João 3 - Bíblia

Nicodemos Hetapyawakaplu Jesus Piranapni

¹ Waneru satu yineru Nicodemos tshinkaluru, judeu chefe-te, fariseu-ne-kni wale.

² Waneya hoyetshno Nicodemos yanwakatlu Jesus waneya wane htshinru: — Tsru Hixikatshriwa, wimatyi pixa kasruklewakleryi, Hoyakalu yokanreryi klu tshinanu hike yineru himukata kamhaletlu nyi hiyakolukaka pkamhajereru Hoyakalu mimotsatanune.

³ Waneya Jesus hihitlu: — Halikaka ntshinyi, hike himukata jihlokletanru Hoyakalu pohirewaxyawaka hepi kata hma matutkanuklunu.

⁴ Waneya Nicodemos hepomhalu: — Hanu xawakhe rumukata yineru tsrutsoleji hiyrunuko hmatuxyawakatnaka? Rumukathe jeji runro nanwaka jihlokletatnaka waneya hmatutanutnaka?

⁵ Waneya Jesus wan-tshina: — Halikaka ntshina, hike himukata jihlokletanu Hoyakalu pohirewaxyawaka hma mathapkatkanuklunu honhaya, Hiwejikaluruya koxa.

⁶ Yineru hmatuxini himaneya yinerni seyni Hoyakalu hiwejinri hmatuxyawaka yineru wale tsonu hiwekkaklewata.

⁷ Hiyáhoni hi himyekanu wane ntshinyawakhi hixa ptowruneka haluka matreta hiyrunukotnaka.

⁸ Hanukta raluka yaleta kanniphalu wane potuko hya. Hixamka jemlu kanniphalu sejire, seyni hi himatlu hyinuwajyawaka sreta hiyrun-koxa hi himatlu rutujyawaka sreta. Waneko pixka rixa ptowru yineru Hoyakalu Hiwejikaluru matuxikatshri.

⁹ Waneya Nicodemos hepomhalu, wla htshina: — Hanhe rixanu xye?

¹⁰ Jesus hihitlu, wla htshina: — Hi he israel-nerune hasrukatshrimkayi seyni xyekaka pirana hi pimata?

¹¹ Halikaka, halikaka wla ntshinyi: — Wunkakhi wimatjemle pirana hiyrunu wunkakhi wetlerutka pirana seyni hixa hi haluk-halixletlu wunkakle.

¹² Xye tshijne pirana nunkaklexini wanepnawaka hi halixno hanhe xawaka halixanno tenhohne hajeru pirana nunkaklexini?

¹³ Hi satukna yineru tenhohne hatskoxya, seyni Jeji Whene tshinkaluru tenhohne serpijikatshri tsonupka wane ratskoxya.

¹⁴ Moisés popriwaka yopkaklu hahaje waleptaji hoho rutaklu himnu bronze kamhikolu hiyáhoni waneko pixka raluk-hixletko Jeji Whene tshinkaluru teno rutakko.

¹⁵ Hiyáhoni wan-rixkona ptowruneka wale halixatshine, riwekanna hikeklu hohne mnikawnakanepa.

Jesus Yokanatka Yine Ralixjenepa Riwekkajyawaka Piranapni

¹⁶ Hoyakalu psol-tshijneka hajene ramotle tshinanu hyokanatlu hituru satupkalutu ptowru yineru ralixjene hi rupnanna seyni riwekanna hikeklu hohne mnikawnakanepa.

¹⁷ Klu tshinanu Hoyakalu yokanatlu hituru riwekkajyawakna ptowru neruka seyni hi hyokanatlu hituru yine rapnokaxyawakapa.

¹⁸ Hiyáhoni Hoyakalu whene halixatshine hi rapnokatkana seyni malixkane rapnokatkana klu tshinanu hi ralixluna Hoyakalu whene satupkalutu.

