Hebreus 4 - Bíblia

Hapnanuxikowaka Hoyakalu Hayinetene Tshinanupa Piranapni

¹ Hoyakalu hinkajya piranwu, hapnanuxikowaka wale nwaka hjihlokajyawakapwu pirana tshinanu, xako hi hpika hwaletanru ptowru potuko Hoyakalu hinkajya piranwu.

² Klu tshinanu israel-neruni mitshi tokantshi hjemlerna pixkalutu, hix-koxa jemlu kihle piranalu potuko hiwekkaklewatatshri pirana. Seyni tokantshi wanna jemanru hi repixatkana klu tshinanu hi ralixluna tokantshi hjemlerna.

³ Seyni hixa Cristo halixatshinwu, Hoyakalu nwaka hwatshri hapnanuxikaluru jihlokatshinwu, Hoyakalu tshinyawakatka pixka: “Njihekanuwle tshinanu wla ntshintokanuta: — Hikeklu hohne njihlokkakanna hit-yehi hapnanuxikowaka yehi.” Hoyakalu wan-tshinatka yáholu hkamrure rali kamhaletatka xye tshijne hiyakoxikolu klu papko.

⁴ Klu tshinanu sete hohne rixinri xye tshijne hiyakoxikolu pirana, rawa Hoyakalu tokanu yonatkaluru wla tshinatshri: “Sete hohne rixinri Hoyakalu hapnanutatka hkamrureya ptowruka hkamhakanatanru tshinanu.”

⁵ Hiyrun-koxa rawa wla tshinatshri: “Hikeklu hjihlokanruna hit-yehi rapnanuxyawakapna.”

⁶ Hiyáhoni kihle piranal-potuko hejemkane hi hjihlokanruna Hoyakalu yehi rapnanuxyawakapna hmalixlenu tshinanna. Seyni pimrine halikaka jihlokanu Hoyakalu yehi rapnanuxyawakapna.

⁷ Wale tshinanu Hoyakalu pa hohneko rutakatnaka. “Xawakni” rutakhiwakatlu. Hix-hohne wkatanu Hoyakalu kochtshekatkalu “xawakni” tshinkaluru, Davi tshinkaluru yonawahleya, wla htshinapiranaxya: “Xawakni hyijnaktokanuxinri Hoyakalu, hi hchikohajiwatanu.”

⁸ Josué tshinkaluru hapnanuxikaluru yehi hjihlokkakkamkatkana yine waneyamka Hoyakalu hi yanumaxinixkalu “xawakni” rutakhiwakleru.

⁹ Hiyáhoni rawawa hapnanru Hoyakalunerune tshinanupa.

¹⁰ Klu tshinanu katuktako hapnanuxikowaka yehi jihlokatshripa, rutuk-kamhaletanutkalu waleko hkamrure, Hoyakalu hkamrure rimapnanuxinixka pixka.

¹¹ Hiyáhoni wmixkowatanu xako wjihlojyawakaplu xye hapnanuxikowaka. Xako hi wmalixanutupni Hoyakalu, israel-nerune mitshi malixyawakanru pixka, hiyáhoni rimaletkatkana hma jihlojyawakanupluna hapnanuxikowaka.

¹² Klu tshinanu Hoyakalu tokanu hiwekkaklewatatshrini, tsru himukatatshri potukni, hiyrunu hepnokaka hwasputatshri yohlolewapi pnute hakotatshripotni. Hyohlolewpotuta rutspathalewpotuta. Chinikantshi, hiweklu hiskiwahapu yokle hiyrunu rajitsh-hapu koxa wan-rixa. Yonatkaluru himathetlu hajtshi hchinikanu klu ruchinikanretjeta hiyrunu klu raluka kamhaleta.

¹³ Hiketkani pa hixanu yohimatkaluru Hoyakalu hetanu. Ptowru potuko hiyakotkaluru hiphujetkaluru, muchyatkotni Hoyakalu yhaleya. Hoyakalu yehi wuphujexinwa hix-yinwu ptowruneka.

Jesus Tsru Sacerdote Potuko Rixinri Piranapni

¹⁴ Hiyáhoni wchikota halixletanu walixle wuphujetlerutka tshinanu. Klu tshinanu W-sacerdote-te, Tsru Sacerdote potukni, tenhohne yatshritka Hoyakalu yehi potuko hapokatshri, waleni Jesus, Hoyakalu whene.

¹⁵ W-sacerdote-te, Tsru Sacerdote potuko himata hetwamonutwu wuhroklekaka tshinanu, klu tshinanu wale koxa yohnitkatka hixa yohnijexikolu pixka, seyni wale hikeklu hektuwatatka.

¹⁶ Hiyáhoni Hoyakalu tuplawakle tskihistsi wyanu hike wpikanu klu tshinanu wanetkalu hetwamonru hikchijikolu. Wane wukchijinri Hoyakalu hetwamonuxyawakwu hiyrunu repixle tshinanwu ptowru katako wujhiniplu.