João 12 - Bíblia

Maria Tshinkaluro Phamluhalo Tuyokjixixyawaklu Jesus Piranapni

¹ Waneya seis hohne tsonu mahaxinixkalu Páscoa hohne, hipnakanatatshri Lázaro tshinkaluru, Jesus hipuktshi hiwekkajinri, hwajexyawaka poktshi, Betânia tshinikowaka poktshi, rapokatka Jesus.

² Waneya wane natshnewlupa hkamhinrina. Marta tshinkaluro nijittshi hitajyana nikatshine. Lázaro satu wanna Jesus-yma tuplatatshine mesa yehi.

³ Waneya Maria haniklo hanikaji litro phamluhalo kwenuro potu, nardo tskihi kamhikolni. Wala-ha tuyokjixitlu Jesus. Waneya tcheyijixitlu Jesus tojiwuchehiyma. Waneya phamluhalopha pantshi psoluka tupalata.

⁴ Waneya satu Jesus hasrukleru, Jesus hekhitapatshri, Judas Iscariotes tshinkaluru, Simão tshinkaluru whene, wla tshina:

⁵ — Haklu tshinanhe hi tuchankaka twu phamluhalo trezentos proji tshinanumkapa waneya hike mwikanemka tenekko?

⁶ Seyni wane htshina hi hike mwikane ruchinijyawaka tshinanni seyni katshowhuru rixyawaka tshinanu wane htshina. Klu tshinanu k-saco-ne maplu, tiyiro mapa ranikjeta hiyrunu rawjetlo tiyiro wane hitakjetkaluro. Wale tshinanu, wane htshinatka.

⁷ Waneya Jesus wla tshina: — Hetachatanro. Klu tshinanu timretlo twu phamluhalo nkapnaxikol-hohne tshinanupa.

⁸ Klu tshinanu hike mwikane himwahohnekanatanu seyni hita hi himwahohnekanatanu.

Lázaro Ruylapiraxyawakna Tsru Sacerdote -ne Piranapni

⁹ Judeu-ne hixolune himatlu Jesus wane rawyawaka. Hiyáhoni wane hyatkana seyni hi Jesus rexyawakapna tsonu tshinanu wane hyana seyni Lázaro, Jesus hipuktshi hiwekkajinri rexyawakapna tshinan-koxa wane hyana.

¹⁰ Seyni rujhahchinikanutna tsru hixikatshinwa sacerdote-ne hanu rixa himukata hiylaletluna Lázaro tshinkaluru koxa.

¹¹ Klu tshinanu Lázaro pirana tshinanu hixolune judeu-ne hichotatkana wanna tsru hixikatshinwa sacerdote-ne. Jesus ralixna.

Jerusalém Hajene Yoptoxyawaklu Jesus Tsru Poyikowluyma Piranapni

¹² Waneya wale prika hixolune yine, Jerusalém poktshi hapokatshine tsru niklu hohne tshinanu, Jesus Jerusalém poktshi rapojyawakapa pirana hjemna.

¹³ Kyawe sure ranikamtna waneya hyatkana Jesus hyoptoxyawakapna. Hsaplew-himalwuretluna, wla htshin-sapletna: — Hamotkaluru Hoyakalu! Himalwutkalurni israel-neru Pohire, Tsru Hixikatshriwa Hoyakalu hiwaka hinikatshri!

¹⁴ Waneya Jesus, jumento whene rukchijinixka ratskotjihohotlu, Hoyakalu tokanu yonatkaluru tshinyawaka pixka rixa.

¹⁵ Wla htshina yonatkaluru mitshikawluru: — Hike hpikanu Sião poktshi hajenhi! Klu tshinanu hixa pohire hinanwakathi jumento whene-tji hoho hyapamta.

¹⁶ Mitshikananu Jesus hasruklene hi himatjematkalu xyekaka pirana. Seyni Jesus hipuktshi riwejinixka waneya ruchinikapluna wane potuko hixkaluru Jesus yineya, yonatkaluru mitshikawluru tshinyawaka pixka, Jesus pirana, hinatshripa pirana.

¹⁷ Hixolune yine, Jesus-stsi hwakanatatshine mitshi, Lázaro-ni yomletshi htomhiylu mitshi, hipuktshi riwekkajyalu mitshi, ruphujtatluna Lázaro pirana.

¹⁸ Hiyáhoni xye pirana tshinan-koxa hyoptotapluna hixolune yine, klu tshinanu hjemluna xye hiyákolu hkamha Jesus.

¹⁹ Waneya fariseu-ne wla htshinkakna: — Haha hetanu, hike wkochpaka! Hetpotutanu, ptowrunek-yine homkahitlu.

Satkaka Grego-neru Haluk-hetlexyawaklu Jesus Piranapni

²⁰ Wanekananna wannayma satkaka grego-neru Jerusalém poktshi hapokatshine Hoyakalu rimalwuxyawakapna tsru niklu hohne tshinanuya.

²¹ Hiyáhoni nyi yine Filipe tshinkaluru, Betsaida poktshi, Galileia tshijne hajeru nwaka rapokna. Waneya ranjitluna, wla htshinna: — Wutsrukate, hixamka haluk-hetletlu Jesus.

²² Filipe yanwakatlu André tshinkaluru, waneya runkaklu. Waneya wanna hepi, André hiyrunu Filipe hinkakletlu Jesus.

²³ Waneya Jesus wla tshinna: — Rapokpapkolutatka Jeji Whene tshinkaluru royaknu ruphujexikolupa.

²⁴ Halikakni, halikakni wane ntshinhi, Chijiji tshiji hmapokkanuklunu, hmupnaknuklunupa, wane rawachatanu. Seyni rupninipa, hixo jiplu.

