João 21 - Bíblia

Jesus Sete Rasruklene Hakanhayehixyawaka Piranapni

¹ Wane pnute Jesus hakanhayehitatnakna rasruklene Tiberíades powha tshinikowakaya. Wan-rixa hakanhaleta:

² Rapatjekanatna Simão Pedro; Tomé, walekatkani Dídimo tshinkaluru; Natanael, Caná poktshi Galileia tshijne hajeru; Zebedeu whenene; hiyrunu pimrine hepi hasruklune.

³ Waneya Simão Pedro wla tshinna: — Hita mariskatapanu. Waneya wanna wla tshinru: — Pixaymapwu. Waneya hyatkana. Kanawa hpokownatkana seyni wale yetshno, hi satukna hkachitna.

⁴ Waneya yetshpotukawa rixinixka, Jesus hipowha wnaha hyopkaka seyni rasruklene hi himathetlu Jesus rixyawaka.

⁵ Waneya Jesus wla tshinna: — Maklujine, hi he chima hkachita? Ruhitluna Jesus, wla htshinruna: — Hike, hi satukna.

⁶ Hiyáhoni wla htshinna: — H-tarrafa-te kanawa potukle sretate hiknokanu waneya hikchikanro. Hiyáhoni ruknokatkaluna h-tarrafa-tna. Waneya hixo chima rixyawaka tshinanu, hi rumukata kosretluna h-tarrafa-tna.

⁷ Waneya hasrukluru, Jesus hamotleru, wla htshinru Pedro tshinkaluru: — Tsru Hixikatshriwatkani tujra! Waneya Simão Pedro jeminixkalu Tsru Hixikatshriwa hapojyawaka hmakawatatka klu tshinanu mamkatukananni hmariskaxyawaka tshinanu. Waneya ruptekhamtlu hipowha.

⁸ Pimrine hasrukkalune kanawa runyana hwanha nwaka. Hi howuk-potutkalu hwanha. Cem metros pchini hetko hya kosretluna tarrafa hixo chima yehi.

⁹ Waneya hiwnaha rapojinixkana, wane rexyaluna tshitshipawa wane twatka chima jimluro hiyrunu pão koxa.

¹⁰ Waneya Jesus wla tshinna: — Pimro chima hkachrero hanikanu wkata.

¹¹ Waneya Simão Pedro pokownatka. Waneya tarrafa hixo chima tsrokakalo hwaleru hkoseta hiwnaha. Chimane cento e cinquenta e três pejnu. Katseplu chima wanepnawaka hi ruskata tarrafa.

¹² Waneya Jesus wla tshinna: — Hinanu, hnikanu. Hiyrunu hi satukna hasrukkaluru haluk-hepomhaletlu Jesus, katni wale. Klu tshinanu rimathetluna Tsru Hixikatshriwa Jesus rixyawaka.

¹³ Waneya Jesus pão hkochtsheka waneya wanna rapiklu. Waneko pixka rixlo chim-koxa.

¹⁴ Jesus hipuktshi riwejinritka wkatanu, map-kata rasruklene yehi ruphujewniyatka xawakniymakananuko.

Jesus Hepomhiywaklu Pedro Piranapni

¹⁵ Waneya rali niklexinixkana, Jesus wla tshinru Simão Pedro: — Simão, Jonas whene, puchinikanretnohe hita nyi pimrine pnute? Waneya Pedro wla tshinru: — Hehe Tsru Hixikatshriwa, pimatlu nuchinijyawakyi. Waneya Jesus wla tshinru: — Pohlutanna noprane carneiro whenene pixkalune.

¹⁶ Waneya rimepe wane tshinretatnaka: — Simão, Jonas whene, puchiniknohe hita? Waneya Pedro wla tshinru: — Hehe Tsru Hixikatshriwa, pimatlu nuchinijyawakyi. Waneya Jesus wla tshinru: — Puslahanna noprane carneiro-ne pixkalune.

¹⁷ Waneya map-kata rixinri wla htshinru: — Simão, Jonas whene, puchiniknohe hita? Seyni Pedro wamonuwata klu tshinanu map-kata wla htshinru: “Puchiniknohe?” Hiyáhoni wla htshinru: — Nutsrukate ptowru potuko pimata, pimatlu nuchinikyi. Waneya Jesus wla tshinru: — Pohlutanna noprane carneiro-ne pixkalune.

¹⁸ Halikaka, halikaka wla ntshinyi: Makluji pixakanaxini palpokoxnawa, hanuktako paluka yaletatka wane pyatka. Seyni tsrutsoleji pixinpatka pkanrakanu. Satu tsatanyi, pmaluka yalexyawakanu ranikanyi.

¹⁹ Wane htshina, rimaxyawakaplu han-hixatshri hipuktshi retanu Pedro hiyrunu Hoyakalu ruphujexyawakapa. Waneya rali wan-tshinretatka Jesus, wla htshinru: — Pomkahitanno hita.

²⁰ Waneya Pedro hiprotakatka, retlu Jesus hasrukleru ramotleru potuko hapakamnu. Xyekni Jesus sta hinaple hikoluhakaynokanatatshri hnikakanaxinna mitshi wla tshinakanatatshri mitshi: — Tsru Hixikatshriwa Jesus kathe hekhitanyi?

²¹ Waneya Pedro rexiniklunru wla htshinru Jesus: — Tsru Hixikatshriwa Jesus, ha xye jeji, hanu hixatshripnihe?

²² Seyni Jesus wla tshinru: — Pomkahichatanno pixa. Seyni nalujiniplu riwejyawaka xye haté nsatojinipa kluhe rixyi?

²³ Wale tshinanu xye pirana hipalatatka Jesus halixatshine yehiya, xye Jesus hasrukleru hima hi hipnanu. Seyni Jesus-mka hi wan-tshinru hma mupniywakanupa seyni wla htshinru: Nalujiniplu riwejyawaka haté nsatojinipa, kluhe rixyi?

João Hiphujexyawaklu Piranapni

²⁴ Xye honukla hasrukkaluru xyekaka pirana hiphujetatshrini hiyrunu xyekaka pirana yonatatshri. Wimatlu halikakni ruphujtaleru pirana.

²⁵ Hiyrun-koxa hi heppiklu pimri Jesus kamhaleru. Seyni ptowru piranako yonatkomka hitaho hi hetkomka xye tshijneko poyahotanro papel steno ptowruka Jesus kamhaleru pirana yonatkomka.