Hebreus 9 - Bíblia

Hoyakalu Himalwuxikolu Potuko Piranapni

¹ Mitshikananu Hoyakalu tshinyawaka hanu rumukata hixletna yine Hoyakalu himalwuxikolu pirana hiyrun-koxa himalwuxikowakapji yineru kamhaleru hixikowakapa pirana.

² Pantshi kamhakaluru hwapa. Yoptowaka hruko rawa nikotapi hitakawaka, mesa hiyrun-koxa pão projkaka hwiywaka. Xye hruko Hoyakalu tshinanu kotspalatkaluru htshinka.

³ Hepi rixinri mkatshri sama hiwrolekatshri, himalexyawaka hruko, Hoyakalu hwiywak-potuko, tshinkaluru.

⁴ Wkatanu hruko rawa kapajiru phamluru yoxikawaka ouro-mta hwahohleru paji. Hiyrun-koxa pnute hruko rawa kapajiru Hoyakalu hwiywaka, ouro-mta hwahohleru paji. Xye paji hitokote rawa Arão kanojere surewatatshri hiyrunu kolpeto ouro kamhikolu, nikluru maná hitakluru hiyrunu Hoyakalu tokanu yine kojiretatshri pirana, sotlu tshrajkaka hwatshri yonawahlo kapajiru hwakanatatshri pejnu.

⁵ Xye kapajiru hoho rawna mayawletshine Hoyakalu towrene tenhohne hajene mayawle, hektuntshi hiknokawaka yehi katshpokatshine. Seyni xyekaka yapkaklu pirana hi wumukata kochtsheklepotuta xawakni.

⁶ Halikaka rali halpokletkoklunutka xyekaka ptowruka, waneya sacerdote-ne Hoyakalupji jihlokawakle putu hkamrurewjekanaxyatkana hkamrurna Hoyakalu towuxyana.

⁷ Seyni hepi rixinri hruko, tsru sacerdote tsonu jihlokjeta, pa katapka pa mhalkaka tshinanu tsonu. Nikalu hraha manikkatu tsru sacerdote hi jihloklu klu tshinanu rujhalu hrahtshi renekjexyawaka waleko hpupjere tshinanu hiyrun-koxa yine pupjere tshinanu.

⁸ Xye hasruklu hkochtsheka Hoyakalu Hiwejikaluru rekhipotuxyawakapwu Hoyakalupji hiputre hruko hwaka pchinika, hi kyapawaklewalu Hoyakalu hwiywak-potuko hjihlojyawakapna yine.

⁹ Xye pirana yapkaklu piranni xawakni papko tshinanu. Wimaxyawakaplu henekachlukaka hiyrunu henekachalu hiylatkalurkaka renekjekanaxyawakna yine mitshi hi rumukata powratletlu yine hchinikanu.

¹⁰ Xye nikkaluru pirana, hirkaluru pirana, ptowru hixatshri herojikolu pirana, waleni mantshi hijrexikolkaka piranni. Xyekaka mitshi hkamhajixkana yine haté rerotexikolu hohne hapojinpotpako.

Cristo-ni Herotu Jihlepokoyehlewakleru Piranapni

¹¹ Seyni Cristo hapokatka Tsru Sacerdote rixyawakapa kihler-kaka hinatshripa tshinanu. Cristo kamrurewaxikowaka kihler-potukni hiyrunu hi psojikna hmahaxyatka. Hiyrun-koxa hkamrure hi yinerumyo kamhalerni, hiyahokni hi xye tshijne hajeru hwatshrini.

¹² Hjihloklu Hoyakalu tsonu hwiywak-potuko yehi. Hi raniklu bode hraha, hi boi whenene hrahaymako hjihlokyehitlu seyni waleko hihrahayma hjihloklu. Rukchijyatkawu hixa yinwu hektunu wenuxikolu hike rixiniko mnikawnakatupni yáholu pa katapka hjihloklu Hoyakalu tsonu hwiywaka potuko yehi.

¹³ Klu tshinanu boi jeji hraha ho bode hraha ho vaca yoxikaluro pahi hpolhohoxikolna, poyaho powratletkamkana hektuntshi pitshotanune, hpowratkomkatkana yine.

¹⁴ Hiyáhoni wane pnut-potu himukatatshrini Cristo hraha. Cristo honukla Hoyakalu Hiwejikaluru hike rixiniko mnikawnakatupa himukatleyma, walenuko renejnawa Hoyakalu yehiya henekachlu hi psojikna mahaxikatshrini, hixa hchinikanu hpowraxyawakapa hike mkochpakkatu kamrurtshiya, Hoyakalu hiwekatshri wkamrurewyehixyawakapa.

