João 19 - Bíblia

¹ Hiyáhoni Pilatos haniklu Jesus waneya hkotshipjejixatkalu.

² Waneya soldado-ne kawchiriplu hsaxpatna sahyi hkamhiywakapna waneya Jesus jiwu rutakatkaluna. Waneya mkatshri sama serolu hmakatluna Jesus.

³ Hiyrunu walestsi rapokjejetna, wla htshina halikletluna: — Hali judeu-ne Tsru Hixikatshriwate! Waneya rumpakhojitluna Jesus.

⁴ Hiyrunuko ruchpakatka Pilatos waneya wla htshinatkana judeu-ne: — Hetanu! Jesus nanikanwakathi himaxyawakapa hi psojikna hikolukanuwnalu nukchijyalu xye jeji.

⁵ Waneya Jesus himuchpakkatka serolu mkatshri hitakamtatshri hiyrunu kawchiri sahyetamtatshritka, Pilatos wla tshinna: — Xyetkani jeji!

⁶ Waneya tsru hixikatshinwa sacerdote-ne hiyrunu soldado-ne hajeyna retawaluna Jesus, hyinuwaka saplewletna, wla htshinna: — Cruz puylaxinri! Cruz puylaxinri! Seyni Pilatos wan-tshinna: — Hixako hanikanru, cruz hiylaxinri! Klu tshinanu hitaho hike hikolukanuwnalu nukchijyalu xye jeji.

⁷ Waneya judeu-nerune hipokananu wla tshinru: — Hixanu yonreru pirana tshinanu rujha hipnaleta klu tshinanu wale wan-tshina, Hoyakalu potuko hima ruruta.

⁸ Waneya xye hjeminixka Pilatos, pnute hpikatka.

⁹ Hiyáhoni hjihlokatnaklu hipjiru. Waneya repomhalu Jesus: — Hanhe puchpajya? Seyni Jesus hike tshina.

¹⁰ Waneya Pilatos wla tshinru: — Haklu tshinanhe hi piynumsatno? Hi he pimata hita himukata towutletlu cruz pupniywakapa ho puchoxikowakapa?

¹¹ Seyni Jesus hihitlu, wla htshina: — Hike ptowuta pixa hita tshinanu Hoyakalu menekkanuklunyi. Wale tshinanu hita nsamyokjeru pixa pnute hektuwatatka.

¹² Hiyáhoni waneklukananuko Pilatos haluk-hicholetmaklu Jesus seyni judeu-ne saplewata, wla htshinruna: — Xye jeji puchoxinipa, hi César himatletlerupatkayi klu tshinanu katukta pohirtshi tshinnawa hkamnitlu César.

¹³ Wale hjemini Pilatos, maleka raniklu Jesus. Hikolukanuwnayehjexikowaka htuplata “Sotlumta tshinikowaka”, (waleni “Gabatá” judeu tokanuya).

¹⁴ Hiyáhoni Páscoa hohne halpokotkaluru hohnestsitkani, hanikaj-hohnestsitkani. Waneya Pilatos wan-tshinna judeu-ne: — Haha xyetkani hpohire.

¹⁵ Seyni judeu-ne wan-tshin-sapleta: — Puylatanru, puylatanru. Cruz putakanru. Waneya Pilatos wla tshin-hepomhaletna: — Hpohirrahe cruz nutakanu? Waneya tsru hixikatshinwa sacerdote-ne wla tshinru: — César-pkani wpohire.

¹⁶ Hiyáhoni renekatkana Jesus cruz rupniywakpatka.

Cruz Rupniywaka Jesus Piranapni

¹⁷ Waneya soldado-ne hanikatkalu Jesus. Waneya cruz rutjitatka Jesus, hyatka, Calvário tshinikowaka, wale tokantshi yokakkaluru, yineru jiwuta pixkalutu yehi, hya.

¹⁸ Wane cruz rutajyaluna hiyrunu hepi yine. Satkaka pa sreta hwa. Jesus hanikaji hwa.

¹⁹ Pilatos yonakjixlu hjihyehixikolu pirana tábua hoho, rutakakjixlu cruz-stsipto. Wane htshin-yonhata: “Jesus, Nazaré hajeru, judeu-ne pohire”.

²⁰ Hiyáhoni hixo judeu-ne het-yonhatlu xye pirana klu tshinanu cruz rutajikowaka Jesus hi howukaylu tsru poktshi. Hiyrun-koxa mapa nru hyonaxika, judeu tokanu, latim tokanu hiyrunu grego tokanu.

²¹ Waneya tsru hixikatshinwa sacerdote-ne wan-tshinmaklu Pilatos: — Hi wane ptshin-yonhakakanru: “Judeu-ne pohire rixyawaka”, seyni wla ptshina yonretanru waleko htshinyawaka pixka: “Hitni judeu-ne pohirno”.

²² Seyni Pilatos wla tshina: — Nyonakjixlerutka hyonatkatka.

