João 11 - Bíblia

Lázaro Tshinkaluru Hiwekkajikolu Piranapni

¹ Lázaro hiyrun-koxa himolerone Maria, Marta, Betânia poktshi hajenni. Seyni Lázaro yeyixakanata.

² (Twu Maria, yeyixatshri Lázaro mole, honra suxo phamluhalo tuyokjixitlu Jesus Tsru Hixikatshriwa jixi hiyrunu Jesus tojiwu chehi tcheyijixixya.)

³ Waneya Lázaro molerone hinkakjixlu Jesus: — Tsru Hixikatshriwa, pimatletleru pamotleru yeyixa!

⁴ Seyni Jesus xye pirana hjemini wane htshina: — Xye yeyixlu hakanhatka hi rupniywakapni Lázaro tshinanni seyni hyeyixle hakanhamta Tsru Hixikatshriwa Hoyakalu pohixikowakapa hiyrunu hpoyahnutko koxa Tsru Hixikatshriwa Hoyakalu whene.

⁵ Hetanu, Jesus hamotatkana Marta, Maria, Lázaro koxa.

⁶ Waneya Jesus jemnixkalu Lázaro yeyixle pirana waneya hi hchireta seyni waneko rutukawa hepi hohne.

⁷ Waneya Jesus wan-tshinna rasruklene: — Hayewa Judeia tshijne wsatkapanu.

⁸ Seyni wanna wan-tshina: — Kasruklewakleru, xawakni potuko judeu-ne wane hajene haluka sotlujrekanatyi seyni wanepnawaka paluka satkapleta wanna nwaka?

⁹ Waneya Jesus hihita: — Hi he satu hohne tshinanu waneru doze horas katawaka? Hiyáhoni hohohne hyanini yineru hi rutspetanu klu tshinanu katyéhiru.

¹⁰ Seyni hoyetshno hyanini yineru rutspetanu klu tshinanu hi katyéhiru.

¹¹ Hiyrun-koxa wane htshina Jesus: — Wimatletleru Lázaro himkatka seyni wane nyanu nkomyejyawakaplu.

¹² Waneya Jesus hasruklene wan-tshina: — Kasruklewakleru, rumjini Lázaro rutskalhahetkotanu.

¹³ Seyni Jesus haluka tshinreta rupnanatka Lázaro. Seyni Jesus hasruklene kahwakatkalu Jesus wan-tshina rumkachata Lázaro.

¹⁴ Waneya Jesus hinkakna phujewak-potuko: — Lázaro-ni hipnanatka.

¹⁵ Hiyrunu numuwata hi wane nwakanata waleyma hixa tshinanu, hixa halixyawakapa tshinanu. Hayewa wetapanru.

¹⁶ Waneya Tomé, hepirune tshinkaluru, wan-tshinna rimotsatanune: — Hayewa wane wyanu hix-koxa Kasruklewakleruyma wupniywakapa!

¹⁷ Waneya rapojinixka Jesus Lázaro yehi quatro hohnetkani hkapnatkanatka Lázaro-ni.

¹⁸ Hi howukatkalu Betânia poktshi Jerusalém poktshiya, três quilômetros hetkoni.

¹⁹ Hiyáhoni híxona judeu-ne hinanwakatlo Marta, Maria koxa hyokwihchinikanuxyawakapna himolni hipniywaka tshinanu.

²⁰ Waneya Marta himatyehixinixkalu Jesus runamxyawakatka, tyanwakatlu tyoptoxyawakaplu. Seyni Maria pantshiko tutukatka.

²¹ Waneya Marta wan-tshinru Jesus: — Tsru Hixikatshriwa, hewiko pwakmaka himka rupnanni nomolni.

²² Wanepnawaka nimatlu Tsru Hixikatshriwa Hoyakalu hikchijinyi klunerukta panjitanru.

²³ Waneya Jesus wan-tshinro: — Pimole hiwekanutnaka.

²⁴ Waneya Marta hihitlu: — Hehe, nimatlu riwekanutnaka hnikawnapiraxin-hohnestsi.

²⁵ Waneya Jesus wan-tshinro: — Hitni hiwekkakatshripno. Hitni hiwekluno. Ptowruka Hita halixatshripa yáholu rupnanu riwekanutnaka.

²⁶ Hiyrun-koxa ptowruneka hiwekatshine, hita halixatshinetka hikeklu rupnanna. Palixluhe xye?

²⁷ Waneya wane ttshina: — Hehe Tsru Hixikatshriwa, nalixyi Messias pixyawaka Hoyakalu whenyi xye tshiji hinatshriyi.

²⁸ Waneya tali tshinretatkalu xye, Marta yatka, ttomhanatkalo tomole Maria waneya wane ttshinro tumsalexyawaklo: — Rapokatka Kasruklewakleru hiyrunu repukyi.

²⁹ Waneya Maria jeminixkalu xye, tpalnahapkatatka, tyanwakatlu Jesus.

³⁰ (Jesus hi hapokawa pantshi seyni wanekowalu Marta yoptoxyawakawalu).

³¹ Pantshi rawakanatna satkaka judeu, Maria yokwihchinikanupiratatshine. Waneya rexinrona Maria palnahapkaxyawaka pantshi tuchpajyawaka, rimotsatatkalona klu tshinanu wanna kahwakatkalo Maria yomletshi nwaka tyamta waneko ttshiyahaxyawakapa.

