Hebreus 5 - Bíblia

Tsru Sacerdote Hitajikolu Piranapni

¹ Ptowru tsru sacerdote nuretkatka yineya hiyrunu rutakka Hoyakalu kamrure hkamhiywakapa yine tshinanupa. Henekachlukaka hiyrunu henekachalu yoxikalurkaka renekjetka hektuntshi tshinanu.

² Xye pixkalutu sacerdote hihrokatshri koxni wale, hiyáhoni rumukata hetwamonretna mimatkane, hiyrunu pupjetatshine koxa.

³ Hiyrun-koxa hike mumukatkatu rixyawaka tshinanu, rujhalu henekachlukaka renejyawaka hi yine hektunu tsonu tshinanu seyni waleko hektunu tshinan-koxni.

⁴ Hi satukna yineru himukata nurrexinwa Tsru Sacerdote rixinripa. Hoyakalu tsonu hitaklu satu yineru Tsru Sacerdote rixyawakapa, Arão-ni tshinkaluru nurexikolu pixka.

⁵ Waneko pixka rix-koxa Cristo. Hi rutajnawa tserutahchinikanru Tsru Sacerdote rixyawakapa seyni halikaka Hoyakalu wla tshinru mitshi: “Nowhenyi pixa. Xawakni purutkano.”

⁶ Hiyrun-koxa Hoyakalu tokanu yonatkaluru, wla htshina: “Pixni Sacerdote potu hwahohnekanatatshriyi, Melquisedeque tshinkaluru hitajikolu pixka.”

⁷ Jesus xye tshijne rawakanaxini, tsru saplewlu hiyrunu tshiyahluyma ranjihohneta hiyrunu ranjitlu Hoyakalu hipuktshi hma kayaxyawakanumkapa. Hoyakalumka yijnakotlu klu tshinanu Jesus kahwakpirurumkani, ptowutkolmakni.

⁸ Yáholu Hoyakalu whenni Jesus seyni hsalewnale tshinanu rasrukatka kajnakolu rixyawakapa.

⁹ Hike mahaxikatshrini Jesus, hiyáhoni ptowru yineru hyijnakotjene riwekkakjerna hike rixiniko mnikawnakanepa hpoyaho hixletatkana.

¹⁰ Hoyakalu nuretatkalu Jesus, Tsru Sacerdote rixyawakapa Melquisedeque tshinkaluru sacerdote-xiklu pixka.

Cristo Halixatshine Mtserunewa Pixka Hixatshine Piranapni

¹¹ Hixo piranamka waluk-hinkakletleta xye pixkalutu pirana tshinanu, seyni hi hetko wimat-hinkakanhi klu tshinanu hi hetko himatjemanru.

¹² Klu tshinanu hix-hohnemka wimwatkahi, hiyáhoni hpoyaho hasruklewatatshine hixletamkatka. Wanepnawaka hijhalu pimrine hasrujyawakaphi Hoyakalu tokanu reyinuwakle pirana hiyrunukotnaka. Hix-yinhi hatatjewa mturunhi hi nikalhitu hakot-nikletatshine pixkalunhi seyni tnutsh-ha hijhatshine pixkalunhi.

¹³ Tnutsh-ha hijhatshine mtserunewa. Wane pixkalune hi himat-nuretlu kihleru potukawaka Hoyakalu pirana hwatshri.

¹⁴ Seyni tsrune pixkalune nijitu nikkaluru potni, wane pixkalune hasruha kamrurewlehchinikanutatshine tshinanu rimathetluna hektuntshi hiyrunu rimat-nuretluna kihle kamrure rixyawakna.