Soldado-ne Hiknojyawaka Jesus Mkalu Hkayaxyawakna Piranapni

²³ Waneya soldado-ne cruz rutakatkaluna Jesus, ranikatkaluna himkalu. Quatro hkaniprexyatkaluna satkaka soldado-ne. Satu himkalu myotsletu hixeta. Teno ruyak-saxpalexika haté tshiji sreta.

²⁴ Waneya wannakakluko wla tshina: — Hi wsuskakanru seyni hiknokkaluru wuknokanu wimaxyawakapa katu kayatanru Jesus-ni mkalu. Wan-rixa hpoyahokajyawakaplu Hoyakalu tokanu mitshikawluru yonatkaluru tshinyawaka, wla tshinatshri: “Nomkalu hkanipretna wannakakluko, hiknoklu rikamhaluna rimaxyawakapna katu kayatanru nomkalu.” Hiyáhoni wan-rixatkana soldado-ne.

²⁵ Cruz-stsi hyopkakna Jesus hinro, nato htshinrero, Maria, Clopas tshinkaluru hnunro hiyrunu Maria Madalena.

²⁶ Waneya Jesus hexinro runro hiyrunu rasrukleru ramotleru runrostsi hwakanatatshri, wla htshinro runro: — Suxo, klalutkani pituru.

²⁷ Wane pnute wla htshinru rasrukleru: — Klalotkani punro. Waneklukawa rasrukleru hanikatkalo waleyma twiywakpatka.

Jesus Hipnale Piranapni

²⁸ Wane pnute, rimaxinixka Jesus ptowruka rali kamhalexinixka hiyrun-koxa hpoyahokajyawakaplu Hoyakalu tokanu mitshikawluru yonatkaluru, Jesus wla tshina: — Honunnahno.

²⁹ Wanekananro pa stonha vinagre-ha. Hiyáhoni wanna kamkolu ruhakluna vinagre-ha. Hissopo tshinkalurujestsipto rutakluna waneya Jesus nama rutakluna.

³⁰ Waneya rurinixkalo vinagre-ha Jesus, wla htshina: — Ralixatka. Waneya hyonohjiwutatka, rupnanatka renek-hiwekletatka.

Hyohlokwansataxikowaka Jesus Piranapni

³¹ Sábado hohnepatkani wale prika. Tsru kahwakpiratkaluru hohnepatkani. Judeu-ne hi halukatkalu hipnatshinni mane cruz rutujyawakatka haté sábado hohne. Hiyáhoni judeu-ne hanjitlu Pilatos hitpali hapu ruknahjixyawakapa. Waneya hiknahatpalitkalunni mane hanikjixkatka.

³² Hiyáhoni runna soldado-ne. Mitshikananu cruz hwatshri Jesus hinaple hwakanatatshri hitpali hapukaka ruknahna. Waneya Jesus pastate hwakanatatshrini koxa ruknajrotpalitna.

³³ Seyni Jesus nwaka rapojinixkana soldado-ne retluna rali hipnaletatka Jesus-ni. Hiyáhoni hi ruknahatpalitluna Jesus.

³⁴ Seyni satu soldado wane hwakanatatshri yohlokwansatatlu Jesus harpão-ya. Chinpotukawa hrahtshi hichpaka honhayma.

³⁵ (Xye hetatshri hinkaklewata. Halikaka htshina. Rimata halikakni htshinyawaka. Runkakletlu hix-koxa himukata halixlexyawakaplu tshinanu.)

³⁶ Xyekaka wan-hixatka Hoyakalu tokanu yonatkaluru tshinyawaka himukata poyahokaklexyawakapa. Wane htshina: “Hi satukna hihapu hiknahko.”

³⁷ Hiyrunuko wane htshinatnaka Hoyakalu tokanu mitshikawluru yonatkaluru: “Hyopukhatanruna hyohlolerna.”

Jesus Kapnaxikolu Piranapni

³⁸ Wane pnute José tshinkaluru, Arimateia hajeru, hanjitlu Pilatos Jesus-ni mane renejikowakapa. José Jesus hasrukler-koxni seyni yohimaxikatshriwani judeu-ne hamlenu tshinanu. Waneya Pilatos hitshitlu hiyáhoni runa ranijyawakaplu Jesus-ni mane.

³⁹ Waleymalu Nicodemos tshinkaluru, mitshikawa Jesus yehi hapkapyetshnotatshri. Nicodemos haniklu phamlu pahiru mirra tshinkaluru hiyrunu aloés tshinkaluru yapjetkaluro, quarenta e cinco kilos hetkolu.

⁴⁰ Waneya Jesus-ni mane hkochtshekna, mkatshri sama, linho sama, phamlu pahiru yapjetkaluroyma ruwtokluna. Wan-rixjetna judeu-ne hkapnaxikowakapa tshinanu.

⁴¹ Cruz rutajikowakastsi rawa satu hitaklucha. Wane hitaklucha rawa satu jitopnatkaluru herotu hike mutajikowakanuwa.

⁴² Judeu-ne halpokohnaputanru hohnestsi potuko rixyawaka tshinanutka hiyrun-koxa hejitotkolu wanestsiko hwatka, wan-rutakmanetanatkaluna Jesus-ni.