João 2 - Bíblia

Hnunrowlu Nwaka Hyiywaka Jesus Piranapni

¹ Waneya hepi hohne hiknohinixka rawatka hnunrowlu Caná poktshi, Galileia tshijneya. Jesus hinro koxa wane hwa.

² Hiyrun-koxa Jesus hiyrunu rasruklene tshanixka hnunrowlu nwaka.

³ Waneya vinho-ha nikawninixka, Jesus hinro wan-tshinru: — Vinho-ha nikawnahatanatka.

⁴ Waneya Jesus wan-tshinro: — Suxo, klu tshinanhe pujhano hita? Nopapkolu hi hapokawa.

⁵ Waneya wala wan-tshinna towrertshine: — Klunerukta runkajinhi, wale potuko hkamhanu.

⁶ Wanekananru seis hachhaji, sotlu kamhikolu. Judeu-nerune powratjexinriwa tshinanu. Satkaka oitenta ho cem litros honha hkachita.

⁷ Waneya Jesus wla tshinna towrertshine: — Honha htsepotanru hachhajkaka. Waneya htsepohapotutluna hachhajkaka haté hipto potuko.

⁸ Waneya wla htshinatkana: — Hsajikhatanu xawakni. Hnunrowatatshri nikle kosekatshri nwaka hanikanru. Waneya ranikanwakatluna.

⁹ Hnunrowatatshri nikle kosekatshri hi himatlu hanhe tuchpajya vinho-ha seyni towrertshine honha sajehatatshine himatlu. Waneya hnunrowatatshri nikle kosekatshri hetumhiniklunutkalu vinho-ha honha kamhikaluro, repuklu hnunrowatatshri.

¹⁰ Wla htshinatkalu: — Ptowru yineru niklu yinuwaklekawahapka hitakjetlu vinho-ha kihleru, waneya tnikahatkoklunutka vinho-ha kihlero waneya tutakkatka vinho-ha kayaho hihlenurutokotka. Seyni pixa vinho-ha kihleru pimreta haté xawakniwa.

¹¹ Wan-rixa yinuwakletlu Caná poktshiya, Galileia tshijne hajeruya Jesus kamhalu mitshikananu hetkaluru hkamhaleru. Ruphujetlu royaknu hiyrunu rasruklene halixatkalu.

¹² Waneya wane wkatanu, Jesus, runro, himolene hiyrun-koxa rasruklene Cafarnaum poktshi nwaka hyatkana. Wan-rutukatkana pimri hohnekaka.

Jesus Hoyakalupji Nwaka Hyiywaka Piranapni

¹³ Páscoa hohne judeu kahwakpirreru hohne wkatanuko, Jesus Jerusalém poktshi nwaka hya.

¹⁴ Waneya Hoyakalupji hyoptoxyana boi-ne hichanretatshine, carneiro hichanretatshine, kamowane hichanretatshine hiyrun-koxa tiyiro hipekjetatshine wane tuplatatshine hyoptota.

¹⁵ Kotshipjerewapi hkamha katsaluya. Waneya Hoyakalupji rakajyatkana ptowrunek-yine, carneiro-ne hiyrun-koxa boi-ne Hoyakalupji maleka sreta hyiywakapna. Tiyiro hipekjetatshine tiyirote rupkaka hiyrun-koxa hyotkakanru mes-kakni.

¹⁶ Hiyrunu wla htshinna kamowane hichanretatshine: — Xye ptowruka hewi hkochpajini! Hi hkamhanru maronewawakapji rixyawakapa Nurupji.

¹⁷ Waneya rasruklene hichinikanretlu yonatkaluru wla tshinatshri: “Hoyakalu, pipji tshinanu njempotuthonuklu, naji halhapirata hatatjewa tshitshmero nwahajita.”

¹⁸ Waneya judeu-ne hihitlu, wla htshinruna: — Kluneru hetkaluru pekhitanwu wimaxyawakaplu towutatshriyi xyekaka pumukata kamhalexyawaka?

¹⁹ Waneya Jesus wla tshinna: — Xye Hoyakalupji hyotkakanu hixa waneya map-hohne pejnu nkamhanutnaklu hita.

²⁰ Waneya judeu-ne wla tshinru: — Xye pantshi quarenta e seis mhale pejnu hkamhakatka. Ha pixa, pkahwakhe map-hohne pejnu tsonu tshinanu pkamhanutnaklu?

²¹ Seyni Hoyakalupji pirana hkochtshekleru, waleni waleko himane pirana.

²² Hiyáhoni Jesus hipnatshine tskala riwejiniklunutka, rasruklene hichinikaplu htshinyawakna mitshi. Waneya ralixluna Hoyakalu tokanu yonatkaluru hiyrunu Jesus tokanu htshinakanaxyawakna ralixatkana.

Jesus Himatahchinikanuxyawakna Ptowrunek-yine Piranapni

²³ Jerusalém poktshi rawakanaxini Jesus Páscoa nikle hohne tshinanu, rexinixkaluna himyekaklewatatshrikaka Jesus kamhaleru, hixolune yine halixlu Jesus.

²⁴ Seyni Jesus hi munanhana yine klu tshinanu rimatahchinikanutna ptowrunek-yine.

²⁵ Hiyáhoni hi rujhatkalu satu yineru hasrujyawaklu hanu rixa yineru klu tshinanu rimatatkalu yineru hchinikanu hwatshri.