João 18 - Bíblia

Jesus Getsêmani Tshinikowaka Hyiywaka Piranapni

¹ Waneya rali hanjihohnerexinixka, Jesus rasrukleneyma yatka waneya hkoprutluna Cedrom tshinikowaka tskata. Rapokluna oliveira-cha wane sreta hwatshri.

² Waneya Judas, Jesus hiphujetatshri, himathetlu oliveira-cha wane hajeru klu tshinanu hixo kata wane rapatjexya Jesus rasrukleneyma.

³ Hiyáhoni Judas koxa oliveira-cha hya, hkosekamtna soldado-ne hiyrun-koxa satkaka tsru hixikatshinwa sacerdote-ne hiyrunu fariseu-ne yokanatanune. Ranikluna lamparina, kolhamero koxa hiyrunu hiylalewapkaka.

⁴ Ptowruka riknohjerupa rimatahnapuxyawaka tshinanu, Jesus yanwakhapkatna waneya repomhatkana: — Kathe hijha?

⁵ Waneya ruhitluna: — Jesus, Nazaré hajeru. Waneya Jesus wla tshinna: — Hitakni. (Wannayma koxlu Judas, Jesus kamnitjeru.)

⁶ Waneya Jesus wla tshininiklunu, “hitakni”, ratjini hyoxiritna hnakhamtna.

⁷ Hiyáhoni rimepe hepomhaletatnakna: — Kathe hijha? Waneya wanna wla tshina: — Jesus, Nazaré hajeru.

⁸ Waneya Jesus hihitna: — Nunkakatkahi hitakni. Hiyáhoni hita hijhini, hetacha yaletanna nyi.

⁹ Wane htshina hpoyahokajyawakapa tokantshi htshinyawaka mitshi, wan-tshinatshri: “Yine penejyano hi satukna namtaka.”

¹⁰ Simão Pedro yohlolewapi himwakanata, waneya hkochpaklu hyohlolewapre, hkastakjepitlu tsru sacerdote towrer-jepi. Hkastaklu hpotukle jepi. (Wale towrertshi hiwakni Malco.)

¹¹ Seyni Jesus wan-tshina hiykoletlu Pedro: — Pihnanutanru hipaji pyochmakanru pyohlolewapre! Pixlahe hi halukno twu copa salewaktshi yehi Nuru henejyano nuryawaka?

Anás Yehi Ranijyawakluna Jesus Piranapni

¹² Waneya soldado-ne h-chefe-tnayma hiyrunu judeu-ne tsru hixikatshinwa kachitlu Jesus. Rostutluna.

¹³ Mitshikananhapka ranikluna Anás yehi. Caifás tshinkaluru himatjirni Anás. Caifás tsru sacerdote wale hwalapu tshinanu.

¹⁴ Caifás honra wla tshinatkana judeu-ne kihleru satupka jeji hipniywaka yine tshinanu.

Pedro Wan-Tshinyawaka Hi Rimathetlu Jesus Piranapni

¹⁵ Simão Pedro hiyrunu satu Jesus hasrukleru homkahitlu Jesus. Tsru sacerdote hetjejreru potuko xye Jesus hasrukleru Jesus-yma jihloklu tsru sacerdote-pji hiputre.

¹⁶ Seyni Pedro hiphapto maleka sreta hitukatka. Waneya Jesus hasrukleru, tsru sacerdote himathetleru, hsatkapa waneya riynumsatlo suxo hiphapto hislahatshro waneya hjihlokaklu Pedro.

¹⁷ Waneya suxo hepomhalu Pedro: — Hi he pixa xye jeji hasrukler-koxyi? Waneya ruhitlo, wla htshina: — Hita hike.

¹⁸ Katshikleru tshinanu towrertshine hiyrunu soldado-ne holkakanata tshitshi hpawlerna yehi. Pedro koxa wannayma yopkaka rolkakanata.

Tsru Hixikatshriwa Sacerdote Hepomhiywaklu Jesus Piranapni

¹⁹ Waneya tsru sacerdote hepomhalu Jesus. Repomhalu rasruklene pirana hiyrunu Jesus hasruklewle pirana.

²⁰ Waneya Jesus wla tshinru: — Ptowruneko hetanu nunkaklewjeta. Ptowru judeu hapatjexyawaka hanjihohnewakapji hiyrunu Hoyakalupji, nunkaklewjekanaxya. Nunkaklewaxyawaka hikeklu nyohimata.

