João 4 - Bíblia

Suxo Samaria-nero Piranapni

¹ Jesus hima João tshinkaluru yohnik-homkahitatshine rawya hiyrunu João yohnik-hima h-batiz-jeta Jesus. Waneya fariseu-ne jemlu xye pirana.

² (Seyni Jesus hi batiz-jekanata halikaka rasruklene tsonu batiz-jekanatna.)

³ Jesus himaxinixka wane htshinyehikanaxyawakluna waneya Judeia tshijne ruchpajyatka. Hsatoka Galileia tshijne nwaka.

⁴ Samaria tshijne raluka yaplemta.

⁵ Waneya satu poktshi Samaria tshijne hajeru poktshi rapoka, Sicar tshinikowaka, Jacó-ni mitshi hituru José-ni renektshijnererustsi.

⁶ Wanekananru Jacó-ni hakophale tshinikowaka. Hanikaj-hohnestsi hetkotkani ramanutatka Jesus hyanre tshinanu waneya hakophastsi htuplatatka Jesus.

⁷ Waneya sato suxo Samaria-nero wane tapoka t-sajkapyawakapa. Waneya Jesus wan-tshinro: — Honha putanno.

⁸ Klu tshinanu Jesus hasruklene poktshi nwaka hyatkana nijittshi ranjixyawakapna.

⁹ Waneya suxo Samaria-nero wla tshinru: — Haklu tshinanhe panjitno hita Samaria-nerno honha nuxyawakapyi klu tshinanu pixa honukla judeu-neryi pixa? (Wane ttshina suxo klu tshinanu judeu-ne hi rimatletkakna Samaria-nerune.)

¹⁰ Waneya Jesus hihitlo wla htshinro: — Pimatkamkalu Hoyakalu henekachle hiyrun-koxa pimatkamkalu panjitjeru wla tshinatshri, honha putanno waneyamka honha panjixinri wale waneya walemka henekanyi honha hiweklu heneklewatatshri.

¹¹ Waneya suxo wla ttshinru: — Honha sajikapi hi pwiya hiyrun-koxa tenopnalu honha yehi. Hiyáhoni hanhe pixa kochpakletanru xye honha hiweklu heneklewatatshri?

¹² Pixlahe wutsrukate Jacó-ni yohnika tsru hixikatshriwayi? Walenikni henekwu xye hakopha. Hiyrun-koxa wale potniko xye honha hirjekanatni wale, hiwhenene hiyrun-koxa hiprane.

¹³ Waneya Jesus wan-tshinro: — Ptowru yineru xye honha hiratshri hiyrunukotnaka ronunnahatewatanu.

¹⁴ Seyni katuktako honha hita henekjexyalu hiratshri hikeklu ronunnahatewatanu. Klu tshinanu honha hita henekjexyalu hakopha rixnatkawa hisatu hitokoteya. Hiweklu hikeklu hohne mnikawnakatupa renekanru.

¹⁵ Waneya suxo wla ttshinru: — Nanjityi penejyawakapno xye honha hikeklu nonunnahatewatanutka. Wan-hixatshrono hi nujhalu hewi nsajkapyawakatka.

¹⁶ Waneya Jesus wla tshinro: — Ptomhapanru phanuru. Hewitshi hinanu.

¹⁷ Seyni suxo hihitlu wla ttshinru: — Hita hi khanurno. Waneya Jesus wla tshinro: — Halikaka ptshina, hi khanurno, ptshina.

¹⁸ Klu tshinanu cinco kata jejine phanurutatka halikaka xye jeji xawakni potuko pimwaleru hi phanurni wale. Hiyáhoni halikaka tokantshi ptshina.

Himalwuru Halikakalutu Piranapni

¹⁹ Waneya wla ttshina suxo: — Xawakni nimatyi hinamtatshri pirana hinkakletatshrihetkoyi.

²⁰ Wutsrukatenni xye mrijiko rimalwuxyatkaluna Hoyakalu, seyni hixa judeu-nhi wane htshinjeta Jerusalém poktshi Hoyakalu himalwuxikowakni halikaka.

²¹ Waneya wla htshinro: — Suxo palixanno. Rapokhohnetanu hike yineru himalwutanru Hoyakalu hewi xye himrijiya, hi Jerusalém poktshiyako.

²² Hixa Samaria-nerunhi hi himatlu kluneru potu himalwujeta, seyni hixa judeu-nwu wimatlu wimalwutanru klu tshinanu judeu-ne yehi runya hiwekkaklewatatshri.

²³ Seyni rapokhohnetanu, halikaka wale hohne hapokatka, Hoyakalu himalwutatshine potu himalwutanru Hirtshi Hoyakalu riwejinriyna hiyrun-koxa hpotuknu hchinikanuymana. Klu tshinanu Hirtshi Hoyakalu halukna rimalwutjene wane pixka hixatshine rixyawakna.

²⁴ Hiwejikalurni Hoyakalu hiyáhoni rimalwutjene haluk-himalwuretlu riwejinriyna hiyrun-koxa hpotuknu hchinikanuymana.

²⁵ Waneya suxo wla ttshinru: — Nimatlu Messias honukla Cristo tshinkaluru hinanu halikaka. Runiniklunu ptowru potuko ruhle hinkakletanwu.

²⁶ Waneya Jesus wla tshinro: — Walekno hita, hitakni hiynumsatyi pixa.