²⁵ Yineru hamota hiwekletatshri, riwejinri ramtakanu. Seyni hiweklu xye tshijne hajeru mamotkatu, riwejinri rihnanutanu hike rixiniko mnikawnakatupa.

²⁶ Satu yineru kamrurewyehixinno, romkahitanno. Waneya hanukta nwanu hita wane koxa rawanu nkamrurewyehitjeru. Ptowru yineru hit-yehi kamrurewaxikatshri pejnu Nuru Hoyakalu kihler-pirana htshinanwakatanru.

²⁷ Xawakni nkojwakahchinikanuta. Klu pirana numukata tshinreta? Numukata wla tshinrethe, Nuru Hoyakalu xye salewaktshi pkochpajinno? Hike, klu tshinanu xye papko potuko tshinanu nuna xye tshijneya.

²⁸ Nuru Hoyakalu, Pixa phiwaka puphujexini. Waneya waneylu tokantshi tenhohneyalutu wan-tshinatshri: — Nuphujetatkalu hiyrunu nuphujetanru hiyrunupakotnaka.

²⁹ Waneya yine wane hwakanatatshine, xye tokantshi jematshine wane htshinna: — Rutlohleni. Seyni pimrine wla tshina: — Satu hiwejikaluru Hoyakalu towreru tenhohne hajeru hiynumatlu.

³⁰ Seyni Jesus wla tshinna: — Xye tokantshi hi hina hita tshinanu seyni hix-yinhi tshinanupa runatka.

³¹ Xawakni rapokpapkolutatka xye tshijne rukolukanuwnayehixikolupa. Xawakni kamtshi xye tshijne towutatshri hallitkotka.

³² Hita teno nutajikolupa, xye tshijiya, ptowru yineru nkosekanu hita nwaka rapojyawakapna.

³³ Xye tokantshi htshina rimaxikowakapa hanu rixa hiylatkotanu.

³⁴ Waneya yine wla tshinru: — Hixa jemlu Hoyakalu tokanu yonatkaluru, Cristo tshinkaluru hima hwahohnekanatanu. Hiyáhoni hanhe pukchijyalu wane ptshinyawaka, Jeji Whene tshinkaluru hijhalu teno rutajikowakapa? Hanurnihe Jeji Whene ptshinreru?

³⁵ Waneya Jesus wla tshinna: — Pchinhohnejiji rawanu katalu hix-yehi hwatshri. Hiyáhoni katawaka hwaka pchinika hyananu, hma kayixyawakanupa. Klu tshinanu mapchahawaka yanikatshri hi himatlu hanu sreta hyamta.

³⁶ Katalu hwaka pchinhi halixanru. Katalu hajene hixyawakapa. Jesus xyekaka pirana runkakleta waneya hyatka. Wanna yehi ramhiyatka.

Judeu-ne Malixlenu Piranapni

³⁷ Hixo himyekaklewatatshri hkamha wanna hetanu seyni wanepnawaka hi ralixluna.

³⁸ Wan-rixna hpoyahokajyawakapa Isaías tshinkalurni, hinatshripa pirana hinkakletatshri tokanu, wla tshinatshri: “Tsru Hixikatshriwa Hoyakalu katnihe satu wunkakle halixatshripa? Katu nwakhe ruphujexiko Hoyakalu himukatle?”

³⁹ Wale tshinanu hi rumukata halixletna, klu tshinanu satu yonhatnaka, wla htshinya Isaías-ni:

⁴⁰ “Hiyhalna ruchyatatka hiyrun-koxa hihchinikanna rimaletatka. Hma mexyawakanupna hiyhaleyna hiyrun-koxa mimatjemkanepni hihchinikanuyna, hma mehchinikanuxyawakanupna wan-hixatshine nutskalajyawakamkapa.”

⁴¹ Isaías-ni xyekaka tokantshi htshina mitshi Jesus hoyaknu rexini mitshi waneya wale pirana runkakletatka.

⁴² Wanepnawaka hixolune wanna judeu kosekatshine halixlu. Seyni fariseu-ne hpijyawaka tshinanna hi rumukata hiphujetletluna Jesus, hanjihohnewakapji hma kochpajikowakanupna tshinanu.

⁴³ Klu tshinanu yine hikchikhihlenreru potu rujhatkana, Hoyakalu hikchikhihlenreru pnute.

Jesus Tokanu Hikolujyawakna Yine Piranapni

⁴⁴ Waneya Jesus tsru tokantshiyma wla htshina: — Hita nalixjeru, hi hita tsonu ralixa seyni wale nyokanatjeru koxa ralixa.

⁴⁵ Netjeru retkoxlu nyokanatjeru.

⁴⁶ Nuna katalu nixyawaka xye tshijne tshinanupa, mapchahawaka hma wyawakanupa nalixjeru.

⁴⁷ Satu yineru ntokanu jematshri hmalixkanuklunupno hi nukolukanuwnakakanru. Klu tshinanu hi nuna xye tshijne nukolukanuwnakajyawaklu seyni nuna xye tshijne niwekkajyawakaplu.

⁴⁸ Hita malukkatu hiyrunu ntokanu malukkatu rawya rukolukanuwnayehitjerupa. Ntokanu nunkakletleru walekni hikolukanhi ralipre hohnepa.

⁴⁹ Klu tshinanu hi hitako ntokanu nunkakatkahi seyni Nuru Hoyakalu yokanatno wane ntshinyawakapa, nunkakletanrupa.

⁵⁰ Hiyrun-koxa nimatlu tokantshi htowuxyano waleni hiweklu hike rixiniko mnikawnakatupa. Hiyáhoni ptowru potuko nunkakletleru pirana wale Nuru Hoyakalu hinkakletjixyano tokanni.