Gênesis 8 - Bíblia

Hahyekachalu Mahalewle Piranapni

¹ Waneya Hoyakalu hichinkaplu Noé ptowru nikalu hocha hajeru, ptowru nikalu campo hajer-koxa, Noé-yma tsro kanawatlo yatshine ruchinikatka Hoyakalu. Waneya Hoyakalu kamhalu kanniphalu tshij-hoho rachpojyawaka waneya hmahalewatatka.

² Waneya ruchyatlu tenohawaka hichpakhaxikatshri hiyrunu ruchyatlu tenhohne hichpakhaxikatshri koxa hiyáhoni runekhatka.

³ Hiyáhoni ruhlepotuko mahalewamtatka tshij-hohoya. Hiyáhoni cento e cinquenta hohne hiknohatka hmahalewpotutatka.

⁴ Waneya seis ksuru hiyrunu dez e sete hohne tsro kanawa Ararate pjitkaka hoho tutukatka.

⁵ Hiyáhoni mitshikananu hohne dez ksuru rixinri hmahlewata honha. Wale ksuru mitshikananu hohne tenowak-potu himlikatka.

⁶ Waneya quarenta hohne hiknohatka waneya honotawakaswa hkamhaleru Noé tsro kanawaya hkohpukatka.

⁷ Waneya Noé hichotlu satu maylu, xyekni ruchpajinixka, hya, hsatkapa hixo kata wane rixa haté riprihatka honha tshij-hohoya.

⁸ Waneya wane pnute ruchotlu satu pomba rimaxyawakaplu ho hmahalewatatkahe ho hike honha tshij-hohoya.

⁹ Seyni hike hmapokkanuklunu pomba hsatkaphonukatka tsro kanawa klu tshinanu honha hichyatawalu tshiji. Waneya Noé yosurukamyotatka hyoptotlo pomba hiyáhoni hkoskanota tsro kanawa rimwalo.

¹⁰ Waneya riknohatka sete hohne ruchotatnaklo pomba.

¹¹ Waneya kayi timapokatkalu; oliveira muna sure hajeyri hiptshekalu jimlakamxikolu, tanika tosowa tanijyalu; wale tshinanu Noé himatatka hmahalewatatka honha.

¹² Hiyáhoni hiyrunu sete hohne pnute hkahwaka waneya pomba ruchotatnaka seyni pomba hi satkapyatkalu Noé.

Noé Hayineten-koxa Tsro Kanawa Hichpajinri Piranapni

¹³ Hiyáhoni wane rixa, mitshikananu hohne, mitshikananu ksuruya, Noé seiscentos e um mhale rixini honha hiprihatka tshij-hohoya. Waneya Noé kochhalu tsro kanawa pjiru, waneya ronotatka, retlu tshiji hiprihatka.

¹⁴ Waneya vinte e sete hohne rixinixka hapkatatatshri ksuru hohne, popritshijitkalu.

¹⁵ Waneya Hoyakalu wan-tshinru Noé:

¹⁶ — Puchpajinixkalo tsro kanawa, pixa, phanunro, piwhenene, piwhenene hnunron-koxa.

¹⁷ Hejnun-koxa pixaymalune, ptowru hixatshri nikkaluru, kamejirune koxa, campo hajene yosrolotatshri, ptowru hixatshri tshiji yapatshri, nyi pkochpakanutka tsro kanawatloya rixolewaxyawakapna tshij-hohoya, hmatuwhenetanna tshij-hohoya rixolewatanna.

¹⁸ Waneya ruchpakatka Noé hiwheneneyma, hhanunro, Noé whenene hnunrone.

¹⁹ Hiyrun-koxa ruchpakna tsro kanawatloya ptowru nikalu, ptowru tshij-hoho yosrolotatshri, ptowru kamejiru hiyrunu ptowru nikalu tshij-hoho yapatshri satkaka neru hichpakatka.

Noé Altar Kamhiywaka Piranapni

²⁰ Waneya Noé kamhalu satu henekachalu renejikowaka Tsru Hixikatshriwa Hoyakalu; waneya raniklu nikalu nikkaluru, kamejirun-koxa nikkaluru waneya reneklu henekachalu yoxikkaluru henekachalu henejikowaka hohoya.

²¹ Waneya Tsru Hixikatshriwa Hoyakalu hamluphatlu kihlephaholu waneya wane htshinnawa: — Hi nsaletanutnaklu tshiji yine tshinanu klu tshinanu yine hektuwaka tsonu ruchinikna hmatureyakawa hyinuwaka haté xawakni. Hi koxa napnokatanutnaklu ptowru hiwekatshri, hanu nixa hapnokatletanna mitshikawlunni.

²² Tshiji hwaka pchinika rawanu hitaklewlu, ramikol-koxa, katshikleru, hamer-koxa, mhaluklu, hinaklu koxa, hohohne, hoyetshno koxa.