²¹ Klu tshinanhe hita pepomha? Pepomhanna njemakanatjene. Wanna halikaka himatlu nunkakjekanaxyana.

²² Seyni wane htshininixka satu soldado Jesus-stsi hwatshri himpakhojitlu Jesus. Waneya soldado wla tshinru Jesus: — Wanerhe ptshin-hihretlu tsru sacerdote?

²³ Waneya Jesus hihitlu, wla htshinru soldado: — Hektuwaka ntshinini, puphujetanru ntokanu hektutu. Seyni halikaka ntshinini, klu tshinanhe pumpakhojitno?

²⁴ Waneya Anás yokanatlu Jesus hostutkaluruko tsru sacerdote Caifás tshinkaluru nwaka.

Pedro Hiyrunuko Wan-tshinyawaka Hi Rimathetlu Jesus Piranapni

²⁵ Waneya Pedro holkakanaxiniwa repomhaluna: — Hi he pix-koxa Jesus hasrukleryi? Seyni Pedro weyawata, wla htshinna: — Hi hitni.

²⁶ Waneya tsru sacerdote towreru Pedro kastakjepitanru mole wla tshinru: — Hi he netyi Jesus-yma oliveira-chaya?

²⁷ Hiyrunuko hweyawata Pedro waneya waneklukawa potuko hyanumatatka patlapa.

Jesus Pilatos Yehi Hapojyawaka Piranapni

²⁸ Waneya judeu-ne haniklu Jesus. Caifás yehi ruchpajyana phurupji ranikluna. Yetshpotukawa. Judeu-ne hi haluka jihlokletlu phurupji hma pitshoxnawakanupwana Páscoa hohne nikle rumukata niklexyawakapna.

²⁹ Hiyáhoni Phuru Pilatos hipji hichpajya waneya repomhana: — Klu tshinanhe hjihyehitlu xye jeji?

³⁰ Waneya ruhitluna, wla htshinruna: — Hektutu hma kamhaknumka, himka pixa wenekanru.

³¹ Hiyáhoni Phuru Pilatos wla tshinna: — Haté hisatkapanru. Hjihyehitanru hixanu yonreru pirana tshinyawaka pixka. Waneya judeu-ne wan-tshinru Phuru Pilatos: — Seyni hixa hi rawiyawu hinhatshri wuylaxyawaklu satu yineru.

³² Wan-rixluna Jesus hpoyahokajyawakapa htshinyawaka rixa hipnalexyawakapa salewaktshiyma.

Phuru Pilatos Hepomsaxyawaklu Jesus Piranapni

³³ Waneya Phuru Pilatos jihlokapjita, htomhalu Jesus waneya repomhalu, wla htshinru: — Pixlahe judeu-nerune pohiryi?

³⁴ Waneya Jesus hihitlu: — Pixako pihchinikanrahe ptshina ho pimrine hchinikanra ptshina?

³⁵ Seyni Phuru Pilatos wla tshinru: — Ha, judeu-nerlahe pkahwakno hita? Pineruneko hiyrunu tsru hixikatshinwa sacerdote-ne hita hsamyokyina. Kluhe pkamha pixa?

³⁶ Waneya Jesus wla tshinru: — Npohirewaxyawaka hi xye tshijne hajerni. Xye tshijne hajeru rixkamka, ntowrerune yahotkakanmaka nma kachixikowakanupa judeu-neya. Npohirewaxyawaka hi hewi hajerni.

³⁷ Waneya Phuru Pilatos wla tshinru: — Hiyáhoni pixlahe phuryi? Waneya Jesus hihitlu, wla htshina: — Pixako wan-tshina. Halikaka wale tshinanu nmatuta hiyrunu xye tshijne napoka nuphujtaxyawakaplu halikakalutu pirana. Ptowruneka halikakalune yijnakotlu ntokanu.

³⁸ Waneya Phuru Pilatos hepomhalu: — Ha klunernihe halikakalutu pirana? Wane htshininixka ruchpakatka judeu-nerune nwaka hya. Waneya wla htshinna judeu-nerune: — Hi psojikna hikolukanuwnalu nukchijyalu xye jeji.

³⁹ Seyni ptowru Páscoa hohne tshinanu nuchojetlu satu preso hajeru. Hi he haluklu nuchoxyawakaplu judeu pohire?

⁴⁰ Seyni ptowrunek-yine wla tshin-sapleta: — Hike, hi walepni seyni Barrabás tshinkaluru puchoxinwu! Barrabás tshinkaluru honukla katshowhuru.