¹⁹ Xyekni hapnokaxikolu: Katalu hapokyehitmakna psol-tshijne hajeneko seyni yine yohnik-hamotlu mapchahawaka kataluya klu tshinanu hektutu hkamhajetna.

²⁰ Ptowru yineru hektutu kamhatshri hahnanutlu katawaka hiyáhoni rasujyaluna katalu hike mexyawakanuplu hkamhalerna hektutu.

²¹ Seyni yineru, hanuruktako homkahitlu halikakalutu pirana katawaka rutajnawa, rimathexikowaka hkamhaleru Hoyakalu hikchikhihlenrerni wale.

João Batista Hinkaklexyawaklu Cristo Pirana Piranapni

²² Waneya wane wkatanu Jesus hiyrunu rasruklene Judeia tshijne rapokatkana. Waneya wan-rutukatka rasrukleneyma. Wane h-batiz-lewjexya.

²³ Hiyrun-koxa João tshinkaluru Enom poktshi h-batiz-lewakanaxya, Salim poktshistsi hajeruya, klu tshinanu honha wane hi hmahaxya hiyrunu wane hyajetna yine h-batiza-xikowakapna.

²⁴ Halikaka waneklu papko João hi hkachitkawa.

²⁵ Waneya satkaka João hasrukjetanune yinuwaka hihjekakleta satu judeu-neruyma judeu-ne powratjexikowaka pirana tshinanu.

²⁶ Waneya João nwaka hyana, wla htshinruna: — Kasruklewakleru, jeji honra pimwakanatanru Jordão wenne tujra wnahlu mitshi, puphujtapiranaxinri, haha wale himakni h-batiz-lewjexya. Hiyrun-koxa ptowru yine yanwakjetlu.

²⁷ Waneya João wla tshinna: — Yineru himukata himwaletlu pa hixanu Hoyakalu henejini tsonru.

²⁸ Hixni nimetjenhi wla ntshinreru mitshi: “Hi Messias-no hita seyni nyokanatka wale wkatanu napojyawakpatka.

²⁹ Yapkaklupa. Hnunrowatatshri yehi, waleni khanunrolu. Seyni hnunrowatatshri himatletjeru repixlu rimotsatlu hnunrowatatshri hiyrunu hyijnakotlu. Hiyrun-koxa hnunrowatatshri tokanu hjemini rumuwata. Hnunrowatatshri hepixatshri pixka nix-hita hiyáhoni numuwpotuthonuka hnunrowatatshri tshinanu.

³⁰ Wale hijhalu pnut-potu hya hijhakaluru rixyawaka seyni hita kayaho hijhakalurupno.

Tenhohne Hichpajikatshri Piranapni

³¹ Halikaka tenhohne hichpajikatshri ptowru neruka pnuterutni wale. Seyni xye tshijne hichpajikatshri xye tshijne hajerukni wale hiyrunu xye tshijne hajeru pirana kochtshekatshrini. Tenhohne hichpajikatshri ptowru neruka pnuterutni.

³² Runkakletlu retanru pirana hiyrunu hyijnakotanru pirana. Seyni hike yineru haluk-halixletanru runkakle pirana.

³³ Hanuruktako yineru, runkakle halixatshri, rekhipotutlu halikakni Hoyakalu.

³⁴ Hoyakalu yokanatanru, Hoyakalu tokanu runkakletjeta. Klu tshinanu Hoyakalu hi psotsonujiji Hiwejikaluru reneklu seyni Hiwejikaluru psoluka reneklu.

³⁵ Hoyakalu Hirtshi hamotlu Whentshi tshinkaluru. Hiyrun-koxa wale towre rutajyalu ptowru potukananuka.

³⁶ Wale tshinanu Whentshi tshinkaluru halixatshri himwalu hiweklu hike rixiniko mnikawnakatu. Seyni Whentshi tshinkaluru malixkatu hi rawyalu riwejinri seyni Hoyakalu hapnokaxyalu hikeklu hohne rasujinri.