²⁷ Waneklu papko potuko rapokatkana rasruklene. Rimyekna suxo riynumsakanaxyawaka. Seyni hi satukna wanna hepomhatkalo suxo klu talukatka. Hiyrun-koxa hi repomhatkaluna Jesus klu tshinanhe riynumsakanatlo.

²⁸ Waneya suxo hiknokahachhajremta. Tyatka poktshi nwaka. Yine tunkaka.

²⁹ — Hinanu hetapanru satu jeji ptowruka nkamhaleru nunkakjeru. Hi he xawaka Cristo-katkani wale?

³⁰ Hiyáhoni wale poktshi ruchpajyatkana. Jesus nwaka hyatkana.

Jitaklewaklerune, Hamatshine Piranapni

³¹ Waneya wane pchinika Jesus hasruklene nikjixmaklu. Wla htshinruna: — Kasruklewakleru, pnikanu.

³² Seyni wale wla tshina: — Knijitno nniklerupa hmetjejetanutu.

³³ Wale tshinanu rasruklene wla htshinkakna: — Hiyáhola satu yineru haniknijitutlu?

³⁴ Waneya Jesus wla tshinna: — Nnijitni waleni nyokanatjeru halujyawaka nkamhiywaka hiyrunu nnikaxyawakaplu hkamrure nenejikolu.

³⁵ Hix-honra hasruha wla tshinreta: “Quatro ksuru pejnu mahata wamyawakaplu.” Seyni hjemanru ntshinyawakhi, himrekhatanu hetanru hitakluchakaka, hitaklu serowata, hmahachata ramikowakatka.

³⁶ Hamatshri wenuxikolu hyoptota. Rapatjeyehixnawa halukkaluru hiweklu hike rixiniko mnikawnakatu tshinanupa. Hiyáhoni hitaklewatatshri hiyrunu hamatshri himumuwatanu.

³⁷ Xye tshinanni halikaka pirana htshinna wla tshinatshine: “Satni hitaklewatatshri, satni hamatshri.”

³⁸ Nyokanathi hamyawakaplu hma mutakanutuko yehi. Pimrine wane kamrurewaxyatka waneya hixa wanna kamrure-ptako hjihlokachatatka.

Hixolune Samaria-nerune Halixyawaklu Jesus Piranapni

³⁹ Hixo Samaria-nerune wale poktshi hajene halixlu Jesus klu tshinanu suxo wla ttshinakanata: “Runkakno ptowruka nkamhakanatanru.”

⁴⁰ Waneya Samaria-nerune hapyehixinru Jesus, ranjitluna wanna yehi rutujyawakapa. Hiyáhoni hepi hohne pejnu wane rutukatka.

⁴¹ Hiyáhoni pimrine hixolune halixlu waleko htokanu tshinanu.

⁴² Wla htshinrona suxo: — Hi pixa ptokanu tsonu tshinanni seyni waleko htokanu wjemyawaka tshinanu walixlu. Wimatlu halikakni Cristo-ni wale ptowru tshijne Hiwekkakatshrini wale.

Jesus Satokanwakaxyawaklu Galileia Tshijne Piranapni

⁴³ Hepi hohne wane rutukatka waneya wane ruchpajya. Galileia tshijne nwaka hyatka.

⁴⁴ Jesus honra mitshi wane htshinatka, “Muphujewnakatuwa pirana hinkakletatshri hi hkahwakpiratka waleko htshijneya.”

⁴⁵ Waneya Galileia tshijne rapojinixka Jesus, kihle yoptole rixluna wane hajene. Tsru niklu hohne Páscoa hohne tshinanu, Jerusalém poktshi hyatkana wanna koxa hiyáhoni wane rexyaluna ptowruka Jesus kamrure wane hkamhakanaxinritka.

Jesus Hitskalajyawaklu Phuru Whene Piranapni

⁴⁶ Jesus satokanwakatlu Caná poktshi Galileia tshijne hwatshri Jesus mitshi honha vinho-ha kamhiywaka nwaka. Wanekananru satu phuru, yeyixawhenetatshri Cafarnaum poktshiya.

⁴⁷ Waneya hjeminixka phuru Jesus Judeia tshijne ruchpajyawaka pirana Galileia tshijne hyiywaka waneya Jesus yehi hya. Ranjitlu Jesus hituru nwaka hyiywakapa rutskalajyawakaplu klu tshinanu hiwhene hipnakastsitkani.

⁴⁸ Waneya Jesus wla tshinru: — Hetkaluru ho himyekaklewatatshri hma metkanuklunu, hi hetko halixanu.

⁴⁹ Waneya phuru wla tshinru: — Punhapkatanutshi noturu mupnakanuko pchinika.

⁵⁰ Waneya Jesus wla tshinru: — Pyanutka pipji nwaka. Piwekawhenethonuka. Jeji halixtokanutlu Jesus hiyáhoni hyatka.

⁵¹ Hipji nwaka hyapamtawa htowrene yoptotlu. Runkakluna, wla htshinruna: — Piwekawheneta!

⁵² Waneya repomhana klu papko hyinuwaka hihlewleta. Wanna wan-tshinru: — Kapethohne, kayi sreta uma hora, rutuk-patshwaleta.

⁵³ Hiyáhoni tsru himatatkalu Jesus tshinyawaklu mitshi: “Piwekawheneta” htshininiklunru klu papko potuko wan-rixatka. Waneya ralixatka wale hiyrunu hipji hajene ptowruneka halixatka.

⁵⁴ Xyekni hepi rixinri hetkaluru Jesus kamhaleru Judeia tshijne ruchpajinixka, Galileia tshijne hyinixka.