakatupa nenekanhi klu tshinanu Nuru Hoyakalu henekno xye tsru hitakkaluru.

²⁸ Waneya repomhaluna: — Klunerhe xawaka wkamhanu? Hoyakalu kamrure wkamhiywakapa?

²⁹ Waneya Jesus hihitna: — Xyekni Hoyakalu kamrure yine halixyawaklu Hoyakalu yokanrerni.

³⁰ Waneya wane htshinna wanna: — Klu himyekaklewatatshri pkamhanu wexyawakaplu walixyawakapyi? Klunerhe pumukata kamhaletanu?

³¹ Wutsrukatene maná hnikna popriwakaya wane htshina yonawahlo potukalu: “Reneklu pão tenhohne hichpajikatshri yine niklerupa.”

³² Waneya hyanumata Jesus: — Halikakni Moisés hi henekna pão tenhohne hichpajikatshri klu tshinanu pão tenhohne hichpajikatshri halikakalutni walekni Nuru heneklewjeta.

³³ Klu tshinanu pão Nuru heneklewaxya walekni yineru tenhohne serpijikatshri xye tshijne Hiwekkaklewaxikatshrini.

³⁴ Waneya wanna wan-tshinru Jesus: — Hiyáhoni penekjetanunwu xye pão.

³⁵ Waneya ruhita Jesus: — Pão hiwekkaklewatatshri Hitni. Katukta yanwakaxinno hikeklu hohne hnatshitanu hiyrun-koxa nalixjeru hikeklu hohne ronunnahatewatanu.

³⁶ Seyni ntshinyawakhi mitshi, hetmakno seyni hi halixno.

³⁷ Ptowru pejnu Nuru Hoyakalu henejyano, hinanwakatno. Hiyrun-koxa ptowru pejnu hita nwaka hapokatshri hikeklu maleka nuknokanru.

³⁸ Klu tshinanu tenhohne nunya tshiji hi hita nalujyawakako nkamhiywakapa seyni nyokanatjeru halujyawaka nkamhiywakapa halikaka.

³⁹ Xyekni Nuru Hoyakalu, nyokanatjeru halujyawaka. Hi satukna hma mamhiywakanupa renejyano pejnu, ralipre hohnepatka riwekkakkona hipuktshi yehiya.

⁴⁰ Hiyrunu xyekni Nuru Hoyakalu halujyawaka, Whentshi tshinkalurno hetatshine, hita halixatshine pejnu, hiweklu hike rixiniko mnikawnakatu hkayaxyawakapna. Waneya ralipre hohnepatka niwekkakanna hipuktshi yehiya.

Jesus Tokanu Hmukchikhihlenuxyawakna Judeu Piranapni

⁴¹ Waneya judeu-ne hihjekaka klu tshinanu Jesus wan-tshinna pão tenhohne hichpajikatshrini wale.

⁴² Waneya wla htshinna: — Hi he Jesus tshinkalurni xye, José tshinkaluru whenni, ruru hiyrunu runro wimathetanunni, xye? Hiyáhoni hanhe xawaka rumukata wan-tshinrexnawa tenhohne hichpajikatshrini wale?

⁴³ Jesus hihitna, wla htshinatkana: — Hi hihjekakanu hixkakluko.

⁴⁴ Hike yineru himukata yanwakletno Nuru Hoyakalu, nyokanatjeru mkosekkanuklunuplu hita nwaka. Waneyapa ralipre hohnepatka hipuktshi yehi niwekkajinri.

⁴⁵ Hoyakalu tokanu hinkakletatshine yonawahle, wla htshina: “Wanna ptowruneka Hoyakalu hasrukanunepni.” Hiyahokni ptowru yineru Nuru Hoyakalu jematshri, Nuru Hoyakalu himatkalewaxikatshri, yanwakatanno hita.

⁴⁶ Halikaka hi satukna yineru hetjejetlu Nuru Hoyakalu. Halikaka satupkalu, Hoyakalu yehi hichpajikatshri tsonu hetjejetlu.

⁴⁷ Halikakni, halikakni ntshinhi, Hita halixatshri himwalu hiweklu hike rixiniko mnikawnakatu.

⁴⁸ Hitni pão-no hiweklu heneklewatatshrino.

⁴⁹ Hixa hitsrukatenni maná nikjekanatni popriwakaya. Seyni rupnanna.

⁵⁰ Xyekni pão tenhohne hichpajikatshri. Ptowru yineru wale nikatshri hmupniywakanupa tshinanu.