³² Waneya tapojinixka Maria Jesus yehi, tuknojnawa Jesus jixistsi, wane ttshina: — Tsru Hixikatshriwa, hewiko pwakmaka himka rupnanni nomolni!

³³ Waneya Jesus hetlo Maria ttshiyahata, ret-koxna timotsatjene koxa htshiyahakanatna. Hiyáhoni hwamonuwatatka Jesus, htshiyahpiratatka Jesus.

³⁴ Waneya repomhatkana: — Hanhe hkapnatanatkalu? Ruhitna: — Hinanu hetapanu.

³⁵ Waneya Jesus tshiyahata.

³⁶ Waneya judeu-ne wan-tshina: — Haha hetanu hi pa hamotlekananukta rixanru Lázaro-ni.

³⁷ Seyni satkaka wanna judeu-ne wan-tshina: — Xye jeji hitskalaklu mayhaletu. Hi he xawaka rumukatatka kamhaletlu pa hixanu hma mupniywakanu Lázaro?

³⁸ Waneya Jesus tshiyahpiratatnaka. Hyanwakatlu yomletshi. Hipjita rawa yomletshi. Tsru sotlu hichyapnatlu yomletshi.

³⁹ Waneya Jesus towutna: — Herutanru sotlu! Waneya Marta Lázaro-ni mole wan-tshinru: — Tsru Hixikatshriwa, wale xawaka posunatka klu tshinanu quatro hohne kapnanatkalu!

⁴⁰ Ruhita Jesus: — Hi he wane ntshinyi palixinri petanru Tsru Hixikatshriwa Hoyakalu pixkonu?

⁴¹ Waneya rerutluna sotlu. Waneya Jesus teno yihatatka wane htshina: — Nuru, poyahnu klu tshinanu pyijnakotatkano.

⁴² Nimata pyijnakjetno seyni wane ntshina hixolune yine tshinanu hewi hwatshine, ralixyawakapna pixa yokanatno.

⁴³ Rali wan-tshinretatka waneya hsaplewatatka: — Lázaro, puchpakanu waneya!

⁴⁴ Waneya Lázaro hichpakatka. Lázaro jixi, himyo koxa ruwtoka mkatshri sama, hihoji koxa mkatshri sama sapowakatka. Waneya Jesus wan-tshina: — Hkochpirokanru, petachatanru hyanyawakpatka.

⁴⁵ Waneya híxona judeu-ne, Maria himotsatatshine, retluna Jesus kamhanru waneya ralixatkaluna Jesus.

⁴⁶ Seyni pimrine yanwakatna fariseu-ne. Waneya wanna hinkakletlu Jesus kamhaleru.

Raluk-hiylalexyawakluna Jesus Piranapni

⁴⁷ Waneya tsru hixikatshinwa sacerdote-ne hiyrun-koxa fariseu-ne hapatjeta judeu tsru hitakkaluneyma. Waneya wane htshinna: — Hanhe xawaka wixanu? Xye jeji híxolu hiyakolukaka hkamhajeta!

⁴⁸ Wetachaxinri wan-rixyawaka ptowru yine halixanru. Waneya romano chefe-tene hinanwakatanwu, Hoyakalupji hyotkakanna hiyrunu wtshijne hkonanwuna.

⁴⁹ Waneya satu wanna, tsru sacerdote hitakkaluru wale mhale potuko, Caifás tshinkaluru wla tshina: — Ha hixa hike himata.

⁵⁰ Hi hetko himat-hichinikanuwata, kihlewu satu yineru rupniywakapa hixolune yine tshinanu hma nikaxikowakanupa wtshijne.

⁵¹ Wale wan-tshina xye, hi waleko hihchinikanni wla htshinya, seyni tsru sacerdote rixyawaka wale mhale tshinanu runkakletlu hinamtatshri pirana. Jesus rupniywakapa htshijnena tshinanu pirana.

⁵² Hiyrunu hi wale tshijne tsonu tshinanu rupnapini seyni rapatjexyawakapna Hoyakalu whenene ptowru tshijne hipalaxikatshine pa nerunepka rixyawakapna.

⁵³ Waneya waneklukananuko rujhahchinikanutna hanu rixa himukata hiylaletluna Jesus.

⁵⁴ Hiyáhoni Jesus hi phujewaka judeu-ne yehi hyanya. Seyni hyatka pa tshijne nwaka, kahnete poktshiri yine mwiywakanustsi hajeru nwaka hya. Satu poktshi, wale tshijne hajeru Efraim tshinikowaka, rutukatka Jesus rasrukleneyma.

⁵⁵ Waneya hi hix-hohne mahatatka Páscoa hohne tshinkaluru rexyawakapna judeu-ne. Hiyáhoni hixolune yine wale tshijne ruchpajyatkana Jerusalém poktshi hkanjiywakapna, runkajikowakpatkana powralune rixyawakatkana Páscoa hohne wkatanu.

⁵⁶ Waneya rujhaluna Jesus. Hoyakalupji rawna yine waneya repomhakakna Jesus pirana, wla htshinna: — Ha hixa hanu hixahotlu Jesus, ho runewhe tsru niklu hohne tshinanu ho hike?

⁵⁷ Mitshikananu tsru hixikatshinwa sacerdote-ne hiyrun-koxa fariseu-ne towutna yine, katuktako Jesus yehi himatatshri runkaklewaxinripa, klu tshinanu raluka kachretluna.