João 17 - Bíblia

Jesus Hanjihohnere Piranapni

¹ Xyekaka pirana htshinatka Jesus. Tenhohne hyihata waneya wla htshina: — Hoyakalu, Nuru rapokpapkolutatka. Piwhene puphujetanu, ruphujexyawakapyi pix-koxa.

² Peneklu towuwlu ptowru yineru htowuxyawaka, hiweklu hike rixiniko mnikawnakatuko renejyawakapna yine ptowruneka penejyatkalu.

³ Pixa Hoyakalu halikakalutu rimaxyawakapna yine, hike pixka hixatshriyi, hiyrunu Jesus Cristo, pyokanatanru rimaxyawakapna yine, xyekni hiweklu hike rixiniko mnikawnakatupa.

⁴ Nuphujetatkayi pixa hewi xye tshijneya. Nnikatatkalu kamrurtshi ptowuxyano nkamhiywakapa.

⁵ Hiyáhoni xawakni Nuru Hoyakalu, pix-potuko puphujetanno. Xye tshijne myinuwakkanuklunuwa pixayma nwajekanaxini hoyaknutshi netleru penekanno.

⁶ — Nuphujetatkalu pixa phiwaka yine penejyano xye tshijne hajene yehiya. Payinetene penejyano. Hiyrun-koxa pixa ptokanu romkahjetna.

⁷ Xawakni rimathetluna ptowruka penejyano, pix-yehi hichpajikatshri rixyawaka.

⁸ Klu tshinanu tokantshi punkajyatkano, wanna nunkakatka. Hiyrun-koxa wale tokantshi ralixna. Pix-yehi hichpajikatshrino halikaka rimathetna hiyrun-koxa rimathetnona pixa yokanatanruno nixyawaka.

⁹ — Nanjihohneta wanna tshinanu, hi xye tshijne hajene tshinanu nanjihohneta. Seyni nanjihohneyehitna yine penejyano klu tshinanu pixanunni wanna.

¹⁰ Hiyrun-koxa hitanunni, pixanun-koxni wanna. Waneko pixka rixa pixanunni hitanun-koxni wanna. Wanna tshinanu rawa noyaknu.

¹¹ Pixa nwaka nyanu, hatatjewa hi hewi tshijne nwawa seyni nyi yine hewi tshijne hwawa. Nuru Hoyakalu Potukalu, nyi yine penejyano pihnanutanu pixa hiwaka himukatle tshinanu. Pa hchinikanurune rixyawakapna hixa pixka.

¹² Wannayma nwakanaxini xye tshijneya pixa hiwaka himukatleyma nihnanutatkana. Yine penejyano nihnanutatka hi satukna hamha seyni hamhatshri tsonupni tshitshmero yatshripa tsonu. Wan-rixatka hpoyahokajyawakaplu Hoyakalu tokanu yonatkaluru tshinyawaka.

¹³ Hiyáhoni pixa nwaka nyanu. Hiyrun-koxa xyekaka tokantshi xye tshijne hajene nunkakatka, numuwle nenejyana hpoyahokajyawakapa wanna yehi.

¹⁴ Pixa tokanu nunkakatkana seyni xye tshijne hajene hahnanutna klu tshinanu hi xye tshijne hajenetkani, hita xye tshijne hajeru nmixyawakanu pixka.

¹⁵ Hi nanjityi xye tshijne pkochpajyawakapna seyni nanjityi pinoxyawakna kamtshi hma kojwajyawakanupna.

¹⁶ Wanna hi xye tshijne hajenetkani, hita xye tshijne hajeru nmixyawakanutka pixka.

¹⁷ Ppotukatanna halikaka piranayma. Halikakalutni ptokanu.

¹⁸ Pyokanaxyawakno xye tshijne pixka, wanna koxa nyokanata xye tshijne hyiywakna.

¹⁹ Wanna tshinanu pixa nenejnawa. Wanna koxa ptokanu halikakalutu tshinanu pixa renejinwana.

²⁰ — Hiyrun-koxa hi nyi tshinanu tsonu nanjihohnetanu seyni nanjihohneyehitanna koxa hita halixatshinepa runkakle tshinan-koxna.

²¹ Nanjityi pa hchinikanurune rixyawakapna, hixa pixka Nuru Hoyakalu pa hchinikanurunwu pixa hitayma hiyrunu pa hchinikanurunwu hita pixayma. Nanjityi pa hchinikanurune pixkakanna hixayma, xye tshijne hajene halixyawakaplu pyokanatanruno nixyawaka.

²² Hiyrunu hoyaknutshi penejyano, wale nenekatkana wanna. Pa hchinikanurune rixyawakapna, pa hchinikanurune wixyawaka pixka.

²³ Hita wannayma hiyrunu pixa hitayma hike mmahaxikane rixyawakapna pa hchinikanurune rixyawakapna. Xye tshijne hajene himaxyawakaplu pixa yokanatno hiyrunu rimaxyawakapna puchinikna puchinikjexyawakno pixka.

²⁴ — Nuru Hoyakalu nanjityi yine penejyano hita nwiywakapa rawyawakapna wanna koxa. Npohirewnale penejyano rexyawakapna. Klu tshinanu xye tshijne hma kamhakonuklunuwa puchinikatkano.

²⁵ Ha, Nuru Hoyakalu Potukalu, xye tshijne hajene hi himatatkayi. Seyni hita himatatkayi hiyrunu nyi yine himatatkalu pixa yokanatno hita.

²⁶ Pixa nimatkakatkana wanna hiyrunu pix-pirana nunkakjetawana. Hichiniklewlu puchinijyawakno pso, wannayma rawyawakapa hiyrunu hita wannayma nwiywakapa.