João 20 - Bíblia

Jesus Hiwejyawakatnaka Piranapni

¹ Waneya hyinuwakle seman-hohne, mapchahakowalu, Maria Madalena yanwakatlu yomletshi. Tetlu rerutkatka sotlu yomletshi hichyale.

² Hiyáhoni tasukamta Simão Pedro hiyrunu satu rasrukleru Jesus hamotleru yehi tya. Waneya wla ttshinna: — Yomletshikta hkochpajyanatkaluna Tsru Hixikatshriwani. Hi wimata hanukta rutakanatkaluna.

³ Hiyáhoni Pedro hiyrunu satu rasrukleru yomletshi nwaka hyana.

⁴ Wanna hepi hasukamta seyni satu kapnuhamtlu Pedro. Wale hapka hapoklu yomletshi.

⁵ Waneya ripyoka, retlu mkatshri sama seyni hi hjihloklu yomletshi.

⁶ Waneya Simão Pedro hapkatamtatshri hapoka. Hjihloklu kapna. Retlu mkatshri sama wane hwakanatatshri.

⁷ Ret-koxlu kasamalu Jesus-ni jiwu hiwtokakanatatshri. Hi pimri sama yehi rawakanata seyni pa sreta rawakanata rixannu hiwtokleko.

⁸ Wane pnute satu rasrukleru hapokhapkatatshri jihlok-koxlu kapna. Retlu waneya ralixatka.

⁹ (Seyni wanepnawaka hi rimatjemawaluna Hoyakalu tokanu Jesus hiwejinritnaka tshinanu hipnatshine tskalaya.)

¹⁰ Waneya rasruklene hipjina hyatkana.

Jesus Hakanhayehixyawaklo Maria Madalena Piranapni

¹¹ Seyni Maria yomletshistsi tyopkakakanata, ttshiyahakanata. Ttshiyahakanaxiniwa, tipyoka texyawakaplu kapna.

¹² Waneya tetlu hepi hiwejikalune Hoyakalu towrene tenhohne hajene klatpowalune tuplakanatatshine Jesus-ni mane hwakanaxyawaka. Satu hijiwu hwakanaxyawaka sreta hwa, satu hijixi hwakanaxyawaka sreta hwa.

¹³ Waneya repomhalona: — Suxo, kluhe pitshiyahjeta? Waneya tuhita, wla ttshinna: — Klu tshinanu hanukta ranikanruna Nutsrukatni, hi nimata hanukta rutakanatkaluna.

¹⁴ Wane ttshininixka, tuprotaka. Tetlu Jesus, hyopkakakanata seyni hi timathetlu Jesus rixyawaka.

¹⁵ Waneya Jesus hepomhalo, wla htshinro: — Suxo, klu tshinanrahe ptshiyahata? Kathe pujha? Seyni wala hitaklucha hislahatshri tikahwaklu hiyáhoni wla ttshinru: — Hitsrukatshi, pixa hanijiniplu, punkakanno putajyawaklu waneya nwapanru.

¹⁶ Waneya Jesus wan-tshinro: — Maria. Waneya tuprotaka, hipokananu wla ttshinru judeu-ne tokanuya: — Rabôni! (wale haluka tshinreta kasruklewakleru.)

¹⁷ Waneya Jesus wan-tshinro: — Hi pkachitanno klu tshinanu Nuru yehi hi nyawa. Seyni nomolene yehi pyanu, punkakanna: “Teno nyanu Nuru yehi hiyrunu hixa Hiru yehi, Noyakalute yehi hiyrunu hixa Hoyakalute yehi nyanu.”

¹⁸ Waneya Maria Madalena yanwakatna rasruklene tunkajyawakapna Tsru Hixikatshriwa texyawakatka. Hiyrunu tunkakatkana ptowru pirana runkajyatkalo.

Jesus Rasruklene Hakanhayehixyawaka Piranapni

¹⁹ Waneya hyinuwakle seman-hohne kayno, Jesus hasruklene hapatjetatka ruchyatka hiphaptokaka judeu-ne hamlenu tshinanu. Waneya Jesus hapokatka wanna hanikajite hyopkakatka. Waneya wane htshinna: — Kihle hchinikanuphi.

²⁰ Rali wan-tshinretatka, rekhitna himyo, hikwansat-koxa. Waneya hpoyikowpotutna rasruklene Tsru Hixikatshriwa rexyawakna.

²¹ Waneya Jesus rimepe wan-tshinretna: — Kihle hchinikanuphi. Nuru xye tshijne yokanaxyawakno pixka nixa yokanrethi hixa.

²² Waneya wane htshininixka, rajpokanwakatna waneya wla htshinna: — Hyoptotanru Hoyakalu Hiwejikaluru.

²³ Hixa hamtakahchinikanyehixinri pimrine hektunu waneya Hoyakalu koxa hamtakahchinikanyehitanru wanna hektunu. Seyni hixa hma mamtakahchinikanyehixiniklunru pimrine hektunu, wanna hektunu hi ramtakahchinikanyehitka rektunna.

Jesus Tomé Hakanhayehixyawaka Piranapni

²⁴ Tomé, walekatkani Dídimo tshinkaluru, satu Doze Jesus hasrukleru, hi wannayma rawakanata, Jesus hakanhayehixiniklunna rasruklene.

²⁵ Hiyáhoni pimrine hasruklene wla tshinru: — Wetatkalu Tsru Hixikatshriwa. Seyni Tomé wan-tshinna: — Nma metkanuklunuplu prego yohloxyawaka marca-te himyo hiyrunu nomyoji nma yochmakkanuklunuplu prego yohloxyawaka hiyrun-koxa nomyo nma yochmakkanuklunuplu hikwansata yohloxikolu, hi nalixanru.

Jesus Hiyrunuko Hakanhayehixyawakna Rasruklene Piranapni

²⁶ Waneya pa semana hiknohinixka, wanepjitnakna Jesus hasruklene Tomé-yma. Waneya yáholu hiphaptokaka hichyaluru potuko, Jesus jihlokatka wanna hanikajite hyopkakatka, waneya wla htshinna: — Kihle hchinikanuphi.

²⁷ Waneya Jesus wla tshinru Tomé: — Pimyoji nomyo putakanu, petamyotanno. Pomyokanu, nokwansata pyochmakanru. Hi malixakletupyi seyni halixatshripyi.

²⁸ Waneya Tomé wan-tshinru Jesus: — Nutsrukate! Noyakalute!

²⁹ Waneya Jesus wla tshinru: — Pexyawakno tshinanu palixatka seyni himuwatatshinepni yine yáholu himka retannona seyni ralixannona.

Klu Riyonatka Xye Pirana

³⁰ Hixo pimri hetkalurkaka hkamha Jesus rasruklene hetanuya, twu papel-mta mutak-yonhatkotu.

³¹ Seyni xyekaka yonatka hixa halixyawakaplu Jesus, Hoyakalu Whene Cristo (Messias) rixyawaka hiyrun-koxa halixinri waneyaphi hiwejinri wale hiwaka tshinanu.