João 5 - Bíblia

Jesus Hiktehatshri Hitskalajyawaka Piranapni

¹ Waneya wane pnut-hohne tsru niklu hohnetnakni himretkaluru hohne judeu-neya, Jesus Jerusalém poktshi nwaka hya.

² Jerusalém poktshi carneiro jihlokawakle tshinikowakastsi rawa satu honha paji cinco hiphaptoterutu. Xye paji wan-tshinka judeu tokanuya “Betesda”.

³ Hixolune hahijewaktshi kachitanune wane hwa. Tshiji rukoluhakanatna mtsawane, myankane, hiktehatshine. Honha hiyolikle hkahwakakanatna.

⁴ Pa katkaka hserpika hiwejikaluru Hoyakalu towreru tenhohne hajeru ruyolikkajyawaklu honha. Hiwejikaluru Hoyakalu towreru tenhohne hajeru hiyolikajinru honha, waneyakni mitshikananhapka honha katsretatshri hima kluneruktako hyeyixale rutskalhiya.

⁵ Wanekanan-koxlu satu yineru hahijewaktshi kachreru, trinta e oito mhale pejnu.

⁶ Waneya Jesus hetlu hikoluhatshri hiyrun-koxa rimaxinixkalu hix-hohne wan-rixyawakatka waneya wla htshinatkalu jeji: — Paluk-hitskalhalethe?

⁷ Waneya jeji hiktehatshri wla tshinru: — Tsru Hixikatshriwa, hikeni satu yineru honha nutakjeru, ruyoljinipa honha. Hiyáhoni nyahot-jihlokletka pchini satu hapka jihlojyanatkano.

⁸ Waneya Jesus wla tshinru: — Pyotunotanu, pkochtshekjekomtanu. Pyanutka.

⁹ Waneya waneklukawa rexnawa jeji rutskalajikowakatka. Hkochtshekjekomtatka hyanatka. Seyni hapnanuxikalur-hohneni wale hohne.

¹⁰ Hiyáhoni judeu-ne wan-tshinru hitskalakalurutka: — Xawakni hapnanuxikalur-hohneni. Hinanchitkalurni putjijekoxyawaka xye hohne.

¹¹ Hiyáhoni ruhitna, wla htshinatkana: —Nutskalakjeru wan-tshinno: “Pkochtshekjekomtanu. Pyanutka.”

¹² Waneya repomhatkaluna, wla htshinruna: — Hanurnihe jeji xye pkamhakjixjeru?

¹³ Seyni jeji hitskalakalurutka hi himathetlu rutskalakjeru katuktani klu tshinanu Jesus hixolune yine tskala ramhiyatka.

¹⁴ Waneya wane pnut-hohne Jesus yoptotlu Hoyakalupjiya waneya wla htshinru: — Petanu. Putskalakkatka. Hiyáhoni xawakni hi pnute hektuwaka pkamhanu, hmakanhayehixyawakanupyi hektutu wane yohnikalutu.

¹⁵ Wane ruchpajyatka jeji waneya runkakna tsrukakalune judeu-ne, Jesus tshinkaluru hitskalaklu.

¹⁶ Hiyáhoni tsrukakalune judeu-ne yinuwaka kamniretlu Jesus, hiyrunu wannamka haluk-hiylaletlu klu tshinanu xyekaka hkamha hapnanuxikalur-hohneya.

¹⁷ Seyni Jesus wla tshinna: — Nuru haté xawakni hkamrurewata. Hiyrun-koxa hit-koxa kamrurewjeta.

¹⁸ Hiyáhoni tsrukakalune judeu-ne hijha hiylaletlu wane yohnika, hi hapnanuxikalur-hohne hma kahwakpiraxyawakanu tshinanu tsonni seyni Hoyakalu pixka rixnawakwa tshinanni. Klu tshinanu wale wan-tshina, Hoyakalu potuko hima ruruta.

Jesus Hinkaklexyawaklu Hkamrure Piranapni

¹⁹ Waneya Jesus wla tshinna: — Halikakni, halikakni wla ntshinhi: Whentshi tshinkalurno hike numukata kamhaleta Nuru mepixkanuklunno. Klu tshinanu kamrurtshi kluneruktako net-kamhaletlu Nuru waleko nkamha hita Whentshi tshinkalurno. Kluneru kamrurtshiktako hkamha Nuru wale potuko nkamhajeta hita Whentshi tshinkalurno.

²⁰ Klu tshinanu Nuru hamotlu Whentshi tshinkalurno. Rekhitlu Whentshi tshinkalurno ptowru potuko hkamhaleru. Xye kamrurtshikaka yohnikalutu rekhirewatanu, himyejyawakapa hixa.

²¹ Nuru hiwekkakjetna hipnatshine, hiweklu renekjetna. Hiyáhoni waneko pixka nix-hita Whentshi tshinkalurno. Hanuruktako yineru naluk-hiwekkakleta, niwekkaklu.

²² Hiyrun-koxa Nuru hi satukna yineru rukolukanuwnajixa seyni renekno hita Whentshi tshinkalurno ptowru potuko nukolukanuwniywakapa.

