João 13 - Bíblia

Jesus Herokajixixyawakna Rasruklene Piranapni

¹ Tsru niklu hohne Páscoa tshinkaluru hohne wkatanu Jesus himatatka rapokatka hipapkolutka xye tshijne ruchpajyawakapa, Ruru Hoyakalu nwaka hyiywakapa. Ruchinikatkana yine walenune xye tshijne hwatshine. Ruchinikhohnekanatna rupninri hohne potuko.

² Jesus hiyrunu rasruklene hali nikletatka. Kamtshi koxa hali hitakahchinikanretatkalu Simão whene, Judas Iscariotes tshinkaluru, Jesus rekhixyawakapa hkamnitjeneya.

³ Jesus himatatkalu ptowru potuko reneklu Ruru Hoyakalu htowuxyawakapa Jesus. Hiyrun-koxa Jesus himatlu Hoyakalu yehi hichpajikatshrini hiyrun-koxa Hoyakalu nwaka yatshripni wale.

⁴ Waneya nikjexikowaka yehi hpalniyatka. Himkalu roho hajeru kahnete rutaklu. Satu cheymanepi hkochtsheka. Rostuptshijita.

⁵ Waneya wane pnute bacia rutakhatlu honha waneya hyinuwaka herokajixletna, rasruklene hiyrunu cheymanepi hiptshiji hostutatshri hcheyijixixyana.

⁶ Waneya Pedro-stsi rapoka. Pedro wla tshinru: — Tsru Hixikatshriwa peroka jixitenohe?

⁷ Waneya Jesus wla tshinru: — Nkamhanru hi pimatjema xawakni seyni xekoyakpatka pimatjemanru.

⁸ Waneya Pedro wla tshinru: — Pixa hikeklu perokajixitanno hita. Waneya Jesus hihitlu, wla htshinru: — Nma merokakanuklunupyi hi psojikna hit-yehi pwini.

⁹ Waneya Pedro wla tshinru: — Tsru Hixikatshriwa hi nojixi tsonu perokanu seyni perokanru nomyo koxa hiyrun-koxa nojiwu.

¹⁰ Waneya Jesus wla tshinru: — Hijixi tsonu herojikalurutka. Wan-hixatshri powratka psoluka. Hixa powralunhi seyni satu hixa tsonu hi powra.

¹¹ Klu tshinanu wale honra himathetatkalu rekhitjerupa. Hiyáhoni wale tshinanu wane htshina, “Satupkahi hi powra.”

Han-hixatshrihe Yineru Potu Tsru Hixyawaka Piranapni

¹² Waneya Jesus rali herokajixletatkana, himkalu roho hajeru rawatka, htuplatatnaka. Waneya wla htshinna: — Himatjemluhe klu kamrurtshi nixhi?

¹³ Hixa wan-tshinjetno, Kasruklewakleru ho Tsru Hixikatshriwa htshinno. Kihleru, wane potuko htshinno klu tshinanu halikakni, wan-hixatshrino.

¹⁴ Hita, Kasruklewaklerno hiyrunu Tsru Hixikatshriwano nerokajixithi hix-koxa hijhalu herokajixkajyawaka, nixakanaxyawakhi pixka.

¹⁵ Klu tshinanu satu hyimlerupa nekhithi hixa. Hiyáhoni hix-yinhi haluka wan-hixletna pimrine hita hixyawakatkahi pixka.

¹⁶ Halikakni, halikakni wane ntshinhi, Towrertshicha hi htowutjeru yohnik-himukatatshrini wale. Hiyrun-koxa yokanatkaluru hi hyokanatjeru yohnika tsruni wale.

¹⁷ Xyekaka pirana himatatshri, kihle hchinikanurupni xyekaka hasrujikolu hkamhini.

¹⁸ Seyni hi hixa ptowruneka nkochtsheka wane ntshinini. Klu tshinanu nimatna nnurrene hanu hixatshinetkani. Hoyakalu tokanu yonatkaluru tshinyawaka hpoyahokajyawakapa tshinanni. Wla htshina yonatkaluru: “Hitayma nijittshi nikatshri pnut-hohne hkamnitanno.”

¹⁹ Hiyáhoni nunkakhapkathi rakanhinipa ntshinyawakhi pirana, halixyawakapno hita nixyawaka.

