João 16 - Bíblia

Jesus Hinkaklexyawaklu Salewaktshi Hinatshripa Piranapni

¹ Jesus wane pnute wan-tshina: — Xyekaka nunkakhi hma malixyawakanupa.

² Hanjihohnewakapjikaka hkochpajikolupa hixa hiyrun-koxa rapokpapkolutanu hiylaxikowaka Hoyakalu halukanru hkamhahoxinwa.

³ Xyekaka hkamhinhina hixa klu tshinanu hi rimatluna Nuru Hoyakalu, hi hitako rimatna.

⁴ Seyni xyekaka nunkakhi, rakanhinipa xyekaka, hixa hichinikanru xyekaka nunkakakanaxyahi. Hiyrunu Jesus wan-tshina: — Seyni mitshikananu xyekaka hi nunkakatkahi klu tshinanu hix-yehi nwawa.

⁵ Seyni xawakni nyokanatjeru nwaka nyanu. Seyni hixa hi satukna hepomhano: “Hanhe pyanu?”

⁶ Hiyrun-koxa xyekaka nunkajyahi tshinanu, hixa wamonuwhajita tsru potuko.

⁷ Seyni halikaka nunkakhi, kihlepotlu nyinripa klu tshinanu nma yaknuklunupa hapnanuhchinikankaklewatatshri hi hapokanu; seyni nyinipa nyokanatanru hix-yehi.

⁸ Seyni rapojinipa Hiwejikaluru, wale hichinikkakanna xye tshijne hajene hektuntshi pirana, potukalu pirana hiyrun-koxa hikolukanuwnalu pirana.

⁹ Hektuntshi tshinanu hjihyehitkanna klu tshinanu hi ralixnona.

¹⁰ Potukatlewlu pirana tshinanu hjihyehitkona klu tshinanu Nuru Hoyakalu yehi nyanutka. Hi hetanutkano.

¹¹ Hikolukanuwnalu klu tshinanu xye tshijne yokanatatshri hikolukanuwnatka.

¹² — Waneyno pimri pirankaka nunkajyawakapmakhi seyni hixa hi himukata hakotletlu xawakni.

¹³ Seyni runinpatka Hiwejikaluru halikakalutu, waleko kosekanhi ptowru piranako halikaka piranaya. Klu tshinanu hi waleko hihchinikanu runkakletanu seyni runkakletanru ptowruka hjemlerutka, runkakletanru hinatshripa pirana.

¹⁴ Hiwejikaluru halikakalutu hita hpoyahnutanu. Hita hinkakle runkakanhi.

¹⁵ Ptowruka Nuru himwaleru hitanni. Wale tshinanu wane ntshinatkahi, Hoyakalu Hiwejikaluru nunkakle psoluka runkakanhi.

¹⁶ — Xekoyakapa hi hetanno seyni hi howukchini hetanutnakno.

¹⁷ Hiyáhoni satkaka wanna hasrukkalune wla htshinkakna: — Klunernihe xye pirana htshinatkawu? “Xekoyakapa hi hetanno seyni hi howukchini hetanutnakno?” Hiyrunu xye, “Nuru Hoyakalu nwaka nyiywaka tshinanni”?

¹⁸ Hiyáhoni wla htshinna: — Hi wimatjemlu klunerukta raluka tshinreta wla htshinini, “Xekoyakapa”.

¹⁹ Seyni rimata Jesus xye pirana raluk-hepomhaletluna hiyáhoni wla htshinatkana: — Hixlahe hepomhakaka hixkakluko klu ntshinatkahi xye hima tshinanu, Xekoyakapa hi hetanno seyni howukchiniyaka hetanutnakno?

²⁰ Halikaka, halikaka ntshinhi. Hixa wamonuwatanu, htshiyahpotutanu seyni pimrine xye tshijne hajene poyikowatanu. Hixa wamonuwatanu seyni hwamonuwle hiprotakanu, himuwlupatkani.

²¹ Suxo honra mturu tshino tjemini, tkaheknanuwata klu tshinanu rapokatka topapkolu. Seyni hajeyri tali matuwhenrexinixka, hi tuchinikanretatkalu katshinolukananu tpoyikowata satu mturu xye tshijne tmatkajini tshinanu.

²² Hiyáhoni xawakni hwamonuwata seyni netanutnakhi hiyrunuko waneya himuwatanu. Hiyrun-koxa himuwle hike yineru himukata kochtsheklexyahi.

²³ — Hinatshri hohnepa hike pirana hijhayehitanutkano. Halikaka, halikaka wla ntshinhi, Kluneruktako hanjixinri Nuru Hoyakalu hita hiwaka tshinanu, renekanhi.

²⁴ Haté xawakni hike hanjitawano. Hanjirewatanu, hyoptoxyawakaplu himuwle hike mmahaxyawakanupa.

Jesus Tokanu Hinhale

²⁵ — Xyekaka pirana nunkakhi yapkaklu piranayma seyni hinatshripa hohne hi yapkaklu piranayma niynumatanhi. Wale hohnepa Nuru Hoyakalu piran-yehi nekhipotutanhi.

²⁶ Wale hohne hinatshripa hita nhiwakayma hanjirewatanu. Hiyrunu wane ntshinhi wale hohnepa hi Nuru Hoyakalu nanjitanu hixa tshinanupa.

²⁷ Klu tshinanu wale, Nuru Hoyakaluko hichinikhi klu tshinanu hixa hichinikno hita hiyrunu klu tshinanu halixno Nuru Hoyakalu yehi hichpajikatshrino.

²⁸ Nuru Hoyakalu nunya. Xye tshijne hapokatshrino. Waneyapa xye tshijne nuchpajini. Nuru Hoyakalu nwaka nyanu.

²⁹ Waneya rasruklene wla tshinru: — Xawakni halikaka pekhixnawa puchinikanretler-potuko. Hi yapkaklu tsonu ptshina.

³⁰ — Ha xawakni wimatyi pixa ptowru potuko himatatshriyi. Hi rujhalu yine hepomhiywakyi. Hiyáhoni walixyi Hoyakalu yokanreryi pixyawaka.

³¹ Waneya Jesus hepomhana, wla htshinna: — Halikaklahe halixno xawakni?

³² Hetanu rapokpapkolutanu, rali hapoklepapkolutatka hipalaxyawakapa hixa satkakhi waleko hyawakle yanu, hita hichomtanu. Seyni hi hichotkalurno halikaka klu tshinanu Nuru Hoyakalu hitaymalutni wale.

³³ Xyekaka pirana nunkakatkahi kihle hchinikanurunephi hita tshinanu. Xye tshijne salewnikatshinephi. Seyni kihle hchinikanurunephi klu tshinanu xye tshijne namtakakatka.