²³ Wan-rixa ptowru yineru kahwakpiraxyawakno hita, Whentshi tshinkalurno, Nuru hkahwakpiraxyawakna pixka. Yineru hanuruktako, mkahwakpiratkanuklunupno hita Whentshi tshinkalurno, Nuru Hoyakalu nyokanatjeru koxa hi hkahwakpirata.

²⁴ Halikakni, halikakni wane ntshinhi, ntokanu jematshri, nyokanatjeru halixatshritka himwalu hiweklu hike rixiniko mnikawnakatu. Hike jikolukanuru waneylu. Seyni hipuktshi riknokajikatka hiweklu hjihlokatka.

²⁵ Halikakni, halikakni wane ntshinhi, hipnatshine Hoyakalu Whene tokanu hjemyawakna papko hinamta hiyrunu rapokatka. Hiyrunu htokanu jematshine hiwekkakko.

²⁶ Nuru Hoyakalu hiwekatshrini waleko rumukatle tshinanu. Waneko pixka nix-hita Whentshi tshinkalurno renejyano niwejya hitako numukatle tshinanu.

²⁷ Hiyrun-koxa renekno hitakkaluru yine nukolukajyawakapa klu tshinanu Yineru Whene tshinkalurno.

²⁸ Hi himyekanu xye pirana tshinanu. Klu tshinanu rapokhohnetanu yinni ptowrunnika hipuktshi yehi hwatshinni, htokanu hjeminipna waneya hipuktshi yehi ruchpajinna.

²⁹ Kihleru kamhatshine, riwekkakkona riwejyawakapna seyni hektutu kamhatshine riwekkakkona rapnokaxikowakapna.

³⁰ Hike numukata kamhaleta hitako nalujyawaka tsonu tshinanu. Hanuruktako Nuru Hoyakalu hikolukanuwnajixno wale nukolukanuwnakaklewaxya. Hiyrun-koxa potukalni nukolukanuwnajixle. Klu tshinanu hi nujhalu hitako nohchinikanu nomkahixyawaka seyni Nuru Hoyakalu nyokanatjeru hihchinikanuko naluk-homkahreta.

³¹ Hitapka hinkaklexinri nopirana waneya hike yineru hetko halixanru nuphujetleru pirana.

³² Seyni waneru satu nopirana hiphujetatshri. Hiyrun-koxa nimatlu halikakni htshinyawaka, nopirana ruphujtatanru.

³³ Hixa yokananwakatlu João nopirana hepomhatshinepa. Hiyrunu wale hiphujtatlu halikakalutu pirana.

³⁴ Halikaka hi nujhalu yinerucha hiphujtale. Seyni xyekaka pirana ntshinhi hiwekkajikolupa.

³⁵ Nikotapi nikotle tsrur-potuko pixka rixatka João. Hixa hijhatkalu pchini tsonu himuwpotuxyawaka xye hnikotle tshinanu.

³⁶ Seyni waneru nuphujtatjeru João yohnik-halukkaluru. Kamrurtshi Nuru Hoyakalu henejyano nnikaxyawakapa, xyekaka nkamhaleru, walekni hiphujtatlu nopirana, Nuru Hoyakalu yokanaxyawakno ruphujeta.

³⁷ Nuru Hoyakalu nyokanatjeru walekni hiphujtatno hita. Seyni hix-yinhi hikeklu jematkalu htokanu hiyrun-koxa hikeklu hetatkalu himane.

³⁸ Htokanu hi hixa hitokote hwa. Wan-rixa klu tshinanu hi halixatkalu hyokanatanru.

³⁹ Hethapotjetlu Hoyakalu tokanu yonatkaluru, hanu htshina. Klu tshinanu hixa kahwaklu wale yonatkaluru tshinanu hikchikanru hiweklu hikeklu hohne mnikawnakatu. Haha walekni hiphujtatlu kat-potno hita.

⁴⁰ Hix-yinhi hi haluk-homkahretno, hiwekkajikolupa.

⁴¹ Hi nujhalu yineru tokanuwnale.

⁴² Seyni nimathethi hi Hoyakalu hichinikanreta haji hitokoteya.

⁴³ Nuru Hoyakalu hiwaka nunya seyni hi haluka yoptoletno. Seyni satuko waleko hhiwaka runikmaka walemka halikaka hyoptohihlenutanu.

⁴⁴ Hanhe hixa halixletlu hixa, pimrine tokanuwle hjemleru? Seyni hi hijhatkalu tokanuwnalu Hoyakalu satupkalutu nwaka hichpajikatshri.

⁴⁵ Hi hkahwakanu njihyehixyawakhi Nuru Hoyakalu yehi. Hixa hikolukjerni Moisés-ni, hixa munanhaleru potuko, walekni hikolukanhi.

⁴⁶ Klu tshinanu Moisés-ni halixkamka waneya hit-koxmaka halixanutka. Klu tshinanu nopirana yonatatshrini wale.

⁴⁷ Moisés-ni yonreru hmalixkanuklunu hanu hixa halixletokanutanno hita?