²⁰ Halikakni, halikakni ntshinhi, Katuktako yoptoxinri nyokanatanru hit-koxa hyoptotatka. Hiyrun-koxa nyoptojerupa nyokanatjeru koxa hyoptotanu.

Jesus Hinkaklexyawaklu Satu Rasrukleruko Kamnixyawakaplu Piranapni

²¹ Waneya Jesus hali wan-tshinretatka hkojwakahchinikanuxnawa waneya ruphujetpotutlu wla htshina: — Halikakni, halikakni wane ntshinhi, satu hixa nkamnitjene hekhitanno.

²² Waneya rasruklene yopukhakaka, hi rimatahchinikanutna katu pirana hkochtsheka.

²³ Wanekananru satu Jesus hasrukleru, ramotleru potuko, Jesus sta hinaple hikoluhatshri.

²⁴ Waneya Simão Pedro hitsejrihjeta Jesus-stsi hikoluhatshri repomhiywakaplu Jesus katu piranrahe hkochtsheka.

²⁵ Hiyáhoni Jesus sta rutspanopotutatka waneya repomhalu Jesus, wla htshina: — Tsru Hixikatshriwa, katu piranhe ptshina?

²⁶ Waneya Jesus wla tshinru: — Walepakni hijpa pão yotshmoluru psoji nenekanu. Waneya pão psoji hyotshmota. Waneya Simão whene, Judas Iscariotes tshinkaluru reneklu.

²⁷ Pão yotshmoluru hnika waneya chinpotukawa Satanás kamtshi jihloklu. Waneya Jesus wla tshinru: — Wuya pkamhalerupa pkamhahapkatanu.

²⁸ Hetanu, hi satukna yineru nikawakakwa hwakanatatshine himatlu klu pirana hkochtsheka Jesus wane htshininri Judas.

²⁹ Klu tshinanu satkaka wanna kahwaklu Jesus hanjikjixlu pa hixanu hmahaxinrina tsru niklu tshinanupa ho tiyiro renekakjixlu hike mwikane, klu tshinanu Judas tshinkaluru honukla hinotjekanatlo tiyiro mapa yehi.

³⁰ Hiyáhoni rali yoptolexinixkalu pão psoji, hyatka. Hoyetshnotkani.

Herotu Towrexikolu Piranapni

³¹ Waneya rali yalexinixka Judas, Jesus wla tshina: — Xawaknitka Jeji Whene tshinkaluru hoyaknu hiphujetka. Hiyrun-koxa Hoyakalu hoyaknu hiphujetka wale tshinanu.

³² Hiyáhoni Hoyakalu hoyaknu hiphujexika wale tshinanu. Xawakni Hoyakalu tshinan-koxa ruphujexika wale hoyaknu. Chinpotukawa ruphujexikolupa royaknu.

³³ Nowhenene mtserunhi pchini tsonu nimwanhi. Xekoyaka hijhanumkano seyni judeu-ne ntshinakanaxyawaka pixka koxa ntshinanhi hixa, nyiywakapa nwaka hi himukata yaleta.

³⁴ Nowhenene mtserunhi herotu towrexikolu nunkakanhi. Waleni hamotkajyawaka. Namotjekanaxyawakatkahi pixka, waneko pixka hix-koxa hamotkajyawaka.

³⁵ Xye tshinanu ptowru yineru himathetanhi nomkahitjene hixyawaka, hamotkajini.

Jesus Hinkaklu Pedro Wkatakluyakawa Piranapni

³⁶ Waneya Simão Pedro hepomhalu, wla htshinru: — Tsru Hixikatshriwa hanhe pyanu? Waneya Jesus wla tshinru: — Nyiywakapa nwaka hi pumukata himotsletanno xawakni. Seyni xye pnutpatka pomkahitanno.

³⁷ Waneya Pedro wla tshinru: — Seyni Tsru Hixikatshriwa, klu tshinanhe hi numukata homkahretanyi xawakni? Klu tshinanu haté niwejinri nuknokanu pixa tshinanupa.

³⁸ Waneya Jesus wla tshinru: — Halikaklahe, haté piwejinri puknokanu hita tshinanupa? Klu tshinanu halikakni, halikakni ntshinyi, hma yanumatkanuklunuwa patlapa, pixa map-kata pweyawatanu. Pma mimatletanutu ptshinanno.