Hebreus 2 - Bíblia

Hiweklu Heneklewatatshri Kihler-pirana Potuko Piranapni

¹ Hiyáhoni wujhalu wuslahpotuxyawaklu halikaka pirana wjemanru, xekoyaka wma pupjexyawakanuplu xyekaka pirana.

² Poyehitkalurupni hiwejikalune Hoyakalu towrene tenhohne hajene tokanu halikaka pirana rixyawakatka. Hiyrun-koxa ptowru neruka pejnu wanna tokanu malixkane, tokantshi momkahitkane pejnu rapnokatkana rujhalna tshinanu.

³ Hiyáhoni, ha hixamka, hanhe wixa hasuklexinri wapnokaxikolu, wmajnakowyehixiniplu xye hiweklu heneklewatatshri pirana kihler-potuko? Mitshikananhapka Tsru Hixikatshriwa Jesus potuko hinkakletlu xye hiweklu heneklewatatshri pirana. Waneya wane wkatanu wale pirana jematshine hekhitwu halikaka pirana rixyawakatka.

⁴ Waneya Hoyakalu poyehitatkalu hipirana wannani hiphujetleru, hekhirewlukakayma, tsru himyekaklewatatshriyma, hiyakolukakayma hiyrun-koxa Hoyakalu Hiwejikaluru pixkonu reneklewle waleko raluk-heneklewlexya pejnu.

Jesus Cristo Hiwekkaklewatatshri Rixyawaka Piranapni

⁵ Klu tshinanu Hoyakalu mitshi hi renekna htowrene hiwejikalune tenhohne hajene towuwlu htowuxyawakapluna tshiji hkamhalerupa. Tshiji wtshinreru, xye tshijnekatkani.

⁶ Rawa wla tshinru Hoyakalu tokanu yonatkaluruya: “Hoyakalu klu hikoluklehe yineru puchinikjeta pixa, hiyrunu yineru pikojwakachinikanuxinri tshinanu klu tshinanu yineruchani wale?

⁷ Pchini hohnejiji tsonu putaklu yineru pitowrene hiwejikalune tenhohne hajene kayahoko hijhakaluru rixyawakatka. Peneklu yineru tsru pohirtshi hiyrun-koxa kahwakpirlu, phurune kahwakpiraxikolu pixka.

⁸ Hiyrun-koxa towuwlu peneklu ptowru potuko htowuxyawakamkapa.” Hoyakalu towuwlu renejyawaklu yineru pirana ‘ptowru potuko htowuxyawaka’ htshinini, halikaka ptowru potukokmakni. Seyni xawakni hi wetlu yineru ptowru potuko towuxyawaka.

⁹ Seyni wetlu Jesus pchini hohnejiji tshinanu tsonu hiwejikalune Hoyakalu towrene tenhohne hajene kayahoko rutakka, rupniywakapa Jesus ptowru yineru kachrijru, Hoyakalu hekhitlu ruhlenu hixa tshinanu. Hiyáhoni xawakni wetlu Jesus tsru pohirtshi renejikowaka hiyrun-koxa kahwakpirlu hipuktshi hsalexikolu tshinanu.

¹⁰ Ptowru potuko rawa Hoyakalu tshinanupa hiyrun-koxa Hoyakalu tshinanu rawa ptowruka. Hiyáhoni Hoyakalu hikchikhihlenutlu hiwhenene hixolune, royaknu yoptotatshinepa rixikowakna. Hiyrun-koxa Hoyakalu halukatkalu mmahaxikatu rixyawakapa Jesus hiyáhoni retlu hsalewniywaka Jesus, wiwekle wenekjeru.

¹¹ Klu tshinanu yine hektunu powratatshrini hiyrun-koxa hpowratanune walerutu rurutna. Hiyáhoni Jesus hi ripatewatna himolene htshinrene.

¹² Hiyáhoni wla htshina: “Hoyakalu, pix-pirana nunkakanna nomolene. Chikalkaka nchikalexinyi yine hixolune hapatjetatshine tskala.”

¹³ Hiyrun-koxa wla htshina: “Nalixanutkalu wale.” Hiyrun-koxa wla htshina: “Hewino hita whentshineyma Hoyakalu henejyano.”

¹⁴ Whentshine hkochtsheklene, wannakni yine kahiturune, kahrahalune. Hiyáhoni Jesus koxa wanna pixka rixnatkawa rumukata kahituru, kahrahalu pixka hixleta. Wan-rixa tsru kamtshi Satanás, hipuktshi heneklewatatshri himukatle hnikaxyawakapa rupnale tshinanu.

¹⁵ Hiyrun-koxa ruchoxyawakapna kachikanatkalune hipuktshi hamlenu hwajekanatatshine.

¹⁶ Halikaka Jesus hi hina hiwejikalune Hoyakalu towrene tenhohne hajene mane pixka rix-manexyawaka. Seyni Hoyakalu tokanu yonatkaluru tshinyawaka pixka rixa, wla tshinatshri: “Runa Abraão-ni klopichane mane pixka rix-manexyawakapa.”

¹⁷ Hiyahokni xye pirana tshinanu rujhalu ptowru himolene hixannu pixka rix-manexyawaka tsru sacerdote rixyawakapa. Wan-hixatshripnawaka jetwamonuklerni hiyrunu ptowru potuko kihle kamrureyalni Hoyakalu piranaya, yine hektunu ruknokkajinripa.

¹⁸ Hiyáhoni xawakni Jesus himukata hepixletna yohnitkalune klu tshinanu wale potuko hyohnitka hsalewnatka mitshi.