João 15 - Bíblia

Uva-tsa Halikakalutu Piranapni

¹ — Hitni uva-tsa halikakalutu pixkalutno. Nuru Hoyakalu uva-cha hislahatshrini.

² Ptowruka hita hwatshri plukaka masahitu Hoyakalu kastakanru. Hiyrun-koxa ptowru plukaka kasahiru wale hihletlu hsahiwpotuxyawakapa.

³ Hixni hihletkatka ntokanu nunkajyatkahi tshinanu.

⁴ Hita hwanu hiyrunu nwanhi hixa. Klu tshinanu uva plu hi himukata sahiwleta waleko hmixkonu tshinanu tsonu seyni rujhalu hiptshe hyokajikowaka. Waneko pixka hixatshinhi hixa. Klu tshinanu hixa hike himukata kochpakleta hita hma yokakkanuklunu.

⁵ — Uva-tsa pixkalutno hita. Hixni hiplu. Hiplu hita hwatshripa hiyrunu hita nimwaleru-plu pixkalutu, hixo sahiplu. Seyni hita mwakatu hikeko hkochpaka.

⁶ Katukta hi himwano, hiplu hiknokkaluru pixkalutupni. Riprihanu hiplu hiyáhoni rapatjetka yineya waneya tshitshmero ruknokkana. Hyoxikka hiplu.

⁷ Hita himwini hiyrunu ntokanu hixa hitokote hwanu, halukanru kluneruktako hanjixini, wale hyoptotanu.

⁸ Nuru Hoyakalu himalwutko hix-potu sahi pixkalutu hsahiwaxini. Wan-hixatshinephi nasruklene.

⁹ Nuru Hoyakalu hichinijyawakno pixka waneko pixka nixa hichiniklethi hixa. Hi hasujinri nuchinikle hixa tshinanu.

¹⁰ Ntowuxyahi homkahixini hi nutuk-hichiniklethi. Nuru Hoyakalu tokanu nomkahjexyawaka pixka. Hiyáhoni hi rutuk-hichinikletno.

¹¹ — Xye pirana nunkakhi, numuwle himwatshine himukatatshinephi, hiyrun-koxa hpoyikowaxyawaka hike mahatatka.

¹² Xyekni ntowuxyahi pirana, hichinikakjexyawaka, hita hichinijyawakhi pixka.

¹³ Hikeni xye yohnik-hichiniklewatatshri, satu yineru rimatletanune kachrijru rupniywaka.

¹⁴ Nimatletanunephi, ptowru tokantshi ntowuxyahi homkahixini.

¹⁵ Hi towrertshine ntshinatkahi klu tshinanu towrertshinecha hi himatlu towutatshri, htowutjerna hchinikanu. Seyni nimatletanune ntshinatkahi klu tshinanu ptowru tokantshi Nuru Hoyakalu tshinyano njemleru, nunkakatkahi.

¹⁶ Hixa hi nuretno hita seyni hitako nuretatkahi hixa hiyrunu nenek-kamrurethi hyiywakapa, Hoyakalu halukanru hkamhiywaka, rawhohnekanaxyawakapa hkamrure. Waneyakni kluneruktako hanjixinri Nuru Hoyakalu, hita nhiwaka tshinanu hanjixinri, renekanhi.

¹⁷ Xyekaka pirana ntowuthi, Hichinikkakanu.

¹⁸ — Xye tshijne hajene hahnanuxiniphi, hichinikanru hit-hapka rahnanutatkana.

¹⁹ Xye tshijne hajeneymalune hixkamka waneyamka hamotko hixa wannanu pixka. Seyni xye tshijne hajeneymalune hma mixyawakanu tshinanni, hiyrunu nurethi xye tshijne hajene hmixyawakanu tshinanu, xye tshijne hajene hahnanuthi.

²⁰ Hi hamtakanru tokantshi ntshinyatkahi. Xyekni wale: “Towrertshi hi htowutjeru yohnik-himukatatshrini wale”. Hiyáhoni hita hsalexinixka, hix-koxa hsaletanna yine. Hita ntshinyawaka rimrexinna waneya hixa tshinyawaka koxa rimretanna.

²¹ Hiyáhoni xyekaka ptowruka hkamhinna hixa, nhiwakaymalunhi tshinanu. Xye hkamhanna klu tshinanu hi rimatluna nyokanatjeru.

²² Hita nma munkanumka hiyrunu nma miynumatkanumkana yine waneyamka hi hektuwaka kamhatshinetkani. Seyni xawakni hi rawyana rektunna mimathexikowakanu.

²³ Hita nahnanutjeru, Nuru koxa rahka.

²⁴ Kamrurtshi nkamhaleru satukna yineru mkamhanutu, nma kamhaknumka wanna hetanu, himka hektuwaka kamhatshinetkani. Seyni xawakni retluna nkamrure wanepnawaka rahnanutnona hiyrunu Nuru koxa rahnanutna.

²⁵ Seyni xye hakanhatka hpoyahokajyawakapa tokantshi yonatkaluru wanna yonre hwatshri, wla tshinatshri: “Rahkanona hike mixkatukno.”

²⁶ Seyni Hapnanuhchinikankaklewatatshri, Hiwejikaluru halikaka pirana hiphujetatshri, Nuru Hoyakalu yehi hichpajikatshripa, nyokanatanrupa, rapojinipa hixa nwaka, waleko hiphujtatanno.

²⁷ Hiyrunu hix-koxa hiphujtalewatanu klu tshinanu nehapoklekananuko hitaymalunekananhi.