⁵¹ Pão hiwekkaklewatatshri, tenhohne hichpajikatshri, hitni. Hiyrun-koxa yineru wale nikatshri pejnu hiwekanu hike rixiniko mnikawnakatupni. Xye pão xye tshijne hiwekle neneklerupa, waleni nohitu.

⁵² Waneya ruhjekakpotuthonukna wannakakluko judeu-ne, wla htshinna: — Xye jeji, hanhe rumukata waleko himane henekletwu wnijyawakaplu?

⁵³ Waneya Jesus hihitna, wla htshina: — Halikakni, halikakni ntshinhi, Jeji Whene tshinkaluru hitu hma mnijyawakanu hiyrunu hihraha hmuryawakanu hi hiwekanu halikaka.

⁵⁴ Nohitu nikatshri hiyrunu nohraha hiratshri hiwekanu, hike rixiniko mnikawnakatupni. Hiyrun-koxa ralipre hohnepatka hipuktshi niwekkajinri.

⁵⁵ Klu tshinanu nohitu halikakni nikkaluru hiyrunu nohraha halikakni hirkaluru.

⁵⁶ Nohitu nikatshri hiyrunu nohraha hiratshri, hita riwejya. Hiyrun-koxa wale niwejya hita.

⁵⁷ Nuru Hoyakalu hiwekatshri yokanaxyawakno pixka hiyrunu Nuru Hoyakalu himukatle tshinanu niwejyawaka pixka, waneko pixka rixa ptowru yineru hita nikatshri pejnu. Hita tshinanuko riwekanu.

⁵⁸ Xyekni pão tenhohne hichpajikatshri. Hi maná, hitsrukatenni nikjekanatanru pixka rixa. Hnikluna seyni rupnanna wanepnawaka. Seyni xye pão nikatshri pejnu hiwekanu hike rixiniko mnikawnakatupa.

⁵⁹ Cafarnaum poktshi rawakanaxini Jesus, hanjihohnewakapji rasruklewjekanaxini xye tokantshikaka htshinatka Jesus.

Satkaka Jesus Homkahiphutatatshri Hma Mukchikhihlenuxyawakluna Jesus Tokanu Piranapni

⁶⁰ Waneya hixolune rasruklene xyekaka tokantshi hjeminna wla htshinna: — Kyapreru xyekaka tokantshi. Kathe hakot-yoptoletlu xye?

⁶¹ Seyni Jesus himatatkalu waleko hihchinikanuya ruhjekakna htokanu tshinanu hiyáhoni wla htshinna: — Hixlahe himtukahchinikanuta xyekaka tokantshi tshinanu?

⁶² Ha hexiniplu Jeji Whene tshinkaluru tenhohne nwaka hsatojinipa rawakanaxyawaka yehi, hanhe hixahchinikanutanu?

⁶³ Hoyakalu Hiwejikaluru waleni henek-hiweklerewatatshri. Wimane hike kochpakatshrini. Tokantshi ntshinyahi waleni Hoyakalu Hiwejikaluru, hiweklu reneklewata.

⁶⁴ Seyni satkakhi hi halixno. Jesus wla tshina klu tshinanu hyinuwaklekananuko Jesus himathetatkana wanna malixlene hiyrunu rimathetlu katupni hkamnitjerupa, rekhitjerupa.

⁶⁵ Waneya wane pnute htshina hinkakleta, wla htshina: — Wale tshinanu wane ntshinhi: Hi satuknako yineru himukata yanwakletno hita, Nuru Hoyakalu mitshitkanuklunru.

Hixolune Jesus Homkahiphutatatshine Hicho Homkahrexyawakanru Piranapni

⁶⁶ Waneya waneklukawa hixolune Jesus hasruklene hiknokatkalu hiyáhoni Jesus rucho hiyanretna.

⁶⁷ Waneya Jesus hepomhatkana rasruklene doze, wla htshinatkana: — Ha hixa, hix-koxlahe hichotanno?

⁶⁸ Waneya Simão Pedro tshinkaluru wla tshinru: — Tsru Hixikatshriwa, wane wixini hanhe wyanu? Klu tshinanu pix-honra himwalu tokantshi hiweklu hike rixiniko mnikawnakatu heneklewatatshri.

⁶⁹ Hixa halixyi, wmunanhayi Pixni Cristo-yi, Hoyakalu hichpajikatshriyi Potukalyi!

⁷⁰ Waneya Jesus wla tshinna: — Hi he hitakni nurethi hixa doze-runhi seyni satu hixaymalutu kamtshi pixkalutni?

⁷¹ Judas tshinkaluru, Simão Iscariotes whene pirana hkochtsheka Jesus. Klu tshinanu walekananukni satu wanna doze rixinri, Jesus kamnitjerupa, rekhitjerupa.