Gênesis 9 - Bíblia

Hoyakalu Kojirexyalu Noé Piranapni

¹ Hoyakalu kihlewaka htshinanwakaxyawaklu Noé hiwhenen-koxa hiyáhoni wla htshinatkana: — Hwuhenewatanu, hixolewatanu, htsepotanru tshiji.

² Ptowru nikalu pikanhi hixa, hixa hamlenu tshinanu, tshiji hajeru, kamejirune teno hajer-koxa; ptowruko tshij-hoho yapatshri, ptowru chima mar powha hwatshri koxa, hixa tenekko htowuxyawakaplo.

³ Ptowru yanatshri, hiwekatshri hixa renekko hixa hnikleru rixyawakapa; wane nix-henekletatkahi ptowru hixatshri hitaklu pixka xawakni ptowru nikalu nenekanhi.

⁴ Seyni nikalu hraha hi hnikanru klu tshinanu hihraha honra nikalu hiwejinri.

⁵ Nujhayehitanhi hixa hrahni yineru hiwekkakatshri. Hiyáhoni hanuruktako nikalu hiylaxinru yineru wale koxa ruylatko. Hiyrunu yineru satu yineru ruylaxini wale koxa hijhalu ruylaxikowakatka.

⁶ Katukta yineru ruylata yine hiylatanru hiylalewatatshri. Wane rixko klu tshinanu Hoyakalu kamhatkana yine waleko hyáholu potuko hkamhiyna.

⁷ Seyni hwuhenewatanu, hixolewatanu; hipalatanu tshij-hohoya, htsepotanru tshiji.

⁸ Wane koxa htshinru Hoyakalu Noé wale whenen-koxa:

⁹ — Hiyáhoni hetanu, nunkaklexyahi hixa, hixa klopichane koxa nunkaklexya,

¹⁰ hiyrunu ptowru hiwekatshri nunkaklexya hixaymalune koxa; kamejirune, nikalu campo hajeru, nikalu hocha hajeru, tsro kanawatlo hichpajikatshri hiyrun-koxa ptowru hixatshri tshiji hajeru nunkaklexya.

¹¹ Ntshinyawakatkahi: hikeklu hohne hnikatko ptowru nikalu hahyekachalu tshinanpakotnaka, hi koxa hahyekachalu nikatanru tshiji.

¹² Waneya wane htshina Hoyakalu: — Xye hetkaluru nenekanhi nunkaklexyahi waleni hixa, hitayma wtshinkajyawaka hiyrun-koxa ptowru hiwekatshri hixayma hwatshri, hixa klopichanepa haté xawakni pnut-hohne hiwekatshinetka.

¹³ Hiyáhoni nkamhanro sato kchi tenhohne mkoh-hoho; xyekni hetkalurupa tshiji nunkaklexinritka.

¹⁴ Wane rixanu pa hohne tenhohne mkohi nakanhakajinipa tshij-hohoya rakanikanro kchi tenhohne mkohi hohoya.

¹⁵ Hiyáhoni nuchinikanru nunkakletanru, ntshinyawak-mitshi hita pixayma hiyrun-koxa ptowru nikalu hiwekatshri. Hiyáhoni honha hi runanutka rahyekachaxyawakpatka, ptowru nikalu hma nikaxyawakanpatka.

¹⁶ Kchi honra tenhohne mkohi twanu; waneya nexiniplu nuchinkanru nunkakletleru hike rixiniko mnikawnakatupa, hita Hoyakalno hiyrunu ptowru hixatshri hiwekatshri, ptowru nikaluyma tshij-hoho hwatshri tshinanu ntshinyawakatka.

¹⁷ Waneya wane htshinru Hoyakalu Noé: — Hiyáhoni xyekatkani nunkakletleru hetkaluru hitayma, ptowru hiwekatshriyma tshij-hoho hwatshri.

Noé Whenene Piranapni

¹⁸ Noé whenene tsro kanawatlo hichpajikatshinni wannani Sem, Cão, Jafé. Cão tshinkaluru, Canaã tshinkaluru hirni.

¹⁹ Nyi Noé whenene mapna: nyi psoltshijneko tsepotanu.

²⁰ Noé jitaklewakleru hiyáhoni hsana hkamha. Rutaklo uva.

²¹ Vinho-ha katshhalo ruratka rimetatka hiyáhoni malechkopitkalu rukoluhpatka lona-pji hitokote.

²² Waneya Cão tshinkaluru, Canaã tshinkaluru hiru, rexinixkalu ruru mamkatu rixyawaka runkakna himolene jejine maleka hwakanatatshine.

²³ Waneya Sem tshinkaluru hiyrunu Jafé tshinkaluru haniklu satu mkatshri waneya hitji sretna rutakluna waneya hitji sretako hyiyna hi wane hyihatna seyni ruchyachkopitluna rurna.

²⁴ Waneya riknohpohayehitatka Noé vinho-ha rimatyehixnatkawa Noé klu hkamhiylu hituru hepurtshi.

²⁵ Wane htshina: — Hi kihlepatkalu Canaã tshinkaluru; hiyáhoni himolene towrerune towrerpatkani wale.

²⁶ Waneya wane pnute Noé halpokotokanuxnawa, wla htshina: — Himalwutkalurni Tsru Hixikatshriwa Hoyakalu, Sem tshinkaluru Hoyakalute. Hiyáhoni Sem towutanru Canaã.

²⁷ Hoyakalu tserutkakanru Jafé tshinkaluru tshijne hiyáhoni Sem lona-pjikaka rawjetanu Jafé hiyrunu Canaã htowutanna.

²⁸ Noé hahyekachalu pnutetka riwekawa trezentos e cinquenta mhale.

²⁹ Raptowrure hohne Noé novecentos e cinquenta mhale waneya rupnanatka.