Hebreus 7 - Bíblia

Melquisedeque Tshinkaluru Phurukananu Hiyrunu Sacerdote -kananutkani

¹ Melquisedeque tshinkaluru Salém tshinikowaka poktshi pohire hiyrun-koxa Hoyakalu ten-potu hajeru Sacerdote-tetkani. Abraão-ni mitshi hiylakaklu nwaka ruchpajinnixka pohiruneyma xye Melquisedeque yoptotapniru mitshi. Kihlewaka htshinanwakatniri Abraão-ni.

² Waneklu papko Abraão-ni ptowruka hkonreru hkamnitjene hejnunkate psojkaka reneklu hiylakaklu yehi hkoninri. Melquisedeque wla raluka tshinreta ‘Pohirtshi Kihle Kamrureru’. Hiyrun-koxa Salém poktshi pohire rixyawaka tshinanu wale hiwaka wla htshin-koxa, ‘Pohirtshi Kihle Hwachaleru’.

³ Hike ruruta. Hike runrota. Rutsrukatene hi kapiranyehna. Hi kyinuwakle piranru. Hiyrun-koxa hi kapiranyehru hnikawninri. Hoyakalu whene pixka rixatka. Sacerdote rixhohnekanaxinripni.

Levi Sacerdote Hitajikolu Koxa Yohnik-himukatatshri Cristo Hitajikolu

⁴ Haha hetanu hi pa himukatlekananru Melquisedeque tshinkaluru klu tshinanu haté Abraão-ni, judeu-nerune hitsrukate potuko, rejnunkate hkonreru hiylakaklu tshinanu, wale hejnu psoji reneklu Melquisedeque.

⁵ Halikaka Moisés yonreru towutlu Sacerdote Levi tshinkaluru klopicha Sacerdote-ne hijhawenruyehixyawakapna yine ptowruka rimwalerna psoji renejyawakapna. Waleko hinerune tsonu rujhawenruyehita, yahmaklu Abraão-ni rurutna wanna.

⁶ Melquisedeque hi Sacerdote Levi tshinkaluru klopichni wale, wanepnawaka rujhalu Abraão-ni wenuxyawaklu, psoji hejnu hkonreru hiylakaklu tshinanuya. Waneya Melquisedeque hihlewahchinikanutlu Abraão-ni. Kihlewaka htshinanwakatniri Abraão-ni Hoyakalu hinkaklexinri potnikni.

⁷ Halikakpotni, kihle hwachalepyi tshinrewatatshri potu, yohnik-himukatatshriwani wale.

⁸ Sacerdote-ne, tiyiro psoji yoptotatshinekananu, yinechakananni hiyáhoni hipnatshinepni. Seyni Melquisedeque mitshi hejnu psoji yoptotatshritka, Hoyakalu tokanu hiphujetlu, xye hpaklu hiwekletawa.

⁹ Hiyáhoni wane ntshina, sacerdote Levi tshinkaluru, yine himwaleru psoji yoptojekanatatshri, hatatjewa hwenut-koxlu Melquisedeque mitshi, Abraão-niyma.

¹⁰ Klu tshinanu yáholu hi hmatutawa Levi tshinkaluru, seyni hatatjewa Abraão-ni mane rawakanatatka Levi, Melquisedeque yoptotapinri Abraão-ni mitshi klu tshinanu Abraão-ni hichpakatshripni wale, Levi.

Sacerdote -ne Levi Tshinkalune Rawa Hnikawniywakna Seyni Cristo Rixhohnekanaxyawakni Piranapni

¹¹ Tokantshi yonatkaluru israel-nerune towutatshri, sacerdote-ne Levi tshinkalune towre rutakanna. Hiyrun-koxa Levi tshinkalune Arão klopichanekananni. Seyni sacerdote-ne Levi tshinkalune kamrure hike hma mahaxiknumka waneya himka rujhakotka satu hixatshri sacerdote kamrurepa. Hi Arão hichpajikatshri towuwlu pixka rixa seyni Melquisedeque towuwle pixka rixa.

¹² Klu tshinanu satuko sacerdote hitakkoklunupa, waneya htowuwle piran-koxa satpako.

