Hebreus 3 - Bíblia

Jesus Hiyrunu Moisés-ni Piranapni

¹ Hiyáhoni Cristo tshinanu nmoletanune, hix-koxa Hoyakalu nurrenhi, homkahpotutanru Jesus, Nuretkalurni wale hiyrunu Tsru Sacerdote potni wale halixlu pirana wuphujetjereru.

² Klu tshinanu Jesus kihle kamrureru Hoyakalu hnuretjeru tshinanu Moisés-ni pixka. Klu tshinanu Moisés kihle kamrureru Hoyakalupji kamrure psoluyaka.

³ Pantshi kkamhakleru, pantshi hkamhaleru yohnik-kahwakpiratkalurni wale. Hiyáhoni Jesus, Moisés-ni yohnik-himalwutkalurni.

⁴ Klu tshinanu ptowru pantshi yine kamhaleru. Halikaka Hoyakalni ptowru potuko kamhatshri.

⁵ Halikaka Moisés-ni kihle kamrureru pantshi hajeru kamrurtshi tshinanu seyni towrertshi ptowutkolu pixka rixa. Hiyáhoni ruphujetlu hinkakletkaluru hinatshripa pirankaka.

⁶ Seyni Cristo-ni ptowutkolu whentshi pixka rixa hislahlexyaplu ptowruka Hoyakalupji hajeru. Hiyrunu hixa yinwu walepji pixka hixatshinwu, wma muhroka halixlexyawakanupa seyni wpaklu halixlexiniplu tsru poyikowlu mnikawnakatupa.

Rawa Hapnanuxikaluru Hwikowaka Hoyakalunune Tshinanupa Piranapni

⁷ Wla htshina Hoyakalu Hiwejikaluru: “Xawakni potuko hyijnaktokanuxinri Hoyakalu,

⁸ Hi hchikohajiwatanutka, hitsrukatenni pixka Hoyakalu mitshi hmajnakowyehixinnina pixka, Hoyakalu mitshi popriwaka yehi himlukantaxinnina pixka.”

⁹ Hoyakalu wla tshina: “Hitsrukatenni yahtaletno mitshi, rumlukantatnona yáholu retluna nkamrure quarenta mhale pejnu.

¹⁰ Hiyáhoni hi kihle hchinikanno wanna yine tshinanu, waneya wla ntshinatka: Hpupjehchinikanjetna. Hi kihle hajna. Hiyrun-koxa nasrujyamkana hi rimatna.

¹¹ Hiyáhoni nahnanuwleyma nunkakna: — Hikeklu hohne hma yoptoxyawakanupluna hapnanuhchinikanru nenejyamkapna.”

¹² Hexinwa, nmoletanune Cristo tshinanu, xako hektu haji hixinipa hiyáhoni hmalixlenu tshinanu Hoyakalu hiwekatshri hiknojinipa.

¹³ Seyni halikaka hijretlewluyma hepixkakanu ptowru hohne potuko xawakni hohne tshinkaluru tshinanu, hektuntshi kyokwirewakleru hma chikotahchinikanuxyawakanuphi.

¹⁴ Klu tshinanu hix-koxa Cristo-ymalunwu wpaklu homkahrepotuxinri walixle, wehalixle pixka.

¹⁵ Wla htshina Hoyakalu tokanu yonatkaluru: “Xye hohne potuko hyijnakoxinri Hoyakalu tokanu, hi hchikohajiwatanu hitsrukatenni Hoyakalu mitshi hkamnixinnina pixka.”

¹⁶ Katuktshika mitshi Hoyakalu tokanu jematshinepnawaka seyni hkamnitluna Hoyakalu wanepnawaka? Wanna ptowrunnika Moisés Egito tshijne kochpajininni.

¹⁷ Katuktshika mitshi Hoyakalu hahkanwakata quarenta mhale pejnu? Wannani majnakowjetatshinni popriwaka yehi hipnikatshinni.

¹⁸ Hiyrunu hanunektshika mitshi Hoyakalu kochtsheta, wla htshinanwakatanunni mitshi: “Hikeklu hohne njihlokkakanunna hit-yehi hapnanuxikowaka yehi?” Hmalixjene wane htshinanwakata.

¹⁹ Hiyáhoni wetlu hi rumukata jihlokletluna hapnanuxikowaka nwaka hmalixlenna tshinanu.