¹⁵ Hiyáhoni wale tshinanu Cristo-ni herotu jihlepokoyehlewakleru. Hiyáhoni Hoyakalu tshanixlene pejnu rumukata yoptoletluna hyoptotanrupna hike rixiniko mnikawnakatupa pirana Hoyakalu hinkaklexyana pirana. Rumukata wan-hixletna klu tshinanu Jesus hipnale hichokakatkana yine pupjetatshine mitshikananu kojiretlu hwatshri hjihyehikanatjerna yehi.

¹⁶ Klu tshinanu hanuktako rawa hipnatshri hiknokamtanru hejnu pirana, ralukhimatkopotuta ho halikaklahe rupnatka hejnu hiknokamtatshri ho hike.

¹⁷ Klu tshinanu riwekka pchinika ruknokamtanrupa hejnu pirana hike yineru rumukata hepixleta hejnu pirana. Seyni hejnu hiknokamtatshripa hipnini tson-patka waneya halikaka repixlewatanutka hejnu hiknokamtkalurupa pirana.

¹⁸ Hiyáhoni wale tshinanu mitshikananu Hoyakalu yine runkaklexya pirana koxa, hrahtshi hiyokleyma tsonu hkochpaka.

¹⁹ Klu tshinanu mitshi Moisés hijrexinixkana yine ptowruneka hiykolu pirana yonatkaluru ptowru piranako rali hinkaklexinixkana waneya boi whenene hraha hiyrunu bode-ne hraha hkochtshekamta. Waneya honha hyapjehatlu hrahtshi. Waleha carneiro pixi seroluyma hiyrunu hitaklu hissopo chehiyma rutslaptahjexyalu papel-mta Hoyakalu tokanu yonatkaluru hiyrun-koxa ptowrunek-yine rutslaptahjeta.

²⁰ Wla htshinreymana yine: “Xyekni hrahtshi ntshinyahi pirana hihlepokotatshri Hoyakalu hijrexyahi pirana romkahjixyahi piranhi.”

²¹ Hiyrun-koxa Hoyakalupji nikalumta kamhikolu, hrahtshi rutslaptahjetlu hiyrunu ptowru hixatshri kapajiru Hoyakalupji hwatshri kamrurewapi stono rutslaptahjetkatka hrahtshi.

²² Psokaklu ptowruko Moisés yonre kochtshekleru pirana hijhatkalu hrahtshi hpowraxikowakapa. Hiyrun-koxa hrahtshi hma kochpakkonuklunu, hi rawa ramtakahchinikanyehixikolu hektuntshi.

Cristo Hraha Hiknojyawaklu Hektuntshi Piranapni

²³ Xyekaka yihapkakletlu tenhohne hwatshrikaka halikakalutu, hiyáhoni rujhatkalu wan-rixikowaka hpowraxikowakatka. Seyni tenhohne Hoyakalu yehi hwatshrikaka potu haluklu hiylatkaluru wale yohnik-himukatatshrini.

²⁴ Klu tshinanu Hoyakalu hwiywaka tshinanu tsonni, pantshi yineru kamhaler-yehi, tenhohne hwatshri yahlucha, hi hjihloka Cristo. Seyni tenhohne potuko hjihlokatka. Hiyrun-koxa Hoyakalu hetanu potukawaka yehi rawa haté xawakni, hixa repixyawakapa.

²⁵ Judeu-ne tsru sacerdote-te, ptowru mhaleko hjihloka Hoyakalu tsonu hwiywak-yehi nikalu hrahayma. Seyni Cristo hi hijhalu wane jihlojemnukanaxyawaka henekachalu hiylatkaluru rixnawakapwa.

²⁶ Klu tshinanu wane pixka rixkamkatka waneyamka xye tshijne yinuwajinikananuko haté xawaknimkatshi wan-rixa salewakatanutshi hixo kata. Seyni xawakni Cristo hiphujewnatka xye rapkatle hohne sreta, hektuntshi ruknojyawakapa waleko rupnale himukatle tshinanu, henekachalu hiylatkaluru rixnawakwa.

²⁷ Satkaka yineru hipnatshripni. Waneya wane wkatanupa rawanu hikolukanuwnalkaka.

²⁸ Hiyáhoni wan-rixa Cristo. Pa katapka renejnawa hixolune yine hektunu hkonyawakapa. Hiyrun-koxa hepi kata rixinri runanu ruphujewnayehixyawakapna yine ptowruneka, hkahwakpotutjene hetanuya. Waneklupa hi hektuntshi hkonyawakapa tshinanu runanu seyni riwekkajyawakapna yine tshinanni.