¹³ Klu tshinanu xyekaka pirana tshinanwakatkaluru, pa nerukni. Hiyrun-koxa satu neruko yineru hi himukata xye altar yehi kamrurewlexikatshri hixleta.

¹⁴ Klu tshinanu himatpotutkalurni Judá klopichni Wutsrukate Jesus. Hiyrunu Moisés sacerdote pirana htshinini mitshi hi xye Judá-nerune tshinanni.

Satu Sacerdote Melquisedeque Pixkalutu Piranapni

¹⁵ Hiyáhoni phujetanur-potni satu hixatshri sacerdote hiphujewnatshritka Melquisedeque tshinkaluru pixkalutu.

¹⁶ Hi Moisés yonreru tshinanu, hi yineru halujyawaka tshinanu sacerdote rutakka seyni sacerdote rixinwa hiweklu mnikawnakatu himukatle tshinanu wan-rixa.

¹⁷ Klu tshinanu Hoyakalu tokanu yonatkaluru wan-tshina: “Pixni Sacerdote hohnekananyi, Melquisedeque hitajikolu pixka.”

¹⁸ Hiyáhoni Moisés yonreru mitshikawluru hi towuwatatka, klu tshinanu hi kpixkonru wale.

¹⁹ Klu tshinanu Moisés yonreru towre hike hpotukata. Seyni kahwakkaluru wane pnute himukatatshri hakanhatka. Hiyáhoni xye kahwaklu tshinanu Hoyakalustsi wapokanu.

Jesus-yma Rawa Hoyakalu Hinkajya Piranwu Piranapni

²⁰ Hiyrun-koxa rawa Hoyakalu tokanu runkaklexyalu pirana. Pimrine sacerdote-nekananu sacerdote-ne rixapna seyni Hoyakalu hike pirana runkakletahnapuxyana.

²¹ Seyni Jesus sacerdote rixyawakapa mitshi Hoyakalu hinkaklexyalu, wla tshinatshri mitshi: “Hitni Hoyakalno Tsru Hixikatshriwano hinkakletlu, hiyrunu hi nyokmakahchinikanuta. Pixni Sacerdote hike rixiniko mnikawnakatupyi”, htshina.

²² Hiyáhoni Hoyakalu hinkaklexyalu tshinan-koxa, rimaxikowak-potupa Jesus-yma rawa Hoyakalu hinkajya piranwu himukatatshri potuko.

²³ Klu tshinan-koxa sacerdote-ne hixo rixapna klu tshinanu rupnajekanatna hiyáhoni hi rumukata paklu kamruretna hipuktshi rimaletjerna tshinanu.

²⁴ Seyni Jesus hiweka hike rixiniko mnikawnakatupa. Hiyáhoni sacerdote rixyawaka hi himat-nikawna satuko kachrihyawakaplu hkamrure.

²⁵ Hiyáhoni rumukata hiwekkaklepotutna yine, wale yapatshine pejnu Hoyakalu nwaka yatshinepa. Klu tshinanu riwekhohnekanata ranjijexyawakaplu Hoyakalu wanna tshinanupa.

²⁶ Wale tshinanu Jesus-kni W-sacerdote-te Tsru Potuko, wujhaleru potuko! Potukal-potukni wale hike mmahaxikatni, powralu. Hiyrun-koxa hektune yehi kotspalaxikalurni wale, tenhohne ten-potu hajerni wale.

²⁷ Pimrinni tsru sacerdote-nni pixka hi rixa. Hi ptowru hohneruka henekachalu hiylatkaluru rujha kamhaleta, mitshikananhapka waleko hektunu tshinanu wane pnute yine hektunu tshinanu rujhatnaka, hi rixa wale. Klu tshinanu Jesus pa katapka wale nanuko henekachaxnawa henekachlu hiylatkaluru rixnatkawa.

²⁸ Tsru sacerdote-ne Moisés yonreru pirana hitakanune yine mpotukane rixapna. Seyni Hoyakalu hinkajya piranru, Moisés yonreru wkatanu, hnuretlu Whentshi tshinkaluru hike mmahaxikatu rixyawaka hike rixiniko mnikawnakatupni.